Uncategorized

Dili_Relasiona ho insidente ne’ebe maka mosu iha munisipiu Ainaro iha semana kotuk, suspeitu na’in 11 oras ne’e dadaun hetan ona pena husi tribunal distrital Suai hodi detein iha prizaun Becora.

Komandante Komandu Polísia Nasional Timor Leste (PNTL) munisipiu Ainaro Superintendente Asistente Justino Menezes hateten suspeitu hirak ne’e hafoin polísia kaptura submete kedas ba iha prosesu investigasaun no dezisaun husi tribunal Suai maka suspeitu na’in 11 ne’e hetan prezaun preventiva.

Kronologia husi akontesimentu ne’e Komandante PNTL Munisipiu Ainaro haktuir  katak iha loron 31 fulan Maio iha tuku 8 kalan maluk balun ho karreta rua husi Dili halo viajen ba Ainaro maibé wainhira to’o iha suku Nunumoge grupu balun ho kondisaun  lanu asaltu karreta rua refere hodi tuda, baku  no tá ema sira iha karreta laran hodi rezulta joven na’in 6, inan feton ida no labarik ki’ik balun iha laran nune’e sira hamutuk na’in 8 mak hetan kanek tanba iha konfrontu malu.

“Hau fó ordem ba membrus sira to’o duni iha fatin akontesimentu hodi halo atuasaun no suspeitu sira halai no polísia konsege kaer ema na’in rua, na’in sia (9) seluk halai lakon no vitima sira polísia lori ba hospital hodi halo tratamentu, suspeitu rua ne’ebe kaer lori ba detein”, esplika Komandante PNTL Munisipiu Ainaro.

Superintendente Asistente Justino Menezes subliña liu tan katak hafoin insidente ne’e, membrus PNTL hotu iha munisipiu Ainaro halo operasaun nune’e iha loron 1 fulan Juñu tuku 7 kalan hodi kaptura tan suspeitu na’in sia (9) seluk iha suku Aitutu, Flexia no Maubisse no loron 3 fulan Juñu lori ba iha tribunal Suai. Suspeitu na’in 11 ne’e hetan pena prizasaun preventiva iha prizasaun Becora.

Hafoin insidente ne’e, Komandu PNTL munisipiu Ainaro halo alerta ba membrus sira hodi halo patrullamentu iha suku-suku liu-liu suku ne’ebe viziñu ho fatin akontesimentu ne’e no situasun kontroladu, komunidade sira kontinua halo vizibilidade ba iha suku no aldeia hodi buat ruma mak apoio ba polísia.

Media PNTL.    

Bobonaro_ Atu bele hametin trankuilidade, dame no hakmatek iha eleisaun parlamentar 2017 ne’ebe sei realiza iha tempu besik, Komandu Polísia Nasional Timor-Leste (PNTL) munisipiu Bobonaro servisu hamutuk ho autoridade munisipal realiza reuniaun konsolidasaun hodi fahe informasaun ba komunidade sira.

Komandante Jerál PNTL Komisariu Polísia Julio da Costa Hornay ne’ebe hamutuk ho reprezentante parseiru UNDP lidera reuniaun ne’ebe hala’o iha loron 3 fulan Juñu 2017 ne’e hateten Komandu agradese ba servisu ne’ebe maka Komandu PNTL munisipiu Bobonaro hamutuk ho autoridade lokal sira koopera ba malu hodi kria establidade no paz iha prosesu eleisaun rua ne’ebe hala’o ona.

“Ohin ita halibur hamutuk iha ne’e atu fahe informasaun ba malu kona-ba preparasaun ba eleisaun parlamentar ne’ebe sei mai, antes ne’e hau hakarak hato’o situasaun jerál iha rai laran; em prinsipiu iha munisipiu hotu situasaun lao diak maibé ameasa sira ne’ebe maka iha, ita presiza tau atensaun”, tenik Komandante Jerál PNTL.

Komisariu Polísia Julio da Costa Hornay subliña liu tan katak ameasa hirak ne’e maka hanesan primeiru mai husi nasaun viziñu ou mundu internasional iha ne’ebe ita hotu-hotu asiste liu husi media sosial, liu husi media Televizaun, liu husi jornal no liu husi radio ne’ebe maka barak ita akompaña.

