News

DILI- Membru Polisia Nasional Timor Leste hamutuk nain 9 ne’ebe kompostu husi Komando PNTL Distritu Dili, no Centru Formasaun Polisia tuir formasaun kona ba oinsa sai kondutor ne’ebe diak no oinsa halo manutensaun ba karreta iha Centru Formasaun Polisia Comoro, Tersa feira 02 Setembru 2014. Formasaun ne’e hala’o durante semana 1 iha inisiu fulan Setembru 2014, no sei kontinua ba segundu no terseiru turnu. “Formasaun ne’e hanesan primeiru turnu ne’ebe PNTL hala’o liu husi kooperasaun ho Timor Leste Police Development Program (TLPDP) hodi loke formasaun ida ne’e atu fo koñesimentu matenek ba membru PNTL sira kona ba oinsa sai kondutor ne’ebe diak tuir regras, halo manutensaun baziku ba karreta, la presiza kiik boot hotu-hotu ba iha ofisina, maibe ita bele halo buat ne’ebe ita bele”. Informa Komandante Centru Formasaun Polisia, Superintendente Xefe Julio Hornai. Instruktor ka formador mai husi membru PNTL hamutuk nain 6 ne’ebe TLPDP treina ona , no iha formasaun ne’e membru PNTL nain 6 ne’ebe hetan ona treiamentu husi TLPDP mak fo fali treinamentu ba nia maluk PNTL sira, no TLPDP so fo apoiu de’it. Instruktor sira husi membru PNTL ne’ebe TLPDP prepara ona mak hanesan; ho deviza Sarjentu hamutuk nain 4 mak Sjt. Norberto de Carvalho, Sjt. Laurindo Fernandes Ferreira, Sjt. Eurico dos Santos, Sjt. Juvinal Tilman, no ho deviza Ajente Xefe iha nain 2 mak Ajt. Xefe Norberto Rodrigues Pereira, no Ajt. Xefe Flavio de Araujo da Costa. Superintendente Xefe Hornai hatutan, iha primeiru etapa ne’e ba deit partisipante membru PNTL nain 9 tamba haree ba kuantidade karreta ne’ebe mak TLPDP fornese iha deit karreta 3 tamba ne’e mak nain 9 uluk, no tuir mai formasaun ne’e sei kontinua fali ba membru PNTL sira seluk. “Ha’u espera katak bainhira sira hetan matenek ida ne’e, sira bele utiliza iha servisu nomos bele fo apoiu ba nia maluk PNTL seluk para hotu-hotu iha koñesimentu oinsa atu bele lori karreta ho diak, oinsa atu kuidadu karreta, nomos oinsa kumpri regras ho diak”. Apela Komandante CFP Julio Hornai. Iha formasaun ne’e hetan mos vizita husi Primeira Dama Isabel Ferreira hanesan mos Prezidente ekipa tekniku apoiu PNTL hateten “formasaun ne’e importante tebes ba PNTL sira atu hala’o, no husu ba ita boot sira tenke aprende didiak no aban bainrua sai duni kondutor ne’ebe professional, kumpri sinais tranzitu, kuidadu karreta, no respeita ema la’o ain, no Polisia mak tenke sai duni ezemplu no matadalan ne’ebe di’ak ba ema seluk liu-liu ba komunidade sira”. Midia PNTL.

