News

Dili, Komandu Polísia Nasional Timor-Leste (PNTL) munisipiu Dili no Baucau detein ona suspeitu mane ida ho inisial OM ne’ebe maka iha fulan Setembru tinan 2020 halo asaun krime Naok Sasan Elektronika iha loja Xineza nian ida iha area Comoro.

Porta Voz Komandu PNTL Superintendente Xefe Arnaldo de Araújo segunda-feira (25/01) ne’e liu husi konferensia esplika kronologia husi akontesimentu ne’ebe mosu iha fulan Setembru tinan kotuk no parte PNTL eskuadra Dom Aleixo detein tiha suspeitu iha sela polísia maibé ikus mai iha loron 10 fulan Setembru 2020 suspeitu halai sai husi sela Aimutin hodi ba subar iha area Lisapat munisipiu Ermera kauze fulan ida nia laran no kontinua ba subar fali iha area Buburaga suku Wailili munisipiu Baucau no ikus mai PNTL munisipiu Baucau mak kaptura hikas.

“Suspeitu ne’e foti subar sasan hafoin polísia kaptura tama tiha komarka mak halai sai hodi ba subar fali iha Ermera no kontinua mai Dili no ikus mai polísia kaptura nia iha ninia subar fatin munisipiu Baucau iha loron domingu (24/01) ne’e”, tenik Porta Voz Komandu PNTL ne’e.

Superintendente Xefe esplika tan suspeitu dadaun ne’e detein ona iha sela Komandu PNTL munisipiu Baucau durante oras 72 nia laran hodi hein prosesu investigasaun tuir mai hafoin sei lori mai Dili hodi aprezenta ba Ministeriu Públiku (MP).

“Iha biban ne’e atu informa mós ba públiku katak durante semana ida nia laran hahu’u iha loron 19 to’o loron 21 fulan Janeiru tinan 2021 Komandu PNTL rezista kazu insidente hamutuk 30, kazu ne’ebe maka ass liu maka Asaltu malu hamutuk 12, baku malu 7, Violensia Doméstika 10 no Tuda malu 5, enkuantu Asidente hamutuk 29 ne’ebe maka la rezulta ema mate maibé kanek kma’an deit,”, informa Superintendente Xefe ne’e.

Komandu UPF Kaptura Ema 30 Tama Illegal

Hahu’u husi loron 21 to’o loron 24 fulan Janeiru tinan 2021 Komandu Unidade Polísia Fronteira (UPF) kaptura ema hamutuk 30 ne’ebe maka tama illegalmente husi Indonesia atu mai Timor-Leste.

“Ema hirak ne’e tama illegal husi area fronteira tolu maka hanesan Oecusse, Covalima no Bobonaro, hafoin kaptura oras ne’e dadaun ema hirak ne’e entrega ona ba ekipa Ministeriu Saúde hodi ba hela iha kuarentena ne’ebe governu prepara ona”, hateten Porta Voz Komandu PNTL ne’e.

Aktual Xefe Gebinete Relasaun Públika PNTL ne’e afirma tan ema 30 hirak ne’e kompostu husi mane hamutuk 17 no feto 13, sira ne’e sidadaun Timor oan hotu. Hafoin kumpri tiha kuarentena maka sei halo prosesu investigasaun tuir Lei ne’ebe maka vigora iha Timor-Leste.

Media PNTL.   

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa akompaña husi Segundu Komandante Jerál Komisariu Polísia Mateus Fernandes segunda-feira (25/01) ne’e realiza enkontru ida ho Komandante PNTL Munisipiu, Unidade, Xefe Departamentu no Xefe Servisu sira iha Kuartél Jerál hodi koalia no halo Avaliasaun ba Implementasaun Estadu Emergensia (EE) no halo Analiza Resumu Lei Nu.7/2020 de 26 Agostu kona-ba Medidas Prevensaun no Kombate Korrupsaun.

Hafoin enkontru ba Jornalista sira, Komandante Jerál PNTL Komisariu Polísia Faustino da Costa hateten iha sorumutu ne’e ami diskuti hanesan ita hatene katak EE kontinua hela, moras iha rai ketan sa’e maka’as nune’e ohin ami enkontru hodi avalia kona-ba implementasaun EE ne’e, saida maka PNTL presiza atu hadia ka reforsa tan.

“Asuntu segundu maka ita hotu hatene katak ita iha ona Lei Nu.7/2020 Medidas Prevensaun no Kombate Korrupsaun no molok husi ekipa Sosializasaun Comissão Anti Corrupção (CAC) mai mós ita nia parte Jurídiku (PNTL-red) hahu’u prepara no esplika ba Komandante sira hotu liu-liu artigu relevante ne’ebe liga ba Lei ne’e no servisu Polísia nian”, esplika Komandante Jerál PNTL ne’e.

