Dili, Komandu Polísia Nasional Timor-Leste (PNTL) detein ema hamutuk 13 ne’ebe maka envolve iha insidente ida iha loron 26 fulan Maio 2017 iha Bukoli munisipiu Baucau.
Komandante Operasaun PNTL Superintendente Xefe Henrique da Costa iha Kuarta ne’e (31/05) hateten husi akontesimentu ne’e maka uma 9 hetan estragus no uma ida mak hetan sunu.
“Kronologia husi akontesimentu ne’e tanba iha grupu ida husi aldeia ida maka organiza malu hodi halo ataka ba fali grupu ida iha aldeia seluk entaun mosu asaltu malu iha ne’eba, medida ne’ebe maka polísia foti iha tempu ne’eba husi parte komandu polísia munisipiu Baucau orienta kedas ekipa patrulla Task Force hodi ba atúa no konsege kaptura autor balun iha fatin ne’eba”, tenik Komandante Operasaun PNTL.
Superintendente Xefe Henrique da Costa subliña liu tan katak hafoin kaptura autor balun iha momentu ne’eba, ekipa Task Force kontinua kaptura tan ema hamutuk 13 no husi ema na’in 13 aprezenta ona ba iha Tribunal Distrital Baucau ninian no nia rezultadu katak ema na’in 13 ne’e hetan Termu Identidade Residensial (TIR) durante periodu kada loron 15 nia laran hodi ba halo aprezentasaun hodi hein nia prosesu kontinuasaun.
“Parte polísia Investigasaun munisipiu Baucau mós sei kontinua hela hodi identifika nafatin karik iha tan autor seluk ruma ne’ebe maka partisipa ka involve iha akontesimentu ne’eba, tanba ne’e prosesu investigasaun sei kontinua hela”, hateten Komandante Operasaun PNTL ne’e.
Akontesimentu Bebonuk, Uma Ida Hetan Sunu No Uma Hamutuk 12 Hetan Estragus
Relasiona ho akontesimentu iha parte Bebonuk (Kampu Tuti) iha semana hirak liu ba hodi rezulta joven ida mate, Komandu PNTL liu husi polísia eskudra Comoro hala’o hela prosesu investigasaun no ninia rezultadu katak iha uma ida maka hetan sunu no uma 12 seluk maka hetan estragus.
“Prosesu investigasaun husi polísia ninian liu-liu eskudra Comoro, sei hala’o hela kontinuasaun ba prosesu investigasaun no sei ba aprezenta ba iha prokurador katak iha suspeitu na’in 10 ne’ebe maka identifika ona atu bele hetan mandatu kapturasaun”, dehan Komandante Operasaun PNTL Superintendente Xefe Henrique da Costa.
Superintendente Xefe ne’e haktuir liu tan katak husi suspeitu na’in 10 ne’e, inklui mós ema importante balun iha suku (Kampu Tuti) nia laran ne’ebe maka parte investigasaun nian husu mós mandatu kapturasaun. No Komandu lakohi atu iha intervensaun ruma ba iha prosesu investigasaun ne’e maka husu mós mandatu kapturasan ba ema importante balun iha suku ne’e nia laran.
“Polísia investigasaun parte eskudra Comoro ninian to’o oras ne’e dadaun sei kontinua buka hela autor sira seluk hodi bele kompleta prosesu investigasaun ne’e”, subliña Komandante Operasaun PNTL.
Media PNTL.
