News

Dili, Kuartel PNTL,  loron 16 fulan Setembru tinan 2021, Segundu Komandante Jeral PNTL Komisariu Polisia Mateus Fernandes Lidera enkontru avaliasaun ho Komandante Operasaun PNTL Nasional Superintendente Xefe Pedro Belo no partisipa husi Komandante Munisipiu Dili, Komandante CFP, Komandante UEP, UPM, Xefe Gabinete, Departamentu i Seksaun sira iha Komandu Jeral konaba Implementasaun Diretiva Operasaun Dili Hakmatek no Seguru.

Iha enkontru ne’e Xefe ekipa fiskalizador husi GIG Superintendente Polisia Inacio dos Santos Saldanha hamutuk ho mebru fiskalizador husi Komandu Jeral (GIG-Departamentu Justisa), Komandu Munisipiu Dili, Komandu UEP no UPM.  Objetivu fiskaliza servisu membru sira nian iha postu provijoriu no permanente iha Kapital ho nune’e hadia diak liu tan servisu membru  sira nian iha  terenu.

Entretantu Komandante Operasaun Nasional Superintendente Xefe Polisia Pedro Belo orienta planu Komandu Operasaun Dili seguru no hakmatek ho mapamentu kolokasaun ba membru Komandu Munisipiu Dili mak hanesan Kolmera, Caicoli, Audian, Taibesi inklui mos postu permanente sira ne’ebe iha tiha ona, nune mos Komandu UEP areadores mak hanesan Becora, no Diresaun Bairo-Piteno to Delta no Komandu  UPM aradores husi Palasiu Governu to Cristurei no ba Komandu Jeral koloka iha Portu Dili to Pantai Kelapa .

Iha okajiaun ne’e nia haktuir sei hala’o mos avaliasaun ba fardamentu/uniformizada membru sira nian iha enkontru refere, atu nune’e bele hadia diak liu tan membru sira nia uniforme iha terenu hodi hala’o servisu operasaun tuir orden Komandu PNTL.

Batugade, Vise Ministru Interior António Armindo no Komandante Jerál Komandu Polísia Nasional Timor-Leste (PNTL) Komisariu Polísia Faustino da Costa iha tersa-feira (14/09) ne’e hala’o vizita ida hodi observa fatin konstrusaun Postu Seguransa ba Unidade Polísia Marítima (UPM) Vatuboro iha suku Bubuleo, aldeia Dair, Postu Administrativu Maubara, Munisipiu Liquiça no mós postu rua seluk maka hanesan ida iha suku Aidabas Leten, Postu Administrativu Atabae, aldeia Migir no ida seluk iha Postu Administrativu Balibo, Munisipiu Bobonaro.

Vise Ministru Interior António Armindo hateten prioridade atu hari’I Postu UPM hotu-hotu ho modelu ida deit ne’be maka kompletu ho ninia fasilidade, asesu ba dalan no eletrisidade hodi ajuda sevisu UPM nian kontrola tranzasaun illegal tama mai iha Timor-Leste.

Iha parte hanesan Komandante Jerál PNTL Komisariu Polísia Faustino da Costa hateten Komandu PNTL hamutuk ho Ministeriu no Parseiru sira ohin mai halo vizita ida mai iha area fronteira atu nune’e bele hare’e fatin futuru konstrusaun postu ba UPM ne’ebe inisia kedas ho postu temporaria nian maka iha area Dair ninian maibé agora ita hetan ona fatin ba oin oinsa ita koalia ho parte autoridade sira iha area refere, en prinsipiu varbalmente autoridade sira konkorda ona tanba ne’e maka ita hare’e futuru oinsa prepara ba konstrusaun ninian.

“Segundu maka nafatin iha area Maubara ninian maka aldeia ida naran Vatuboro ita hare’e ona fatin, agora tanba saida maka ita hare’e fatin, atu dehan katak fatin hirak ne’e dala-ruma durante ne’e ita nota katak bele iha aktividade sira ne’ebe kontrabandu mós bele mosu, entaun kuaze fulan hirak nia laran ita koloka iha ne’eba hanesan postu temporariu, maibé ba oin ne’e bele sai postu ida permanente”, tenik Komandante Jerál PNTL ne’e.