Komisariu Polísia ne’e hatan ba preukupasaun ema balun nian liga ba Pandemia COVID-19 iha rai ketan ne’ebe besik liu iha liña fronteira katak PNTL liu-liu kestaun Seguransa, iha inisiu tuir mai hamosu postu Vizilansia balun maibé ho situasaun EE to’o dala-sia ne’e, katak ita hamosu tan postu Vizilansia balun ne’ebe maka durante ne’e ita deskonfia ka ita deteta katak iha fatin hirak ne’e maka sempre iha movimentu illegal. Hanesan orientasaun Iha semana balun ba kotuk ita fó sai ona atu aumenta tan postu Vizilansia balun iha area sira ne’ebe identifika hanesan fatin potensia ba ema bele hakur illegal ba mai.

“Husi parte Liquiça to’o iha Maliana ne’e bele dehan iha fatin ha’at ne’ebe ita identifika, hanesan mós rua iha parte Suai tantu mós iha Oecusse ninian ida”, afirma Komisariu Polísia ne’e.

Autoridade másimu Instituisaun Seguransa ne’e afirma tan asuntu seluk ne’ebe maka diskuti iha enkontru ne’e maka atu Transmite Mensagem Primeiru Ministru hanesan mós Ministru Interior ba Komandante sira no ba hotu-hotu katak iha buat tolu hanesan Disiplina, Hirakria ou Cadeia do Comando no ikus maka Jestaun Rekursu, ida ne’e maka ami hato’o atu Komandante sira bele hatutan hikas ba membru sira iha terenu.

Hola parte iha sorumutu ne’ebe lidera husi Komandante Jerál no Segundu Komandante Jerál ne’e maka Inspetór Jerál, Komandante Komandu Operasaun, Administrasaun, Komandante PNTL Munisipiu, Unidade, Xefe Servisu, Departamentu no Gabinete sira hotu.

Media PNTL.            

Dili- Komandu Polisia Nasional Timor-Leste (PNTL) husu diskulpa ba publiku relasiona ho prosesu investigasaun ba Estatua Nain Feto Assunção ne’ebe maka makina X-Ray leno no diskumfia objetu balu iha ilas Nain feto nia laran ne’ebe diskumfia material droga maibe prosesu investigasaun detekta katak objetu ne’e laos material droga.

Komandante Jeral PNTL Komisariu Faustino da Costa hateten Komandu PNTL no ekipa tomak hato’o obrigadu wain ba madre sira ne’ebe kopera teb-tebes tanba ita nia intensaun hotu-hotu ida deit maka bele responde ba publiku katak situasaun real maka hanesan ne’e para publiku hela ho informasaun hirak ne’ebe klaru, tanba selae ema hotu prekupa katak buat ne’e diskumfia hanesan ne’e mos laiha asaun ruma atu bele hare, Nia hato’o asuntu ne’e hafoin prosesu investigasaun iha Unidade Narkotika Kuartel Jeral PNTL Kaikoli Dili, Kinta (21/01)

Komisariu ne’e haktuirtan tanba lalaok servisu, maka wainhira hetan informasaun ruma hanesan ne’e ita buka atu verifika to fo informasaun ne’ebe lolos ba publiku.

“Hau hanoin ho rejultadu ne’ebe iha maka hodi Komandu PNTL no ekipa tomak hau agradese dala idatan no ekipa sei hare fila-fali para kria kondisaun ida ne’ebe merese ba estatua ita ne’e hodi entrega hikas ba Madre sira para lori fila-fali ba Lospalos.

Prosesu reinspesaun ne’ebe halao iha Kuartel jeral ne’e akompana diretamente husi Madre husi kongregasaun ADM nain rua, ekipa konjunta kompostu husi Servisu Investigasaun Kriminal Nasional (SIKN), Polisia Militar(PM), Servisu Nasional Intelijensia (SNI), Alfandega. Husi prosesu investigasaun ne’e investigador sira la deteta material droga maibe espesie rai mean ne’ebe nia funsaun atu halo todan estatua ne’e.

Iha okajiaun ne’e Madre Goretti ADM husi kongregasaun Amalkasih Darah Mulia (ADM) hateten reprejenta ami nia kongregasaun hakarak hato’o katak ami maka lori estatua Nain Feto tama mai liu husi Fronteira, Amu parokia Lautem maka hameno atu buka estatua ida ne’ebe nia presija tanba ne’e liu husi ami hameno tanba konyese ema iha Indonezia.

