Uncategorized

Dili, Komandu Polísia Nasional Timor-Leste (PNTL) munisipiu Viqueque kinta-feira (06/05) ne’e relata informasaun katak iha loron 05 fulan Maiu tinan ne’e oras 19:16 ekipa Saúde Postu Uatolari Viqueque akompaña ho ekipa Gestaun Krize ba tula pasiente Pozitivu COVID-19 iha postu administrativu Uatulari, suku Afloikai, ema deskoñesidu tuda kareta ambulansia rezulta vidru oin bo’ot rahun no vidru odamatan parte kondutor iha kuana mos rahun, pasiente hamutuk ema na’in 5 kompostu husi feto ida no mane 4 no lori ona mai iha sala izolamentu Polo UNTL Viqueque.

Porta Voz Komandu PNTL Superintendente Xefe Arnaldo Araújo liu husi konferensia imprensa hateten akontesimentu ne’e mosu wainhira ema deskoñesidu lasu ho pregu tu’u iha ai hodi lasu kareta ambulansia ho ekipa Gestaun Krize nian.

“No oras ne’e dadaun ekipa konjunta ne’ebe kompostu husi PNTL no Gestaun Krize iha ona fatin akontesimentu hodi halo identifikasaun ba autor sira”, esplika Porta Voz Komandu PNTL ne’e.

Superintendente Xefe iha konferensia imprensa ne’e relata mós katak iha semana liu ba, iha akontesimentu ida ne’ebe maka ema halo festa iha tempu implementasaun Estadu Emergensia (EE). Oras ne’e dadaun, PNTL liu husi Servisu Investigasaun Kriminal Nasional (SIKN) halo ona identifikasaun ba festa na’in hamutuk ema na’in rua, kompostu husi oan no inan ho inisial inan C.P no oan ho inisial J.A.P no SIKN sei bolu ema sira ne’ebe ha momentu ne’eba envolve iha festa refere.

“Durante implementasaun regras EE semana ida nia laran, SIKN identifika ona ema hamutuk na’in 95 ho tipu kazu ha’at hanesan kazu dezobedensia ba regras EE, prosesu husi kazu hirak ne’e lori ona ba iha Ministeriu Públiku (MP)”, esplika Superintendente Xefe ne’e.

Hatan ba preukupasaun komunidade barak kona-ba atuasaun Polísia nian hodi obriga ema hotu tenke halo teste SWAB, Porta Voz Komandu PNTL esklarese katak Lei EE maka obriga ekipa konjunta kompostu husi PNTL no Ministeriu Saúde (MS) hodi halo teste SWAB ba komunidade hirak ne’ebe maka la kumpri regras EE.

“Pontu segundu husi atuasaun Polísia nian maka hodi halo prevensaun ba kontaminasaun virus COVID-19 atu labele daet ba ema barak, nune’e ho teste SAWB ne’e maka ita bele hatene katak ema ne’e pozitivu ou lae”, tenik Superintendente Xefe ne’e.

Xefe Gabinete Relasaun Públikia PNTL esplika liu tan katak basea ba Rezolusaun Governu Nu.15 katak sidadaun hirak ne’ebe maka halo exame médiku diagnostiku obrigatoriu no hetan rezultadu pozitivu maka sidadaun refere MS sujeita pesoal refere atu ba izolamentu profilátiku obrigatoriu no kustu durante iha izolamentu sei responsabiliza husi individu refere.

“Tanba ne’e husu ba sidadaun sira hotu atu kumpri regras EE ne’ebe implementa ona hodi kumpri mós konfinamentu domisiliariu atu hetan moras COVID-19, PNTL sei apoiu tomak ba servisu MS nian hodi implementa regras ne’ebe remi ona”, hakotu Porta Voz Komandu PNTL ne’e.

Media PNTL.   

Dili, Asosiasaun Esposa Ofisiais Superior Polísia Nasional Timor-Leste (PNTL) tersa-feira (04/05) ne’e apoiu sasan nesesidade bázika (Umanitária) ba membru PNTL husi Unidade Espesial Polísia (UEP) ne’ebe maka sai vítima iha dezastre naturais ne’ebe akontese iha loron 4 fulan Abril tinan 2021.

