Liquiça_ Membru Komandu Polísia Nasional Timor-Leste (PNTL) Munisipiu Liquiça ne’ebe maka iha pasadu envolve an iha aktividade Grupu Arte Marsias (GAM) no Grupu Arte Rituais (GAR) sexta-feira (16/02) ne’e ofisialmente entrega atributu GAM no GAR ba Governu liu husi Ministeriu Interior (MI).
Ministru Interior (MI) Francisco Guteres hafoin serimonia entrega atributu GAM no GAR iha Komandu PNTL munisipiu Liquiça ba jornalista sira hateten lori Governu nia naran hakarak agradese ba Komandu PNTL, ba Komandu munisipiu liu-liu membru sira ne’ebe maka voluntariamente mai entrega sira nia atributu tanba sira hakarak atu servi los deit Estadu liu husi Polísia Nasional Timor-Leste (PNTL), agradese ba sira no kongratula sira.
“Aktividade ne’e, ita halo ida ne’e hanesan exemplu husi munisipiu Liquiça atu munisipiu seluk halo tuir, agora ba oin sei hanoin atu halo tan iha munisipiu Baucau no munisipiu seluk lao nafatin, ida ne’e atu hatudu katak Polísia maka ida ne’e, ami laos pertense ba grupu ida ka grupu seluk maibé ami pertense ba Estadu tanba ami ne’e Estadu nia ema, ida ne’e maka sira hakarak hatudu ba ema hotu”, informa Ministru Interior (MI) ne’e.
Membru Governu ne’e apela nafatin ba membru PNTL tomak liu-liu ba sira ne’ebe maka seidauk entrega atributu ka mai atu atu halo deklarasaun hodi husik GAM no GAR sira ne’e, hau enkoraja sira atu bele mai hato’o. Tanba iha Polísia, ita iha Regra ida katak labele asosia ka tama iha kualkér grupu ne’ebe maka lori instabilidade no problema mai ita nia nasaun.
“Wainhira maka hetan sira iha ne’eba, prosesu oin seluk ona tanba sé sira mai ho voluntariamente no mai ho deklara katak sira hakarak desvinkula sira nia an ka sai husi grupu sira ne’e hotu, ne’e Estadu apresia tebes no sira mantein nafatin iha Polísia, katak sira hili Polísia tanba ita husu ba sira, imi hakarak hili Polísia ka hili GAM no GAR maibé membru sira ne’ebe ohin entrega sira nia Atributu ne’e, katak sira mantein hodi hili sai nafatin membru PNTL atu servi povu ida ne’e, husu ba membru seluk atu halo tuir ida ne’e”, hatutan Membru Governu ne’e.
Ministru Joventude no Desportu, Arte no Kultura, Nelio Isac Sarmento iha nia diskursu hateten katak, “ohin ita hamutuk iha ne’e atu akompaña asiste akta husi intrega atributu arte marsiais, ne’ebe fulan hirak liu ba kotuk ita nia Governu hasai resolusaun hodi suspende Arte Marsiais. Rejolusaun hodi suspende aktividade Arte Marsiais ne’e hanesan atu fo lembra ba ita hotu hodi halo ezame de konsensia ba ema hotu-hotu hahu kedas husi membru arte marsiais no mos Instituisaun sira ne’ebe iha relasaun ho arte marsiais”,.
Ministru Joventude no Desportu agradese ba Ministru Interior no mos Komandante Jeral PNTL, tamba akta ne’ebe Komandu PNTL hatudu atu fo lembra ba kofiansa povu nian ba nia instituisaun Seguransa.
“Ita hotu-hotu hamrik iha ne’e atu kumpri hodi hateten ita lakoi hare tan ita nia povu mata ben suli no sasan ruma estragus tamba deit aktividades asaun arte marsiais sira nian. Hau hakarak hateten katak, tuir lolos arte marsiais ne’e nia dutrina diak ba ita, maibe dala ruma ita involve demais haluha tia servisu prinsipal ne’ebe ita tenke halo, ita mos hakarak hare ita nia instituisaun sira liliu seguransa sira iha forsa ne’ebe diak hodi atua aktu kriminal sira ne’ebe mosu iha ita nia rai”, dehan Ministru Nelio Isac Sarmento.
Hatutan Governante ne’e katak, responsabilidade ne’ebe Polisia iha atu asegura seguransa ”hau hanesan Ministru Joventude no Desportu agradese parabens ba membru sira ne’ebe voluntariamente hakarak intrega atributu arte marsiais no ita boot sira hakarak komunga lolos deit maka lei no orden hodi fo justisa, hodi fo lia los hodi defende ita nia povu sira ne’ebe hetan sofrementu husi ema ne’ebe hakarak estraga ita nia nasaun liu husi krimi ne’ebe sira halo, tamba ne’e polisia merese duni atu toma medidas”.
Iha fatin hanesan Komandante Jeral PNTL Komisariu Jeral Henrique da Costa ba Jornalista sira hateten katak, depois ita realiza parada iha loron 17 fulan Dezembru tinan 2023 iha Palacio Governu Komandu orienta kedas ba iha Komandu Munisipiu sira hodi identifika membru sira ne’ebe involve iha Grupu Arte Marsiais no Grupu Arte Rituais ne’ebe governu suspende.
Komandu PNTL Liquica maka prepara uluk ninia membru sira hodi realiza serimonia intrega Atributu GAM no GAR. “Ita nia planu ba Komandu PNTL Munisipiu husi Parte Leste ninian tantu Lautem, Viqueque, Baucau no Manatutu, ita bele realiza deit iha Komandu PNTL Munisipiu Baucau, depois ba iha rai klaran ninia hanesan Aileu, Ainaro no Manufahi ita sei realiza iha Komandu PNTL Munisipiu Ainaro, depois Ermera, Bobonaro no Covalima depois mak ita sei hare Munisipiu Dili no mos Kuartel Jeral rasik”, informa Komandante Jeral PNTL.
Komandante Jeral mos husu ba membru sira hare tuir ezemplu ne’ebe mak membru sira husi Komandu PNTL Munisipiu Liquica halo, se imi iha hanoin diak hodi fo dedika imi nia an tomak hodi servi Instituisaun ida ne’e hodi servi ita nia povu, husu atu nune’e atributu sira ne’e hodi mai intrega nune’e imi konsentra lolos ba iha servisu polisia ninian ho dignu no professional ba iha komunidade no mos hodi servi ita nia rai Timor Leste.
“Ba membru sira ne’ebe intrega ona sira nia atributu GAM no GAR komandu apresia ba sira, tamba sira halo tuir orientasaun komandu ninian no komandu sei la foti sansaun ruma ba sira”, dehan Komandante Jeral PNTL.
Komandante Jeral PNTL hatutan katak, ba membru sira ne’ebe lakoi koopera, komandu iha nia medida rasik, tamba governu nia desizaun mak boot liu se ita la kumpri ita atu kumpri los ba sé? Ita bele deside ita hakarak nafatin servisu iha Instituisaun PNTL ka ou ita hakarak atu servisu iha Organizasaun Arte Marsiais ne’ebe mak ita nafatin defende ba.
Atributu GAR no GAM ne’ebe Intrega husi Membru Komandu PNTL Munisipiu Liquica hamutuk 18 no Komandu RAEOA 1 total 19. Atributu hirak ne’e mak hanesan, PSHT 10, IKS Kera Sakti 3, KORK 1 no Arte Ritural (77) 5. Media PNTL.