“Ida ne’ebe maka ita hotu-hotu tenke toma atensaun maka kona-ba terorizmu, ISIS, droga ho fa’an ema; ida ne’e maka ita hotu-hotu nu’udar sidadaun Timor, ita tenke toma atensaun atu buat hirak ne’e labele infitra tama mai ita nia nasaun ne’ebe sei nurak”, hatutan Komisariu Polísia ne’e.

Reuniaun konsolidasaun ne’e ho tema: “Trankuilidade, Dame, hakmatek no Seguru Iha Perspetiva Seguransa Nasional Ba Kampaña Politika Eleisaun Parlamentar 2017 Espesifiku Iha Munisipiu Bobonaro” partisipa husi komunidade munisipiu Bobonaro no reuniaun hetan apoio husi UNDP, The Asia Foundation no embaixada Japão iha Timor Leste.

Media PNTL. 

Dili- Ministeriu Interior (MI) no Komandu Polisia Nasional Timor-Leste (PNTL) sosializa lei Nu. 5/2017 rejime juridiku pratika Artes Marsiais, Rituais, Armas Brancas, Rama Ambon no alterasaun Codigu Penal.

Ministeriu Interior Longuinhos Monteiro hateten inportansia husi sosializasaun lei ne’e tanba PNTL assume responsabilidade maximu atu inplementa lei ne’e iha teritoriu nasional, tanba ne’e presija kompriende uluk kontiudu no pratika husi lei ne’e nune’e inplementa iha terrenu ho diak, Nia hato’o asuntu ne’e iha serimonia sosializasaun lei Nu.5/2017 iha Hotel Ramelau Aimutin Dili (05/06).

Nia haktuirtan katak orgaun rua maka responsabiliza ba lei ida ne’e maka PNTL, orgaun Polisia seluk no Komisaun Reguladora Artes Marsiais (KRAM) iha parte Administrativu nian. KRAM maka sei halo rejistu ba grupu artes marsiais sira ne’ebe maka iha, liu-liu sira ne’ebe maka afilia ba federasaun Internasional no sira ne’ebe maka la afilia ba federasaun internasioal.

Lei ne’e bandu totalmente Artes Marsiais ho natureja tradisional tanba hamosu kauza ema lakon vida no estraga ema nia sasan.

Iha okajiaun ne’e Komandante Jeral PNTL Komisariu Polisia Julio da Costa Hornay iha nia intervensaun hateten workshop ida ne’e nudar oportunidade diak ba ita hotu atu koñese diak lei ida ne’e no ezekuta ho diak.

“Hau husu ba partisipante sira atu partisipa ho maximu no toma atensaun atu nune’e inplementasaun iha terrenu labele failla tanba lei ida ne’e liga ba Armas Brancas nia utilizasaun, Artes Marsiais ne’ebe maka oras ne’e daudaun buras iha teritoriu laran tomak liu-liu iha sidade Dili ne’ebe sai preukupasaun ba ita hotu atu oinsa atu hamate,” dehan Komisariu Julio.

espera katak liu husi sosializasaun ida ne’e bele habelar ita hotu nia koñesementu kona-ba inplementasaun lei ida ne’e.

Entertantu iha okajiaun ne’e Prokurador Jeral Republika Jose da Costa Ximenes hateten Ita nia prespetiva ba lei ida ne’e hanesan resposta diak ida ba problema arte marsiais ne’ebe maka dala barak uza Armas Brancas hanesan Rama ambon lei ida ne’e bele fo solusaun ba problema barak ne’ebe ita iha.

Espera katak lei ida ne’e sei reforsa liutan no sai instrumentu Polisia no Ministeriu Publiku hahu, iha nivel investigasaun, hahu organiza hamutuk no bele uza hodi kontra ema sira ne’ebe involve iha atividade hanesan ne’e.

Lei Nu.5/2017 kolia asuntu hat inportante maka hanesan Rejime juridiku relativa ho pratika Artes Marsiais no Rituais, Armas Brancas, Rama Ambon no Alterasaun Codigu Penal.

Partisipa iha sosializasaun lei ne’e Komandante PNTL munisipiu 13, Komandante UPF, Komandante Polisia Militar, reprezentante husi F-FDTL, Diretor Jeral Alfandega, KRAM no Funsaun Publika. Media PNTL

Dili, Komandu Polísia Nasional Timor-Leste (PNTL) kaptura ona suspeitu na’in 6 ba insidente ida ne’ebe akontese iha loron 31 fulan Maio iha oras tuku 8 kalan iha munisipiu Ainaro. Insidente ne’e mosu wainhira grupu deskoñesidu balun halo asaltu ba karreta rua (2) ne’ebe maka halo viagem husi Dili ba Ainaro nune’e mós husi Ainaro atu mai Dili.