DILI- Timor Leste Police Development Program (TLPDP) oferese karreta 3 (tolu) ho modelu “Land Cruiser” ba Centru Formasaun Polisia Comoro hodi hala’o pratika ba kondutor no manutensaun baziku ba karreta PNTL. Objetivu TLPDP oferese karreta 3 ne’e ba Polisia Nasional Timor Leste (PNTL) liu-liu Centru Formasaun Polisia tamba durante ne’e tuir TLPDP nia observasaun ba membru PNTL ne’ebe lori karreta, balun seidauk hatene didiak kona ba oinsa kuidadu karreta, liu-liu oinsa halo manutensaun baziku ba karreta hodi depende deit ba ofisina PNTL nian. Molok atu fo formasaun ba membru PNTL seluk, TLPDP fo ona formasaun no pratika ba Instrutores ka Formador sira husi membru PNTL liu-liu membru Centru Formasaun Polisia Comoro hodi sai formador ba kondutor no manutensaun baziku ba karreta, no iha inisiu fulan Setembru ne’e Formador hamutuk nain 6 (neen) ne’ebe TLPDP treina ona, sira mak sai fali treinador ba membru PNTL nain 9 ne’ebe tuir formasaun ba primeiru turnu. Iha fatin hanesan, Komandante Centru Formasaun Polisia Superintendente Xefe Julio Hornai hateten, tuir loloos formasaun kona ba kondutor no manutensaun baziku ba karreta ne’e hala’o ona bainhira Ajente Polisia foun sira tama iha Akademia Polisia tamba formasaun ne’e mos iha nanis ona iha kurríkulu Formasaun Polisia nian hodi sai hanesan lisaun ida ba membru PNTL foun sira, maibe tamba laiha karreta ne’ebe atu uza ba pratika mak durante ne’e formasaun ne’e la hala’o iha periodu formasaun nian. Komandante Julio Hornai hatutan, TLPDP fornese ona karreta 3 ne’e, ba oin formasaun ne’e sei kontinua hala’o nafatin, liu-liu ba membru Polisia foun sira atu hetan formasaun ida ne’e, tamba ne’e mos lisaun ida iha kurríkulu formasaun PNTL nian. Mídia PNTL.      

DILI – Primeira Dama Isabel Ferreira nu’udar mos Prezidente de Apoiu Tekniku ba PNTL, Tersa, 02 Setembru 2014 ho nia ekipa hala’o vizita ba Sentru Formasaun Polísia,Comoro hodi haree direitamente ba kondisaun Sentru Formasaun Polísia hanesan fasilidade, treinamentu ba Polísia sira liu-liu prosesu rekrutamentu ba kandidatu foun ba PNTL. Iha vizita ne’e, Prezidente ekipa tekniku apoiu PNTL Isabel Ferreira ho nia kometiva, simu direita husi Komandante Sentru Formasaun Polísia, Superintendente Xefe Julio Hornai no akompaña mos Asesora TLPDP ho nia membru sira. Iha vizita ne’e, Primeira Dama ho ekipa haree direita ba kandidatu sira ne’ebe atu tama Polísia tuir hela testu fíjiku hanesan halai hale’u kampu, sukat altura, no seluk tan. Vizita mos aula treinamentu teoria, aula treinamentu teoria ba kondutor no manutensaun ba karreta, aula treinamentu ba investigasaun, no aula TLPDP. Hafoin vizita, Komandante Sentru Formasaun Polísia, Superintendente Xefe Julio Hornai hateten, vizita husi Prezidente ekipa tekniku apoiu PNTL ne’e nia objetivu atu haree prosesu rekrutamentu la’o loos ka lae, atu nune’e bainhira iha aban bainrua publiku ruma la satisfas ho prosesu rekrutamentu husi PNTL nian katak prosesu la’o la justu, Prezidente ekipa tekniku apoiu PNTL iha ona hanoin atu bele fo informasau klaru ba publiku kona ba prosesu ne’e. Mídia PNTL    

