Lansamentu Livru Esiklopedia Ba Eis Komandante Jerál PNTL

434190181_442248391648078_4878872567979935109_n

Dili, Komandu Polísia Nasional Timor-Leste (PNTL) iha selebrasaun aniversáriu ba dala XXVI iha loron 27 fulan Marsu tinan 2024 halo Lansamentu Livru Eis Komandante Jerál PNTL.

Komandante Komandu Pesoal no Formasaun Superintendente Xefe Arquimino Ramos iha ninia enkuadramentu ba Lansamentu livru ne’e hateten Komandante Jerál PNTL Komisariu Jerál Polísia Henrique da Costa orienta ekipa Elaborasaun ba Esiklopedia Eis Komandante Jerál PNTL hanesan Vizaun diak ida ne’ebe atu hatu’ur istoria PNTL hahu’u husi Komandante Jerál Dahuluk Superintendente Paulo Martins, Komisariu Afonso de Jesus, Komisariu Longinhos Monteiro, Komisariu Julio da Costa Hornay no Komisariu Faustino da Costa.

“Agora dadaun Redasaun Esiklopedia ba Eis Komandante Jerál sira, ba Timor-Leste hanesan buat foun maibé iha nasaun barak ne’ebe ita le’e sira nia referensia, istoria barak hahu’u husi sira nia Eis Komandante Jerál sira dahuluk hodi hare’e ninia progresu, dezafiu sira ne’ebe sira hasoru husi tempu ba tempu durante sira lidera instituisaun PNTL”, esplika Komandante Komandu Pesoal no Formasaun iha selebrasaun aniversáriu PNTL nian ba dala XXVI.

Superintendente Xefe ne’e salienta tan katak lori ekipa ne’ebe elabora Livru Esiklopedia ba Eis Komandante Jerál nian hato’o apresiasaun no agradesimentu ba Komandante Jerál no Segundu Komandante Jerál ne’ebe maka ho hanoin diak orienta ami ekipa ida ne’e, ho tempu ne’ebe maka badak tebes maibé ami fiar katak Livru ida ne’e bele sai Referensia ba Instituisaun PNTL ne’ebe hare’e ninia lalaok, progresu no dezafiu sira ne’ebe ita hasoru hahu’u husi tinan 2000 to’o mai tinan 2024.

“Hanesan tema ba aniversáriu tinan 2024 maka Polísia ida ne’ebe Profesional no Polísia ne’ebe Resiliente katak ita hasoru dezafiu, obstáklu lubuk ida maibé ho Esperítu no Vontade, Esperítu Patriotizmu no Nasionalizmu ita konsege hakat liu, ultrapasa situasaun sira ne’e no ohin ita afirma ba públiku katak PNTL ida ne’ebe Resiliente katak Sei La Nakdoko ba soke sira ne’ebe sei mai iha oin, ita afrima ba públiku katak ita prontu atu servi deit Estadu no Povu Rai doben Timor-Leste”, tenik Superintendente Xefe ne’e.

Media PNTL.

 

Komisariu Jerál Polísia Henrique da Costa Atribui Sertifikadu Louvor Hamutuk 190 Ba Membru PNTL Tomak

434197894_442242401648677_7245424531369980835_n

Dili, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa iha âmbitu Komemorasaun Aniversáriu PNTL nian ba dala XXVI iha loron 27 fulan Marsu tinan 2024 atribui Sertifikadu Louvor hamutuk 190 ba membru sira ne’ebe hala’o funsaun polisial iha diferente Unidade, Orgaun Servisu PNTL nian.

Sertifikadu Louvor hirak ne’e atribui ba iha membru sira husi Komandu Regional, Komandu Munisipiu PNTL, Unidade Patrullamentu Fronteira (UPF), Unidade Polísia Marítima (UPM), Unidade Espesial Polísia (UEP), Komandu Operasaun, Komandu Pesoal no Formasaun, Komandu Administrasaun, Gabinete, Estrutura Apoiu Komandu Jerál PNTL.

434191237_442313051641612_6563118352061625165_n

Iha sekuensia programa serimonia Aniversáriu PNTL ba dala XXVI ne’ebe hala’o iha Kuartél UEP Bairo-Pite ne’e membru hirak ne’ebe maka reprezenta hodi simu sertifikadu Louvor husi Komandante Jerál PNTL maka hanesan Superintendente Umbelina dos Santos Soares, Superintendente Assistente Augosto Tilman da Costa, Inspetór Aleixo da Costa, Inspetóra Assistente Elfie Gonsalves Perreira, Primeiru Sargentu Sandra António da Cruz, Agente Xefe Mario Filipe, Agente Xefe Rui Manuel Freitas no Agente Xefe Anino da Gama.

Sertifikadu Louvor ne’e rasik entrega husi Presidente Repúblika Jose Ramos Horta, Presidente Tribunal Rekursu Deolindo dos Santos, Ministru Interior Francisco da Costa Guterres no Eis Primeiru Ministru Taur Matan Ruak.

Atribui mós Titlu Simboliku sertifikadu ba Funsionariu Sivil PNTL na’in rua maka hanesan Manuel da Costa no Alcina Perreira. Sertifikadu ne’e entrega husi Komandante Jerál PNTL Komisariu Jerál Polísia Henrique da Costa no Segundu Komandante Jerál Komisariu Polísia Pedro Belo.

Iha serimonia ne’e, Presidente Repúblika Dr. José Ramos Horta Kondekora Medalha de Mérito Sertifikadu Rekoñesimentu ba Tenente Coronel Guarda Nacional Repúblicana (GNR) Paulo Gorge Andre Serra tuir Dekretu Nu.15 de 2009 de 18 Março.

Media PNTL.

 

Diskursu Komisariu Jerál Polísia Henrique da Costa Iha Selebrasaun Aniversáriu PNTL Ba Dala XXIV

434227540_442240028315581_2849892990040100217_n

Ezselentísimus Konvidados sira hotu Permite hau atu hahu hodi ezpresa hau nia profundu agradesimentu ho ita boot sira nia prezensa iha komemorasaun bá PNTL nia aniversáriu.

lha tinan 24 liu-bá, dia 27 de Marsu 2000 husi primeiru grupu 50 jovens polisiais kompleta nia formasaun, ne’ebé hamosu PNTL. Iha tinan barak nia laran polísia adapta ona evolusaun sosiedade no konsolida nia posisaun hanesan agente produtor seguransa, no hatudu sempre nia kapasidade profesionalismu no reziliensia ne’ebé ás.

