Dili, Komandu Polísia Nasional Timor-Leste (PNTL) no Ministeriu Turizmu, Komersiu no Industria (MTKI) liu husi Inspecção Geral dos Jogos kinta-feira (21/01) ne’e asina Nota Entendimentu ka Memorandum of Understanding (MoU) hodi kontrola jogu illegal hirak ne’ebe maka akontese iha nasaun Timor-Leste.
Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha edifisiu MTKI Fomentu hateten liu husi MoU entendimentu ne’e maka PNTL pronto atu kontribui hodi redúz atividade liu-liu jogu illegal sira ne’ebe maka fó prejuizu ba Estadu liu husi atividade ilísitu sira.
“PNTL nu’udar forsa seguransa ida ne’ebe iha misaun atu defende Legalidade Demókratiku, garante seguransa ba ema hotu-hotu inklui riku-soin ema hotu nian iha nasaun Timor-Leste no importante mós iha atividade sira hanesan ne’e presiza iha fiskalizasaun direita no mós supervizaun inklui monitorizasaun husi autoridade relevante sira seluk”, tenik Komandante Jerál PNTL ne’e.
Autoridade masímu Instituisaun Seguransa ne’e akresenta tan atividade sira ne’e sai fali atividade komérsiu ne’ebe bele fó lukru ba ema ruma bainhira laiha kontrolu no mós monitorizasaun husi parte sira relevante.
“Iha oportunidade ida ne’e Komandu PNTL apresia no agradese ba Inspetór Jerál Jogu ho nia ekipa tomak ne’ebe hala’o formasaun ba PNTL hod bele realiza atividade asina MoU ida ne’e, agradese mós ba Ministru MTKI ne’ebe maka apoiu tebes-tebes atividade realizasaun ba asina Nota Entendimentu entre instituisaun rua hanesan PNTL no Inspecção Geral dos Jogos ninian”, hateten Komisariu Polísia ne’e.
Iha fatina hanesan Ministru MTKI José Lucas do Carmo da Silva hateten ho akordu ida ne’e la signifika katak atu bandu jogu sira, maibé governu halo akordu ne’e ho objetivu atu regularize jogu sira ne’ebe maka bele hatama reseita ba Estadu Timor-Leste.
“Ho akordu ne’e maka parte Inspecção Geral dos Jogos hamutuk ho PNTL sei halo asaun sira ne;eve konkreta hodi kombate jogu illegal sira ne’ebe maka oras ne’e dadaun buras ona iha nasaun ida ne’e, tanba iha tempu ne’ebe naruk tebes grupu balun hakarak akumula deit ba sira nia interese maibé haluha tiha saida maka Estadu Direitu”, informa governante ne’e.
Nota Entendimentu ne’e asina entre parte Primeiru nian maka Inspetór Jerál Jogu MTKI nian Domingos da Costa Guterres ho parte Segundu maka Komandante Jerál PNTL Komisariu Polísia Faustino da Costa. Hola parte iha serimonia ne’e Ministru MTKI, Komandante Jerál PNTL, Inspetór Jerál Jogu MTKI, reprezentante Vise Ministru Interior atúal Sekretariu Estadu Protesaun Sivil, Estrutura Komandu PNTL tomak inklui funsionariu MTKI nian.
Media PNTL.