DILI– Unidade Espesiál Polísia (UEP) halo selesaun ba Ajente Polísia hamutuk nain 40 (hatnulu) husi Unidade Espesiál Polísia ne’ebe kompostu husi Batallaun Ordem Públika (BOP), Korpu Seguransa Pesoal no Pelotaun de Apoiu Servisu, hodi konkore ba vaga 35 (tolunulu resin lima) hodi sai membru ba Grupu Operasaun Espesiál (GOE) iha UEP. Selesaun ne’e hala’o liu husi teste fíjiku, saúde, no entrevista ba kandidatu foun sira ne’ebe ho nia deviza Ajente Polísia atu konkore ba vaga refere iha Sentru Formasaun Polísia Comoro-Dili, durante semana ida hahú husi loron 1 to’o 5 Setembru 2014. “UEP loke vagas ba membru GOE foun ba tinan 2014, membru GOE foun ne’e labele transfere de’it maibe tenke liu husi prosedimentu no regras, tamba ne’e mak Komando Jeral autoriza hodi loke vaga ba membru GOE foun ne’ebe agora dadauk halo selesaun ba Ajente sira, kuaze 40 pessoas mak konkore ba vaga 35 ida ne’e, sira hahu liu husi teste fíjiku, médiku no entrevista.”informa Komandante Kompañia Operasaun Espesiál, Superintendente Asistente, Euclides Belo. Komandante GOE Euclides hatutan, entre kandidatu sira ne’e, ida ne’ebe mak iha fíjiku, no kapasidade di’ak liu mak bele passa no sei ba tuir tan kursu ka treinamentu GOE nian durante fulan 3 (tolu) iha Rairobo, Distritu Bobonaro tinan ne’e. Ajente sira ne’ebe mak konkore ba vaga ne’e la’os mai husi Unidade seluk maibe sira ne’e hetan graduasaun ona iha tinan 2013 no durante ne’e hala’o sira nia kna’ar ona iha Unidade Espesiál Polísia. Kandidatu sira ne’ebe la passa iha teste ne’e, sei fila fali ba sira nia sub unidade ne’ebe sira servisu antes ne’e, hanesan BOP, CSP no Pelotaun de Apoiu Servisu. “Ha’u nia mensajen ba kandidatu sira katak tenke konkore ho sentidu spiritual, sentidu Polísia nian, espiritu Nasionalizmu, tamba GOE nu’udar forsa epesial ida Nasaun nian, atu konkore ba Polísia Espesiál, ita tenke preparadu em termus de fíjiku, skill no kapasidade.”apela Komandante Euclides Belo. Entertantu teste fíjiku no entrevista hala’o iha Sentru Formasaun Polísia Comoro, nomos iha Taci tolu, no teste médiku hala’o iha Klínika PNTL iha Kuartel Jeral PNTL Caicoli, Dili. Mídia PNTL

DILI – Ajente Polísia hamutuk 30 pessoas tuir treinamentu kona-ba asuntu jéneru ninian hodi nune’e bele atende kazu violénsia bázeia ba jéneru tuir lei kontra violénsia doméstika no violénsia seksual. Treinamentu ne’e hala’o durante loron lima Segunda to’o Sesta, (25-29 Agostu 2014) iha Sentru Formasaun Polísia. Komandante Seksaun Jéneru PNTL, Superintendente Assistente Umbelina Soares hatete, treinamentu ne’e importante tebes ba Ajente Polísia foun sira hodi nune’e iha kna’ar lorloron bele intende didiak asuntu jéneru bázeia lei kontra violénsia doméstika. “Ajente sira presiza hatene ba isu jéneru ninian hodi nune’e bele atendementu diak ba kazu sira ne’ebe hasoru feto no labarik sira, tanba agora dadaun ne’e kazu hasoru feto no labarik sira iha uma laran mak domina liu.”dehan Superintendente Assistente Umbelina Soares. Iha fatin hanesan Diretóra NGO Ba Futuru, Lika Marcal dehan, treinamentu ne’e iha pakote ida ne’ebe kobre ba asuntu direitus umanus, igualdade jéneru nomos lei rezolusaun konflitus. Liu husi treinamentu ne’e sei hato’o rekomendasaun ba governu atu preve orsamentu espesiál ba PNTL iha Seksaun Jéneru ninian hodi nune’e polísia sira iha koiñesementu diak isu jéneru ninian liu husi formasaun. “Ami hala’o treinamentu ne’e ho PNTL sira, tanba polísia mak hala’o lei no orden ne’ebe sai ajente protesaun lei sira iha futuru,”dehan Lika. Abertura ba treinamentu ne’e partisipa husi Inspektur Jerál PNTL, Superintende Xefe Faustino da Costa, Diretór Dep. Justisa PNTL Superintende Xefe Carlos Jeronimo no Komandante Sentru Formasaun Polísia Superintende Xefe Julio Hornai, treinamentu ne’e realiza tanba servisu hamutuk entre PNTL Seksaun Jéneru ho Sosiedade Sivil Ba Futuru. Mídia PNTL

