Maliana, Komandante Jerál Polísia Nasional Timor-Leste (PNTL) Komisariu Polísia Faustino da Costa iha segunda-feira (18/01) akompaña husi Komandante Komandu Operasaun Superintendente Xefe Pedro Belo hala’o vizita servisu ida ba munisipiu Bobonaro postu administrativu Maliana hodi hare’e besik liu tan seguransa iha area fronteira liga ho situasaun Pandemia COVID-19 ne’ebe ninia númeru sae maka’as iha rai ketan Indonesia-Atambua. Objetivu husi vizita ne’e maka atu fó orientasaun balun ne’ebe mai husi parte governu ba Komandu PNTL munisipiu Bobonaro oinsa maka atu asegura seguransa iha fronteira nian.
Komandante Jerál PNTL Komisariu Polísia Faustino da Costa iha ninia intervensaun ba enkontru ne’ebe hala’o iha Komandu PNTL munisipiu Bobonaro hateten ohin oportunidade diak ida hodi mai iha ne’e hodi fahe informasaun no oinsa ba oin ita nia servisu hamutuk hodi prevene Pandemia surtu COVID-19 ninian, oinsa ita hamutuk salva ita nia povu, ita nia komunidade no salva ita nia maluk sira hotu.
“Hanesan ita hotu hatene katak ita tama ona ba Estadu Emergensia (EE) ba dala-sia ninian ne’ebe hahu’u iha loron 3 fulan Janeiru sente katak todan oituan tanba suspende aktividade lubuk ida hanesan eskola la lao, misa iha igreja mós laiha, iha mós aktividade lubuk ida seluk ne’ebe labele lao”, tenik Komandante Jerál PNTL ne’e.
Komisariu Polísia akresenta tan katak hare’e ba situasaun iha rai laran liu-liu ba númeru moras COVID-19 komesa menus maka iha semana kotuk (sexta-feira) iha fila fali alterasaun ida, hafoin Konsellu Ministru altera ou hamamar oituan regras EE sira nian ba dala-sia maibé iha tempu ida hanesan ita nia Konsuladu Timor nian iha nasaun Indonesia liu-liu iha parte osidental aktualiza ba ita kona-ba situasaun ita nian iha parte tasi sorin ne’ebe fó risku tebes-tebes ba ita rasik iha Timor-Leste.
“Hakarak agradese ba Prezidente Autoridade ho nia ekipa tomak ninia esforsu tomak durante ne’e katak ita presija servisu hamutuk nafatin, reforsa liu tan laos deit iha parte Bobonaro nian maibé tantu mós iha munisipiu Covalima no mós iha Oecusse”, afirma Komisariu Polísia ne’e.
Iha biban ne’e, lider komunitaria sira munisipiu Bobonaro nian pronto nafatin atu servisu hamutuk ho Komandu PNTL munisipiu Bobonaro nian iha âmbitu prevensaun ba Surtu COVID-19 nian no mós asegura seguransa iha area fronteira.
Hola parte iha enkontru ne’e Komandante Jerál PNTL Komisariu Polísia Fautino da Costa Komandante Komandu Operasaun Superintendente Xefe Pedro Belo, Prezidente Autoridade munisipiu Bobonaro, Autoridade Postu, Xefe Suku no estrutura tomak Komandu PNTL munisipiu Bobonaro nian. Media PNTL.