Tinan ida kotuk liubá hau asume knaar hanesan Komandante-Jerál no iha hau nia diskursu ne’ebé hau hato’o tempu ne’ebá, ami kompromete hodi dedika a’an ba interese públiku ho komprimisu, motivasaun ne’ebé a’as, lealdade, espíritu ba misaun no buka atu solusiona problema mesmu iha difikuldades, ida ne’e maka ami halo ba interese no benefisiu instituisaun no povo nian.

Tempu ne’ebá ami apresenta mos prioridades 5 ne’ebé sai hanesan matadalan ba ami nia komprimisu bá nasaun iha periudu 2023/2026 hodi serbí rai no povo ida ne’e, ami hahu hala’o ami serbisu hodi atinji metas sira neʼebé estabelese ona.

Tanba ne’e iha parte Melloria Jestaun Institusional halo ona ajustamentu iha estrutura PNTL, elabora mos prosesu promosaun ba modalidade antiguidade no eskolla, propoin ona kuadru pesoál adekuadu bá nesesidade polisia nian, halo mos estudu ba nesesidade rekrutamentu, realiza mos atividades ne’ebé promove igualidade jéneru no inkluzaun, ami dezenvolve hela prosesu legal sira neʼebé nesesáriu ba konkretizasaun Institutu Siénsias Polisiás no Akademia Polisia, kria mos Asosiasaun Esposas/Maridus PNTL neʼebé bainhira hahu, halo ona nia papél importante tebes, relevante ho ponto de vista sosiál ba realizasaun atividades sira ne’ebé proporsional ba membrus hirak ne’ebé enfrenta difikuldade balun, ba perspetiva futuru ne’ebé diak, aprofunda mos relasaun sira ho parseiru dezenvolvimentu.

Salienta mos katak, ho objetivu atu proporsiona asisténsia médika, psikolójiku no aimoruk ba polisia ho sira nia familia, ami mantein kontatu próximu ho Departamentu Saúde, hodi implementa medidas neʼebé adekuadu bá prevensaun no análize ba moras ne’ebé mosu husi atividades polisia nian, hodi mantein relasaun diak ho Hospital Nasional Guidu Valadares (HNGV), hodi enkamiña polísia no funsionáriu sivil sira ho problemas saúde ne’ebé grave liu.

Refere ba iha reforsu legislasaun, kolabora mos iha revisaun Lei Organika, Estatutu Profisionál no Regime Renumeratóriu, kontribui mos hodi fó pareser ba iha Kódigu Estrada no Regulamentu Sinalizasaun Transitu no propoin regulamentu sira ba konkursu admisaun ba Agente no Ofisiáis sira.

Iha parte Kooperasaun Institusional, halo hela esforsu atu ita mos bele adere ba ASEAN, no reforsa ita nia ligasaun ho nasaun sira seluk hanesan Australia, China, Korea do Sul, Estadus Unidus Amerika, Japaun, Indonesia, Portugal no Nova Zeladia nune’e mos ba organizasaun sira hanesan TLPDP, UNDP no 10M, no mantein nafatin hodi hametin relasaun.

Alende relasoens bilaterais promove mos reuniaun regularidade ne’ebé permite reforsa sentimentu seguransa ba estranjeiru sira ne’ebe mak hela iha Timor-Leste, troka informasaun sira ne’ebé kontribui seguransa ba ema hotu.

Internalmente ami mos estabelese kooperasaun ho entidade sira seluk hanesan manutensaun hodi kombate krime brankamentu kapitais, Protokolu ho Unidade Informasaun Finanseira husi Banku Sentral, Provedoria Direitus Umanus no Justisa, Komisaun Anti Korrupsaun hodi kombate korrupsaun, Ministeriu Turismu Komersiu Industria relasiona ho kontrolu jogus ilisitus, Komisaun Reguladora Arte Marsiais hodi realiza asaun sensibilizasaun no fizkalizasaun ba prevensaun konflitus.

Ami mos kria amizade ho veteranu sira, Igreja no ONG sira. Ba parseria hirak ne’e, permite ita hodi serbisu no dezenvolve aspetu espesifku sira no halo ita nia polisia sai forte liu. Kona-bá melloria kapasidade hodi responde bá sidadaun sira hetan mos apoiu husi parseiru dezenvolvimentu hodi fó formasaun no treinu tantu iha territóriu nasionál nomos iha estranjeiru ba melloramentu kapasidade membrus PNTL Hodi reforsa páz, seguransa interna no estabilidade lor-loron, ami habelar instrusaun no informasaun relativamente ho poténsia fenomenu krime ne’ebé lao hela, jestaun tráfiku no halo hela akompañamentu hodi monitoriza fenomenu ne’ebé bele afeta seguransa ba ita nia populasaun sira.

Nune’e mos ba ita nia fronteira terestre no maritima presiza iha atensaun espesiál husi polísia, tan ne’e, alende reforsu rekursus umanus ne’ebé aloka ba iha sistema rekolla informasaun, maibe mos halo reforsu fiziku ba vijilánsia iha fronteira terestre liu-husi apoiu Komandu Munisipiu sira no UEP, hodi mantein kontrolu ema tama no sai, no evita prátika krime. Ami mos hahu realiza preparasaun hamutuk ho entidades sira seluk hodi simu ita nia Sua Santidade Papa Francisco, nune’e ninia viajen mai Timor- Leste bele fő seguransa no trankuilidade tuir saida maka ita hotu hakarak.

Apezar exemplu sira ne’ebé temi ona, ami mos hakarak hato’o katak, durante tinan ida ami nia mandatu enfrenta hela difikuldades balun, maibe ho deit profesionalismu no reziliensia ami konsege ultrapasa difikuldades hirak ne’e liu husi apoiu inkondisional husi Governu liu husi Ministériu Interior no entidades parseiria sira. Indikadores ba atividade sira positivu tebes maibe krime ida sempre krime, nune’e ita hotu tenke alerta hodi haburas ita nia dezempeñu.