DILI – Liu husi implementasaun programa HAKOHAK Polísia ho Komunidade ne’ebe realiza iha 2012 to’o agora, Fundasaun Ázia halo konkluzaun katak, povu iha Timor Laran tomak iha 50% mak sei preokupa ho seguransa, sekarik ofisial PNTL atribui ba iha suku hotu-hotu populasaun 98% povu sente ona seguru. Asuntu ne’e hato’o husi Diretora Fundasau Ázia Susan Marx iha Segundu seminariu nasionál ba Polísiamentu Komunitária ho nia tema “Polísiamentu Komunitária iha nia implementasaun ba vizaun estratéjiku: Vizibilidade, Involvimentu no Profesionalizmu hodi kumpre filozofia PNTL” Sesta, (22/8/2014). Diretora Fundasaun Ázia hatutan, programa HAKOHAK lori ona kordenasaun ne’ebe efektivu no suporta ba ofisial polísia sira iha suku. HAKOHAK liu husi Komisaun Dirasaun Distrital (KDD) Konsellu Polísiamentu Komunitária (KPK) ajuda ona fó suporta ba ofisial polisia sira iha suku atu identifika no rezolve problemas ho suporta ko koperasaun husi komunidade sira. “Ami hare iha polísia balu nebeé proativu tebes ajuda hodi hamenus sentimentu inseguransa no promove estabilidade atu nune’e dezenvolvimentu bele kontinua la’o nafatin,”informa Marx. Xefe Departamentu Polísiamentu Komunitária, Superintendente Assistente Boavida Riberio hatete, segundu seminariu nasionál ne’e atu hatene rezultadu implementasaun programa ne’ebe mai husi premeiru seminairu ne’ebe realiza iha 2012. Rekomendasaun premeiru, oinsa bele akomoda servisu no koñesementu Polísiamentu Komunitária, presiza prezensa polísia nian iha suku hotu-hotu atu nune’e haklo’ot movimentu grupu ilegál no atu hasae fiar no konfiansa husi komunidade ba iha kna’ar polísia, estabelese Komisaun Dirasaun Distrital (KDD) no Konsellu Polísiamentu Komunitária (KPK) iha teritorriu laran tomak no hasae kapasidade Ofisial Polísia Suku (OPS), maske to’o agora OPS seidauk kobre suku hotu hare husi membru PNTL sei menus. Hare ba rekomendasaun hirak ne’e Komandu PNTL lansa estratéjiku ne’ebe hanaran Vizibilidade, Involvimentu no Profesionalizmu (VIP). Hamutuk ho parseiru Fundasaun Azia estabelese KPK 78, no KDD 7 husi Distritu 8. Tuir planu iha tempu badak sei loke tan KPK ba iha Distritu 3 mak hanesan, Distritu Cova-lima, Manufahi no Ermera. Tuir meius PNTL nian, iha Distritu Ainaro sei estabelese tan KPK 2, neé hatudu katak, KPK importante tebes iha komunidade ne’ebe sai parseiru hodi kontrola hamutuk iha área seguransa. Xefe Suku Soloi Kraik, Distritu Aileu Jose Domingos Pika hatete, Distritu Aileu mak premeiru estabelese Polísiamentu Komunitária ne’ebe iha pozitivu tebes prezensa polísia iha komunidade nia le’et, liliu ofisial polísia sira loroloron mai iha sede suku hodi buka dalan ba problemas iha suku laran. Tuir Xefe Suku Jose Pika, problema ne’ebe mak rezolve hodi involve polísia mak hanesan disputa rai, problema violénsia doméstika no problema entre joven sira. Xefe suku ne’e husu atu Komandu PNTL hari’i sede permanente ba OPS sira. “Hau fiar katak se OPS kobre hotu iha nasaun ne’e problema sei menus ba bebeik no ema hotu sei moris hakmatek,”presta Jose Pika. Segundu Seminairu Nasionál ne’e hetan apoiu husi USAID, Nova-Zelandia no Fundasaun Ázia. Programa HAKOHAK servisu hela ho PNTL hodi tulun institusionaliza konseitu Polísiamentu Komunitária iha Timor-Leste ne’ebe implementa Fundasaun Ázia ho apoiu orsamentu husi Ajensia Dezenvolvimentu Internasionál Estadu Unidus (USAID) no Programa Asisténsia Nova-Zelandia. Mídia PNTL  