Reprezentante Esposa Ofisiais Superior PNTL ne’ebe hanesan mós Xefe Seksaun Sosial iha estrutura Asosiasaun nian Guida Isaura da Conceição Bariz Araújo Monteiro hateten hare’e ba dezastere naturais ne’ebe akontese iha fulan kotuk hodi rezulta ema barak mak tenke sai vítima nune’e mós ba membru UEP na’in 86 afetadu mós no att liu maka membru ida tenke lakon vida iha momentu ne’eba.

“Ami hanesan Esposa Ofisiais Superior tur la hakmatek tanba ita mesak membru PNTL ninian, ami sente ho idea solidaridade ami hakarak fahe ami nia sentimentu nu’udar mós hanesan inan ida ba membru PNTL sira ne’e, ho kbi’it ne’ebe ami iha hakarak hakma’an sira nia terus ne’ebe durante inundasaun ne’e”, tenik Xefe Seksaun Sosial Asosiasaun Esposa Ofisiais Superior PNTL ne’e.

Guida Isaura akresenta tan katak apoiu umanitária ne’ebe iha tuir Asosiasaun ninia kbi’it maka iha fos no supermie, maske ami la oferese buat barak maibé hanesan atu hatutan deit saida maka ami bele atu oferese. Apoiu refere Asosiasaun sei kontinua fó ba membru PNTL hotu ne’ebe afetadu husi inundasaun ne’e maske apoiu ne’ebe fó la barak.

“Apoiu umanitária ba dezastre naturais nian foin dahuluk Asosiasaun Esposa Ofisiais Superior PNTL halo maibé aktividade umanitária sira seluk ami sempre hala’o wainhira hamutuk ho Esposa Prezidente da Repúblika nian hodi lao ba munisipiu balun”, hakotu Guida Isaura.

Iha fatin hanesan Delfina Maria dos Santos hanesan membru UEP ne’ebe sai vítima iha dezastre naturias foin lalais ne’e hateten agradese tebes ho apoiu husi Asosiasaun Esposa Ofisiais Superior PNTL nian hanesan jestu solidaridade.

“Nu’udar inan ida la haluha hato’o ami nia obrigadu wa’in ba inan sira husi Asosiasaun Esposa Ofisiais Superior PNTL ne’ebe hadomi ami hanesan inan ida ne’ebe sustenta familia uma laran bainhira inundasaun mosu mai ne’ebe ita la espera katak buat sira ne’e bele akontese”, tenik membru UEP ne’e.

Delfina Maria dos Santos ne’ebe hela iha aldeia BTN 3 Tasi-Tolu esplika nia sai vítima iha dezastre naturais ne’e tanba nia uma be’e tama iha loron 4 fulan Abril tinan ne’e.

Atividade ne’e hala’o iha Komandu UEP no partisipa husi Komandante UEP Superintendente Xefe Orlando Gomes, Segundu Komandante UEP Superintendente Damião Correia. No apoiu umanitária ne’e entrega direita husi Xefe Seksaun Sosial Asosiasaun Esposa Ofisiais Superior PNTL Guida Isaura da Conceição Bariz Araújo Monteiro akompaña husi esposa Segundu Komandante UEP.

Media PNTL.      

Komandante Jeral da PNTL

Komisariu Polisia Faustino da Costa

Loron diak, loron ksolok ba lee nain sira hotu ne’ebe namkari iha Timor-Leste laran tomak:

Nudar ita hotu hatene katak virus SARS COV-2 nebe laos afeta ou daet deit iha Timor-Leste maibe mos ohin loron sai hanesan pandemia ida nebe afeta mundu no husi Organijasaun Mundial Saude (OMS) deklara ona nudar pandemia Global, nune’e iha Timor-Leste mos oras ne’e kazu husi pandemia ida ne’e sae makaas nune’e PNTL nudar autoridade seguransa ne’ebe sei inplementa ba fiskalizasaun ba movimentu sira hotu husi pandemia ida ne’e hakarak hato’o ba publiku hotu katak:

