Dili, Komandu Polísia Nasional Timor-Leste (PNTL) husu ba Autoridade lokal sira iha kapital Dili atu koopera ho parte seguransa hodi labele hakiak bandidu iha bairu laran, nune’e evita mosu konflitu ne’ebe ikus-ikus ne’e mosu iha kapital Dili, hanesan akontese iha loron 20 fulan Agostu tinan 2024 iha aldeia Manu-Meta Raihun Suku Vila-Verde, Postu Administrativu Vera-Cruz ne’ebe rezulta vitima balun kanek no estragus ba komunidade nia uma.
Segundu Komandante Jerál PNTL Komisariu Polísia Pedro Belo hafoin partisipa iha reuniaun Ajustamentu Planu Asaun Annual ba tinan 2024, kuarta-feira (23/08) ne’e ba jornalista sira hateten Komandu husu ba Autoridade Lokal sira atu labele hakiak preman/Bandidu sira ne’ebe maka gosta atu konflitu iha bairu laran.
“Polísia nia susesu iha komunidade, tenke fó informasaun, autoridade lokais sira mós tenke koopera hodi fó informasaun, labele hakiak fali bandidu iha bairu laran, wainhira mosu konflitu maka autoridade sira lakoi fó informasaun maka loron ida Polísia mós sei foti hotu autoridade sira, nasaun independensia ita tenke servisu hamutuk”, haktuir Segundu Komandante Jerál PNTL ne’e.
Komisariu Polísia ne’e subliña tan katak husu atu autoridae lokal sira labele hakiak bandidu iha sira nia bairu laran hodi perturba komunidade sira nia aktividade iha tempu kalan. Bandidu sira ne’e diak liu tenke dudu se’es tiha, atu labele moris hamutuk ho komunidade, atu nune’e komunidade bele lao livre hodi hala’o nia aktividade tuir ema ne’ebe maka moris hanesan iha nasaun independensia nia laran.
“Ami mós husu ba líder arte rituais sira atu kontrola mós ninia membru sira ne’ebe mka ho idade minoridade, maibé ita hatene katak sira iha líder tanba ita mós envolve sira iha reuniaun bebeik ona, atu atensaun ba ninia membru sira ne’e, maibé dala-barak sira la kontrola entaun ikus mai mosu konflitu sira ne’e, ida ne’e dala-ruma laos ema maka hakarak atu halo hanesan ne’e, maibé líder sira la kontrola nia membru sira, orientasaun líder sira nian ne’e dala-ruma membru sira iha terenu la rona malu”, hatutan Komisariu Polísia ne’e.
Eis Komandante Komandu Operasaun PNTL ne’e afirma kestaun kapasidade líder arte marsias no arte rituais sira nian hodi kontrola ninia membru sira ne’e maka sai dúvida bo’ot, hodi hamosu konflitu iha fatin-fatin, estragus komunidade sira nia hela fatin no balun sai vitima husi konfrontu sira ne’e.
“To’o agora, problema mosu iha fatin-fatin mas laiha líder ida husi arte marsias no arte rituais ne’ebe hamrik koalia ba ninia membru sira atu labele halo problema, labele estraga povu nia sasan, ita hotu bele akompaña katak ho akontesimentu sira hotu, laiha líder ida maka atu bele responsabiliza ba aktu sira ne’e, governu legaliza ona sira nia aktividade maibé responsabilidade sira nian maka laiha”, hakotu Komisariu Polísia ne’e. Media PNTL.
