Ermera- Komandu Polisia Nasional Timor-Leste (PNTL) munisipiu Ermera no Departamentu Tranzitu Seguransa Rodoviariu Nasional halo sosializasaun lei kodigu estrada no sinais tranzitu ba kondutor no kareta nain sira.
Komandante PNTL Munisipiu Ermera Superintendente Natercia Martins hateten sosializasaun ne’e ho objetivu prinsipal atu fo konyesementu ba kondutores transportes públiku no kareta nain kona ba Lei Kódigu de Estrada no Sinais Tránzitu nune’e bele minimija asidente trafiku no infrasaun iha Ermera, Nia hato’o asuntu ne’e iha abertura sosialijasaun foin lalais iha Kuartel PNTL munisipiu Ermera.
Nia haktuirtan wainhira lori kareta iha estrada públiku kondutor tenke matenek, iha abilidade no atitudi diak hodi kumpri no obedese Lei no Regulamentu tránzitu, atu nune’e bele minimiza númeru asidente no infrasaun tránzitu iha munisipiu Ermera.
“Ba kontudor sira wainhira halo infrasaun (pelangaran) PNTL Unidade Tránzitu munisipiu Ermera sei la tolera no aplika Nota Auto Infrasaun (tilang),”Nia aviza.
Entretantu Diretor Departamentu Tránzitu Nasional Inspetor Xefe António L.C. Soares hateten sosializasaun ne’e inportante ba kareta nain no kondutor transporte públiku Bus, Angguna, Mikrolet no Travel tanba sira mak loron- loron lori kareta tula passajeiros husi Ermera –Dili, Dili-Ermera no husi Ermera ba sub distritu no sub distritu mai Ermera.
Nia mos aviza ba ba kondutor sira tenke iha karta kondusaun válidu tuir kareta nia kategoria, tenki uza uniforme no tenke kompleta dokumentus kareta nian hanesan Livrete, Fixa Inspesaun no lisensa operasaun trajekto ( ijin trayek ) tamba dokumentu hirak ne’e iha nia prazu validade tanba ne’e wainhira dokumentus hirak ne’e prazu liu sei hetan sansaun.
Atu termina komandante ne’e husu ba kondutor no ajudante ( konjak ) sira atu mantein kareta mo’os, labele hadau passajeirus sira nian sasan iha terminal Tasi-Tolu, no tenke iha étika nebe diak wainhira tula passajeiru sira.
Sosializasaun ne’e hetan partisipasaun maximu husi kareta nain no kondutor sira ho total partisipante hamutuk ema nain 200. Media PNTL
