Baucau, 26 abril 2022 (SRP) – Vise-Ministru Interior, Antonio Armindo, hato’o nia kongratulasaun ba Komandante BOP (Batallaun Ordem Publika) nu’udar ramu hosi Unidade Espesial Polisia (UEP), COP Bravo, Inspetor Polisia Basilio M. B. Freitas ho nia ekipa ne’ebe maka servisu hamutuk ho Komandu PNTL Baucau hodi asegura seguransa paz no estabilidade durante eleisaun prezidensial iha Munisipiu Baucau.
Governante ne’e hato’o nia sentimentu direta ba membru sira iha nia vizita traballu mai Komandu PNTL Munisipiu Baucau hodi rona mos membru sira nia preokupasaun balu durante halo knar hodi fo seguransa iha Munisipiu refere.
“Hakarak hato’o hau nia apresiasaun ba imi nia servisu durante asegura eleisaun prezidensial foin dadaun liu ba ne’e atu rona mos imi nia problema balu ne’ebe imi hasoru tanba hau hamutuk ho ita nia Primeiru-Ministru no Ministru Interior hahu hadia neineik hodi halo modernizasaun ba instituisaun PNTL”, dehan Antonio Armindo, durante enkontru ho Komandante Basilio Freitas ho nia membru sira iha Compañia Bravo Baucau, tersa ne’e.
Governante ne’e fo hanoin nafatin ba membru sira atu halo atuasaun bazeia ba lei ne’ebe hatur ona.
“Guvernu apresia tebes imi nia servisu hodi koopera ho Komandu PNTL Baucau tau matan ba estabiliade, maibe imi nia atuasaun tenke obriga ema kumpri regra hodi labele perturba ordem publiku, maibe tenke bazeia nafatin ba direitu humanu” hakotu.
Hafoin remata enkontru ne’e Vise-Ministru Antonio Armindo ho ekipa kontinua halo vizita ba Komandu PNTL Munisipiu Viqueque hodi kontinua rona preokupasaun hosi membru sira. Media Serviços Relações Públicas MI