Ita konsiente katak, presiza apoiu husi parte hotu hodi kontinua avansa no konsolida ita nia polisia ba futuru ne’ebé diak. Estatístika kriminalidade aumenta iha tinan kotuk bainhira ita kompara ho tinan sira kotuk-bá besik 25%, laos deit ho tipolojia kriminais iha fin husi pandemia COVID-19 no aumentu neʼebé progresivu husi populasaun, maibe tanba ita nia atuasaun ne’ebé proativu liu.

Ita hatene katak, evolusaun kriminalidade sei obriga polísia hodi halo estratéjia foun ne’ebé adapta husi kada tipu krime, nomos oinsá utilizasaun efetivu ba ekipamentus no materiais sira. Hanesan mos ho tinan hirak kotuk liu-bá, apezar iha alterasaun legislativas iha tinan 2023 kontinua iha númeru insidente entre grupu rivais iha fatin hotu liu-liu iha Dili, neʼebé provoka distúrbiu ba orden públika.

Tanba ne’e konsidera hanesan fonte ida ba inseguransa no poténsia ameasa ba estabilidade rai ida ne’e, PNTL aposta hela iha asaun sensibilizasaun, proximidade nomos diálogu, nune’e husu atu problema hirak ne’e laos deit sai kazu polisia nian maibe tenke aproxima bebeik liu husi perspetiva multidisiplina, envolve Governu, Institusiaun sira no komunidade Alende insidente grave sira iha territóriu nasional ne’ebé provoka vitima no destruisaun patrimoniu sira, ami mos preokupa disputa sira konba rai, datensia domestika, krime organizadu transnasional, kazu burla, trafiku wialna kriminalidade informátika, terrorizmu, kontrabandu, peska ilegal no asidente viasaun ne’ebé sempre akontese tinan tinan hodi resulta ema lakon vida iha ita nia rai.

Ba materia ida ne’e apezar númeru asidente no kanek sae uitoan, ita orgulhu tanba nia gravidade diminui ou menus liu-liu númeru ema lakon vida menus 20%, husi 2022 no 2023, ami konsiente katak ho deit prezensa PNTL ba prevensaun seidauk to’o, maibe dalan ida diak liu mak sensibilizasaun neʼebé esensiál tebes ba iha eskola no komunidade sira.

Apezar situasaun hirak neʼebé maka ita hotu preokupa, maibe ita rejista hela tantu iha Timoroan sira nia oin nune’e mos ba ema estranjeiru sira tha ne’e neʼebé hala’o hela serbisu no mai visita, konsidera Timor-Leste hanesan nasaun ida seguru no livre ne’ebé relevante tebes no positivu ba PNTL hodi hatudu katak, empeñamentu no dedikasaun ita nia membrus sira hatudu ona kontribuisaun hodi mantein páz no trankuilidade bá populasaun sira durante tinan 2023. Permite hau atu koalia tan situasaun kona-bá misaun internasional.

Ita konsiente katak, dezafiu sira kona-bá seguransa la koñese fronteira, ami nia misaun laos hare deit ba iha planu domestiku no ami mos hamorin ona ita nia rai nia naran iha rai sira seluk.

Iha ambitu internasional, investimentu iha area formasaun ba Misoens Internasionais kualidade ita nia membrus PNTL sira hatudu ona diversus senarius hanesan Kosovo, Guine Bissau no resentemente liu iha Sudaun do Sul hodi kontribui ba páz no seguransa internasional.

Iha parte ida ne’e, ami mos propoin hela ofisial dirigente PNTL ida hodi koloka iha sede Nasoens Unidas, hodi nune’e bele aumenta influensia ita nia país iha sistema internasional no afirma imajen PNTL no Timor-Leste iha mundu.

Maibe karik ita bele sente orgullu ba buat hirak ne’ebe mak feto ka mane halo ona iha seguransa ba rai ida ne’e, ita mos siente katak, ita sei iha dalan ne’ebé naruk atu perkore hodi realiza buat hirak tuir mai, tanba ne’e ita presiza atu resolve kestaun balu iha area Pesoál banesan rekrutamentu Ajentes foun no promosaun ba sira ne’ebé tuir kareira no tempu ou lha parte Lojistika no Infraestrutura, hadia kondisaun serbisu membru sira, fornesimentu viaturas, ekipamentus no instalasaun sira.

Sei laiha duvida liu husi melloria area hirak ne’e no ita sei konsege halo buat barak iha parte Operasional, moderniza nia prosedimentus ho signifikativamente hasae ekonomia, efislénsia no efikásia.

Ami sei kontinua dezenvolve PNTL hodi fo formasaun diversifikada no adekuada tuir nesesidades interna no externa hodi kontribui ba realizasaun programa Nonu Governu Konstitusional no Planu Estratéjiku 2011-2030 no ami sei hakas an ba benifisiu povo timorense.

Parada husu atensaun Karus membru PNTL, sira, hau nia liafuan ikus mak ba imi, Durante tinan 24 imi halo ona imi nia misaun neʼebé determinante tebes ba iha susesu hodi kombate atu mantein seguransa interna, trankuilidade públika no ba kumprimentu ita nia misaun sira.

Apezar ita hasoru difikuldades neʼebé grave hanesan krize 2006, polísia sira sempre hatudu nia forsa, koesaun, konfiansa no fó esperansa ba futuru ne’ebé seguru ba povu timorense.

Segredu husi susesu mak sempre ho Profesionalismu no Reziliensia:

– profesionalismu iha serbisu ne’ebé ita ezekuta;

– reziliensia iha esforsu;

-profesionalismu neʼebé íta uza hodi apoiu ita nia populasaun lor-loron

-reziliensia ba mane ka feto PNTL ne’ebé konsege adapta mudansa, dignifika farda ne’ebé ita uza lor-loron ho orgullu:

Profesionalismu iha atuasaun sira sempre ho imparsialidade no apartidarismu ba ema hotu;

– reziliensia hodi atende sidadaun sira ho kapasidade hodi simu kritika no konstrutiva ne’ebé permite melloria serbisu polisial;

– profisionalismu ba iha zona ne’ebé remota liu no tha kondisaun neʼebé difisil hodi garante seguransa ba ema hotu

– reziliensia ne’ebé permite ita atu fó esperansa ba futuru neʼebé seguru liu ba povo timorense;

Dala ruma iha mal komprensaun, maibe sempre leal, no hakruk ba fiar neʼebé fó ba ita no ba Timoroan hotu hodi fő valor neʼebé ás ba pátria no respeitu ita nia povo.