DILI – Liu husi estabelesementu Departamentu Polísiamentu Komunitária ne’ebe koloka membru polísia ba iha komunidade nia le’et iha pasu pozitivu tanba hare ba estatístiku krime sira komesa menus, tanba polísia komunitária sira sempre halo aprosimasaun lorloron ho komunidade atu hadok-an husi krime. Asuntu ne’e hato’o husi Xefe Departamentu Polísia Komunitária Superintendente Assistente Boavida Ribeiro, iha ekontru evaluasaun servisu Komandu polísia Distritu sira hala’o ba programa jestaun Polísiamentu Komunitária Timor-Leste nomos projetu HAKOHAK ne’ebe marka prezensa husi parseiru sira mak hanesan, Nova-Zelandia, The Asia Fundation no JICA, iha Kuartel Jerál PNTL, Caikoli Kinta (7/8/2014). Enkontru ne’e prezidi husi Segundu Komandante Jerál PNTL, Komisáriu Polísia Afonso de Jesus Tuir Superintendente Assistente Boavida Ribeiro, objetivu enkontru ne’e hodi diskuti atividade recente polísiamentu Komunitária inklui atualizasaun (update) husi Komandante Distritu sira kona-ba susesu no dezafiu iha distritu ida-idak no relatoriu vizita ofisiais PNTL balun ba iha Noza-Zelandia nomos hare ba oportunidade hirak ne’ebe mosu ho relatoriu husi programa TLCPP no HAKOHAK ba pariudu fulan Abril to’o 30 Juñu 2014. Iha ekontru ne’e mos atu review servisu Polísia Komunitáriu ninian iha Distritu sira ne’ebe estabelese ona mak hanesan; Distritu Aileu, Manatuto, Baucau, Viqueque, Liquisa, Ainaro no Dili. “Polísia Komunitária loke dalan entre polísia ho komunidade hodi servisu hamutuk no rezolve problema krime nian, laran susar kona-ba krime fiziku no dizorden sosial ninian.”Xefe Departamentu Polísiamentu Komunitária salienta. Liu husi aprezentasaun, Komandante PNTL Distritu Baucau, Superintendente Xefe Jose Neto Mok informa, Distritu Baucau liu husi programa ne’e iha suku 10 mak hari’i ona Konsellu Polísiamentu Komunitária (KPK) no Funsiona Ofisial Polísia Suku (OPS) iha suku 49 husi total 5, iha OPS polísia sira ne’ebe halao kna’ar iha eskudra mak koloka ba, membru polísia balu hala’o servisu fatin rua, iha suku no eskudra. “Ami nia OPS sira iha koordenasaun diak ho xefe suku sira hodi sosializalei trafiku no impaktu husi droga no alkóliku.”dehan Superintendente Xefe Jose Neto Mok. Alende ne’e mos Komandante Liquisa, Superintendente Xefe Natercia Martins hatete, durante programa Polísia Komunitária iha Distritu Liquisa elementu polísia iha kapasidade diak koalia ho komunidade sira, liu husi programa polísia ho lider komunidade sira komesa rezolve problema, hanesan probelma disputa rai, kazu violénsia doméstika no kazu poligamia, kazu barak maka gora la to’o ba tribunal tanba polísia ho lider sira ativu rezolve ba kazu sira ne’e. Komandante TLCPP Komisáriu Jhon Rivers hatete, governu Nova-Zelandia orgullu ba progresu husi programa Polísiamentu Komunitária ne’ebe hala’o iha Timor-Leste, progresu ne’ebe hetan la ses husi esforsu membru polísia hotu ho vontade diak. Komandante TLCPP hatutan, polísia Nova-Zelandia sei nafatin ho Komandu PNTL hodi estabelese programa Polísiamentu Komunitária ba distritu sira ne’ebe seidauk. “Ami fiar ho relasaun servisu mak iha ona sei kontinua nafatin ba iha futuru ho diak liutan.”presta Komandante Rivers. Tuir planu, programa Polísiamentu Komunitária sei nafatin kontinua estabelese ba Distritu sira maka hanesan, Distritu Bobonaro, Cova-Lima, Manufahi, Ermera no Oecusse. Mídia PNTL  