Madre ne’e haktuirtan Ami mos la narnaran deit atu halo nune’e bainhira amu husu, hau dehan bele kontaktu direta Madre boot ne’ebe iha atu Madre kontaktu ba ema ne’ebe madre sira konyese nune’e maka ami haruka foto ba depois halo patron iha Jokjakarta hafoin ilas Nain Feto ne’e prontu no haruka mai Timor-Leste.

Ami husu diskulpa karik to’o tiha tempu neba ami nia Madre boot husi Lospalos ba fronteira hamutuk ho Madre Felicia tempu ne’e sira halo deklarasaun akordu no madre asina hodi ba fo Amu parokia nune’e Estatua ne’e seidauk book ka fo bensaun no seidauk lori ba fatin ne’ebe atu tau ne’ebe ami hein to’o tempu PNTL ba foti iha Tersa nune’e ho haraik aan ami entrega.

Ohin mos Amu Padre kontaktu hela deit hau atu fo hatene ba PNTL hodi fo hatene ba media atu fo informasaun klaru katak buat ne’ebe ita diskumfia ne’e la realidade maibe ne’e hanesan ne’e duni saida maka iha laran ita hotu hare nune’e labele inventa tanba ita hotu sarani katolika nune’e ita ajuda malu.

Ami hato’o diskulpa no obrigadu ba PNTL katak halo servisu tenke hanesan ne’e to’o atinji nia objetivu ne’ebe ita hotu hakarak ba mehi ida konaba ita hotu nia diak nune’e laiha parte ida maka sai vitima.

Kronolojia Estatua Nosa Senhora Assunção lori mai Timor-leste liu husi fronteira Batugade iha loron 02/Dezembru 2020no lori ba igreja parokia Lospalos iha loron 05 Dezembru 2020 tuir planu atu tau iha igreja ida iha Lautem no lori mai Dili iha loron Tersa (19/01/2021 hafoin ekipa konjunta ba halo teste X-Ray iha Aeroportu Internasional Nicolao Lobato no halo hikas reinspesaun iha loron 21/01/2021 hafoin entrega hikas ba Madre sira hodi lori fila ba Lospalos. Media PNTL

Dili- Ofisiais Superior Polisia Nasional Timor-Leste (PNTL)  nain 44 Gradua iha Diploma Jestaun Polisial (Dip Jep) hafoin kompleta kursu durante tinan ida fulan walu iha Sentru Formasaun Polisia (CFP-sigla portuges).

Komandante CFP Superintendente Xefe Arquimino Ramos hateten Formasaun ba Ofisiais Superior sira nudar formasaun prinsipal ida hodi forma kompetensia hodi servi ita nia povu liu husi konyesementu ne’ebe naton hare ba situasaun atual, Nia hato’o asuntu ne’e iha serimonia Gradusaun iha CFP Comoro Dili, Sexta (22/01).

Nia haktuirtan kursu ne’e ho total karga orariu 1800 ho kreditu 120 ne’ebe ekiparadu ho D2 ne’ebe sira kompleta Modulu V. prosesu fromasaun atu hasae konyesementu Polisia liu husi sistema no politika formasaun ida ne’ebe diak no relebante ho situasaun no kondisaun Timor-Leste nian no norma internasional.

“Ohin markatan istoria ida ba PNTL tanba ohin ita bele asisti serimonia abertura anu letivu 2021 ne’ebe sai ona hanesan kultura ba eskola hotu-hotu inklui CFP no serimonia graduasaun Diploma Jestaun Polisial ba dala uluk nomos kursu sira seluk hanesan kursu AAR,”dehan Komandante CFP.

Baze legal CFP PNTL hanesan instituisaun ensinu Polisia nian ne’ebe halo kursu ne’ebe maka instituisaun ne’e hetan lisensa no akreditasaun husi Ministeriu Edukasaun ho Diploma Ministerial Nu. 10/2012 16 de Maiu konaba konsere lisensamentu operasional ba PNTL ba realijasaun no graduasaun kursu jestaun Polisial liu husi nia formasaun ho konsentrasaun.

Kursu ida ne’e atu hetan akreditasaun husi Instituisaun Vokasional no instituisaun ensinu Superior liu husi koperasaun ho UNPAZ hodi hetan grau Akademiku.

Iha okajiaun ne’e Segundu Komandante Jeral PNTL Komisariu Mateus Fernandes hateten Hau sente kontente tebes bainhira graduadu sira hatais toga ne’ebe nakonu tebes ho esperansa povu no estadu nian iha ordem publika ba prosesu dezenvolvimentu nasional Timor-Leste nian.