1. Populasaun no sosiedade tomak persija hatene katak Timor-Leste ohin loron ita nia estadu no governu hamosu ona rejolusaun lubun hodi deklara hahu husi Estadu Emerjensia (EE), estadu de kalamidade no Serka Sanitaria(SS) inklui kapital Dili reforsa ho Konfinamentu Domisiliariu.
2. Populasaun tomak persija hatene katak konfinamentu domisiliariu ne’e hateten katak ema hotu-hotu so hela iha uma deit.
3. Iha serka sanitaria ne’ebe aplika ba munisipiu sira hanesan Ainaro, Baucau, Covalima, Ermera, Dili, Lautem, Liquisa, Manufahi no Viqueque; PNTL nia obrigasaun hodi garante katak SS ne’e hodi kria disiplina iha komunidade no bairu hotu atu evita transmisaun husi COVID-19 ne’ebe sae makaas iha Timor-Leste.
4. Konfinamentu Domisiliariu Jeral iha kapital Dili atu salva ema hotu nune’e populasaun hotu labele afeta ou kona virus ne’e.

Tuir mai saida deit maka populasun sira tenke halo:

1. Hela deit iha uma no labele sai bainhira laos nesesidade urjente.
2. Ba ema hotu-hotu tenke uza maskra iha nebe deit no bainhira deit.
3. Koloka nudar tradisaun hodi fase liman beibeik evita kontaktu fiziku no mantein distansia social.
4. Governu kria ona kondisaun maka hanesan: autorija kios, loja, supermerkadu no mini merkadu sira hodi kontinua loke no faan sasan nesesidade bazika no esensial, inkuli Banku no Sentru Abastesiemntu kombustivel nian.
5. Rezolusaun governu nian mos autoriza e orienta atu ema hotu nebe halao servisu professional nian no trabalhador sira atu sira nebe kontinua halao servisu persija no tenke iha autorijasaun husi Superior ierarqiku no trabalhador sira husi kompania tenke hetan autorijasaun husi Ministeriu Turismu Komersiu no Industria nebe nia formulariu koloka ona iha tabela husi rejolusaun.

Tuir mai saida maka PNTL halo no halao hela maka hanesan;

1. Inplementa rejolusaun ne’e bazeia ba pontus hirak ne’ebe temi ona iha leten sein halo negosiasaun ba lei nebe iha.
2. Halo fiskalizasaun masimu ba Estadu emerjensia hahu husi fronteira sira no fronteira entre munisipiu.
3. Garante katak movimentu sira ne’ebe lao no sirkula ne’e bazeia deit ba rejolusaun nebe eziste.
4. Ba sedeit maka kontra no la tuir lei hirak ne’e PNTL sei atua no kriminaliza nune’e imediatu aprejenta ba Ministeriu Publiku, tanba konsidera hanesan la obedese ka la kumpri ordem autoridade.

Informasaun ba publiku katak :

Merkadu ne’ebe governu autoriza loke maka hanesan merkadu nasional iha Taibesi no merkadu Manleuana ho nia funsionamentu ka oras loke hahu husi 06:00-18:00 kada loron. Signifika fatin hirak nebe la temi iha lei ne’e sei la permite merkadu sira seluk.

Dever koperasaun: bazeia ba rejolusaun guvernu ne’e PNTL hato’o katak autoridade munisipiu no lideransa komunitaria sira atu halao mos dejiminasaun ba komunidade sira konaba prevensaun COVID-19 hamutuk ho Ofisial Polisia Suku (OPS) nebe koloka iha kada suku iha teritoriu nasional.

Ho komunikadu ida ne’e espera katak ita hotu sei hatudu ita ida-idak nia kontribusaun ba Estadu no Governu konaba esforsu tomak nebe halo hodi salva ita hotu husi pandemia COVID-19.

Agradese no obrigadu wain.

Dili- Komandu Jeral Polisia Nasional Timor-Leste (PNTL) entrega kareta operasional rua(2) ba Komandu munisipiu Dili no rua (2) ba Unidade Espesial Polisia hodi halo servisu operasaional iha terrenu hodi asegura seguransa.

Komandante du Komandu Administrasaun Superintendente Xefe Jose Soares hateten iha tinan 2020 PNTL sosa kareta operasional 21, agora kareta nen(6) maka mai ona tanba ne’e maka Komandante Jeral fo orentasaun atu fahe uluk kareta 4 ba Dili tanba ita nia kareta operasional barak kondisaun grave no manutensaun atraja tanba ne’e inplika servisu operasional iha terrenu liu-liu iha kapital Dili no munisipiu seluk.

Nia haktuirtan ita sei heintan to’o iha fulan juñu kareta 15 maka sei maitan hodi distribui ba munisipiu seluk hodi apoiu servisu operasional iha terrenu.