Komandante Operasaun PNTL Superintendente Xefe Henrique da Costa iha Kinta ne’e (01/06) hateten husi insidente polísia konsege kaptura ona suspeitu na’in rua iha momentu akontesimentu no ohin konsege kaptura tan suspeitu na’in 4.

“Akontesimentu ne’e akontese iha suku Nunumoge, aldeia Lebulau (Munisipiu Ainaro) akontese kazu ema ho grupu deskoñesidu halo asaltu ba iha karreta Hilux ho xapa matrikula A.10784 TLS no trek Fuso ho xapa matrikula A.50289 TLS iha area refere wainhira karreta Hilux ho diresaun husi Dili atu ba Ainaro no trek Fuso ho diresaun husi Ainaro atu mai Dili hetan asaltu husi ema deskoñesidu na’ain 5 halo ataka ba iha karreta rua refere”, tenik Komandante Operasaun PNTL.

Superintendente Xefe Henrique da Costa esplika liu tan katak husi insidente ne’e rezulta ema balun kanek no iha tempu ne’eba polísia atúa kedas no konsege kaptura suspeitu na’in 2 iha fatin akontesimentu no iha loron 01 fulan Juñu ne’e, operasaun ne’ebe maka organiza nafatin husi polísia konsege kaptura tan suspeitu na’in 4. Suspeitu na’in 6 oras ne’e dadaun detein hela iha sela polísia hodi kontinua ba iha prosesu investigasaun.

Husi relatoriu ne’ebe maka Komandu Operasaun iha katak husi insidente ne’e rezulta vitima na’in 2 maka hetan kanek todan no na’in lima mak hetan kanek kma’an no motivu husi insidente ne’e rasik oras ne’e seidauk bele hatene tanba sei iha prosesu investigasaun nia laran. Komandu PNTL munisipiu Ainaro to’o oras ne’e dadaun sei kontinua hela buka aútor prinsipal ne’ebe maka organiza hodi halo asaltu.

Media PNTL.

Dili-Komandu Polísia Nasional Timor-Leste (PNTL) hato’o parabens ba selebrasaun loron mundial labarik iha mundu liu-liu iha Timor-Leste.

“Hau hakarak hato’o mensagen Segundu Komandante Jerál PNTL nian ba loron mundial labarik, katak husi labarik mak ba ema bo’ot no labarik sira mak futuru ba ita nia nasaun. Tanba ne’e husu ba inan aman sira labele halo violensia hasoru labarik sira, tempu ida agora labarik sira atu estuda no eskola. Se karik tempu ida agora maka ita obriga sira atu halo servisu, ba futuru ne’e sira atu sai oinsa?”, Mensagen ne’e hato’o liu husi Komandante Operasaun PNTL Superintendente Xefe Henrique da Costa iha kuartél jerál Kaikoli Dili Kuarta (31/05).

Loron 1 fulan Juñu sai hanesan loron mundial ba labarik iha mundu tomak, Timor Leste mós iha biban ida ne’e selebra loron espesial ba labarik sira ho aktividade oin-oin ne’ebe maka organiza husi Komisaun Direitu Labarik.  Media PNTL.

Dili, Komandu Polísia Nasional Timor-Leste (PNTL) detein ema hamutuk 13 ne’ebe maka envolve iha insidente ida iha loron 26 fulan Maio 2017 iha Bukoli munisipiu Baucau.

Komandante Operasaun PNTL Superintendente Xefe Henrique da Costa iha Kuarta ne’e (31/05) hateten husi akontesimentu ne’e maka uma 9 hetan estragus no uma ida mak hetan sunu.

“Kronologia husi akontesimentu ne’e tanba iha grupu ida husi aldeia ida maka organiza malu hodi halo ataka ba fali grupu ida iha aldeia seluk entaun mosu asaltu malu iha ne’eba, medida ne’ebe maka polísia foti iha tempu ne’eba husi parte komandu polísia munisipiu Baucau orienta kedas ekipa patrulla Task Force hodi ba atúa no konsege kaptura autor balun iha fatin ne’eba”, tenik Komandante Operasaun PNTL.