Imi hatene oînsă atu hatudu umanismu ne’ebé Polísia Nasional Timor-Leste iha, hodi aliña disponibilidade permanente hodi servi ita nia rai.

Hau sei fó atensaun tomak hodi kontinua ho komprimisu atu kria kondisaun nesesaria ba melloramentu imi nia serbisu ba imi nía dedikasaun tantu iha revisaun diploma sira tuir estrutura polisia nian, akizisaun ekipamentus nomos melloramentu infrastuturas ne’ebé lor-loron imi serbisu ba.

Tanba ne’e, ita hotu tenke agradese ba apoiu neʼebé ita simu husi ministériu sira ne’ebé serbisu diretamente ho PNTL, ne’ebé la ho imi nia apoiu tomak ami la konsege alkansa padraun sira atual ba iha dezenvolvimentu no seguransa públika.

Ita hotu hatene katak, dalan ne’ebé ita atu lao sei hasoru dezafiu no susar tebes, maibe ita hotu tenke hare bá futuru ho esperansa neʼebé forte no enerjia.

Kontinua sura mos ho imi, ho ida ne’e deit, ita bele kontinua hodi afirma katak PNTL ohin loron no sempre profissional, reziliente ne’ebé hanesan ho nia lema “Serbí no Proteje”. Obrigado barak.

AFP Kontinua Apoiu PNTL

434206666_441690585037192_5540521490886190481_n

Dili, Australia Federal Police (AFP) liu husi Timor-Leste Police Development Program (TLPDP) kontinua apoiu Komandu Polísia Nasional Timor-Leste (PNTL) iha area Terorizmu no area Kooperasaun Polisial. Akordu rua ne’e asina direita husi Komandante Jeral PNTL Komisariu Jerál Polísia Henrique da Costa ho Deputy AFP Lisa Gale iha tersa-feira (26/03) ne’e no asiste direitamente husi Ministru Interior, Sekretariu Estadu Protesaun Sivil, Segundu Komandante Jerál no Komandante Komandu Supervizaun sira PNTL nian.

Ministru Interior Francisco Guterres ba jornalista sira hafoin asiste asina akordu ne’ebe hala’o iha Salaun Ministeriu Interior hateten ohin ami asiste asinatura akordu tékniku rua entre Polísia Australia ho Polísia Timor-Leste.

“Akordu rua ne’e importante tebes tanba Kooperasaun ida entre Polísia Australia ho Polísia Timor-Leste liu husi TLPDP katak ne’e programa ba Polísia ninian, akordu ne’e Australia fó apoiu barak ona, hau hakarak agradese ba Australia liu-liu AFP tanba sira mós apoiu rehabilitasaun Centro Formasaun Polísia (CFP)”, informa Ministru Interior ne’e.

Membru Governu ne’e salienta tan katak sira mós fó treinamentu ba membru PNTL sira ba iha nasaun Indonesia (Malang), Nova Zelandia, Australia rasik, agora dadaun ita fokus kooperasaun ne’e ba area formasaun lideransa ninian, area Investigasaun Kriminal no area tékniku sira ne’ebe maka balun presiza sira nia tulun atu bele eleva polísia nia kapasidade atu bele hala’o servisu ho professional liu.

434203399_441691048370479_7120875098389843881_n

“Akordu ida ne’e atu mai formaliza deit no hametin liu tan kooperasaun ne’ebe maka lao tiha ona durante tinan ruanulu resin, iha tinan barak nia laran sira nafatin tulun ita, tanba ne’e ita simu atu bele avansa oituan, ajuda nafatin ita nia polísia lao ba oin”, hatutan Membru Governu ne’e.

Nia haktuir tan katak kooperasaun atu fó formasaun iha area Terorizmu ba membru PNTL atu bele halo preparasaun hodi antisipa mosu terorizmu iha ita nia rai, formasaun ne’e diak hodi halo prevensaun. No atu eleva kapasidade ita nia membru PNTL sira atu bele atinzi hodi kombate krime organizadu sira mai iha ita nia rai. Akordu ne’e rasik ho durasaun tinan tolu hafoin ida ne’e ita revê fila fali hodi bele lao nafatin ba oin.

Iha fatin hanesan Deputy AFP Lisa Gale hateten hau nia prezensa iha Timor-Leste ba semana ida ne’e ho objetivu primeiru maka atu re-inforsa relasaun amizade entre Timor-Leste ho Australia no entre AFP ho PNTL liu husi akordu rua ne’ebe maka ohin ita selebra iha Ministeriu Interior hanesan provas ida hodi hatudu katak Kooperasaun entre rai rua forte tebes.

“Ida ohin hamutuk ho Komisariu Jerál Polísia Henrique da Costa, ita fortelese no formaliza akordu kooperasaun entre Polisia Federal Australia ho Timor-Leste iha area Terorizmu, segundu akordu selebra entre Polisia Federal Australia ho PNTL liu-liu iha area kooperasaun polisial ne’ebe maka foka ba treinamentu, foka mós ba area sira seluk ne’ebe maka nia objetivu atu fortalese no hasa’e kapasidade PNTL ninian”, afirma Deputy AFP ne’e.

Lisa Gale subliña tan katak iha nivel diplomasia entre Polísia ho Polísia bele hare’e katak relasaun ne’ebe maka forte no diak tebes entre Polísia Federal ho Timor-Leste liu ona tinan ruanulu, entaun ida ne’e dala ida tan hodi hatudu katak fortalesimentu kooperasaun ne’e, hatudu katak instituisaun rua ho países (nasaun) rua kontinua haburas no hametin kooperasaun bilateral. Razaun hau nia prezensa iha ne’e maka atu fortalese kooperasaun entre Polísia rua no entre nasaun rua.