Nia haktuirtan iha prosesu konstrusaun estadu iha dejafiu oi-oin ne’ebe mosu no ejiji ita prepara aan nudar sidadaun no nudar servidor ne’ebe kompetente tuir nesesidade nesesariu hanesan komponente prinsipal ba estadu no nasaun.

Lideransa instituisaun PNTL ne’e Espera katak graduadu sira sei fo rejultadu diak ba instituisaun PNTL hanesan povu no estadu nia iis ba dezenvolvimentu nasional liu-liu halao ordem publiku.

Entretantu Ex Prezidente Republika Dr. Jose Ramos Horta hateten  Hau nia prejensa atu fo apoiu moral ba instituisaun PNTL tanba iha mundu nasaun hotu iha Polisia ne’ebe maka sempre marka prejensa bainhira iha problema ruma maske dalabarak ita la rekonyese Polisia nia servisu.

Nia haktuirtan to’o ohin loron kondisaun no material ba pessoal seguransa sira seidauk sufsiente maibe iha mudansa balu no husu nafatin ba governu atu tau prioridade ba saude membru PNTL nian.

Iha oportunidade ne’e Loreadu Novel da Paz ne’e hato’o parabens ba graduadu no familia sira tanba ho familia nia suporta maka imi iha kbiit no inspirasaun ba hakaas aan hodi estuda, parabens mos ba Dosente no Instrutor sira iha CFP ne’ebe fo fatin atu ofisiais sira estuda no sai matenek liutan.

Iha okajiaun ne’e Reitor UNPAZ Adolmando Amaral  hateten Polisia tenke modernija sai professional wainhira atu sai professional sira tenke asesu no aprende iha nivel ensinu superior hodi halo interpretasaun konaba teoria no peskija barak maka iha ona alternativa ba sira atu kombina sira nia esperensia ho siensia ne’ebe maka sira aprende hodi halo atuasaun tuir konsetu prinsipal ne’ebe governu mehi katak Polisia tenke sai profesional.

Serimonia graduasaun ne’e kompleta ho Muda fita no entrega Diploma, Entrega Pin Dip Jep, Entrega Pin AAR no entrega graduadu ba Reitor UNPAZ

Fomandu sira ne’e mai husi Ofisiais Superior sira ne’ebe kolokadu iha Komandu munisipiu no Unidade sira hotu.

Serimonia ne’e partisipa husi Reprejentante Vise Ministru Interior Paul Martins, Diretor ANAAA, Diretor INDIMO, Diretora FDCH, Reitor IOB, Parseru TLPDP, familia graduadu no konvidadu sira. Media PNTL

Dili, Governu Repúblika Xina liu husi ninia Embaixada iha Timor-Leste sexta-feira (22/01) ne’e entrega doasaun Uniforme mai iha Komandu Polísia Nasional Timor-Leste (PNTL) hodi bele apoiu membru sira nian iha terenu. Uniforme hirak ne’e maka hanesan Sepatu Botas hamutuk 4500, Sintu hamutuk 4500, Kapa Udan ho nia total 4200 no Fatin Tau Be’e Hemu (Kantil-red) hamutuk 350. Entretantu Fatin tau be’e hemu nian ne’e sei distribui ba membru Unidade Patrullamentu Fronteira (UPF) bainhira halo partrullamentu iha liña fronteira.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha Salaun Enkontru Kuartél Jerál hateten loron ohin sai loron ida ne’ebe importante tanba tuir lolos atividade ne’e realiza iha tinan kotuk maibé tanba deit kestaun Pandemia ho situasaun Surtu COVID-19 ne’ebe mosu maka sasan hirak ne’e la konsege realiza iha tinan 2020 no ita realiza iha tinan 2021.

“Nune’e sasan hirak ne’ebe ohin loron ita hetan ne’e laos apoiu husi embaixada Xina maibé apoiu ida ne’e dala-barak no bebeik ona nu’udar kontinuasaun ba PNTL tanba apoiu sira seluk ne’ebe husi Repúblika Popular Xina ba Timor-Leste liu-liu iha PNTL maka hanesan apoiu ba Unidade Espesial ekipamentu seguransa ba iha parte EOD ninian, apoiu Ró Patrullamentu ba Unidade Polísia Marítima (UPM) ne’ebe inisia kedas desde tinan 2005 no ohin loron ita iha hodi halo servisu hanesan mós apoiu Radio Komunikasaun ba PNTL no mós Kamera Vizilansia ka CCTV sira ne’ebe ohin loron eziste”, haktuir Komandante Jerál PNTL ne’e.

