Maliana, 11 agostu 2021– Komandu Polísia Nasionál Timor-Leste (PNTL) halo operasaun konjunta no konsege kaptura sidadaun timór oan na’in-4 ne’ebé sai autór prinsipál hodi fasilita membru Grupu Arte Marsiais (GAM) hakat fronteira terrestre ho dalan ilegál hodi ba Indonézia.
Iha kapturasaun ne’e PNTL mós prende atributu arte marsiais husi PSHT (Persaudaraan Setia Hati Terate) hanesan motorizada 2 ho marka Honda Versa no Yamaha Jupiter MX no lori kedas mai iha postu UPF Alto Lebos.
Komandante UPF, Superintendente Euclides Belo, hateten sidadaun sira ne’ebé PNTL detein ne’e kaptura iha área Lebos no sira husi Aldeia Gole, Suku Deodet, Postu-Administrativu Lolotoe, Munisípiu Bobonaro.
“Ohin iha oras tuku 2 (rua) ita-nia membru PNTL sira halo operasaun konjunta ho servisu kolektivu, kaptura tán membru Grupu Arte Marsiais na’in 4 iha área Suku Lebos ho sira nia inisiál maka hanesan EdR, NP, AM no JB, ne’ebé durante ne’e nu’udar fasilitadór hodi lori ema husi Lebos ultrapasa fronteira ilegalmente ba Indonézia”, informa Euclides Belo, iha Kuartel UPF, Nu Badak, tersa ne’e.
Superintendente Euclides esplika tan, suspeitu sira ne’e viola ona Lei númeru 5/2017 19 abríl kona-ba Rejime Jurídiku Prátika Arte-Marsiál no Rituál sira, Arma Branka, inklui Rama Ambon.
“PNTL mos asegura ona motorizada rua hanesan evidénsia iha postu UPF Alto Lebos no agora daudaun sira n’ain 4 iha hela sela detensaun UPF Companhia Alfa Tunubibi, hodi halo prosesu identifiksaun hafoin entrega ba komandu PNTL Munisípiu Bobonaro hodi halo investigasaun”,
Iha operasaun konjunta ne’e envolve Servisu Informasaun Polísia (SIP), UPF, F-FDTL, COE, BOP, PNTL Komandu Munisípiu Bobonaro no-mós PNTL destakadu husi Komandu Munisípiu Dili.
Fontes: Media Ministeriu Interior (MI)