  DILI – Membru Polísia Nasionál Timor-Leste (PNTL) nain 5 hetan promosaun, husi postu Inspektór ba Inspektór Xefe no husi Inspektór Xefe ba Superintendente Assistente, iha Kuartel Jerál PNTL-Caicoli-Dili, Sesta (1/08/2014). Liu husi Diskursu Komandante Jerál PNTL Komisáriu Polísia DR. Longuinhos Monteiro hatete, determina promosaun husi postu Inspektór ba Inspektór Xefe no husi Inspektór xefe ba bázeia ba kompetensia nebé iha tuir lei organika PNTL no lei promosaun nebé prepara husi Komandu Administrasaun Rekursu Umanu parese husi komisaun promosaun PNTL. Membru PNTL nain 5 ne’ebe hetan promosaun mak hanesan; Inspektór Xefe Eduardu Campus promove ba Superintendente Assistente husi Distritu Viqueque, Inspektór Xefe Abrão F. D. Quintas promove ba  Superintendente Assistente husi Unidade Espesiál Polísia (UEP), Inspektór Delfina da S. Mesquita promove ba Inspektór Xefe husi Sentru Formasaun Polísia, Inspektór Sabino Araujo Soares promove ba Inspektór Xefe husi Distritu Bobonaro no Inspektór Dária da C. Ximenes promove ba Inspektór Xefe husi Servisu Investigasaun Kriminál Nasionál Promosaun ne’e importante tebes ba Instituisaun PNTL hodi hasae kareira no kapasidade membrus sira, alende ne’e promosaun hodi koloka fali postu ba membru polísia balun ne’ebe mate husik hela kargu ne’e, exemplu membru polísia ida mate ho deviza Inspektór Xefe, hare ba ida ne’e tenki buka membru seluk enkaisa fila fali. “Hau lori Komandu PNTL fó parabens imi nain 5 mak hetan promosaun ne’e no ekoraza imi atu mantein servisu diak liutan iha imi nia distritu no unidade ne’ebe imi hala’o kna’ar ba,”apela Komisáriu Polísia DR. Longuinhos Monteiro Komandante Jerál PNTL hatutan, iha prosesu promosaun Komandu Jerál, liu husi Departamentu Rekursu Umanus prepara rekejítus kriteriu ba atividades nomos kompartamentu membrus sira. Komisáriu Polísia DR. Longuinhos informa, iha Setembru nia laran sei iha promosaun deviza nomos iha rotasaun servisus iha Departamentu no Unidade. Iha okaziaun ne’e Komandante Jerál PNTL DR. Longuinhos ezije ba Departamentu Rekursu Umanus atu iha prosesu promosaun deviza labele hamosu diskriminasaun. “Husu atu iha promosaun deviza tenke bazeia ba kriteiru no atividades membru ninian atu nune’e labele mosu diskriminasaun,”apela Komandante Jerál PNTL. Mídia PNTL

DILI – Relasiona ho komunikasaun liu husi liña emerjensia 112 ne’ebe dala barak ema balun uza la tuir ninia funsaun ne’ebe loos, Komandante PNTL Distritu Dili sei koopera ho Diretór Kompañia Timor Telecom hodi ko’alia kona-ba kestaun ne’e, hodi husu ba Timor Telecom atu blokeia númeru sira ne’ebe halimar ho liña 112. Informa Komandante PNTL Distritu Dili, Superintendente Xefe Pedro Belo iha nia kna’ar fatin Komando Distritu Dili, kuarta feira (30/07/2014). “ba oin  númeru ne’ebe mak halimar liña emerjénsia 112 ne’e, ha’u haruka ha’u nia membru operasaun komunikasaun nian atu rejistu hotu, no númeru sira ne’e ha’u sei haruka ba Timor Telecom hodi blokeia tiha,  no ha’u rasik sei ba ko’alia ho Diretór Kompañia Timor Telecom atu bele koa’lia kona-ba kestaun ne’e, atu nune’e uza liña 112 tuir ninia funsaun hodi salva vitima sira nia vida”. Tenik Superintendente Xefe, Pedro Belo. Komandante PNTL Distritu Dili ne’e subliña katak, polisia hasoru problema bainhira atende ba liña 112, tamba ema balun la’os fo informasaun hodi husu polisia nia ajuda, maibe hodi halimar, ho nune’e hatudu katak komunidade barak mak seidauk hatene kona-ba funsaun liña emerjensia ne’e. Ikus liu Komandante Pedro Belo apela ba ema hotu atu koopera ho polisia hodi kombate ema ne’ebe halo krime, no liu husi liña ida ne’e bele hato’o informasaun ba parte polisia hodi ajuda vitima sira, no lori kriminozu sira ba Tribunal. “husu ba komunidade sira atu uza liña 112 tuir nia funsaun, bainhira hasoru situasaun ema nian hetan asalta malu ka situasaun ameasa ema nia vida, bele hato’o lalais mai polisia atu salva ema sira ne’ebe hasoru situasaun sira hanesan ne’e”. Apela Komandante PNTL Distritu Dili, Superintendente Xefe Pedro Belo. Mídia PNTL.  

