Komandu Polísia Nasional Timor-leste (PNTL) segunda-feira (04/07) ne’e hala’o diskusaun kona-ba Planu Asaun Annual (PAA) ba tinan 2023 hamutuk ho Komandu Munisipiu, Unidade, Xefe Gabinete, Xefe Seksaun sira iha Kuartel Jerál. Tema ba diskusaun loron dahuluk nian maka “Garante Sustentabilidade Orsamentu Estadu Baseia Ba Programas (Program-Budgeting).
Komandante Jerál PNTL Komisariu Polísia Faustino da Costa iha ninia intervensaun abertura diskusaun ne’e hateten objetivu husi diskusaun ne’e maka oinsa ita atu bele ajusta programa, ba oin ita husu orsamentu ba ita nia programa.
“Ita hotu hatene katak PNTL kuaze tinan ruanulu-resin, PNTL ita iha Planu Estratéjiku tinan lima nian ida (2014-2018) programa lubuk ida mak ita konsege implementa ona, maibé programa wain mós la konsege hala’o/implementa, 2020 ita iha tan Planu tinan lima nian ida (2020-2024) oras ne’e iha hela Governu no ita mós iha dokumentu final ida tinan 2023 to’o 2038”, tenik Komandante Jerál PNTL ne’e.
Komisariu Polísia ne’e esplika liu tan katak sé ita hare’e ba Planu Estratéjiku 2014-2018, ita iha diresaun no programa lubuk ida ne’ebe ita hanaran Programa Tématiku atu oinsa guia ita atu halo tuir hamosu aktividade. Tanba ita atu ajusta to’o tinan 2038, ita iha programa Tématiku ne’e sanulu atu hare’e ba Planu Estratéjiku Desenvolvimentu Nasional (PEDN) 2011-2030.
“Diskusaun ba loron ohin nian hanesan ita hotu hare’e maka Orsamentu baseia ba Programa signifika ita iha Planu/Programa maka foin bele husu osan, nune’e ita bele hanaran Planu maka Servisu no Servisu tuir Planu; tanba ne’e Planu maka ita nia programa”, hatutan Komisariu Polísia ne’e.
Autoridade másimu Instituisaun Seguransa ne’e afirma katak ita hotu tenke rekoñese dezafiu saida maka PNTL hasoru durante tinan hirak ne’e nia laran, ida ne’ebe iha nivel nasional; Estabilidade Politika ne’e situasaun ida no ida ne’e sai dezafiu ida ba PNTL hanesan autoridade seguransa, agora ita afetadu ou lae husi Estabilidade Politika ida ne’e.
Iha biban intervensaun sorumutu loron dahuluk ne’e, Komisariu Polísia Faustino da Costa hato’o tutan apresiasaun ne’ebe membru Komisaun B Parlamentu Nasional fó ba Komandu PNTL munisipiu sira wainhira hala’o fiskalizasaun iha munisipiu no hare’e servisu profesionalizmu membru PNTL sira nian.
Tuir planu, diskusaun ne’e sei hala’o durante loron tolu nia laran (04-06) no partisipantes maka Komandante Komandu Operasaun, Komandante Komandu Munisipiu 12, RAEOA, Munisipiu Espesial Atauro, Komandante Unidade (UPM,UEP), Xefe Seksaun, Xefe Gabinete no Xefe Servisu sira kontinente jerál nian. Abertura ba Diskusaun ne’e halo husi Komandante Jerál PNTL akompaña husi Inspetur Jerál. Media PNTL.