Superintendente Xefe Henrique da Costa subliña liu tan katak hafoin kaptura autor balun iha momentu ne’eba, ekipa Task Force kontinua kaptura tan ema hamutuk 13 no husi ema na’in 13 aprezenta ona ba iha Tribunal Distrital Baucau ninian no nia rezultadu katak ema na’in 13 ne’e hetan Termu Identidade Residensial (TIR) durante periodu kada loron 15 nia laran hodi ba halo aprezentasaun hodi hein nia prosesu kontinuasaun.

“Parte polísia Investigasaun munisipiu Baucau mós sei kontinua hela hodi identifika nafatin karik iha tan autor seluk ruma ne’ebe maka partisipa ka involve iha akontesimentu ne’eba, tanba ne’e prosesu investigasaun sei kontinua hela”, hateten Komandante Operasaun PNTL ne’e.

Akontesimentu Bebonuk, Uma Ida Hetan Sunu No Uma Hamutuk 12 Hetan Estragus  

Relasiona ho akontesimentu iha parte Bebonuk (Kampu Tuti) iha semana hirak liu ba hodi rezulta joven ida mate, Komandu PNTL liu husi polísia eskudra Comoro hala’o hela prosesu investigasaun no ninia rezultadu katak iha uma ida maka hetan sunu no uma 12 seluk maka hetan estragus.

“Prosesu investigasaun husi polísia ninian liu-liu eskudra Comoro, sei hala’o hela kontinuasaun ba prosesu investigasaun no sei ba aprezenta ba iha prokurador katak iha suspeitu na’in 10 ne’ebe maka identifika ona atu bele hetan mandatu kapturasaun”, dehan Komandante Operasaun PNTL Superintendente Xefe Henrique da Costa.

Superintendente Xefe ne’e haktuir liu tan katak husi suspeitu na’in 10 ne’e, inklui mós ema importante balun iha suku (Kampu Tuti) nia laran ne’ebe maka parte investigasaun nian husu mós mandatu kapturasaun. No Komandu lakohi atu iha intervensaun ruma ba iha prosesu investigasaun ne’e maka husu mós mandatu kapturasan ba ema importante balun iha suku ne’e nia laran.

“Polísia investigasaun parte eskudra Comoro ninian to’o oras ne’e dadaun sei kontinua buka hela autor sira seluk hodi bele kompleta prosesu investigasaun ne’e”, subliña Komandante Operasaun PNTL.

Media PNTL.         

Dili- Komandante Centru Formasaun Polisia (CFP) halo palestra ba Instruindu sira ne’ebe tuir kursu formasaun Sarjentu hodi haklean liutan sira nia koñesementu konaba koperasaun institusional ho entidade seluk.

Komandante CFP Superintendente Arquimino Ramos hateten palestra ne’e  atu loke Intruindu sira nia hanoin nune’e sira iha hanoin ne’ebe luan laos hare deit ba misaun polisia nian maibe hanoin oinsa presiza iha koperasaun institusional, Nia hato’o asuntu ne’e liu husi palestra iha iha CFP Comoro Dili Tersa (30/05).

Superintendente ne’e haktuirtan katak Palestra ne’e babain sempre halo ba sira ne’ebe atu remata kursu sempre tuir palestra husi entidade sira husi instituisaun PNTL no instituisaun seluk hanesan Polisia Sientifika Investigasaun Kriminal (PSIK), Tribunal, Alfandega, Ministeriu Publiku no seluktan.

Palestra ne’e ho tema “Reforma Seitor Seguransa no Direitus Humanus Polisia” ne’ebe kolia konaba Reforma Institusional, Istoria  no lalaok Polisia Nasional Timor-Leste (PNTL), Jestaun Rekursu Humanus PNTL, Formasaun, promosaun no Direitus Humanus Polisia.

Instruindu nain 114 maka partisipa iha palestra ne’e inklui Polisia CPLP nain 7, Instruindo sira ne’e tuir ona kursu formasaun Sarjentu durante fulan 7 no sei kompleta ho estajiu durante fulan 2 iha munisipiu 13 antes simu graduasaun iha fulan Agostu.

Tuir observasaun media PNTL Instruindu sira partisipa masimu iha palestra ne’ebe maka halao durante oras rua nia laran nian, no sira iha interese maka atu aprende hodi aprofesoa sira nia konesementu. Media PNTL

Dili, iha semana ida nia laran (22-28/05/2017) Polísia Nasional Timor-Leste (PNTL) rejista asidente hamutuk 34 no insidente hamutuk 46 ne’ebe maka akontese iha teritoriu Timor laran tomak.