“Kareta operasional ne’e hola ho OJE 2020, kareta hirak ne’e ho marka HILUX no nia pesas fasil hetan no hola husi kompania sira iha Dili laran ho nia kustu ne’e mais ekonomiku,” dehan Komandante ne’e.

Antes termina Ex Komandante munisipiu Baucau ne’e husu ba komandante munisipiu sira liu husi Xefe administrasaun, MTO kada munisipiu antes uza kareta ne’e tenke halo tuir regras ne’ebe maka hasai tia ona hodi halo kontrolu regular mensalmente no hare kondisaun kareta hodi kontrola be no oliu tanba ne’e maka sai fukun prinsipal ida to’o agora ne’ebe afeta ba kustu manutensaun ne’ebe maka boot.

Komandu hasai ona despasu no fahe ona formatu ba Komandu munisipiu atu nune’e ita ne’ebe sai nain ba kareta ne’e garante kondisaun kareta nian hodi halo prestasaun servisu ne’ebe diak ba ita nia povu no nasaun liu-liu iha periodu Estadu Emerjensia no Serka Sanitaria. Media PNTL

Dili- Komandu Polisia Nasional Timor-Leste (PNTL) rejista kazu insidente hamutuk 51 no asidente kmaan 14 durante semana ida (23-29) fulan ne’e.

Portavoz PNTL Superintendente Xefe Arnaldo Araujo hateten kazu insidente ne’ebe maka PNTL rejista maka hanesan Violensia Domestika 13, Baku Malu 10, Asaltu 23, Ema Tama illegal 1 no Ema mate nain 1 alende ne’e rejista mos asidentes trafegu kma’an  hamutuk 14.

Nia hatutan alende kazu hirak ne’e PNTL mos rejista kazu hatalik a’an(suisidiu) tolu (3) kompostu husi feto nain rua iha munisipiu Baucau, postu administrativu Quelikai vitima Livia Belo Freitas (26) no Baguia vitima naran Julieta Cristina Ximenes (23) nomos vitima Graciano Soares (26) husi munisipiu Ermera postu Railaku, kazu rua rejistu no prosesu ona iha Polisia Investigasaun, maibe kazu iha Ermera Familia la konkorda ou lakohi atu lori mate isin ba Autopsia ho ida ne’é Policia halo Deklarasaun Auto de entrega mate isin ba  Familia no familia rasik halo deklarasaun katak loron ikus sei la mosu problema.

Timor-Leste oras ne’e daudaun inplementa hela Estadu Emerjensia hodi limiti sidadaun sira nia movimentu ba mai nune’e bele prevene propagasaun surtu COVID-19 maibe iha individu balu kontinua viola regras EE hodi halo movimentu ilegal ba nasaun vizinu Indonezia. Hanesan iha loron 25/04  Oras 15:15 Otl PNTL kaptura sidadaun feto ida naran Francisca Goncalves (40) hela iha suco Holsa postu administrativu Maliana munisipiu Bobonaro tama Illegal mai husi Nasaun Indonesia liu iha area Tunu-Bibi.

Kronologia Iha  loron  29-12-2020, Sra. Francisca sai  husi  Bobonaro  ba  vizita  nia  familia  iha  Indonesia  liu husi dalan Ilegal durante ne’e iha hela Nasaun Indonesia no iha loron 25/04 nia fila husi  Nasaun  Indonesia  liu  husi  dalan  Ilegal  mai  Timor-Leste. agora  entrega  ona  ba Equipa  Saude  no  lori  ona  ba  iha Mota a’in hodi tama iha Quarantina.

Komandante ne’e informatan PNTL mos rejista ema estrangeiros ida mate iha Baucau, iha  loron  Sabado  Dia  24  de  Abril  2021    Oras  10:00 -17.00    Otl,  Membru  PNTL  SIK  Baucau hamutuk ho ekipa Sentru Integradu Gestaun Krizi Saude Municipio Baucau ba halo konfirmasaun ba  mate  isin Indiano naran Ahmid Jamil Fatin/data moris: India  -05-08-1959  Idade: 61 Hela fatin profisoriu: Aldeia Kairiri Suku Gariuai Posto Baucau Villa.Estado Sivil: kazadu Profisaun: Time Lider ba kompanha ICT, ICP konsultan, Projeto Baucau-Viqueque  ne’ebe mak mate  iha  Suku  Gariwai  Postu  Baucau  Villa  Munisipiu Baucau.

