Aileu, relasiona ho kazu odi malu, asalta malu ne’ebe akontese entre populasaun suku Faterlau Munisipiu Aileu ho suku Fatukalu Munisipiu Manufahi, Komandu Polísia Nasional Timor Leste (PNTL) hamutuk ho autoridade lokal halo mediasaun hodi resolve problema refere.
Iha loron 18 Agostu 2016 liu ba populasaun husi suku Faterlau postu administrativu Lekidoe Munisipiu Aileu no populasaun suku Fatukalu postu administrativu Turiskai Munisipiu Manufahi, hamutuk autoridade lokal, Komandu PNTL Munsipiu Aileu halo dialogu hodi rona lamentasaun ne’ebe mak populasaun suku rua refere iha durante tinan 2009 to’o mai iha tinan 2016.
Iha mediasaun ne’e, komunidade sira halo tuir lisan kultura nian hodi ba hamutuk iha mota Aimea ne’ebe sai baliza entre suku rua ne’e, nahe biti bo’ot no oho animal hodi kasu tuir lisan ne’ebe maka iha.
Populasaun husi suku rua refere hahu’u husi tinan 2009 to’o tinan 2016 labele halo movimentu ba malu tanba problema ne’ebe maka mosu hodi difikulta sira atu hakat liu mota Aimea ne’ebe sai baliza entre Munisipiu Aileu ho Same. No wainhira Presidente da Repúblika (PR) halo vizita ba suku rua ne’e, kounidade sira aprezenta lamentasaun ne’ebe sira hasoru durante ne’e tanba labele hakat liu baliza iha mota Aimea. Nune’e, PR husu ba administrador Munisipiu Aileu no Same hodi bele buka dalan atu resolve problema suku rua ne’e nian.
Komandante PNTL Munisipiu Aileu Superintendente Damião da Silva Correia hateten parte Komandu hamutuk ho Ofisial Polísia Suku (OPS) no autoridade lokal fasilita parte rua hodi bele hetan solusaun ba problema ne’e, nune’e iha futuru labele mosu tan problema hanesan.
“Inisiativa Komandu PNTL Munisipiu Aileu nian hodi halo mediasaun ne’e, tanba mosu problema ne’ebe maka komunidade husi Munisipiu Aileu ho Munisipiu Manufahi iha hanesan odi malu, naok sasan, hana malu hahu’u kedas husi tinan 2009 to’o mai 2016, no iha vizita PR nian iha suku Faturlau no suku Fatukalu sira (Komunidade) apresenta problema ne, katak sira labele lao ba malu”, tenik Superintendente Damião da Silva Correia.
Iha fatin hanesan administrador Munisipiu Aileu João Tilman do Regu esklarese katak iha momentu halo mediasaun ho suku rua ne’e, establese mós akordu Kultural ne’ebe maka kesi komunidade parte rua hodi labele hamosu problema hanesan iha futuru.
“Akordu ne’ebe maka husi komunidade suku Fatukalu no suku Faturlau halo iha mota Aimea maka akordu Kultural ne’ebe maka tuir uju kustume Munisipiu AIleu ninian espesilmente aplika iha suku rua, ho nia objetivu maka atu kria kooperasaun, koordenasaun entre komunidade sira iha Munisipiu rua ne’e”, hateten administrador Munisipiu Aileu.
João Tilman do Regu hatutan tan katak, ho mediasaun no akordu Kultural ne’e maka komunidade sira husi Munisipiu rua ne’e bele moris hakmatek no bele fortifika, haforsa nafatin koopersaun entre komunidade suku Faturlau no suku Fatukalu.
Media PNTL.
