Palásiu Prezidensiál Nicolau Lobato, Díli, 28 abril 2022
Prezidente Repúblika, Francisco Guterres Lú Olo, ohin, iha enkontru semanál ho Komandante Jerál Polísia Nasionál Timor-Leste (PNTL), Komisáriu Faustino da Costa no Segundu Komandante, Komisáriu Mateus Fernandes, husu atu PNTL asegura seguransa iha preparasaun no realizasaun serimónia tomada posse Prezidente Repúblika foun, iha 19 maiu no iha selebrasaun Loron Restaurasaun Independénsia 20 maiu.
Prezidente Repúblika mós “agradese ba servisu hirak ne’ebé polísia halo durante ne’e” no husu PNTL mantein nafatin servisu di’ak sira ne’e.
Ba imprensa hafoin enkontru ho Xefe Estadu, Komisáriu Faustino da Costa esplika Komandu PNTL iha ona planu oinsá atu halo seguransa liu husi enkontru avaliasaun ne’ebé sei halo ho Komandu Munisipiu no Unidade sira PNTL, iha 2 maiu no tuir mai, iha 13 maiu, ho foku ba serimónia rua iha 19 no 20 maiu.
Komisáriu Faustino da Costa informa Komandu PNTL to’o oras ne’e sei hein hela husi Komisaun Organizadora lista konvidadu importante sira hanesan Xefe Estadu no Xefe Governu, ne’ebé sei marka prezensa iha serimonia rua refere, nune’e PNTL bele prepara ho antesedénsia nia membru no ekipamentus sira ne’ebé presiza hodi fó seguransa ho di’ak.
Ko’alia kona-ba situasaun seguransa iha rai-laran, Komisáriu Faustino da Costa hatete: “situasaun (seguransa) iha territóriu nasionál la’o di’ak”. MÍDIA PR
