Dili, Komandu Polísia Nasional Timor-Leste (PNTL) rezeita informasaun falsu ne’ebe maka espallha iha Media Sosial (MEDSOS) ne’ebe hateten katak PNTL bandu atu halo movimentu iha tempu kalan liu-liu iha area sira ne’ebe maka identifika sai fatin risku ba konflitu.
Komandante Jerál PNTL Komisariu Polísia Julio da Costa Hornay segunda-feira ne’e (16/04) ba jornalista sira hateten loron hirak liu ba ita simu informasaun iha MEDSOS liu-liu Facebook katak ema balun lori PNTL nia naran hasai informasaun katak iha fatin lubuk ida ne’ebe temi ne’e fatin ida risku portantu limite movimentu iha tempu kalan.
“Hau responde kedas iha MEDSOS mós liu husi Facebook, hau apela ba ema hotu-hotu ne’ebe asesu ba Media Sosial katak informasaun ne’ebe sai iha MEDSOS liu-liu Facebook ne’e lalos, Polísia to’o ohin loron seidauk hasai informasaun ida ba públiku katak fatin hirak ne’ebe sira temi iha Media Sosial ne’e risku no husu ba povu atu limite sira nia movimentu, ne’e laiha”, tenik Komandante Jerál PNTL ne’e.
Komisariu Polísia ne’e apela ba povu tomak Timor-Leste atu lalika hakfodak ho informasaun sira ne’e, halo imi nia aktividade normal hanesan bain-bain, aktividade diariu ne’ebe povu tomak halo tuir idak-idak nia programa hodi sustenta moris loron-loron nian hanesan aktividade eskola no aktividade saida deit maka imi halo, halo ho avontade.
“Iha problema ruma karik, PNTL hamutuk ho Falintil Forsa Defesa Timor-Leste (F-FDTL) ne’ebe durante ne’e halo servisu koordenasaun, sei atúa, sei atende problema hirak ne’ebe ita bo’ot sira sente hasoru, hato’o mai informasaun klaru, fatin ne’ebe klaru ita nia polísia sira sei to’o iha fatin ida ne’eba tanba ita nia polísia no forsa iha terenu loron ba loron durante 24 oras nia laran prontidaun atu asegura situsaun em jerál iha kapital no mós iha munisipiu no iha fatin hotu-hotu hodi nune’e ita nia povu tomak bele hakmatek hodi akompaña prosesu kampaña ne’e tomak to’o ba rohan”, hatutan na’in ulun PNTL ne’e.
Komisariu Polísia Julio da Costa Hornay apela mós ba membru PNTL tomak no mós F-FDTL katak proibidu atu involve ann ou ka iha prátika politika iha kampaña ida ne’e ka iha ne’ebe deit, iha kualkér situasaun ne’e proibidu atu halo prátika politika, bele aprende politika maibé proibidu prátika politika iha terenu.
“Tanba ne’e husu ba membrus tomak, Ofisias sira, Komandante sira atu mantein nafatin orientasaun Komandu ne’ebe hato’o ona ba imi iha enkontru hamutuk ho Ofisias Superior sira iha Kuartél Jerál F-FDTL iha loron 9 liu ba, katak proibidu atu envolve ann iha prátika politika, hala’o imi nia misaun tuir Lei haruka, kompetensia ne’ebe maka Lei fó ba ita ida ne’e maka ita hala’o ho responsabilidade másimu ba ita nia povu doben Timor-Leste ida ne’e”, hateten Komisariu Polísia ne’e.
Media PNTL.