DILI – Polísia Nasionál Timor Leste (PNTL) hala’o konferénsia ho Prokuradoria Jerál Repúblika (PJR) hodi hala’o diskusaun kona-ba jestaun investigasaun avansadu husi nível Nasional no distrital, iha salaun Konferénsia Tower Fatuhada-Dili, durante loron 3 (tolu) nia laran, hahu husi 30 Juñu to’o 02 Jullu 2014. Iha abertura ba konferénsia ne’e, Segundu Komandante Jerál PNTL, Komisáriu Afonso de Jesus hateten, husi konferensia ne’e oinsa atu reforsa area justisa bazeia ba planu estratejiku PNTL nian. Asuntu imporante ne’ebé mak diskute iha konferensia ne’e mak delegasaun kompetensia  ba PNTL sira atu hala’o prosesu investigasaun di’ak liu tan iha futuru. Liu husi konferensia ne’e mos atu hametin liu tan kooperasaun entre PNTL ho PJR no Ministerio Publikuiha area investigasaun nian liuliu kualidade investigasaun ne’ebé di’ak no ida ne’e importante tebes ba membru Investigadór PNTL sira hodi buka solusaun hamutuk hodi rezolve problema hirak ne’ebé mosu. Iha fatin hanesanAdjunta Prokuradór Jerál Repúblika, Dra. Zelia Trindade iha nia diskursu hateten, persiguisaun kriminál no administrasaun justisa, buat ne’ebé importante tebes iha nasaun Timor-Leste, tamba Timor-Leste nu’udar Estadu Direitu Demokrátiku, ne’ebé mak estadu fó nia funsaun ba PJR no PNTL, liu-liu iha tribunal hodi administra justisa atu bele halo persiguisaun ba kriminalidade sira hodi halo ejerse ba asaun penál. “Lori Prokuradór Jerál Repúblika nia naran hato’o parabens ba PNTL ne’ebé bele realiza konferénsia ne’e, tamba konferénsia ne’e iha relevante tebes ba PNTL no PJR, oinsa mak bele hadi’a liña koordenasaun di’ak liu tan”, Informa Dra. Zelia Trindade. Iha Artigu 132 Konstiuisaun RDTL hateten, Ministeriu Publiku, reprejenta Estadu atu ejerse iha funsaun penál, no Ministériu Públiku (MP) sai titular ba asaun penál, bainhira krime ruma mosu iha Timor-Leste, parte MP kolabora ho tribunal hodi buka lia los hodi realizaema sira ne’ebé buka justisa. “Ba artigu ne’e, la’os parte MP no Tribunal de’it mak administra justisa maibé, Polisia mos importante tebes tamba sai auxiliar ne’ebé esensial tebes ba adminstrasaun justisa, tamba Polisia mak ba investiga no halo atuasaun ba krime ruma, ida ne’e parte husi persiguisaun justisa, oinsa para atu asegura sidadaun sira nia trankuilidade, ninia direitu, se mak sai vitima, se mak sai suspeitu, ida ne’e ita nia funsaun tuir lei”, Hatutan Adjunta PJR. Partisipasaun iha konferénsia ne’e mak parte PJR, parseiru TLPDP, prokuradór distrital, xefe investigadór distrital sira, ofisiais husi nasional, Seksaun IMS, no membru investigador PNTL sira husi Nasional no Distritál. Mídia PNTL.