Dili, 08 novembru 2022 (SRP) – Polisia nasional Timor-Leste, buka tuir autor ne’ebe envolve iha kazu asaltu hodi hakanek vitima Agostinha Jose Pereira Neves, tinan 28 no tuda rahun uma iha area Balibar foho leten ne’ebe lokaliza iha Aldea Raikuak, Suku Lahane Osidental, Postu Administrativu Vera-Cruz, Munisipiu Dili.
Tuir deklarasaun husi vitima hanesan uma nain Wilson Jose Pereira Neves, hateten asaun ne’ebe konsidera tentativa homesidiu ne’e akontese iha segunda (07/11), tuku 01h30 madrugada wainhira vitima hamutuk ho familia sei deskansa hela.
“Ami hamutuk ho familia toba hotu hela derepente ema komesa tuda fatuk ba uma leten no hakilar dehan “ne’e sete-sete imi halimar imi mate tan”, rona ida ne’e ami sente tauk hodi nonok deit iha uma laran no hau rasik telfone kedas ba polisia husu ajuda. Maibe lakleur deit iha oras tuku rua resin sira komesa mai besik falun oin ho sira nia faru uza sasan kroat baku mate ahi oan iha ferik katuas nia rate oin no kontinua uza besi meik baku rahun vidru janela 3 hodi kona Atina nia oin no sira sona diman iha odamatan vidru rahun hotu sorte maun sira polisia mai lalais selae sira tenta atu oho ami iha uma laran”, dehan, Wilson.
Nia dehan, wainhira grupu deskunesidu ne’e halo asalta sira hare PNTL komesa sai hosi foho lolon mai nia sira konsege halai sa’e liu ba foho leten.
Hafoin akontesementu ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL), junta ho J2, Unidade Informasaun Falintil, S2, toó kedas fatin akontesementu hodi hakalma situasaun no transporta kedas vitima ba ambulansia hodi halao tratamentu.
Entertantu Vitima Agostinha Jose Pereira Neves, deklara nia hetan sona iha parte hasan karuk no durante ne’e nia laiha inimigu ho ema se deit tanba hanoin deit mak nia servisu.
“Hau servisu cleaner iha hotel Bidau ema sira ne’e ami ladun kuñese maibe hau hare mane isin badak ida hakilar sona tama besi meik mai hau nia oin ne’e nia lian hau deskunfia ami nia vizinha maibe hau lakoi dun ema”, dehan Agostinha.
Agostinha kondena hahalok krime ne’ebe akontese no husu PNTL buka tuir suspeitu hirak ne’ebe envolve iha kazu refere nune’e sira labele moris iha trauma nia laran.
Parte SIPN mos kontatu kedas ba Eskuadra PNTL Nain-Feto hodi rekolla informasaun no buka tuir autor sira ne’ebe envolve iha asaun brutal ne’e. Ho situasaun ne’e PNTL envolve BOP, COE no Eskuadra Nain-Feto hodi asegura vitima nia uma hodi garante hakmatek no halakon trauma ba kik oan sira.
