Dili, 07 fevereiru 2024 (SRP) – Programa Dezenvolvimentu Polisia Timor-Leste (sigla ingles;TLPDP) halo kolaborasaun ho Ministeriu Interior, hamutuk ho Komandu Jeral Polisia Nasional Timor-Leste (PNTL), hala’o seminariu ba daruak hodi koalia kona-ba oinsa bele eleva kuñesimentu motorista sira atu disiplina iha estrada publika.
Komandante TLPDP Superintendente Darren Booy, haktuir katak objetivu husi sorumutu ida ne’e maka atu aliña inisiativas dezenvolvimentu ne’ebe sai prioridade ba seguransa rodoviária nian iha futuru.
“Objetu estratejiku husi Planu Asaun ida-ne’e maka atu dezenvolve kampaña seguransa rodoviária, hodi eduka sidadaun sira respeita leis tranzitu inklui halo sensibilizasaun ba komunidade sira atu kumpri kodigu Estrada iha teritória nasional Timor-Leste tomak”, esplika Darren Booy, durante enkontru ne’e iha TLPDP Hudi Laran.
Nia dehan, TLPDP sei kontinua apoiu nafatin Ministeriu Interior hodi dezenvolve kampaña seguransa rodoviária ba publiku sira no wainhira hetan ona aprovasaun final maka sei hakat ona ba implementasaun iha tempu besik.
“Ami iha vontade tomak hodi apoiu siklu ne’e para reforsa ka dezenvolve modelu seguransa rodoviaria nian. Tan ne’e publikasaun liu hosi media no panfletu sira ne’e tenke ho konsistensia nune’e publiku sira bele komprende”, salienta.
Darren hateten, ba semana dahuluk sei servisu hamutuk hodi fo sai panfletu liu hosi mensajen badak ba komunidade sira, hafoin halo mos kampaña liu hosi relasaun publika hodi fo sai nafatin mensajen atu hasa’e kuñementu publiku nian inklui infrator sira.
“Panfletu sira ne’e bele sai hanesan alerta publiku, karik lakoi halo tuir aplika multa. Hau hatene katak atividade sira ne’e dalaruma halo ona maibe presija halo beibeik tanba neneik sei konsistensia no muda ema nia mentalidade”, subliña.
Lideransa TLPDP ne’e rekuñese planu ida ne’e importante tebes tanba iha ligasaun ho eduksaun no alerta ba komunidade em jeral, tanba ne’e presija iha asaun klaru.
“Konseitu ne’e dalaruma foun ba PNTL no Relasaun Publika maibe ida ne’e simples no efetivu. Dala ruma ita hare ema para dupla iha estrada hodi kauza ba trafiku no ema wain la preokupa maibe presija muda sira nia mentalidade”, tenik tan.
Komandante Darren afirma, TLPDP bele apoia Tranzitu hodi sosializa kodigu estrada ao mesmo tempu halo sinergia ho DNSR hodi halo revizaun no atualizasaun ba enkuadramentu legal sira, nune’e bele responde ba evolusaun tranzitu iha capital Dili ne’ebe dinamiku tebes, no-mos ajuda organiza motorista sira nia komportamentu iha estrada publiku.
Entretantu enkontru ne’e hetan partisipasaun hosi Komandante Komandu Operasaun PNTL, Superintendente Xefi Polisia Jose Soares, Diretora Nasional Seguransa Rodoviaria (DNSR) Ministeriu Interior Domingas Maia Barros, Komandante Tranzitu Nasional, Komandante Tranzitu Munisipiu Dili, inklui asesor sira hosi TLPDP no-mos Ministeriu Interior nian.
Media Serviços Relações Públicas
