Ermera-Iha tinan 2022, krime violensia domestika rejistu aas liu iha Kapital Dili ho total kazu hamutuk 119 no Munisipiu Ermera kazu 40 nomos munisipiu seluk iha teritoriu laran.
Segundu Komandante Jeral PNTL Komisariu Polisia Pedro Belo hato’o asuntu ne’e liu husi diskursu iha ambitu serimonia lansamentu konstrusaun uma VPU nian iha Gleno, Ermera, Tersa (2/05/2023).
“Haree ba estatistika krime violensia domestika iha tinan 2022, total hamutuk 279. Husi numeru nee Munisipiu aas liu iha Munisipiu Dili ho total kazu hamutuk 119, tuir mai Munisipiu Ermera total kazu hamutuk 40, no tuir mai iha Munisipiu Manufahi no Oecuse total kazu hamutuk 21,” tenik Komisariu Polisia ne’e.
Tanba ne’e, ema hotu tenki fo asistensia, tenki fo karajem, ba vitima sira hodi nune’e bele koalia lia loos, iha justisa nia oin tanba ema hotu hatene katak, iha kultura Timor nian, uluk kedas katak mane maka iha responsabilidade uma laran, entaun kultura ida ne’e, hamate liberdade feto no labarik sira hotu.
Iha fatin hanesan, Resident Representative UNDP iha Timor Leste Munkhtuya Altangerel afirma, bazeia ba PNTL nia dadus ne’ebe iha total kazu violensia domestika no sexual, keixa ona iha munisipiu Ermera, ida nee kuaje %6 ba kazu ne’ebe keixa ba Unidade Pessoa Vulneravel (VPU-sigla ingles) iha nasaun.
“Dadus nee mos signifika katak mediu husi vitima sira kada fulan vijita VPU Ermera hodi buka seguransa, protesaun no justisa,” dehan nia.
Nia hatutan VPU ho posibilidade sai hanesan opsaun ikus hodi bele proteje sira nia aan husi sofrimentu ne’ebe sira lori ona iha tempu naruk, tanba ne’e maka oferese fatin ne’e ba sira nune’e bele iha espasu hodi senti seguru iha Polisia nia liman.
Entretantu Prezidente Autoriedade Munisipiu Ermera Euzebio Salsinha hateten hare’e ba numeru ne’ebe aas liu-liu iha munisipiu Ermera presiza halo prevensaun, redusaun, ba kazu violensia domestika no violensia ba feto no labarik sira ne’ebe iha vulneravilidade.
“Levantamentus ne’e hatudu katak, ita Ermera maka aas liu, iha teritoriu laran, ida ne’e maka presiza ita halo esforsu extraordinariu no kontinua nafatin halo sensibilizasaun ,” dehan Prezidente Autoriedade Munisipiu Ermera.
Aleinde ne’e husu mos atu halo sensibilijasaun ba komunidade sira, nune’e bele intende kona-ba saida maka violensia domestika, tanba violensia domestika nee krime publiku.