Motivu akontesemento Tuir informasaun husi testemunha Abranm Sousa Lobato Iha dia 24/04/2021, Oras 05.30 otl Nia rona barullo hanesan ema kondisaun  lanu  no  hakilar  nune’e  testemunha  lao  ba  iha  Sala  han fatin  referetorio  iha  neba testemunha hare vitima toba latan ona iha semente leten, entaun sasin hanoin katak vitima nia kondisaun  lanu  sempre  monu  nune’e,  vitima  hakilar  makas  no  vitima  nia  kolega  naran  Marcial pascua  ema  husi  Filipina  nian  no  staf  feto  nain  rua  mos  hader  mai,  no  ami  hanoin  katak  vitima kondisaun lanu no ami koko ajuda kaer vitima atu hamrik hodi ba hatoba vitima iha Quartu laran maibe vitima ho kondisaun isin bot no todan nune’e ami lakonsege foti sae vitima.

Evidencia ne’ebe maka Polisia hetan mak hanesan Tua nebe vitima hemu husik hela iha kopu no tua iha botir. Enkuantu mate isin lori ona ba Ospital Guido valadares  hodi halo Autopsia no Polisia  halo prosesu investigasaun. Media PNTL

Dili-  Servisu Operasional PNTL liuhosi Departamentu Nasionál Tránzitu no Seguransa Rodoviária halo pasa revista ba karreta no motor ne’ebé halo movimentu hodi kontrola jestaun veìkulus iha estrada públiku no nesesidade atu kria ambiente kondusaun seguru ne’ebé efikas no efisiente.

Komandante Polísia Tránzitu Nasionál, Superintendente Polísia, João Belo, hateten atividade ne’e hodi dezenvolve kampaña Dili Hakmatek inklui atu eduka sidadaun sira hodi respeita lei tránzitu, Nia hato’o asuntu ne’e ba Jornalista sira iha Kuartel Jerál PNTL kaikoli Dili, kuarta (28/04).

“Ohin ami prende motorizada hamutuk 60 resin, karreta 4, inklui karreta pezadu ne’ebé númeru mátrikula laiha no tula sasan pezadu ne’ebé bele kauza ba perturbasaun públiku no asidente”, dehan João Belo.

Komandante ne’e haktuirtan Viaturas ne’ebe maka prende maioria infrator sira laiha karta kondusaun no laiha asesoris hanesan xapa mátrikula, lampu no espellu. Ohin ita fokus liubá motorizada no transporte ne’ebé la iha asesores ezemplu hanesan plat oin kotuk no karta kondusaun. Maibé ba dokumentus ne’ebé invalidu durante periodu Estadu Emerjénsia ita konsidera vale nafatin.

João Belo realsa, ba infratór sira ne’ebé antes ne’e viola ona kódigu estrada no kontinua viola nafatin sei aplika koima másimu.

Eis Komandante UPF ne’e hateten, sei foti medidas ba motorista sira ne’ebé hetan ona infrasaun husi seksaun Tránzitu Munisípiu Dili nian, tanba tuir loloos sira tenke kompleta lai rekezitus antes kontinua halo movimentu iha estrada públiku.

Tuir diretiva operasaun ne’ebé maka Komandu fó sai katak, operasaun ida-ne’e atu eduka sidadaun sira hodi respeita kódigu estrada no-mos iha relasaun ho operasaun “Dili Hakmatek”, hodi garante katak ema hotu ne’ebé maka uja estrada publiku tenki kompleta rekezitus hahú kedas hosi karta kondusaun no-mos asesores transporte nian.

Atu termina komandante tranzitu ne’e haktuir Polísia Tránzitu regularmente sei hala’o pasa revista ba transporte públiku, privadu, Governu inklui motorizada ne’ebé halo movimentu iha kapitál Dili hodi asegura regra serka sanitaria ne’ebé Guvernu dekreta ona to’o loron 2 maiu 2021. Media PNTL

Dili, Komandu Polísia Nasional Timor-Leste (PNTL) liu husi Departamento Policiamento Comunitaria (DPCN) kuarta-feira (28/04) ne’e hetan apoiu material eskritoriu husi parseiru Fundasaun Asia (The Asia Foundation-TAF) hodi bele halo kna’ar loron-loron nian. Apoiu hirak ne’e DPCN hetan hafoin hato’o proposta ba parseiru liga ba iha dezastre naturais ne’ebe akontese iha loron 4 fulan Abril tinan ne’e maka afeta mós ba material DPCN nian balun maka hetan estragus.

