DILI– Unidade Espesiál Polísia (UEP) halo selesaun ba Ajente Polísia hamutuk nain 40 (hatnulu) husi Unidade Espesiál Polísia ne’ebe kompostu husi Batallaun Ordem Públika (BOP), Korpu Seguransa Pesoal no Pelotaun de Apoiu Servisu, hodi konkore ba vaga 35 (tolunulu resin lima) hodi sai membru ba Grupu Operasaun Espesiál (GOE) iha UEP. Selesaun ne’e hala’o liu husi teste fíjiku, saúde, no entrevista ba kandidatu foun sira ne’ebe ho nia deviza Ajente Polísia atu konkore ba vaga refere iha Sentru Formasaun Polísia Comoro-Dili, durante semana ida hahú husi loron 1 to’o 5 Setembru 2014. “UEP loke vagas ba membru GOE foun ba tinan 2014, membru GOE foun ne’e labele transfere de’it maibe tenke liu husi prosedimentu no regras, tamba ne’e mak Komando Jeral autoriza hodi loke vaga ba membru GOE foun ne’ebe agora dadauk halo selesaun ba Ajente sira, kuaze 40 pessoas mak konkore ba vaga 35 ida ne’e, sira hahu liu husi teste fíjiku, médiku no entrevista.”informa Komandante Kompañia Operasaun Espesiál, Superintendente Asistente, Euclides Belo. Komandante GOE Euclides hatutan, entre kandidatu sira ne’e, ida ne’ebe mak iha fíjiku, no kapasidade di’ak liu mak bele passa no sei ba tuir tan kursu ka treinamentu GOE nian durante fulan 3 (tolu) iha Rairobo, Distritu Bobonaro tinan ne’e. Ajente sira ne’ebe mak konkore ba vaga ne’e la’os mai husi Unidade seluk maibe sira ne’e hetan graduasaun ona iha tinan 2013 no durante ne’e hala’o sira nia kna’ar ona iha Unidade Espesiál Polísia. Kandidatu sira ne’ebe la passa iha teste ne’e, sei fila fali ba sira nia sub unidade ne’ebe sira servisu antes ne’e, hanesan BOP, CSP no Pelotaun de Apoiu Servisu. “Ha’u nia mensajen ba kandidatu sira katak tenke konkore ho sentidu spiritual, sentidu Polísia nian, espiritu Nasionalizmu, tamba GOE nu’udar forsa epesial ida Nasaun nian, atu konkore ba Polísia Espesiál, ita tenke preparadu em termus de fíjiku, skill no kapasidade.”apela Komandante Euclides Belo. Entertantu teste fíjiku no entrevista hala’o iha Sentru Formasaun Polísia Comoro, nomos iha Taci tolu, no teste médiku hala’o iha Klínika PNTL iha Kuartel Jeral PNTL Caicoli, Dili. Mídia PNTL