Dili, Komandu Polísia Nasional Timor-Leste (PNTL) segunda-feira (06/06) ne’e realiza Seminariu Nasional ida ho tema “Prespektiva Seguransa Fronteira-UPF Ba Futuru” hodi elabora hamutuk idea atu oinsa maka seguransa iha liña fronteira bele desenvolve ho diak iha futuru.
Vise Ministru Interior (VMI) António Armindo iha entrevista ba jornalista sira hateten limitasaun iha liña fronteira ne’e barak tebes hanesan limitasaun ba ekipamentus, kondisaun hela fatin, limitasaun númeru husi membru sira, tanba ne’e maka politika governu nian maka atu hahu’u ida ne’e, hahu’u hadia sira nia infrasturtura, hadia sira nia bens estar, hadia ekipamentus tanke hanoin atu hadia mós kona-ba númeru sira ne’ebe hare’e ba sei iha hela limitasaun.
“Tanba ne’e ita hahu’u ona iha tinan kotuk maka sira nia bens estar uluk halo ona hanesan hasa’e sira nia osan ba alimentasaun ba dolar sanulu, aumenta sira nia salariu 5% iha tinan ne’e no iha tinan oin sa’e ba 15% no sei iha benefisiu sira seluk, maibé ida tuir fali maka sira nia infrasturtura hanesan ita hotu hatene iha tinan ida ne’e ita hari’I tan ona postu hamutuk 25 ba Unidade Fronteira Terrestre no ita hanoin koko atu aumenta tan nafatin”, tenik Vise Ministru Interior ne’e.
Membru governu ne’e afirma tan katak nia parte koalia ona ho Primeiru Ministru (PM) hanesan mós Ministru Interior (MI) atu hare’e tok postu hirak ne’ebe existe ninia kondisaun ladiak ne’e pelo menus ita bele hare’e atu halo melloramentu, hadia no halo rehabilitasaun ba iha postu hirak ne’e, atu nune’e membru sira labele hela ho kondisaun ida ne’ebe ladun diak, tuir fali kona-ba sira nia ekipamentus no rekrutamentu, tanba ne’e maka parte ida ne’ebe ofisial liu.
“Iha fronteira hanesan ita hotu hatene númeru membru ne’ebe maka ki’ik, tanba ne’e hau hamutuk ho Komandu PNTL ami halo ona planu rekrutamentu basea ba orientasaun verbal husi Ministru Interior, haruka ona ba PM nia gabinete maibé ami seidauk simu ninia resposta, hafoin simu nia resposta maka ita foin hare’e, naturalmente sira nia ekipamentu, sira nia kuantidade pesoa/membrus sira iha fronteira ne’e, ita presiza; sá tan agora ita aumenta ona postu iha ne’ebe ita presiza ema ho númeru ne’ebe maka bo’ot”, afirma VMI ne’e.
Iha fatin hanesan Komandante Jerál PNTL Komisariu Polísia Faustino da Costa ba jornalista sira hateten desenvolvimentu seguransa iha fronteira ne’ebe maka diak liu ne’e kompostu husi buat barak, ida fali fronteira diak liu nia signifika saida, agora ita atu koalia kona-ba seguransa fronteira ne’ebe kapas no diak maka presiza hare’e ninia infrasturtura.
“Situasaun balun ne’ebe presiza ita hare’e tan maka laos interna PNTL nian, ita koalia kona-ba situasaun ekonomia, iha parte ida ne’e nia laos mai mesak deit katak ho intensaun ida husi ita nia negosiante sira maibé mós mai ho kestaun ida seluk ne’ebe kontribui maka infrasturtura”, esplika Komandante Jerál PNTL ne’e.
Komisariu Polísia ne’e salienta tan katak aktividades ilísitus iha fronteira ne’e konstribui husi buat barak hanesan infrasturtura, asesu merkadoria no situasaun ida seluk maka kuandu ita nia ema hotu-hotu konsiente katak ita nasaun Independente no Soberanu.
“Atu hare’e ba futuru, primeiru maka ita nia sosiedade/komunidade presiza komprende katak ita laos ona provinsia, ita nasaun; segundu ita tenke kumpre regra/rekezitus hotu-hotu, ita la hareé tan ba istoria pasadu, la hareé tan ba kultura, kuandu iha vizita bele ba tanba Lei fó dalan maibé tenke kumpri rekezitus hotu neébe aplika iha liña fronteira, kuandu ema hotu halo tuir, hau hanoin ita nia seguransa kapas, sei la hasoru problema”, haktuir autoridade másimu instituisaun PNTL neé.
Seminariu neé sei halaó durante loron rua husi loron 06 fulan Juñu toó loron 07 fulan Juñu tinan neé iha Maubara Room Timor Plaza. Hola parte iha abertura loron dahuluk seminariu neé maka Vise Ministru Interior, Komandante Jerál, Segundu Komandante Jerál, Inspétur Jerál, Komandante Komandu Operasaun, Administrasaun, Komandante Komandu munisipiu 12, RAEOA, Komandante Komandu munisipiu espesial Atauro, Xefe gabinete, Xefe Servisu no Segundu Komandante TLPDP. Seminariu neé realiza tanba hetan apoiu husi parseiru desenvolvimentu TLPDP.
Media PNTL.