Prosesu konstrusaun ba Postu UPM ne’e hetan apoiu Orsamentu husi Polísia Federal Australia liu husi Programa Dezenvolvimentu Polísia Timor-Leste ne’e realiza bazeia ba kooperasaun Bilateral entre Governu Australia no Governu Timor-Leste liu husi Vise Ministru Interior.

Antes remata vizita iha postu UPM, ekipa delegasaun hala’o mós observasaun ba iha Batugade hodi hare’e direitamente kondisaun Postu Tránzitu ne’ebe ladiak no sei hala’o konstrusaun iha tempu badak. Ekipa delagasaun ne’e kompostu husi Vise Ministru Inteior, Komandu PNTL nian maka hanesan Komandante Jerál PNTL, Komandante Komandu Operasaun, Komandante UPM, Segundu Komandante Unidade Espesial Polísia (UEP) no parseiru Komandu PNTL hanesan Programa Dezenvolvimentu Polísia Timor-Leste (TLPD-sigla Inglês).

Media PNTL.                    

Dili- Vise Ministru Interior Antonio Armindo halo enkontru ho Komandu PNTL hodi fo orentasaun servisu no apresiaasaun ba servisu ne’ebe maka PNTL halao durante inplementasaun Serka Sanitaria no Konfinamentu Domisiliariu Jeral.

Vice Ministru hateten enkontru ho Komandu PNTL hodi partila informasaun ne’ebe maka fo sai iha Reuniaun Konsellu Ministru Kuarta 08/09 liu-liu inplementasaun Serka Sanitaria no Konfinamentu Domisiliariu Jeral ne’ebe maka sei termina aban (10/09 oras: 11:59) no kontinuasaun Serka Sanitaria ne’ebe diferente mai ho rekejitu no regras iha nia inplementasaun, Nia hato’o asuntu ne’e iha Kuartel Jeral PNTL Kaikoli Dili, Kuarta (08/09).

“Iha Reuniaun Konselu Ministru horseik dader levanta konaba servisu PNTL nian liu-liu sistema patrula iha Dili oinsa maka ita inplementa regras governu nian iha Dili, Primeiru Ministru Taur Matan Ruak nudar mos Ministru Interior fo parabens ba Komandante Jeral PNTL ho nia membru sira ne’ebe maka servisu makaas durante COVID no ekstra ordinariu  ba operasaun iha fronteira.”Nia haktuir.

Nia hatutan Ministru Interior kontente hare rejultadu iha fronteira ita nia Enviadu Espesial ba to’o iha Atambua no Kupan reprejenta Ministru Interior, reprejenta Komandu PNTL ba halo negosiasaun no ikus mai iha rejultadu ne’ebe diak tanba ne’e Nia kontente los nia hanoin tuir lolos servisu ida ne’e la fasil maibe Komandu ita sira ne’e hamutuk afinal ita bele.

Ita laos atu husik deit sidadaun sira alende tama illegal nufim ita mos hanoin katak nia tama ona illegal ba Indonezia ita tenke servisu kontaktu halo Diplomasia para lori ita nia sidadaun sira ne’e liu husi dalan legal ne’e kontribusaun governu nian, ita hanoin wainhira sira tama illegal mai fali ne’e lori risku ba komunidade sira ne’ebe maka hela besik iha fronteira. Tanba ne’e  governu hanoin duke lori risku ba iha fronteira, ita koalia ho governu Indonezia para pelumenus deporta deit sidadaun sira ne’e para ita simu sira lori ba karantina hodi hamenus risku atu labele lori moras ne’e daet ba komunidade sira, Primeiru Ministru kontente tanba komandu PNTL no Ministeriu Interipor hanoin to’o hodi halo ida ne’e.