Segundu Komandante Jerál PNTL Komisariu Polísia Faustino da Costa iha segunda ne’e (29/05) ba jornalista sira hateten asidente ne’ebe maka rejista, kompustu husi ema ho kanek kma’an hamutuk 28, ema ho kanek todan 10 no ema na’in tolu (3) maka mate ne’ebe maka akontese iha munisipiu Aileu, Dili no Liquiça.

“Iha semana ida nia laran ita iha insidente hamutuk 46, husi insidente ne’ebe maka akontese konsege hetan estragus sasan no ema balun kanek tanba ne’e ita kompara asidente ho insidente, asidente hasai ema nia vida barak liu duque insidente ne’ebe maka mosu iha ita nia rai”, hateten Segundu Komandante Jerál PNTL.

Komisariu Polísia Faustino da Costa haktuir liu tan katak ho asidente no insidente ne’ebe maka mosu,  afeta ba iha situasaun jerál iha teritoriu nasional katak situasaun jerál iha Timor-Leste lao ho diak.

Kolokasaun Membru PNTL Iha Eskuadra Atauro Sufisiente

Relasiona ho preukupasaun husi membru Parlamentu Nasional (PN) kona-ba kolokasaun membru PNTL iha postu administrativu Atauro, Segundu Komandante Jerál PNTL Komisariu Polísia Faustino da Costa hateten Komandu koloka pesoal hirak ne’ebe maka konsidera katak bele responde situasaun iha Atauro,  kestaun maka ne’e karik  insufisiensia ba rekursu umanu buat ida, insufisiensia ba rekursu materiais buat ida.

“Ita iha membru ne’ebe komandu konsidera katak sufisiente iha Atauro, além de komandu distrital nian ema ne’ebe maka ita koloka, iha mós Unidade Polísia Maritima iha ne’eba signifika pesoal ne’e sufisiente hodi halo servisu”, tenik Komisariu Polísia Faustino da Costa.

Segundu Komandante Jerál PNTL subliña liu tan katak kestaun halo rekrutamentu presija hare’e mós ba iha orsamentu ne’ebe kada tinan hodi bele halo prosesu rekrutamentu, maibé Komandu hanoin hela atu altera kriteriu Lei kona-ba rekrutamentu ou konkursu nian.

“Instituisaun Estadu ida ne’e rekruta ema ne’ebe hakarak servi povu ho rai ida ne’e, laos Instituisaun Estadu ida ne’e atu fasilita fó servisu ba ema ne’ebe servisu laiha Timor, ida ne’e ami troka maneira ida ne’e, katak instituisaun estadu ida ne’e intrega ema ne’ebe hakarak servisu ba rai ida ne’e,” salienta Komisariu Polísia Faustino da Costa.

Media PNTL.     

Dili- Investigador Polisia Nasional Timor-Leste (PNTL) tenke halo servisu tuir lei no ordem hodi garante justisa ba ema hotu.

Segundu Komandante Jeral PNTL Komisariu Polisia Faustino da Costa hateten Investigador sira tenke halao servisu tuir lei no ordem hodi promove justisa ne’ebe hanesan ba ema hotu nune’e bele garante seguransa no moris hakmatek, Nia hato’o asuntu ne’e iha enseramentu Konferensia Investigasaun Kriminal iha Hotel Beach Garden Praia dos Coceiros Dili Sexta (26/05).

Komisariu Faustino haktuirtan katak ita iha Komandante Jeral, Konstiruisaun RDTL no Lei tanba ne’e nudar Segundu Komandante Jeral hau apresia no louva imi nia servisu bainhira imi halao tuir lei no ordem maibe hau la tolera rajaun hirak ne’ebe maka labele justifika.

“Hau husu ba imi atu tau iha pratika no hatudu iha terrenu diskusaun ne’ebe imi halo durante loron tolu (3) hanesan mos formasaun seluk ne’ebe imi iha hau hakarak hare no akompana progresu husi imi nia servisu.”

Liu husi Konferensia ba dala-5 ne’e  bele halo avaliasaun ba servisu investigador sira nian hodi nune’e bele redus kazu pendente.

Iha okajiaun ne’e Inspetor Xefe Mouzinho Correia nudar Xefe Komisaun Organizadora hateten ita iha esperasansa katak liu husi konferensia ne’e bele halo mudansa balu ba sistema ne’ebe maka uza iha prosesu investigasaun tanba liu husi aprezentasaun kada grupu konaba prekupasaun no rekomendasaun ne’e sai materia inportante ba Servisu Investigasaun Criminal Nasional (SICN) hodi hato’o ba Komandu para iha konesementu no materia hirak ne’e bele diskuti iha planu asaun nasional tuir mai.

