Dili, Komandu Polísia Nasional Timor-Leste (PNTL) kuarta-feira (23/08) ne’e hala’o reuniaun Ajustamentu Planu Asaun Annual ba tinan 2024 hafoin aprezentasaun Planu Asaun Annual iha semana kotuk (16/08) maka Komandu PNTL liu husi Gabinete Planeamentu Estratejiku no Dezenvolvimentu hamutuk ho Komandu Supervizaun, Diretur Diresaun, Xefe CFP, Xefe Gabinete, Komandante Unidade (UPM, UEP,UPF) no Xefe Departamentu sira ajusta hodi rekolla dokumentu relevante sira iha elaborasaun final molok aprezenta ba iha Ministeriu Interior (MI) no kontinua ba iha Konsellu Ministru.
Komandante Jerál PNTL em subtituisaun, Komisariu Polísia Pedro Belo hafoin reuniaun ba jornalista sira hateten liu husi diskusaun ida ne’e, ami hotu ajusta prioridade saida maka sei hare’e iha tinan 2024 no sei ajusta ba Planu Ministeriu Interior nian.
“Tanba ne’e, ohin ami tu’ur hamutuk halo diskusaun hodi rona mós Komandante sira ne’ebe imposrtante liu hanesan Komandante UPF, iha ne’ebe hanesan ita hotu hatene katak durante ne’e sira nia kondisaun ladun diak, entaun presija tebes hare’e sira nia kondisaun, tau mós Planu Prioridade ba iha UPF nian”, tenik Komandante Jerál PNTL em subtituisaun ne’e.
Aktual Segundu Komandante Jerál PNTL ne’e afirma tan katak iha planu prioridade lima ne’ebe maka mai husi parte MI fó ba PNTL maka hanesan, primeiru ba iha UPF nian, Investigasaun, Tránzitu, Servisu Informasaun no Polisiamentu Komunitaria. Tanba ne’e maka oras ne’e dadaun ami ajusta didiak Planu sira ne’e, hodu nune’e bele aprezenta Planu ne’ebe ho kualidade.
“Hau hanoin katak rekrutamentu ne’e lao ona, ida ne’e parte formasaun nian, planu ami tau hotu iha laran maibé ita hatene katak rekrutamentu ne’e parte politiku hanesan Ministru Interior nian koalia ona katak sei realiza iha tinan oin, laos ida ne’e deit ita mós tau osan ba iha parte Promosaun nian, no mós viagem ne’ebe maka sei ba rai liur, tanba ita hatene katak oras ne’e dadaun ita prepara ann atu tama ba ASEAN, entaun formasaun no reuniaun barak ne’ebe maka PNTL sei partisipa ida ne’e, buat hirak ne’e hotu ami ajusta ba iha Planu sira ne’e”, hatutan Segundu Komandante Jerál PNTL ne’e.
Komisariu Polísia ne’e salienta tan katak ami mós tau Planu Prioridade ba iha UPM hanesan ita hotu hatene katak UPM iha Ró ne’ebe maka kuaze tinan barak ona maka la halo manutensaun no reparasaun, entaun presiza ami tau mós orsamentu ba ida ne’e. No mós kondisaun Ró patrullamentu sira seluk ne’ebe presiza halo manutensaun, ida ne’e hanesan planu rutina ne’ebe ami tau.
“Dala-ruma osan ne’ebe maka ba manutensaun Ró ho montante bo’ot, entaun dala-ruma mós labele kobre atu halo reparasaun, tanba ne’e maka tinan ida ne’e ami prepara orsamentu ba iha tinan 2024 nian, kona-ba atu sosa Ró hau hanoin Ró ki’ik sira ne’e presiza, maibé dezisaun iha Politiku sira nia liman karik bele apoiu maibé karik labele buat saida maka ami iha, ami kontinua avansa ho ida ne’e”, hateten Komisariu Polísia ne’e.
Kona-ba kondisaun infrastrutura, ami tenke hare’e husi munisipiu maka mai to’o nasional, iha munisipiu ita hare’e liu maka eskuadra sira, tanba eskuadra barak to’o oras ne’e dadaun nia kondisaun edifisiu ladun diak ona, ida ne’e ami tau hotu iha Planu sira.
Hola parte iha aktividade ne’e, Segundu Komandante Jerál Komisariu Polísia Pedro Belo, Inspétur Jerál, Komandante Komandu Operasaun, Pesoal no Formasaun, Administrasaun, Diretur Disiplina no Justisa, Komandante CFP, Komandante Komandu UEP, UPM, UPF, Komandante Komandu munisipiu Dili, Atauro, Xefe Departamentu, Xefe Gabinete Asesoria no Pontu Fokal sira.
Media PNTL.