“Hau mos aproveta oportunidade ida ne’e hodi fo apresiasaun no fo parabens ba Komandante Jeral no Komandante CFP ne’ebe maka hahu ona treinamentu no Formasaun iha Liquica loron rua liu ba,” dehan Vise MI.

Iha enkontru ho lideransa instituisaun PNTL ne’e Vice Ministru mos fo sai konaba enkontru ne’ebe nia halo ho Ministru Interior atual Primeiru Ministru no nia husu ba PM atu tau prioridade no Mellora liutan instituisaun PNTL hodi nune’e bele asegura no garante seguransa ne’ebe diak liu ba povu no nasaun.

Iha okajiaun ne’e Komandante Jeral PNTL Komisariu Faustino da Costa hateten oras ne’e daudaun ita iha Estadu Emerjensia (EE) ba dala 17 ne’ebe maka foin hahu iha semana ida nee nia laran, iha EE ida ne’e Polisia asegura mos inplementasaun Serka Sanitaria ne’ebe maka inplementa iha munisipiu Ermera no Dili nomos Konfinamentu Domisiliariu Jeral.

Nia hatutan Komandu hato’o karta ba Primeiru Ministru konaba estratejia foun ne’ebe maka ita antisipa oinsa atu kombate no mitiga variante foun seluk ne’ebe tama iha Azia liu-liu ASEAN hanaran MU ne’ebe risku no lais liu kompara variante Delta nebe oras ne’e sai ona kontaminasaun lokal. Ho situasaun hirak ne’e PNTL hato’o katak alende Komandu munisipiu no Unidade sira Ofisias sira iha Komandu Jeral no membru destakadu Komandu Jeral nian prepara apoiu ba Sala Situasaun Sentru Jestaun Krize, apoiu mos Komandu munisipiu Dili no Unidade Patrulamentu Fronteira hodi asegura seguransa iha fronteira.

Atividade ne’ebe maka halo mos iha semana ida ne’e nia laran sei halo avaliasaun ba dala rua iha Dili ba Diretiva Dili Seguru no hakmatek ne’ebe sei halao kada kinta-fera nomos konaba seguransa iha fronteira nian sempre halao iha kada loron tersa-fera.

Husi avaliasaun ida ne’e atu identifika nomos buka atu bele hare esforsu ne’ebe maka membru instituisaun ne’e halao serake estratejia ne’e merese ona ou sa difikuldade maka membru PNTL hasoru iha Dili no fronteira. Los duni dalaruma iha situasaun balu lakonsege responde hotu hanesan mos situasaun ne’ebe sai prekupasaun publiku ba ema sira ne’ebe tama sai illegal.

Alende ne’e iha prekupasaun rua ne’ebe maka Komandu PNTL hakarak hato’o ba Vice Ministru Interior katak husi Sosiedade Sivil Forum Organizasaun Não Govermental Timor-Leste (FONGTIL) levanta konaba kazu agresaun fiziku ida ne’ebe indika ba membru PNTL tanba ne’e Komandu hasai despasu ida atu halo audit no relatoriu justifikasaun husi Komandu munisipiu Ermera ami simu no nota katak vitima torturasaun ne’e moras mental.

No kestaun daruak maka prekupasaun publiku konaba PNTL maka hasai nia ideia rasik hodi halo desijaun ba sidadaun hirak ne’ebe vasina dala rua kompletu ona tenke halo Swab test hanoin ida ne’e ita hotu bazeia ba lei no rejolusaun governu haruka ne’ebe maka PNTL inplementa iha terrenu, Nia hakotu. Media PNTL

Dili-Centru Formasaun Polisia (CFP-sigla portuges) sei halo formasaun no kapasitasaun konaba lei, diretus humanus no uza forsa ba membru Polisia Nasional Timor-Leste (PNTL) iha fulan Setembru.