Komandante Komandu Operasaun PNTL Superintendente Xefe Pedro ne’ebe reprezenta Komandu PNTL iha âmbitu simu apoiu hirak ne’e hato’o agradesimentu ne’ebe bo’ot tebes-tebes ba apoiu ne’ebe mai husi TAF fó ba DPCN hanesan ita hotu hatene no asiste katak iha loron 4 fulan Abril tinan ne’e akontese inundasaun iha kapital Dili ne’ebe afeta mós mai iha Komandu Jerál PNTL.

“Iha afetasaun ida ne’e buat barak maka hetan estragus liu-liu ba kumputador sira, tanba ne’e ho apoiu ne’ebe iha bele tulun membru sira hodi kontinua halo servisu nu’udar servidor Estadu, servidor ba nia povu no ba rai doben Timor-Leste, tanba wainhira laiha tulun hau hanoin ne’e susar tebes ho kondisaun mundu ne’ebe uza teknologia ne’ebe modernu liu”, tenik Komandante Komandu Operasaun PNTL ne’e.

Superintendente Xefe ne’e dala ida tan agradese ba TAF ne’ebe maka iha situasaun difisil sempre hamutuk ho PNTL, ne’ebe maka durante ne’e servisu hamutuk ho DPCN, ajudus barak ne’ebe sempre fó tulun iha ita nia situasaun pandemia COVID-19 ne’ebe tama mai no ajudu balun to’o ba iha Komandu PNTL munisipiu sira ne’ebe maka to’o oras ne’e dadaun utiliza hela.

“Apoiu hirak ne’ebe kaka TAF fó ba Komandu PNTL, ami sei aproveita ho diak, nune’e bele fó benefisiu diak ba ita nia komunidade no mós povu Timor-Leste tomak, agradese dala ida tan ba apoiu ne’ebe fó mai ami no ami fiar katak iha tempu tuir mai sei nafatin apoiu DPCN, TAF hanesan ajensia ida ne’ebe maka durante ne’e parseria ne’ebe servisu diak tebes-tebes ho PNTL laos ba deit material maibé mós iha formasaun ba KPK sira iha munisipiu hotu-hotu”, hakotu Superintendente Xefe ne’e.

Entretantu Diretór Jestaun DAPK TAF nian Adelio Tilman hateten hanesan parseiru desenvolvimentu, Fundasaun Asia ka TAF ne’ebe hetan apoiu husi governu Nova Zelandia servisu kleur tebes ho PNTL iha tempu naruk.

“Maibé ita hotu triste tanba ho situasaun inundasaun fó afeta ne’ebe bo’ot ba ita nia komunidade no mós ba PNTL, tanba ne’e Xefe DPCN hato’o pedidu hetan mós afeta husi inundasaun ne’ebe refere, TAF hanesan parseiru desenvolvimentu ami koko atu tulun oituan tuir kbi’it ne’ebe ita iha liu-liu atu apoiu DPCN liu husi Komandante Operasaun nia lideransa atu bele kontinua servisu nafatin”, hateten Diretór Jestaun DAPK TAF ne’e.

Adelio Tilman akresenta tan katak lori Xefe TAF Timor-Leste hakarak hato’o ba Komandu PNTL liu-liu DPCN espera katak ho tulun ne’ebe iha bele ajuda netik servisu instituisaun PNTL hodi servi ita nia povu no ita nia nasaun.

Apoiu material hirak ne’e maka hanesan Laptop Dell Latitude 5400 hamutuk tolu, Projector Epson ida, UPS APC Power Backup 800 VA hamutuk 2, Printeer Canon G4010 hamutuk rua no Destok All in One 200 Pro G4 hamutuk rua. Sasan hirak ne’e entrega direitamente husi Diretór Jestaun DAPK TAF nian Adelio Tilman ba iha Komandante Komandu Operasaun Superintendente Xefe Pedro hafoin entrega hikas ba iha Xefe DPCN Superintendente António da Luz.