“Importante tebes liu-liu iha akordu kooperasaun iha kombate terorizmu tanba ida ne’e importante tebes atu oinsa ita fortalese no hametin ita nia fronteira husi ameasa trans-nasional crime sira”, hakotu Deputy AFP ne’e.

Media PNTL.

Mensajen iha Ambitu Komemorasaun Aniversariu PNTL ba dala XXIV

434194556_441680841704833_7726387323641606555_n

Mensajen Reprejentante Vatikanu iha Timor-Leste MGR. Marco Sprizi

Enkoraja membru PNTL hotu atu moris ho ita bot sira nia funsaun nudar Polisia iha Kristu ne’e partense iha ita nia fiar Katoliku, no Diak los Timor-Leste sei rai hela roman fiar nian, São Jõao Paulo II iha tinan 35 ba liu ba husik hela testamentu ida ne’e ‘Imi Mak Masin Rai Nian no Roman mundu nian’, nune’e PNTL tenke sai Masin Rai Nian no Roman Mundu nian, Roman ba Fe no Masin ba Karidade no Domin.

Dala idatan parabens PNTL, Obrigado no kontinua Servi nasaun ho fiar iha Jejus Kristu

Mensajen Reverendu Vigariu Jeral Arkidioseze Dili Pe. Graciano Santos Barros

Iha oportunidade ida ne’e lori Arkidioseze Dili nia naran hato’o Ami nia parabens ba Instituisaun PNTL no Polisia Timor-Leste ne’ebe selebra tinan 24 ninia ejistensia iha ita nia rai doben timor

“Polisia halao ninia knar tau ordem no regulamentu iha ita nia rain nune’e mantein ordem, regulamentu no lei sira bele lao diak, iha Ita boot sira nia kbaas no nia liman povu fiar no Ami hotu fiar buat hotu sei lao diak; Sem Polisia buat hotu sabraut,”.

Ita hare deit kuandu iha dalan publiku Polisia laiha ne’e timor pior liu ne’e foin mak pontu ida, buat barak teb-tebes ne’ebe maka presiza ita boot sira nia serbisu no Ita bot sira nia tulun.

Dala idatan husi fatin ida ne’e hakarak felisita parabens ba PNTL.

Mensajen Komandante Jeral PNTL Komisariu Jeral Polisia Henrique da Costa.

Durante tinan 24 Ami seidauk bele halo buat barak hodi fornese seguransa tuir pedidu ka ejijensia ema ida-idak ninian maibe ami tenta atu esforsu makaas ho apoiu sira hotu ninian atu nune’e bao in Ami bele fornese atendemntu ida ne’ebe diak no dignu hodi servi povu no rai ida ne’e.

Nudar humanu la ses husi sala maibe Ami nafatin kurizi ami nia aan, Ami nafatin simu kritika nomos simu opiniaun sira pojitivu nian atu nune’e ami bele dezenvolve PNTL ba oin ho diak liutan.

“Hamutuk ita sei bele oferese atendementu ne’ebe diak ba ita nia populasun sira, Polisia deit sei labele halo buat ida maibe ho apoiu ema hotu-hotu nian ita sei fornese atendementu ida ne’ebe diak,” Komandante Jeral konklui.

PNTL Hato’o Agradementu ba Ejistensia Tinan XXIV

434190010_441668588372725_3662627451949952206_n

Dili-Polisia Nasional Timor-Leste (PNTL) Hato’o Agradesmentu ba Aman Maromak nia Bensaun, protesaun no akompanhamentu ba instituisaun Seguransa ne’e ho nia membru tomak hodi fo Seguransa ba nia povu no Nasaun.

Agradesementu ne’e halao liu husi selebrasaun misa solene ne’ebe prezidi husi Amu Selebrante Reprezentante Vatikanu iha Timor-Leste MGR. Marco Sprizi no Amu Konselebrante Reverendu Vigariu Jeral Arkidioseze Dili Pe. Graciano Santos Barros no Amu kapelaun PNTL Pe. Abril Lopes. Iha kapela Santo Antonio Sentru Formasaun Polisia Comoro Dili, (26/03).

Iha nia Homilia MGR Marco Sprizi hateten Figuras Militar no Polisia iha Sagrada Eskritura Maromak nia lia fuan hanesan figuras pojitiva no ezemplu fiar nian ba Kristu, no husu ba PNTL atu sai Masin no Naroman Kristu nian hodi halao knar atu servi povu no nasaun ne’e nakonu ho paz no Seguransa.

“Hamutuk ho imi iha ne’e hodi festeza no selebra iha orasaun ba aniversariu instituiisaun PNTL nian ba dala XXIV lori Santo Padre Papa Francisco nia naran hakarak hato’o Hau nia parabens no bensaun wain ba PNTL nia aniversariu,”dehan MGR Marco.

434184195_441670458372538_3392122570676002409_n

Iha Misa ne’e Komandante Jeral entrega lembransa ba Reprejentante vatikanu iha Timor-Leste hafoin kontinua hasai foto hamutuk.

Hafoin misa kontinua ba presta Homenajen no kari Ai-funan iha Monumentu dos Martires PNTL 25 maiu 2006 nomoskari Ai-funan iha monument dos Herois Metinaro.

Misa solene ne’e Anima ho koru husi Komandu PNTL munisipiu Liquica no partisipa husi Komandante Jeral PNTL Komisariu Jeral Polisia Henrique da Costa, Segundu Komandante Jeral Komisariu Polisia Pedro Belo, komandante komandu Supervizaun, Komandante munisipiu, Komandante Unidade, Xefe Departamentu, Xefe Gabinete, Ofisiais Superior, Ofisiais Sub Alternu Sarjentu, Ajente no Familia boot PNTL.

Media PNTL

Komemora loron Aniversáriu PNTL Ba Dala 24, Komandu Hala’o Aktividade Asaun Karidade.