Komandante CFP Superintendente Xefe Arquimino Ramos hateten CFP prepara ona kurikulum no haruka ona ba Fundu Dezenvolvimentu Kapital Humanu (FDCH) atu nune’e iha tempu badak realija kursu ba Komandante Eskuadra hahu iha Komandu munisipiu Liquica, kontinua ba Aileiu, Ainaro no Ermera hafoin kontinua ba munisipiu 8 seluk inklui RAEOA ho total partisipante hamutuk 1200, Nia hato’o asuntu ne’e ba Jornalista sira iha CFP Comoro Dili, Kuarta (25/08)

Formasaun ne’e sei foka liu konaba oinsa maka uza forsa ho proporsional, legal, akuntabilidade no tuir nesesidade, nune’e iha atuasaun balu ne’ebe la tuir regras Komandante munisipiu no unidade sira iha poder disiplinar atu loke ba prosesu no foti medidas.

Formasaun ba Komandante sira oinsa maka lidera operasaun iha terrenu, prepara planu operasaun, inplementasaun no ejekusaun planu operasional husi Komandu Jeral no oinsa sira lidera ekipa iha Eskuadra no Unidade sira.

“Kurikulu formasaun ne’e ho padraun internasional tanba CFP sai mos membru International Police Academy Association (INTERPAL) ne’ebe maka kada tinan Polisia iha nasaun hotu sempre share aprejentasaun kurikulu ba malu nune’e kurikulu ne’e lao la ses husi kurikulu ne’ebe utilija iha rai seluk,”dehan Komandante Ramos.

Nia haktuir Orsamentu ba programa ne’e aprova no aloka ona ba programa ne’e ita hein ejekuta deit iha loron 06/09, formasaun ne’ebe maka sei halao ho durasaun semana rua ba Komandante sira no semana ida ba membru sira formasaun ne’e kompostu husi teoria no pratika ho fasilitador sira husi CFP rasik nomos Unidade Apoiu Diretus Humanus ONU (UADU) nomos PDHJ.

Komandante Arquimino atualija katak iha tinan 2019 to’o 2020 antes COVID-19 CFP fo ona formasaun ba membru PNTL hamutuk 1.518 tuir ona formasaun konaba Diretus Humanus no Uza Forsa nian nune’e mebru sira hatene oinsa halo atuasaun iha terrenu tuir padraun ne’ebe iha ho regras empenamentu, Normas Organijasaun no Prosedimentu (NOP) uza forsa nian nomos lei uza forsa nian. Media PNTL

Dili-Komandu Polisia Nasional Timor-Leste (PNTL) halo enkontru evalusaun servisu ligadu ho inplementasaun diretiva hirak ne’ebe maka Komandu hatun ba munisipiu Unidade no Xefe Servisu sira.

Komandante Komandu Operasaun Nasional Superintendente Xefe Pedro Belo hateten Evaliusaun Servisu Unidade Patrulamentu Fronteira (UPF) nudar topiku prinsipal tanba situasaun ikus-ikus ne’e sidadaun hirak ne’ebe maka ultrapasa fronteira ilegalmente to’o Indonezia depois POLRI kaptura no deporta mai fali ita oras ne’e daudaun kontinuasaun konaba sira nia prosesu no seguransa iha fatin karantina ne’ebe maka sira hela ba, Nia hato’o auntu ne’e iha Sentru Formasaun Polisia (CFP) Comoro Dili, (25/08).

Nia haktuirtan liu husi enkontru ne’e Komandante sira hare hamutuk forsa, frakeja no oportunidade ne’ebe iha; Frakeja ne’ebe maka Ami identifika maka distansia entre Postu ida ho postu seluk ne’ebe maka naruk no dok teb-tebes(km 12-25), limitasaun ekipamentu no transporte oinsa bele kontrola masimu tanba ne’e maka ema barak ultrapasa fronteira illegal tanba ne’e maka Komandu PNTL nafatin husu ba governu no Politiku sira atu hare asuntu hirak ne’e selae susar utuan.

“Kestaun fronteira laos Polisia deit maka resolve Ami so bele asegura kuandu iha ona fasilidade adekuadu, Hau hanoin katak Komandante Jeral hato’o ona relatoriu hotu-hotu nune’e ami fiar katak laos agora maibe tempu oin mai sei bele rezolve naton maibe sufsiente atu asegura seguransa iha fronteira,” dehan Komandante Belo.