Autoridade másimu Seguransa ne’e afirma tan katak laos deit sasan hirak ne’ebe ohin temi maibé iha buat barak maka embaixada Xina oferese ba Instituisaun PNTL dala ida tan maka ohin ita realiza iha loron 22 Janeiro tinan ne’e.

“Iha parte oportunidade ida ne’e programa apoiu hirak ne’e iha tanba Lideransa no Kooperasaun diak tebes entre PNTL ho Adidu Seguransa embaixada Xina ninian ne’ebe iha komitmentu ne’ebe bo’ot hodi iha komunikasaun diak PNTL ho Adidu Seguransa nian hodi bele realiza serimonia ne’e ho diak”, haktuir Komisariu Polísia ne’e.

Komisariu Polísia Faustino da Costa iha biban ne’e lori estrutura Komandu ninian agradese ba Embaixada Xina ho nia ekipa tomak katak apoiu no suporta husi ita bo’ot sira nian maka sei haforsa Profesionalizmu no Vizibilidade PNTL nian iha baze ne’ebe ikus mai sai mós hanesan Konfiansa ema hotu ninian ba Institusaun Estadu ida ne’e. Ba Komandante sira hotu inklui membru PNTL tomak katak apoiu hirak ne’e sei distribui iha tempu badak nia laran no husu atu uja ho responsabilidade liu-liu uja iha tempu ne’ebe maka presiza.

Iha fatin hanesan Embaixador Repúblika Xina iha Timor-Leste Dr. Xiao Jianguo’s hateten ne’e hanesan parte ida ajudu nasaun Xina ba Timor-Leste, hau fiak katak ho doasaun ne’e sei hasa’e kapasidade instituisaun PNTL nian liu-liu membru sira iha liña fronteira hodi hasoru Pandemia COVID-19 no ajuda sira hodi hala’o servisu ho efisiensia liu tan.

“Desde surtu COVID-19, governu Xina ho konsisten hakarak ajuda Timor-Leste liu husi ajudu ka apoiu ba nasaun Timor-Leste hanesan apoiu dahuluk governu Xina ninian ba situasaun COVID-19, embaixada Xina mós apoiu ona Maskra hamutuk 30.000 direita ba PNTL no 80.000 ba governu Timor-Leste liu-liu ba Ministeriu Interior, doasaun ohin loron ne’e ba PNTL hanesan meius seluk ida hodi hametin liu tan kooperasaun entre nasaun rua (Xina Ho Timor-Leste) no apoiu ne’ebe seriu husi governu Xina ba Timor-Leste”, afirma Komisariu Polísia ne’e.

Media PNTL.  

Dili, Komandu Polísia Nasional Timor-Leste (PNTL) no Ministeriu Turizmu, Komersiu no Industria (MTKI) liu husi Inspecção Geral dos Jogos kinta-feira (21/01) ne’e asina Nota Entendimentu ka Memorandum of Understanding (MoU) hodi kontrola jogu illegal hirak ne’ebe maka akontese iha nasaun Timor-Leste.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha edifisiu MTKI Fomentu hateten liu husi MoU entendimentu ne’e maka PNTL pronto atu kontribui hodi redúz atividade liu-liu jogu illegal sira ne’ebe maka fó prejuizu ba Estadu liu husi atividade ilísitu sira.

“PNTL nu’udar forsa seguransa ida ne’ebe iha misaun atu defende Legalidade Demókratiku, garante seguransa ba ema hotu-hotu inklui riku-soin ema hotu nian iha nasaun Timor-Leste no importante mós iha atividade sira hanesan ne’e presiza iha fiskalizasaun direita no mós supervizaun inklui monitorizasaun husi autoridade relevante sira seluk”, tenik Komandante Jerál PNTL ne’e.

Autoridade masímu Instituisaun Seguransa ne’e akresenta tan atividade sira ne’e sai fali atividade komérsiu ne’ebe bele fó lukru ba ema ruma bainhira laiha kontrolu no mós monitorizasaun husi parte sira relevante.

“Iha oportunidade ida ne’e Komandu PNTL apresia no agradese ba Inspetór Jerál Jogu ho nia ekipa tomak ne’ebe hala’o formasaun ba PNTL hod bele realiza atividade asina MoU ida ne’e, agradese mós ba Ministru MTKI ne’ebe maka apoiu tebes-tebes atividade realizasaun ba asina Nota Entendimentu entre instituisaun rua hanesan PNTL no Inspecção Geral dos Jogos ninian”, hateten Komisariu Polísia ne’e.

