Dili- Unidade Espesial Polisia (UEP) sei realija jogu football Taxa UEP Cup hodi komemora aniversariu UEP ba dala-13 iha loron 14 Agostu 2022, nune’e bele kria relasaun amizade ho joventude sira.

Prezidente komisaun organizadora Taxa UEP Cup Superintendente Polisia Damião Correia hateten atu komemora aniversariu UEP nian maka sei realija atividade jogu football hamutuk ho komunidade no joven sira ho objetivu atu kria no hametin relasaun amizade entre membru UEP ho komunidade hodi asegura no hametin seguransa no estabilidade ba povu no nasaun doben Timor-Leste.

Nia hatutan komisaun organizadora hasai ona konvite ba klube football sira ne’ebe maka ejisti iha Dili no munisipiu nune’e iha ona klube balu maka mai rejistu no Ami loke nafatin inskrisaun to’o loron sexta 15/07.

Hafoin inskrisaun remata komisaun organizadora sei halo enkontru tekniku hamutuk ho klube sira ne’ebe maka rejistradu ona hodi desidi orariu bainhira maka hahu jogu no durasaun ba jogu ne’e rasik.

Ba manan nain sira UEP prepara taxa permanente nune’e ba klube hirak ne’ebe maka manan jogu ne’e sei simu taxa.

Iha biban ida ne’e komisaun organizadora aviza ba publiku liu-liu klube football sira ne’ebe maka ejisti no iha interese bele mai rejistu iha Kuartel UEP Bairo-Pite Dili. Komisaun organizadora estabelese kriteria ne’ebe klaru ba futebolista sira konaba taxa no lalaok jogu ne’e rasik.

Atividade ne’e sei realija ho orsamentu husi Komandu maibe la taka dalan atu simu apoiu husi parseru sira ne’ebe maka  iha interese atu apoiu hodi realija atividade jogu amizade ne’e,

Relasiona ho aniversariu UEP maka sei halao atividade prinsipal ne’ebe maka sempre halao kada tinan hanesan serimonia aniversariu ne’ebe maka sei halo ho aprejentasaun atrasaun husi sub unidade tolu (3) maka hanesan Batelaun Ordem Publika (BOP), Corpu Seguransa Polisia (CSP) no Comandu Operasaun Espesial (COE) ne’ebe maka agora daudaun halao hela preparasaun. Media PNTL