Maske ho kondisaun minimu maibe PNTL-UPF sempre firme atu servisu ho Espiritu servi nafatin povu no nasaun hodi asegura seguransa ba rai ida ne’e.

 Enkontru ne’e Prezidi husi Komandante Jeral komisariu Faustino da Costa, no Segundu Komandante Jeral Komisariu Mateus Fernandes no partisipa husi Inspetor Jeral, Komandante Komandu Administrasaun, Komandante munisipiu, Komandante Unidade no Xefe Servisu sira. Media PNTL

Batugade, 19 agostu 2021 (SRP) – Autoridade Seguransa Indonézia liu hosi Kapolres Belu, entrega tan membru Grupu Organizasaun Arte Marsiais husi PSHT (Persaudaraan Setia Hati Terate) mai hamutuk na’in-352 ne’ebé antes ne’e hetan kapturasaun iha area Atambua Nusa Tengara Timur (NTT) tanba hakat fronteira terrestre liu dalan ilegál hodi partisipa seremonia graduasaun hasae sintu iha Indonezia.

Komandante UPF (Unidade Patrullamentu Fronteira), Superintendente Polisia, Euclides Belo, konfirma sidadaun timor hirak ne’e envolve aan iha grupu arte marsiais no hakat liu husi dalan ilegal ba graduasaun (Sae Sabuk) iha Indonezia.

“Ohin ofisialmente autoridade seguransa Indonezia nian, kompostu hosi Kapolres Belu, Dandim no Migrasaun Indonezia nian, entrega hikas ita nia sidadaun timor oan ho total hamutuk ema nain 352 ne’ebe atravesa ilegalmente ba Indonezia hodi tuir graduasaun ba Grupu Arte Marsiais PSHT”, haktuir Euclides Belo, ba jornalista sira iha Postu Integradu Mota-Ain, kinta ne’e.

Nia dehan, sidadaun timor oan hirak ne’e nia parte halo ona identifikasaun no daudaun entrega ona-ba Sentru Integradu Jestaun Krize transporta ba Dili hodi kumpri kuarentena durante loron 14 nia laran hafoin sei prosesu tuir lei ne’ebe vigor tanba kontra ona regra Estadu Emerjensia (EE) hodi hakat sai hosi Timor-Leste ba Indonézia ilegalmente.

“Ami servisu koordenadu ho autoridade sira ne’ebe servisu iha liña fronteira, espesialmente ba Sentru Integradu Mota Ain, durante prosesu tomak ami kumpri ona regra no prosedimentu tuir protokolu ne’ebe estabelese hela iha ita nia rain”, subliña.

Euclides hatutan, nia parte mos simu estudante nain 109 hosi Indonezia ne’ebe desidi fila mai Timor tanba pasaporte kaduka no fixa mate inklui mos timor oan nain 36 ne’ebe la konsege ba servisu iha inglatera tanba konsidera Indonezia kategoria zona mean ba Covid-19. Media Interior

Dili, Polísia Repúblika Indonezia (Polri) kaptura sidadaun Timor oan hamutuk ema naín 113 iha Atambua, Munisipiu Belu, Provinsia Nusa Tenggara Timur (NTT) Indonesia. Sidadaun hirak neé kompostu husi mane naín 103 no feto naín 8 neébe maka Polri kaptura iha loron segunda-feira (09/08) iha tuku 09:00 oras Indonezia nian.

Porta Voz Komandu Polísia Nasional Timor-Leste (PNTL) Superintendente Xefe Arnaldo Araújo liu husi konferensia imprensa tersa-feira (10/08) neé informa sidadaun hirak neé Polri kaptura iha loron hirak liu ba wainhira sira halaó hela aktividade iha Indonesia no oras neé dadaun sidadaun hirak neé iha hela Polri nia liman, iha tempu badak ema hirak neé sei deporta mai ita nia rai liu husi odamatan Batugade.

