Dili, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa kinta-feira (22/02) ne’e hala’o vizita servisu dahuluk ba iha Komandu PNTL munisipiu Dili hodi halo enkontru ho Komandante Munisipiu ho nia estrutura sira no hato’o orientasaun Komandu nian ba membru sira.
Hafoin hala’o enkontru ho Komandante Munisipiu no nia estrutura tomak, ba jornalista sira Komisariu Jerál Polísia Henrique da Costa hateten iha enkontru ne’e hato’o mós mensagem husi Prezidente Repúblika no Primeiru Ministru ne’ebe hato’o liu husi Enkontru Konsellu Superior Defesa no Seguransa nian kona-ba prestasaun servisu PNTL nian, ita hatutan ba iha Komandante sira ho nia estrutura nune’e hodi kontinua ba membru sira atu mantein servisu diak ne’ebe durante tinan 2023 hala’o ona no ita husu atu bele halo diak liu tan.
“Buat prinsipal ida maka ne’e, tenke hakbesik ann liu ba tan komunidade no atendimentu ba ita nia komunidade tenke ho professional, kuidadu mós ho ita nia linguagem tenke nafatin respeita ita nia komunidade sira, buat ne’ebe ita orienta ba sira atu halo diak liu tan maka vizita ba iha ita nia komunidade, eskola, universidade sira hodi sensibiliza kona-ba Lei sira ne’ebe maka iha”, esplika Koamndante Jerál PNTL ne’e.
Komisariu Jerál Polísia ne’e salienta tan katak ida ne’e mós parte husi Prevensaun Krime, Asidente Tráfiku no Violasaun ba iha Kódigu Estrada ninian, tanba dadus ne’ebe maka ita iha katak iha tinan 2023 ne’e, iha sidadaun hamutuk 86 maka lakon sira nia vida tanba konduz transporte (Kareta & Motor) ne’e la tuir regras, ikus mai hamosu asidente tráfiku.
“Ita mós husu ba sira atu nune’e hala’o servisu nafatin mantein disiplina, mantein servisu tuir Orientasaun ne’ebe maka Komandu fó, respeita Kadeia do Komandu atu nune’e buat ruma mosu sempre pasa tuir liu husi sira nia Komandante, nune’e kontinua ba iha Komandu Jerál atu nune’e bele responde ka fó solusaun ba iha difikuldade ka situasaun sira ne’ebe maka sira enfrenta”, hatutan Komisariu Jerál Polísia ne’e.
Autoridade másimu instituisaun Seguransa ne’e afirma tan katak enkontru ne’e mós Komandante Munisipiu aprezenta katak iha munisipiu Dili ne’e identifika fatin risku lubuk ida, ne’ebe maka la se’es husi buat ne’ebe Servisu Informasaun Polísia ninian aprezenta ba ita. Husu ba sira atu nune’e wainhia tun ba terenu, identifika nafatin autor sira ne’ebe sempre kria problema iha bairu-bairu, nune’e Polísia bele foti medida identifikasaun ruma atu nune’e hodi hatene lolos, bele mós halo komunikasaun ho Ministeriu Públiku (MP) atu bele prosesu.
“Infrastrutura ba iha Komandu munisipiu Dili ninian nune’e mós ba iha eskuadra sira hanesan Cristo Rei, Nain Feto no Vera Cruz, ita nia eskuadra Dom Aleixo foin remata ona, hein atu bele utiliza deit, ida ne’e sai hanesan prioridade Komandu no Governu ninian liu husi Ministru Interior, ekiap tékniku sira hala’o hela ninia prosesu, tuir informasaun husi Komandante munisipiu katak iha semana kotuk sira mai halo ona teste ou foti sampel rai nian hodi hatama laboratoriu hare’e estrutura rai nian, oinsa bele halo Komandu munisipiu Dili ho kualidade”, hakotu Autoridade másimu instituisaun Seguransa ne’e.
Iha sorin seluk, Komandante Komandu PNTL munisipiu Dili Superintendente Xefe Polísia Orlando Gomes hateten Vizita servisu Komandante Jerál nian mai iha Komandu Munisipiu Dili hanesan oportunidade diak ida atu nune’e Komandu bele aprezenta preukupasaun no nesesidade sira ne’ebe ita kestiona liu husi aprezentasaun ne’ebe hato’o ona ba Komandante Jerál PNTL.
“Espera katak preukupasaun no mós nesesidade ne’ebe Komandu presiza tau atensaun no difikuldade sira hanesan transporte, kondisaun infrastrutura edifisiu Komandu ninian no mós eskuadra sira, ohin iha aprezentasaun ita hato’o hotu ona, difikuldade seluk ne’ebe ita hasoru maka radio komunikasaun ne’e presiza apoiu maka’as atu bele halo transmisaun komunikasaun diak hodi halo atendimentu ba ita nia komunidade sira”, informa Komandante Komandu PNTL munisipiu Dili ne’e.
Vizita Servisu dahuluk iha Komandu PNTL munisipiu Dili ne’e, Komandante Jerál PNTL akompaňa husi Segundu Komandante Jerál Komisariu Polísia Pedro Belo, Komandante Komandu Administrasaun Nasional Superintendente Xefe Polísia Natersia Martins, Diretur Justisa no Disiplina Superintendente Xefe Justino Menezes no Inspetúr Jerál Superintendente Xefe Polísia Jorge Monteiro.
Marka prezensa mós Prezindente AESPNTL Manuela de Araújo no vizita ne’e simu direita husi Komandante Komandu PNTL munisipiu Dili ho nia estrutura Komandu munisipiu. Media PNTL.