Iha fatina hanesan Ministru MTKI José Lucas do Carmo da Silva hateten ho akordu ida ne’e la signifika katak atu bandu jogu sira, maibé governu halo akordu ne’e ho objetivu atu regularize jogu sira ne’ebe maka bele hatama reseita ba Estadu Timor-Leste.

“Ho akordu ne’e maka parte Inspecção Geral dos Jogos hamutuk ho PNTL sei halo asaun sira ne;eve konkreta hodi kombate jogu illegal sira ne’ebe maka oras ne’e dadaun buras ona iha nasaun ida ne’e, tanba iha tempu ne’ebe naruk tebes grupu balun hakarak akumula deit ba sira nia interese maibé haluha tiha saida maka Estadu Direitu”, informa governante ne’e.

Nota Entendimentu ne’e asina entre parte Primeiru nian maka Inspetór Jerál Jogu MTKI nian Domingos da Costa Guterres ho parte Segundu maka Komandante Jerál PNTL Komisariu Polísia Faustino da Costa. Hola parte iha serimonia ne’e Ministru MTKI, Komandante Jerál PNTL, Inspetór Jerál Jogu MTKI, reprezentante Vise Ministru Interior atúal Sekretariu Estadu Protesaun Sivil, Estrutura Komandu PNTL tomak inklui funsionariu MTKI nian.

 Media PNTL. 

Dili- Polisia Nasional Timor-Leste (PNTL) rejista kazu hamutuk 97 durante semana ida nia laran hahu loron 15 to’o 20 Janeiru kompostu husi insidente 57 no asidente 40 hodi halo prosesu.

Porta Voz PNTL Superintendente Xefe Arnaldo Araujo hateten  kazu ne’ebe maka PNTL rejista maka Violensia Domestika 12, asaltu 11, Baku malu 10, Amiasa 4, Ofensas Integridade Fizika Simples 15, tuda malu 2 no estraga fasilidade publiku 1, Nia hato’o asuntu ne’e liu husi komferensia emprensa ohin (Kinta, 21/01) iha Kuartel Jeral PNTL Kaikoli Dili.

Nia haktuirtan PNTL  mos rejista kazu asidente trafiku hamutuk 40, kanek kmaan 24 no kanek todan 5. Kazu hirak ne’e nia prosesu lao ona hodi hato’o ba Ministeriu Publiku nune’e submete ba justisa.

Alende ne’e PNTL rejista mos sidadaun hirak ne’ebe maka tama illegal mai Timor-Leste liu husi fronteira terrestre hahu husi loron 01-20 Janeiru 2021 hamutuk sidadaun nain 76, sidadaun hirak ne’e kompostu husi timor oan hamutuk 73 no Estranjeiru hamutuk nain 3, ne’ebe  kompostu husi feto nain 18 no mane 58. Sidadaun hirak ne’e tama ona iha karantina durante loron 14 tuir regras Saude mundial.

Kestiona konaba akontesementu tiru mate karau iha Manufahi iha suku Dotik aldeia Weto, Komandu PNTL haruka ona ekipa husi Servisu Informasaun Polisial (SIP) tun ona ba terrenu hodi halo investigasaun, ekipa ne’e hetan evidensia balu hanesan involku iha fatin akontesmentu no sei halo investigasaun hodi justifika involku ne’ebe ema uza.

Andamentu ba prosesu ne’e lao hela no hein katak iha tempu badak sei hatene semaka involve iha kazu ne’e  nune’e Komandu bele foti desijaun ba kazu ne’e.

Iha biban ne’e porta voz mos apela ba povu atu labele estraga fasilidade hirak ne’ebe maka governu prepara no tau iha fatin publiku hanesan sinain tranzitu iha Estrada, fasilidade iha Jardim, tanba kodigu penal artigu 259 krime Danu Agravadu penalija hahalok ne’e ho ameasa kadeia tinan 2 to’o 8 ou multa. Tanba ne’e PNTL sei atua wainhira hetan keixa. Media PNTL

Maliana, Komandante Jerál Polísia Nasional Timor-Leste (PNTL) Komisariu Polísia Faustino da Costa iha segunda-feira (18/01) akompaña husi Komandante Komandu Operasaun Superintendente Xefe Pedro Belo hala’o vizita servisu ida ba munisipiu Bobonaro postu administrativu Maliana hodi hare’e besik liu tan seguransa iha area fronteira liga ho situasaun Pandemia COVID-19 ne’ebe ninia númeru sae maka’as iha rai ketan Indonesia-Atambua. Objetivu husi vizita ne’e maka atu fó orientasaun balun ne’ebe mai husi parte governu ba Komandu PNTL munisipiu Bobonaro oinsa maka atu asegura seguransa iha fronteira nian.