“Dalan neébe maka sira sempre uza hodi liu hakat ba Indonezia maka liu husi dalan hat maka hanesan husi rai tolu no tasi ida, dalan husi rai tolu neé maka Fatumean, Lamaknen no Turiskai no mós liu husi tasi, sira neé maka atravesa ba Indonezia Atambua hodi ba halo aktividade iha neéba”, tenik Porta Voz Komandu PNTL neé.

Superintendente Xefe afirma ita hotu hein katak iha tempu badak Polri  sei entrega sidadaun hirak neé liu husi ita nia Imigrasaun no liu husi odamatan Batugade nian. Hafoin ema sira neé lori mai ita nia rai maka sei halaó tuir regras neébe maka vigora iha ita nia rai. Otamatikamente sira mós sei tama Kuarentena loron 14 hafoin maka halo prosesu tuir mai.

“Hakarak hatoó obrigadu wain ba governu Indonezia, liu-liu Polísia Indonezia nian espesial ba Polres Belu neébe maka sira ho esforsu makaás bele kaptura ita nia sidadaun sira neébe maka agora dadaun iha hela sira nia fatin, hatoó mós obrigadu wain ba ita nia Atase Polri neébe maka agora dadaun iha Timor-Leste, nia mós servisu makaás, halo kooperasaun diak ho PNTL hodi nuneé ita nia servisu kooperasaun bele lao ho diak maka ema neébe agora dadaun detein hela iha Polres Belu sei entrega iha tempu badak”, afirma Xefe Gabinete Relasaun Públika neé.

Media PNTL.

Dili, Komandu Polísia Nasional Timor-Leste (PNTL) segunda feira (09/08) ne’e desloka tan ekipa ida membru PNTL hodi reforsa seguransa iha liña fronteira atu prevene variante virus Delta tama mai Timor-Leste.

Komandante Komandu Operasaun Superintendente Xefe Pedro Belo ba jornalista sira hateten, ne’e planu husi Komandante Jerál PNTL nian no ema hotu nia preukupasaun seguransa ba iha liña fronteira nian, tanba ita hatene katak iha fronteira ne’eba ita iha membru ne’ebe limitadu tebes-tebes liu-liu sira ne’ebe destaka iha postu sira.

“Tanba ne’e ita reforsa tan husi Komandu Jerál no molok ida ne’e mós reforsa ona husi Unidade Espesial Polísia (UEP) ne’ebe maka koloka ona iha ne’eba (Fronteira-red) no oras ne’e dadaun ami atu koloka tan ekipa atu reforsa tan ba parte fronteira ninian, atu ita hotu tenke asegura fronteira tanba oras ne’e dadaun iha movimentu illegal ema ne’ebe maka’as tebes-tebes iha fronteira ninian”, tenik Komandante Komandu Operasaun PNTL ne’e.

Superintendente Xefe ne’e salienta tan katak ekipa ne’e iha misaun ne’ebe klaru hodi bele koopera hamutuk ho nia maluk sira iha ne’eba (Fronteira-red) no sei orienta direita husi Komandante sira ne’ebe enkarega iha parte fronteira nian, sira hotu sei submete ba iha ne’eba (Fronteira-red) hodi bele asegura ita nia fronteira ho diak, tanba ita hotu hatene katak oras ne’e dadaun iha moras ida variante foun Delta ne’ebe maka oras ne’e dadaun sa’e maka’as iha ita nia nasaun viziñu no tuir informasaun balun mos tama ona mai Timor-Leste.

“Ho ida ne’e maka ita tenke asegura fronteira ho metin atu nune’e ema sira labele halo movimentu tun sa’e iha parte fronteira nian, maibé ohin ekipa ida ne’e ho nia misaun ne’ebe klaru tebes-tebes, sira sei lao ho servisu, sira sei lao ho Sentidu Estadu nian no sira sei hatudu rezultadu ne’ebe diak ba povu no rai ida ne’e”, hatutan Superintendente Xefe ne’e.

Media PNTL.