Media PNTL.              

Dili, Komandu Polísia Nasional Timor-Leste (PNTL) tersa-feira (27/04) ne’e hala’o enkontru ida hamutuk ho parseiru desenvolvimentu sira hanesan Asistensia Légal ba Feto no Labarik (ALFELA) no United Nation Development Programme (UNDP) hodi trasa programa ida ne’ebe hanaran Spotlight iha ne’ebe foka liu ba Violensia Domestika no Violensia basea ba Jéneru iha Timor-Leste.

Komandante Jerál PNTL Komisariu Polísia Faustino da Costa ne’ebe lidera enkontru ne’e hateten parte Komandu agradese ba oportunidade diak ida ne’e liu-liu ba parseiru sira nia apoiu hodi bele trasa programa ida ne’e.

“iha tinan 2019 Komandu PNTL parte Jéneru nian aprova ona Planu Estratéjiku ba tinan lima ninian nune’e maka iha Planu refere ita koloka programa ida hanaran Spotlight, los duni katak iha aktividade implementasaun programa kada tinan PNTL liu husi nia Planu Asaun Annual sempre koloka parte ida hanaran Igualdade Jéneru, Violensia basea ba Jéneru no mós oinsa atu fasilita parte balun hanesan testamuña ba kazu Violensia Doméstika nune’e bele hetan tratamentu ne’ebe justu”, tenik Komandante Jerál PNTL ne’e.

Autoridade másimu instituisaun seguransa ne’e haktuir tan katak maske nune’e dazafiu barak mós parte PNTL hasoru hanesan ita hotu hanesan iha tempu hirak ba kotuk hahu’u husi tinan 2020 Timor-Leste no mundu tomak infrenta problema ida Pandemia ne’e.

“Pandemia nu’udar parte iha ne’ebe ezizi PNTL atu hala’o ninia kna’ar extraordinariu ida alénde misaun prinsipal PNTL nian atu halo atendimentu públiku, fó asistensia ba ema hotu maibé ho Pandemia ida ne’e dada membru PNTL sira nia servisu bo’ot hodi atribui tan servisu extra ida maka asegura ita nia komunidade no servisu Ministeriu Saúde nian iha âmbitu prevensaun ba moras surtu COVID-19 iha Timor-Leste”, haktuir Komisariu Polísia ne’e.

Iha sorin seluk parte parseiru desenvolvimentu hanesan UNDP hateten ho estabelesimentu programa Spotlight no hakarak partilla informasaun ho Komandu PNTL liu-liu ba iha parte Polisiamentu Komunitaria. UNDP mós kontinua suporta hodi fó kapasitasaun iha âmbitu atendimentu Polísia ninian ba kazu Violensia Domestika no Violensia basea ba Jéneru. Programa refere sei implementa iha munisipiu tolu hanesan Ermera, Maliana no Viqueque, PNTL maka na’in ba iha programa ne’e ho apoiu tomak husi parseiru UNDP no ALFELA iha ninia implementasaun.

Nune’e husi parseiru ALFELA iha implementasaun programa ne’e maka husi fundu Spotlight sei fornese komunikasaun ba maluk VPU ne’ebe iha munisipiu tolu ne’ebe temi ona. Sei apoiu mós direitu membru VPU sira husi munisipiu ne’ebe maka sei partisipa iha enkontru meja redonda iha nasional ne’ebe lidera husi Komandu Jerál.

Hola parte iha sorumutu ne’ebe hala’o iha salaun enkontru Kuartél Jerál ne’e maka Komandante Jerál, Xefe Servisu Investigasaun Kriminal Nasional (SIKN), Xefe Gabinete Relasaun Internasional, Sub Xefe Gabinete Jéneru PNTL, Xefe VPU Nasional no Sub Xefe Departamentu Polisiamentu Komunitaria Nasional, ekipa parseiru nian UNDP no ALFELA.

Media PNTL.                       

Dili, Komandu Polísia Nasional Timor-Leste (PNTL) liu husi Departamentu Polisiamentu Comunitaria Nasional (DPCN) hamutuk ho Polisia Komunitaria Munisipiu Dili segunda-feira (26/04) ne’e hala’o aktividade sensibilizasaun regras prevensaun ba surtu COVID-19 iha fatin públiku hanesan supermerkadu no merkadu tradisionais sira.