Konferensia Investigasaun Kriminal ba dala-5 ho tema “Uniformiza Setor Justisa no Aplikasaun Lei iha Timor-Leste” ne’ebe maka halao durante loron tolu 24-26 de Maiu foka liu konaba Estabelesementu Sistema, Jestaun, Manajementu, Mekanismu no Metodu Koperasaun investigador sira no Xefe Investigador munisipiu 13, Oinsa investigador sira utilija Sistema Incident Management System (IMS) iha sira nia servisu loro-loron no seluktan.

Konferensia ne’e involve instituisaun hirak ne’ebe servisu iha area aplikasaun lei hanesan PNTL, PSIK, Servisu Imigrasaun no Prokuradoria Geral Republica. Media PNTL

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Julio da Costa Hornay iha Kinta ne’e (25/05) hasoru malu ho ekipa ida husi Konsellu Imprensa Timor-Leste (KI).

Komandante Jerál PNTL Komisariu Polísia Julio da Costa Hornay hafoin enkontru hateten idea hirak ne’ebe maka ekipa Konsellu Imprensa hato’o iha enkontru ne’e importante tebes oinsa atu bele kria MOU ida hodi bele servisu hamutuk atu bele koopera ba malu entre membru Polísia ho jornalista sira.

“Hau sente ideas sira ne’ebe maka Prezidente Konsellu imprensa ho nia ekipa mai hato’o ne’e importante tebes oinsa para ita bele kria servisu hamutuk tantu polísia no jornalista sira atu fahe informasaun ba malu, nune’e mós bele hadia buat balun ne’ebe maka durante ne’e lao dala-ruma informasaun ne’ebe maka polísia hato’o maibé jornalista sira hakerek buat ketak”, tenik Komandante Jerál PNTL.

Komisariu Polísia Julio da Costa Hornay subliña liu tan katak husi enkontru ne’e maka Komandu sujere atu hadia wainhira mosu fallainsu ruma, husu atu hadia laos deit iha sikun husi página ida nian ne’ebe maka ema labele le’e fila fali maibé se bele iha página ida tomak.

“Mas depois ho vizita Konsellu Imprensa nian ne’e hodi fó informasaun katak ami iha direitu de resposta, ida ne’e hau hanoin buat diak ida karik akontese aban bainrua ita bele hadia, nune’e mós fotografia sira ne’ebe tau iha informasaun sira ne’e tenke apár malu ho kazu ne’ebe akontese, labele tau fali fotografia ne’ebe maka la apár ho informasaun ne’ebe fó sai”, salienta Komisariu Polísia ne’e.

Entretantu, Prezidente KI Virgilio Guterres iha entrevista hateten objetivu husi vizita ne’e maka atu hato’o insiativa Konsellu ninian atu iha futuru bele halo kooperasaun entre instituisaun rua ne’e (PNTL-KI) liu-liu oinsa bele garante liberdade imprensa no liberdade ba jornalista sira atu halo kobertura.

“Tanba dala barak mosu entedimentu la hanesan, liu-liu maluk jornalista iha entedimentu ne’ebe maka la hanesan nune’e mós ita nia maluk polísia sira ne’ebe servisu iha kampu, entaun sempre mosu problema ki’ik oan ne’ebe bele resolve liu husi kooperasaun”, hateten Prezidente KI iha kuartél jerál PNTL.

Virgilio Guterres haktuir liu tan katak iha vizita ne’e informa mós ba Komandu PNTL hanesan intituisaun ne’ebe maka atu manten ordem públika, atu aplika ou implementa saida maka ema bolu direitu de resposta katak bainhira jornalista ou media ruma públika konteúdu ne’ebe maka lalos kona-ba PNTL ou membru PNTL, PNTL iha direitu de resposta atu hato’o ba media ne’ebe hakerek no media ne’ebe hakerek, tuir Lei no Regulamentu iha obrigasaun atu públika iha fatin hanesan notisia ne’ebe maka sra públika.

“Iha area balun ne’ebe maka ami koalia maka oinsa atu envolve jornalista sira iha treinamentu atu hatene servisu Polísia nian nune’e mós ami hakarak partisipa iha sesaun balun ne’ebe ami bele fahe ba polísia sira kona-ba servisu media nian”, tenik Prezidente KI.

Media PNTL.