Komandante Jerál PNTL Komisariu Polísia Faustino da Costa iha ninia intervensaun ba enkontru ne’ebe hala’o iha Komandu PNTL munisipiu Bobonaro hateten ohin oportunidade diak ida hodi mai iha ne’e hodi fahe informasaun no oinsa ba oin ita nia servisu hamutuk hodi prevene Pandemia surtu COVID-19 ninian, oinsa ita hamutuk salva ita nia povu, ita nia komunidade no salva ita nia maluk sira hotu.

“Hanesan ita hotu hatene katak ita tama ona ba Estadu Emergensia (EE) ba dala-sia ninian ne’ebe hahu’u iha loron 3 fulan Janeiru sente katak todan oituan tanba suspende aktividade lubuk ida hanesan eskola la lao, misa iha igreja mós laiha, iha mós aktividade lubuk ida seluk ne’ebe labele lao”, tenik Komandante Jerál PNTL ne’e.

Komisariu Polísia akresenta tan katak hare’e ba situasaun iha rai laran liu-liu ba númeru moras COVID-19 komesa menus maka iha semana kotuk (sexta-feira) iha fila fali alterasaun ida, hafoin Konsellu Ministru altera ou hamamar oituan regras EE sira nian ba dala-sia maibé iha tempu ida hanesan ita nia Konsuladu Timor nian iha nasaun Indonesia liu-liu iha parte osidental aktualiza ba ita kona-ba situasaun ita nian iha parte tasi sorin ne’ebe fó risku tebes-tebes ba ita rasik iha Timor-Leste.

“Hakarak agradese ba Prezidente Autoridade ho nia ekipa tomak ninia esforsu tomak durante ne’e katak ita presija servisu hamutuk nafatin, reforsa liu tan laos deit iha parte Bobonaro nian maibé tantu mós iha munisipiu Covalima no mós iha Oecusse”, afirma Komisariu Polísia ne’e.

Iha biban ne’e, lider komunitaria sira munisipiu Bobonaro nian pronto nafatin atu servisu hamutuk ho Komandu PNTL munisipiu Bobonaro nian iha âmbitu prevensaun ba Surtu COVID-19 nian no mós asegura seguransa iha area fronteira.

Hola parte iha enkontru ne’e Komandante Jerál PNTL Komisariu Polísia Fautino da Costa Komandante Komandu Operasaun Superintendente Xefe Pedro Belo, Prezidente Autoridade munisipiu Bobonaro, Autoridade Postu, Xefe Suku no estrutura tomak Komandu PNTL munisipiu Bobonaro nian. Media PNTL.               

Dili- Polisia Nasional Timor-Leste (PNTL) rejista ema nain tolu (3) mate durante semana ida nia laran hahu loron 8-14 Janeiru tinan 2021 tanba asidente trafiku no insidente.

Porta voz PNTL Superintendente Xefe Arnaldo Araujo informa hahu loron 8 to’o 14 fulan ne’e Polisia Nasional Timor-Leste rejista ema nain ida mate tanba asidente trafiku entre kareta Bus no motorizada Honda Revo Fit ne’ebe soke malu iha area Manduki-Atabae rejulta vitima Joaquina Guilhermina (57) husi suku Sanirin Atabae mate, Nia hato’o asuntu ne’e liu husi komferensia emprensa ohin (Kinta 14/01) iha Kuartel Jeral PNTL Kaikoli Dili.

Komandante ne’e informatan PNTL mos rejista kazu insidente rua seluk maka eletrisidade soke mate vitima Dinis de Jesus Amaral (40) nudar professor husi Eskola Tekniku Profesional Akar laran munisipiu Covalima, vitima mate tanba la kuidadu aan wainhira hadia ahi eletrisidade iha nia uma.

Alende ne’e iha mos kazu ikan lanu ema nain ida mate iha suku Parlamentu munisipiu Lautem vitima Leonel Fernandes (9) no ema nain sia (9) seluk konsege lori ba ospital hodi halo tratamentu, ema hirak ne’e konsumu ikan ne’ebe maka sira kaer iha tasi maibe ikan ne’e iha benenu.

Porta Voz ne’e haktuirtan durante semana ne’e nia laran PNTL rejista insidente hamutuk 44 kompostu husi Asaltu malu kazu 11, baku malu kazu 14, Tuda malu 3, Tuda uma 1, Violensia Domestika 13, ikan lanu ema 1 no eletrisidade soke ema kazu ida (1) no asidente ne’ebe maka akontese hamutuk 16 no rejulta vitima ida mate.