430662814_435246495681601_1269361722340365475_n
Dili, Hodi komemora loron Aniversáriu Polísia Nasional Timor-Leste (PNTL) ba dala 24 iha loron 27 fulan Marsu tinan 2024, maka Komandu PNTL hala’o aktividade asaun karidade hodi tulun ema kbi’it laek, ema ho difisiensia matan no Uma Mahon balun iha kapital Dili.
Asaun karidade ne’e hala’o direitamente husi Komandante Jerál PNTL Komisariu Jerál Polísia Henrique da Costa iha sexta-feira (15/03) ne’e, akompaña husi Komandante Komandu Administrasaun, Komandante Komandu PNTL Munisipiu Liquiça, Segundu Komandante Komandu PNTL munisipiu Dili.
Aktividade ne’e mós hola parte hamutuk ho Asosiasaun Espoza Polísia Nasional Timor-Leste (AESPNTL) hanesan Prezidente Sra. Manuela de Araújo, Vise Prezidente Sra. Ticha Altrudes Valente Gonsalves hamutuk ho membru AESPNTL nian.
Iha ninia entrevista ba jornalista sira hafoin entrega apoiu nesesidade báziku ba ema kbi’it laek, ema ho difisiensia matan no Uma Mahon, Komisariu Jerál Polísia Henrique da Costa hateten ita hatene katak iha loron 27 Marsu agora PNTL sei selebra 24 anos ezistensia PNTL ninian, aktividade balun ne’ebe ami hala’o ona hanesan desportu, limpeza, seminariu nasional no ida maka vizita hare’e posibilidade hodi tulun ba iha ema kbi’it laek sira.
“Tanba ne’e ohin ita halo ona vizita, fó ona ita nia kontribuisaun ka apoiu ki’ik ba iha ita nia komunidade ida iha parte Liquiça ninian iha Beduku, agora ita mai tan familia sira iha difisiente matan ninian, ita lori mós apoiu ki’ik oan balun fó ba sira”, tenik Komisariu Jerál Polísia ne’e.
431443757_435247132348204_7516564274341873755_n
Komandante Jerál PNTL ne’e esplika tan iha fatin ba ema ho difisiensia matan ne’ebe tuir relatoriu ne’ebe maka iha katak ema hamutuk 100, sira husi munisipiu 13, nune’e ita lori netik apoiu nesesidade báziku ruma hanesan fos, be’e, supermie no biskuit balun, la barak maibé ho kbi’it ne’ebe ita iha bele tulun sira.
“Tanba sira ho difisiente matan presiza, sira presiza ema hotu nia tulun no sira mós parte husi sosiedade, parte husi komunidade ida ne’e, ita presiza fó atensaun espesial ba sira, além de ne’e sira mós dala-ruma fasil atu nune’e sai hanesan vítima ba iha krime sira no sai mós vítima ba iha atendimentu sira”, haktuir Komandante Jerál PNTL ne’e.
Autoridade másimu instituisaun Seguransa ne’e afirma tan katak tanba ne’e maka iha Polísia ita mós hetan treinamentu liu-liu sira parte Investigasaun VPU ninian, sira iha treinamentu espesial oinsa bele mós atende ba iha ita nia komunidade sira ho difisiensia ninian.
“Tema Anivesáriu ba Polísia ninian maka ‘PNTL Ida Ne’ebe Maka Profesional No Regilente’, Profesional iha termu Atendimentu no ita Regilente hodi atúa ba iha kualkér situasaun saida maka mosu”, salienta Autoridade másimu instituisaun Seguransa ne’e.
Hatan kona-ba preukupasaun ema ho difisiensia sira nian liu-liu seguransa ba sira wainhira hala’o aktividade ladun seguru, Komisariu Jerál Polísia ne’e esplika iha suku nia laran, iha area Manleuana ne’e ita iha Ofisial Polísia Suku (OPS) ne’ebe sira (Ema ho Difisiensia) iha kontaktu ba malu no koñese malu signifika katak ita nia OPS ne’e sempre halo movimentu iha ne’e.
“OPS iha duni no Komandu munisipiu Dili sira nia ekipa patrulla sempre halo movimentu atu nune’e prevensaun ba iha krime, halo mós komunikasaun ho sira tanba ita nia misaun ida maka hakarak hakbesik ann liu ba iha komunidade atu nune’e bele rona direitamente ho sira no ita mós bele fó asistensia balun ne’ebe maka ita iha ba sira”, hakotu Komisariu Jerál Polísia ne’e.
Marcos Mendonça da Silva ho nia kaben Domingas Coa nu’udar familia ida ne’ebe maka moris ho kondisaun vulneravel liu iha Aldeia Turleu, Suku Tibar, Postu Administrativu Bazartete, Munisipiu Liquiça. Durante tinan barak nia laran hahu’u husi tinan 2010 to’o ohin loron hela deit iha mota Beduku ninian ninin hodi buka moris hanesan tuku fatuk, penyera rai-henek hodi fan no sustenta niia familia.
Iha aktividade asaun karidade ne’e, familia Marcos Mendonça da Silva hetan apoiu sasan nesesidade básiku hanesan fos, supermie, paun, kadernu ba labarik sira inklui manta ne’ebe maka oferese direitamente husi Komandante Jerál PNTL ho Prezidente AESPNTL.
Iha Uma Mahon Balide, Komisariu Jerál Polísia ho ekipa, oferese mós sasan nesesidade básiku hanesan fos, supermie, be’e no aihan seluk ba Uma Mahon ne’ebe akumula ema vulneravel liu-liu labarik feto ki’ik oan sira. Nesesidade básiku hanesan, hato’o mós ba Grupu Ema Difisiensia Matan nia iha area Manleuana. Media PNTL.

