Dili, Komandu Polísia Nasional Timor-Leste (PNTL) apela ba ema ou grupu husi organizasaun ka partidus politiku sira ne’ebe maka hakarak atu kria instabilidade iha rai ida ne’e.
Liu husi Konferensia Imprensa segunda-feira (05/06) ne’e, Segundu Komandante Jerál PNTL Komisariu Polísia Pedro Belo hateten lori Komandu PNTL nia naran, atu fó sai informasaun ne’ebe ita hotu akompaña katak orseik iha ita nia aman no ita nia maun sira ne’ebe fó sai liafuan kroat ba públiku.
“Tanba ne’e maka PNTL atu avizu deit ba ema hotu-hotu katak, ita hotu hatene katak ema hotu iha diferensia opiniaun ne’ebe maka mosu iha organizasaun ka partidu politiku, husu atu maun no aman sira buka malu atu resolve ho ulun malirin no labele lori povu, labele lori fali militante hodi ameasa malu, tanba ita hotu lakoi atu situasaun sira ne’e atu akontese tan ne’ebe maka akontese ona iha pasadu”, tenik Segundu Komandante Jerál PNTL ne’e.
Komisariu Polísia ne’e afirma tan katak tanba ne’e PNTL iha prínsipiu ida katak atu avizu ba ema hotu-hotu moris hakmatek, idak-idak lao ho ninia aktividade, hanesan ita hotu akompaña katak eleisaun remata ona, povu tomak ezerse ona nia direitu iha loron 21 fulan Maiu liu ba no oras dadaun povu tomak entrega ona ba lideransa sira oinsa maka atu forma governu ne’ebe maka sei tuir mai.
“No oras ne’e dadaun ita hotu sei akompaña dezisaun ne’ebe maka sei hatu’un husi Tribunal Rekursu, tanba ne’e maka oras ne’e dadaun ita hotu akompaña katak iha ita nia ema balun fó sai iha Media Sosial ho liafuan ne’ebe maka kroat tebes-tebes hanesan ema hotu preukupa, nune’e mós parte seguransa preukupa, tanba ne’e avizu katak PNTL sei la tolera kualkér auto krime ne’ebe maka sei mosu mai no la tolera ba ema sira ne’ebe maka hakarak atu masa mai iha Dili sem iha koñesimentu”, afirma Komisariu Polísia ne’e.
Segundu Komandante Jerál PNTL ne’e salienta tan katak kualkér se deit maka hakarak atu halo konsentrasaun ema ka masa mai iha Dili tenke iha lisensa. Tanba ita iha Lei demonstrasaun mós hateten katak antes halo demonstrasaun tenke fó uluk koñesimentu ba iha parte seguransa nian. Tanba ne’e ami husu katak kualkér se deit maka hakarak estraga estabilidade ida ne’e, PNTL sei la toleransia ba ida ne’e.
“Tanba ne’e liu husi Konferensia Imprensa ida ne’e, ami foti prínsipiu ida katak PNTL garante seguransa ba iha komunidade hotu, ba ita nia povu tomak no husu mós ba iha povu tomak atu labele konsumu informasaun ne’ebe maka ema balun fó sai kona-ba atu organiza masa tun mai Dili, kuandu tama mai Dili ita hotu akompaña katak tenke mai hasoru uluk parte seguransa”, hatutan Segundu Komandante Jerál PNTL ne’e.
Tanba ne’e maka parte seguransa aviza ba ema hotu-hotu katak bele iha diferensia politika, bele diferensia opiniaun ou saida deit, maibé buka malu atu resolve, maibé labele lori povu atu sai vítima fali. Ita hotu lakoi atu mosu problema, tanba agora ita hotu hakarak maka povu tenke moris hakmatek, ita hotu hakarak dezenvolvimentu, laos ema atu kria fali instabilidade iha ita nia rai ida ne’e.
Media PNTL.