Diretór DPCN Superintendente António da Luz ne’ebe dirije aktividade ne’e hateten iha loron hirak liu ba Komandante Jerál PNTL hasai Diretiva Operasaun ida ba departamentu sira hotu iha Kuartél Jerál inklui mós ba DPCN atu bele kontinua hala’o aktividade prevensaun ninian.

“Tanba ne’e maka DPCN hamutuk ho Polisia Komunitaria Munisipiu Dili hala’o aktividade sensibilizasaun ne’e hodi bele esplika nafatin kona-ba regras Organizasaun Mundial Saúde (OMS) nian no mós Ministériu Saúde (MS) ba prevensaun surtu COVID-19 nian”, esplika Diretór DPCN ne’e.

Superintendente ne’e hato’o apela ba komunidade sira atu mantein uza maskára, fase liman ho sabaun no kumpri nafatin regras hirak ne’ebe maka OMS no MS fó sai ba komunidade sira. Iha aktividade ne’e ekipa deteta katak iha komunidade balun la uza maskára maibé ekipa mós prepara kedas maskára ba sira ne’ebe maka la uza, ami oferese kedas atu nune’e sira bele utiliza.

“Ohin ami halo esplikasaun ba estudante sira ne’ebe maka tuir planu atu aranka ba nasaun Korea no hau rasik koalia ho responsavél Sentru ba kursu lian Korea nian iha parte Becora, katak to’o agora seidauk iha orientasaun ida ba estudante sira atu ba Korea, tanba ne’e maka ohin hau esplika ba sira kona-ba regras ne’ebe maka iha hafoin sira iudak-idak fila ba sira nia hela fatin”, haktuir Superintendente ne’e.

Tuir planu aktividade sensibilizasaun ne’e sei kontinua atu nune’e komunidade siar bele kumpri nafatin regras prevensaun ba moras surtu COVID-19 iha Timor-Leste.

Media PNTL.        

Dili– Polisia Nasional Timor-Leste(PNTL) munisipiu Manufahi asegura ona sidadaun nain ualu(8) ne’ebe maka halai sai husi Quarantena Orahou no Tinolina munisipiu Manufahi tanba la satisfas ho rezultadu suap no hela fatin.

Porta voz PNTL Superintendente Xefe Arnaldo Araujo informa  ba publiku kona-ba situsaun ne’ebe akontese iha munisipiu Manufahi iha sabadu kalan 24 de abril maiz ou menus tuku 19:00 kalan servisu saude munisipiu fo sai rejultadu suap ba sidadaun nain 140 iha Quarantena Urahou ho rejultadu negativu no rejultadu SWAB Quarantena Tinolina hamutuk 40 pessoas nain 8 mak positivu, Nia hato’o asuntu ne’e ba Jornalista sira iha Kurtel Jeral PNTL Kaikoli Dili, Segunda (26/04).

Nia haktuir informasaun husi Komandante munisipiu Manufahi katak antes  rezultadu suap sai sidadaun sira ne’ebe mak hela iha Quarantena Tinolina halai sai hotu hafoin Komandu munisipiu buka tuir no konsege lori fali mai no balu familia maka lori ba entrega hodi kumpri Quarantena. Sidadaun nain ualu (8) sei kontinua kumpri Quarantena hodi halo observasaun no tratamentu saude  maibe nain 32 ne’ebe negativu agora fila ona  ba uma, agora dadaun ne’e situasaun lao kontorlado lao  ho diak” haktuir superintendente Arnaldo

Iha oportunidade ne’e porta voz ne’e apela ba komunidade tomak ne’ebe mak hakarak ba Munisipiu karik hetan rezultadu SWAB pozitivu husu atu kopera ho parte saude nune’e bele prevene propagasaun surtu COVID-19, no husu mos ba parte saude atu hatudu sira nia profisionalizmu atu nune’e  komunidade la bele sente paniku nune’e labele iha dezentendementu entre pasiente ho professional saude sira.

Husu mos ba komunidade tomak atu kumpri regra Estadu Emerjensia ne’ebe ministeriu saude fo sai hanesan uza maskra,  fase liman ho sabaun ou uza hand sanitizer no mantein distansia sosial. Media PNTL