Atualija mos katak hahu loron 29 fulan Dezembru 2020 to’o agora iha ema barak maka tama mai husi fronteira, sidadaun balu iha pasaporte kompletu maibe tanba momentu neba odamatan portaun taka hela entaun sira liu husi dalan illegal maibe sira ba aprejenta aan iha postu Polisia UPF iha lina fronteira no UPF lori sira ba Servisu Migrasaun hafoin kumpri karantina iha Mota Ain, Prosesu ba sidadaun hirak ne’e lao hela no lao tuir regras ne’ebe maka iha. Media PNTL

Dili, Durante loron hitu nia laran hahu’u husi loron 30 fulan Desembru 2020 to’o loron 05 fulan Janeiru tinan 2021 Komandu Polísia Nasional Timor-Leste (PNTL) rezista kazu Insidente hamutuk 69 no Asidente hamutuk kazu 23. Maske nune’e situasaun seguransa iha teritoriu nasional lao diak no hakmatek.

Porta Voz Komandu PNTL Superintendente Xefe Arnaldo Araújo liu husi konferensia Imprensa tersa-feira (05/01) ne’e iha Kuartél Jerál informa kazu Insidente ne’ebe maka mosu durante loron hitu nia laran, kazu ass liu maka asaltu malu, violensia domestika, baku malu no tuda malu.

“Kazu asidente ne’ebe maka akontese durante loron hitu nia laran rezulta ema na’in rua mate fatin no na’in 12 hetan kanek kma’an, enkuantu total kazu insidente ne’ebe maka mosu hanesan kazu asaltu malu hamutuk 31, violensia domestika kazu 9, baku malu kazu 9 no kazu tuda malu hamutuk 7”, informa Porta Voz Komandu PNTL ne’e.

Superintendente Xefe Arnaldo akresenta tan katak iha loron 02 fulan Janeiro tinan 2021 ema asaltu malu iha Suai suku Beco aldeia Diluhilil postu admistrativu Suai Villa munisipiu Covalima rezulta ema na’in hat kanek, suspeitu hamutuk na’in lima, na’in hat detein ona iha sela PNTL munisipiu Covalima no suspeitu ida seluk ho inisial A.S PNTL sei buka tuir hela, motivu husi asaltu malu ne’e sei iha prosesu nia laran.

“Iha loron sabadu 02/01 oras 10:00 matebian ho naran António de Araújo tinan 28 monu mesak husi rai naruk no mate fatin, iha aldeia Maubok suku Fatisi munisipiu Aileu; motivu husi akontesimentu ne’e maka bainhira matebian sai husi uma atu ba vizita nia familia hodi hato’o Boas Festas wainhira to’o iha aldeia Maubok matebian monu ba rai naruk mate iha fatin, kazu refere oras ne’e iha hela prosesu investigasaun”, esplika Superintendente Xefe ne’e.

Aktual Xefe Gabinete Relasaun Públika PNTL ne’e afirma tan katak iha loron 04 Janeiro tinan 2021 mosu abuzu Seksual ida iha munisipiu Ermera iha ne’ebe joven feto ida ho idade 19 anos ho inisial AV hela iha Dili (Bebonuk) ho nia familia ba iha Gleno, wainhira to’o iha ne’eba vitima (joven feto-red) hetan violasaun abusu seksual husi mane joven na’in tolu, oras ne’e dadaun PNTL munisipiu Ermera hala’o hela ninia prosesu investigasaun.

Komandu PNTL Husu Ba Komunidade Atu Kumpri Regras EE

Relasiona ho situasaun Pandemia Covid-19 iha Timor-Leste, iha inisiu tinan 2021 Prezidente Repúblika dekreta tan extensaun Esradu Emergensia (EE) ba Da-sia liu husi Dekretu Prezidente Nu.73/2021 no Dekretu governu Nu.21/2021 iha ne’ebe Ministeriu Saúde (MS) aplika Protokolu hanesan medida sira hodi prevene moras Covid-19, maka Komandu PNTL husu ba komunidade sira atu kumpri regras hirak ne’ebe maka MS fó sai.

“Husu ba komunidade sira atu kumpri regra sira husi MS hanesan wainhira sai husi uma tenke uza mascara, fase liman ho sabaun, distansia sosial husi ema ida ho ema seluk, labele halibur malu liu ema na’in sanulu, laiha aktividade kultura hanesan festa ou serimonia sira ne’ebe halibur ema barak, molok tama ba supermerkadu sira tenke fase liman no matein distansia sosial iha loja laran”, apela Xefe Gabinete Relasaun Públika PNTL ne’e.

Media PNTL.