 

Governu Xina Apoiu Motorizada Batedores Ba PNTL

432452569_434673162405601_4934999417015915993_n
Dili, Governu Xina liu husi ninia Embaixada iha Timor-Leste, kinta-feira (14/03) ne’e apoiu Komandu Polísia Nasional Timor-Leste (PNTL) Motorizada Batedores hamutuk unidade lima (5) ba Departamentu Tránzitu Seguransa Rodoviária Nasional (DTSRN).
Komandante Jerál PNTL Komisariu Jerál Polísia Henrique da Costa iha ninia intervensaun ba serimonia entrega motorizada batedores ne’ebe hala’o iha Kuartél Jerál Kaikoli hateten momentu ida ne’e onradu tebes ba ita hotu iha ne’e hodi simu embaixadora Xina iha Timor-Leste, ita realiza serimonia entrega motorizada sira ne’e.
“Embaixada Xina hala’o duni ninia kumprimisiu hodi apoiu motorizada ba PNTL no hasa’e kapasidade membru PNTL ninian liu-liu iha area Tránzitu nian”, tenik Komandante Jerál PNTL ne’e.
Komisariu Jerál Polísia ne’e salienta tan katak ho apoiu ne’ebe maka Embaixada Xina oferese ba PNTL, motorizada hirak ne’e bele ona hasa’e kapasidade hodi bele halo eskoltu ba bainaka VIP ninian liu-liu liga ba planu vizita Amu Papa nian mai iha Timor-Leste iha fulan Agustus no September tinan ne’e.
“Hau hakarak espresa hau nia gratidaun ba embaixadora Xina iha Timor-Leste ba apoiu no dedikasaun ba dezenvolvimentu nasaun Timor-Leste nian liu-liu hodi fó tulun mai iha kapasitasaun instituisaun PNTL nian”, hatutan Komisariu Jerál Polísia ne’e.
432469571_434672922405625_776832916435733439_n
Iha fatin hanesan Embaixada Xina iha Timor-Leste Ms. Wang Wenli iha ninia diskursu hateten hau sente orgullu bele partisipa iha serimonia ida ne’e hodi entrega motorizada ba PNTL.
“Embaixada Xina iha Timor-Leste ho PNTL mantein kooperasaun ne’ebe maka diak tebes, hafoin Timor-Leste hetan ninia idependensia, nasaun Xina sempre apoiu Timor-Leste iha area dezenvolvimentu, diplomata, negosiante, kompaña no sidadaun Xina sira mai iha Timor-Leste hodi selu no apoiu nasaun Timor-Leste sai nasaun ne’ebe dezenvolvidu iha mundu”, haktuir Embaixada Xina iha Timor-Leste ne’e.
Ms. Wang Wenli salienta tan katak Governu Xina iha komitmentu hodi apoiu nafatin PNTL liu-liu hanesan uniforme/ fardamentu, postu ba Polísia sira no hau iha esperansa ho apoiu motorizada sira ne’e bele ona apoiu servisu Tránzitu sira nian hodi halo eskoltu ba bainaka.
Hafoin ida ne’e, hala’o kedas asinatura hanesan termu de entrega motorizada hamutuk unidade lima (5) ne’ebe asina husi Komandante Jerál PNTL Komisariu Jerál Polísia Henrique da Costa ho Embaixada Xina iha Timor-Leste Ms. Wang Wenli. Remata ida ne’e, kontinua kedas ho entrega xave motorizada husi Komandante Jerál PNTL Komisariu Jerál Polísia Henrique da Costa ba Xefe Departamentu Tránzitu Seguransa Rodoviária Nasional (DTSRN) Superintendente Assistente Polísia Luis da Costa no halo aktrasaun halai motorizada batedores husi membru DTSRN.
Hola parte mós iha serimonia ne’e Segundu Komandante Jerál PNTL Komisariu Polísia Pedro Belo, Komandante Komandu Supervizaun PNTL nian, Komandante Komandu PNTL munisipiu Dili, Komandante Komandu Unidade Marítima (UPM), membru PNTL no konvidadu sira seluk. Media PNTL.

 

Komandante Jeral Lidera Formatura iha UEP, Husu membru atu Disiplina, Unidade no Lian Ida Deit.

IMGL2097

Dili- Komandante Jeral lidera formatura primera semana fulan marsu iha Kuartel Unidade Espesial Polisia (UEP) no bolu atensaun ba membru sira atu iha disiplina ne’ebe maka aas, Disiplina Forte unidade no lian ida deit hodi halao no kumpri orentasaun ne’ebe maka durante ne’e fo ona ba Komadante Unidade.

Komandante Jeral PNTL Komisariu Jeral Polisia Henrique da Costa hateten ohin oportunidade Hau nian hodi foti formatura no passa revista, iha tempu hanesan fo orentasaun hirak ne’ebe maka durante ne’e Komandu passa ona liu husi Komandante Unidade hodi hatutan orentasaun ba membru sira, Hau nia prejensa iha ne’e hodi hare imi nia performansia hafoin Komandante Jeral ho Segundu Komandante mos sei nafatin dirize serimonia hanesan iha fatin sira seluk hanesan UPF no UPM tanba Unidade Espsiais sai hanesan ultimu rekursu ne’ebe maka PNTL iha entaun Komandu sempre akompaña imi nia movimentu no imi nia preparasaun kualker oras, Nia hato’o asuntu ne’e iha Kuartel UEP Bairo-Pite Dili, Segunda (04/03).

Nia hatutan ita akompaña situasaun rai laran liu-liu iha kapital Dili ne’ebe maka presija Polisia nia atuasaun, persija Polisia nia prejensa atu nune’e bele prevene kriminalidade hodi responde no atua kriminoju sira tanba ne’e nafatin husu ba UEP atu apoiu Komandu sira tuir regras ne’ebe maka iha nune’e wainhira Unidade Espesial tun ba terrenu nudar forsa ultimu hodi resolve problema.

“Komandante Unidade atensaun mos kuandu Komandante Kompania ka Seksaun sira ne’ebe maka la prontu atu serbisu iha UEP maka hato’o relatoriu atu nune’e ita hare,”dehan Komandante Jeral.

PNTL iha Unidade tolu (3), Komandu munisipiu 13, inklui mos Atauro ne’ebe nia estatutu hanesan Prezidente Autoridade Administrativa tanba ne’e ita prontu atu koloka ba iha nebe deit, sira ne’ebe maka koloka iha UEP tenke hatudu duni katak nia iha ninia espesialidade iha buat hotu.

IMGL2065

Komandante Jeral mos rekonyese katak dalaruma membru sira ne’ebe maka ita bolu mai tama deit no laiha formasaun ne’ebe maka diak nia mos estraga unidade ida ne’e tanba ne’e husu ba Komandante Unidade karik iha membru foun ne’ebe maka tama iha UEP tenke prepara formasaun ne’ebe maka adekuadu ba sira atu nune’e sira nia disiplina, performansia no unidade tenke muda ninia mentalidade ba iha UEP ne’e responsabilidade Komandante Unidade nian hodi forma sira hodi sai hanesan membru UEP duni.

