Dili, Atu asegura seguransa durante vizita Sua Santidade Amo Papa Francisco nian mai Timor-Leste ho diak iha fulan Setembru tinan 2024, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa akompaña husi Segundu Komandante Jerál Komisariu Polísia Pedro Belo iha loron tersa-feira (13/08) ne’e hala’o enkontru ho Komandante Komandu PNTL munisipiu 14 inklui RAEOA hodi hato’o orientasaun servisu Komandu nian.
Iha intervensaun enkontru ne’e Komandante Jerál PNTL Komisariu Jerál Polísia Henrique da Costa hateten alén-de hato’o orientasaun, Komandu mós sei rona difikuldade, problema ka informasaun ou buat ruma maka relasiona ho vizita Amo Papa ninian, sé karik iha Komandu munisipiu idak-idak wainhira hala’o enkontru ho parseiru sira hanesan Igreja, Veteranu, Prezidente Autoridade, Juventude ou buat ruma ne’ebe maka Komandu munisipiu labele solusiona, ita bele koalia hamutuk saida maka Komandu bele apoiu atu nune’e solusiona difikuldade sira ne’e.
“Hanesan ita hatene katak Komandu Jerál sei buka meius, esforsu tomak atu nune’e bele apoiu ita nia Komandante sira, apoiu ita nia membru sira ne’ebe maka tun direitamente iha terenu hodi asegura Vizita Sua Santidade nian, ita mós hatene katak iha tempu ne’eba ita foti membru sira husi munisipiu mai, sei sai mós impaktu ida ba servisu operasional iha munisipiu sira hotu, ne’e buat ida ne’ebe maka munisipiu hotu sei infrenta maibé hau husu ba imi atu nune’e ita tenke nafatin maneja oinsa atu ho númeru ne’ebe maka ita iha, karik iha problema ruma iha munisipiu ka eskuadra sira, iha ema ruma sempre iha atu nune’e bele responde”, afirma Komandante Jerál PNTL ne’e.
Komisariu Jerál Polísia ne’e salienta tan katak buat balun ne’ebe maka ita presiza tau atensaun maka servisu ida ne’e responsabilidade Polísia ninian, responsabilidade seguransa ninian, ita nia kolega sira (F-FDTL) ne’e mai apoiu ita. Imi kumpri tuir Ordem Operasaun ne’ebe maka fó sai ona ba imi, hala’o tuir ida ne’e, karik iha buat ruma nafatin mantein komunikasaun ho Komandante Komandu Operasaun ou bele direitamente mai iha Komandante Jerál no Segundu Komandante Jerál.
Iha biban enkontru ne’e, Komandu mós rona preukupasuan no problema sira ne’ebe maka Komandu munisipiu sira hasoru iha âmbitu preparasaun vizita Amo Papa Francisco nian. Hola parte iha enkontru ne’ebe hala’o iha Kuartél Jerál maka Komandante Komandu PNTL munisipiu 14 inklui RAEOA. Media PNTL.
