Aileu, Ministru Interior Francisco Guterres, Ph.D, akompaña husi Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa, iha loron 05 fulan Outubru tinan 2023 hala’o vizita servisu ba iha Komandu PNTL munisipiu Aileu hodi hare’e kondisaun ne’ebe maka durante ne’e Komandu hamutuk ho membru sira hasoru.
Iha ninia intervista Ministru Interior hateten hafoin simu tiha kargu, foin maka mai halo vizita hodi hare’e kondisaun nune’e bele fó motivasaun ba membru sira atu bele servisu ho diak.
“Hau mai fó motivasaun ba sira atu servisu diak liu tan mezmu iha kondisaun ne’ebe ladun diak ba sira maibé sira mantein firme, mantein no eleva sira nia esperitu nafatin atu servi nasaun no rai ida ne’e ho povu ida ne’e, tanba ne’e maka hau ezize ba sira atu mentein servisu ho diak”, tenik Ministru Interior.
Membru Governu ne’e salienta tan katak hau mai atu hare’e sira nia kondisaun, tanba ita ezize sira servisu, ita rasik mós tenke iha obrigasaun liu-liu Estadu rasik tenke kria kondisaun ba sira, tanba ne’e hau mai atu hare’e oinsa nusa maka kria kondisaun ba sira.
“Kondisaun mínimu ne’e la sufisiente ba sira atu halo servisu ho diak, entaun Estadu tenke tau atu investe tan saida, investe infrastrutura ami prepara atu hare’e hela sira nia kuartél Komandu nian, ami hare’e no luta hodi prepara hela atu nune’e tinan oin ita bele hahu’u ona konstrusaun Kuartél ida ba Komandu munisipiu Aileu no ita rehabilita sira nia fatin ne’e, inklui eskuadra hodi sira bele hala’o servisu ho diak”, hatutan Ministru Interior ne’e.
Governante ne’e subliña tan katak além de infrastrutura, governu sei kria tan kondisaun ba ekipamentus no farda ba sira atu hala’o kna’ar ho diak. Kondisaun hirak ne’e, parte Ministeriu prevê ona iha Orsamentu ba tinan 2024.
Iha fatin hanesan, Komandante Komandu PNTL Munisipiu Aileu Superintendente Polísia Sebastião Alves Quintão, haksolok ho vizita ne’e hodi bele motiva diak liu tan nia membru sira. Inklui aprezenta mós progresu servisu no dezafius ne’ebé mak durante ne’e sira hasoru.
“Ami agradese tebes hetan vizita espesiál hosi Ministru Interiór mai iha fatin ne’e, hanesan Komandante hau kontente tanba ho vizita ne’e bele fó motivasaun diak liu tan ba membru PNTL Aileu nian iha ne’e atu aprezenta mós preokupasaun husi membru balun mak kona-ba ekipamentu no rekursu umanu ne’ebe maka limitadu”, tenik Komandante Superintendente Polísia Sebastião Alves Quintão, perante halo aprezentasaun ba Ministru Interior iha salaun enkontru Komandu PNTL Munisípiu Aileu.
Iha biban ne’e, Superintendente Polísia ne’e relata mós kazu insidente no asidente tinan kotuk inklui tinan 2023, hahú hosi fulan Janeiru to’o Setembru nian.
“Kazu iha fulan Janeiru to’o ohin loron totál kazu hamutuk 67, kazu sira ne’e aprezenta ona ba Ministériu Públiku (MP), 31 rezolve família no kazu seluk sei pendente hodi hein prosesa no balun presiza kompleta dokumentu ba MP, iha mós kazu tránzitu ne’ebé halo aktividade rodoviária nian, infratór sira selu koimas ne’ebé tama kofre Estadu iha tinan kotuk rihun tolu resin, husi fulan Janeiru to’o ohin loron iha dolar 227”, salienta Komandante PNTL munisipiu Aileu ne’e.
Hatan ba preokupasaun hirak ne’e, MI hateten agora daudaun Governu hahu’u halo modernizasaun ba PNTL bazeia ba planu prioridade Governu nian maka reforsa seguransa iha fronteira, infraestrutura, tuir mai reve Estatutu Pesoal PNTL nian. Media PNTL.