Autoridade masimu instituisaun seguransa ne’e nafatin bolu atensaun ba Komandante Unidade atu tau atensaun no aproveta apoiu husi parseru sira tantu husi GNR no Australia hodi fo formasaun ne’ebe maka adekuadu ba membru sira atu nune’e balu atua nafatin problema maibe treinamentu mos lao nafatin.

Ba membru sira atensaun ba atributu hirak ne’ebe maka ohin balun seidauk kompletu kuandu ba oin membru sira nafatin la kumpri Komandante Unidade liu husi ita nia disiplina bele foti medida ruma, Hau lakohi Unidade Espesial halo fila-fali komparasaun ho Kontijente Jeral.

Iha biban ne’e Komandante Jeral hato’o apresiaisaun ba membru UEP, UPM, Kuartel Jeral no CFP ne’ebe partisipa iha serimonia loron Nasional Veteranus (03/03) tanba imi nia performansia kapas.

Formatura dader ne’e partisipa husi Komandante UEP Superintendente Polisia Damião Correia ho nia estrutura, Ofisiais Inspetor, Sarjentu, Ajente no Estudante Estajiariu sira. Media PNTL

Komandante Jeral Vizita Komandu PNTL Autoridade Administrativa Atauro

IMGL0974

Atauro- Komandante Jeral PNTL halao vizita ofisial ba Komandu PNTL munisipiu Atauro hodi hare no rona kondisaun no situasaun membru sira ne’ebe maka halao knar iha munisipiu Atauro hodi mantein Lei no Ordem.

Komisariu Jeral Polisia Henrique da Costa hato’o apresiasaun ba membru hirak ne’ebe maka halao seguransa ho masimu hodi mantein populasaun munisipiu Atauru moris iha paz no estabilidade nia laran, Nia hato’o asuntu ne’e iha Komandu PNTL munisipiu Atauro, sexta (01/03).

“Hakarak uza biban ida ne’e hodi hato’o apresiasaun ba serbisu tomak ne’ebe maka membru sira oferese durante tinan 2023 to’o ohin loron, ita nia serbisu hetan apresiasaun husi Prezidente Republika no Primeiru Ministru, nune’e hakarak uza biban ida ne’e hato’o diretamente ba imi konaba susesu ne’ebe maka ita halao durante tinan 2023 hodi hasoru eventu lubuk ida hanesan Eleisaun Parlamentar no Eleisaun Suku no buat hotu-hotu lao diak tanba ne’e Xefe Estadu no Xefe Governu hakarak apresia ba PNTL tomak,”dehan Komandante Jeral.

Buat ne’ebe maka ita husu maka asegura no tane aas apresiasaun ne’ebe maka Nai ulun sira hato’o, ita presiza atu halo diak liutan no ita mos presiza atu hadia buat ne’ebe maka ita avalia katak iha tinan 2023 ba kotuk ne’e ita halo seidauk diak.

Dadus ne’ebe maka Segundu Komandante munisipiu hato’o katak iha tinan 2023 ejisti deit krime hamutuk 10 no kazu asidente Trafegu 1 no rejista iha Sistema Manajementu Insidente annual (IMS-sigla ingles) ita rejista deit kazu 7 ba Atauro ninian no dalaruma kazu balu la rejista iha Sistema tanba problema eletrisidade no internet nune’e husu atu insidente no asidente hotu ne’ebe maka iha persija rejista atu nune’e ita nia dadus ne’e sai hanesan dadus nasional tanba ne’e tenke halo komunikasaun nafatin ho Xefe Departamentu Investigasaun Kriminal Nasional no Xefe Seksaun IMS nian atu nune’e bele cross check.

IMGL1111

Iha biban ne’e Komandante Jeral mos fo orientasaun ba Komandante munisipiu ho nia membru sira atu nafatin halo sosializasaun no sensibilizasaun konaba regras Tranzitu nomos oinsa prevene krime iha komunidade no eskola sira atu nune’e bele hatene no kompriende lalaok inplementasaun Lei liu husi atividade Polisiamentu Komunitaria nomos reforsa patrulhamentu lao ain hodi hakbesik aan ba povu,“Tenke kontinua halao atividade Polisiamentu Komunitaria no Edukasaun Tranzitu,”.

Mantein komunidade sira informadu atu nune’e evita involve iha krime no halao pratika atividade GAM/GAR ne’ebe maka governu suspende.

Iha sorumutuk ho Estrutura Komandu PNTL Autoridade Administrativa Atauro Komandante Jeral hato’o programa Prioridade lima (5) ne’ebe maka Nia no Segundu Komandante Jeral sei inplementa durante mandatu tinan tolu (2023-2026) maka hanesan hadia jestaun institusional, hodi organiza no jere didiak fali instituisaun liu husi koloka Komandante sira hodi priense estrutura iha Komandu Jeral nomos munisipiu sira, Haforsa Lejislasaun, Koperasaun Institusional, Hadiak Atendementu Publiku no hametin Paz no Estabilidade Seguransa Interna.

Iha sorumutuk ho estrutura Komandu munisipiu no membru sira Komandante munisipiu Atauro Interinu hato’o difikuldade lubuk ida ne’ebe maka sira infrenta hanesan fatin serbisu laiha Komandu munisipiu hamutuk deit ho Eskuadra hodi responde ba politika governu nian maibe la hare ba ita nia kondisaun nomos difikuldade asesu ba Estrada no transporte.

Politika Komandu nian hafoin koloka tia komandante Superior sira Komandu mos hanoin atu ajusta tan fila-fali iha nivel Ofisiais Sub Alternu nian husi postu Inspetur Assistente to’o Inspetur Xefe sira atu priense kargu balu iha Eskuadra ka Seksaun depende ba nesesidade instituisaun no kapasidade pessoal ninian.

Iha vizita ne’e komandante Jeral akompana husi Komandante Komandu Operasaun Superintendente Xefe Polisia Jose Soares, Diretor Finansas e Orsamentu Inspetur Xefe Polisia Fatima Mendonça, Amo Kapelaun PNTL Pe. Abril Lopes, Espoza Komandante Jeral Manuela de Araujo no membru sira. Media PNTL