Semana Ida, Mosu Insidente 3 No Asidente 1

2F5A3923

Dili, Durante semana ida Komandu Polísia Nasional Timor-Leste (PNTL) rezista kazu Insidente hamutuk 3 no Asidente 1 ne’ebe maka mosu iha teritoriu nasional. Maske nune’e situasaun seguransa ia rai laran kontinua lao hakmatek.

Porta Voz Komandu PNTL Superintendente Xefe Arnaldo Araújo segunda-feira (26/10) ne’e liu husi konfernesia imprensa ne’ebe hala’o iha Kuartél Jerál Kaikoli hateten Insidente 3 ne’ebe maka mosu hanesan kazu Homisidiu ida akontese iha loron 22 fulan Outubru tinan ne’e iha oras 18:00 akontese oho malu iha Mota Laclo Suku Dato Postu Administrativu Liquiça Villa ne’ebe rezulta vitima ho inisial J.S idade 20 husi Suku Fatukesi tenke lakon vida; suspeitu husi kazu refere ho insial A.C idade 20 husi Suku Dato Liquia Villa, kauza husi insidente maka tanba hadau malu rai-henek.

“Parte seluk maka iha loron 24 fulan ne’e hetan ema balun diskonfia soe bebe iha area Vila-Verde, oras ne’e dadaun bebe iha hela ospital hodi hetan tratamentu, bebe nia inan parte polísia kaptura kedas lori ba Hospital no oras ne’e dadaun iha ona Uma Mahon, aman husi bebe parte polísia sei buka tuir hela hodi buka hatene kauza husi aktu refere, kazu ne’e iha hela prosesu investigasaun Komandu PNTL Munisipiu Dili nia liman”, esplika Porta Voz Komandu PNTL ne’e.

Iha loron hanesan (24 Outubru) mosu kazu Suisidiu/Tara-Ann, labarik ida ho idade 12 tara-ann iha area Bekusi Munisipiu Dili, oras ne’e dadaun mate isin iha ona familia nia liman. Kauza husi akontesimentu ne’e, parte Polísia sei buka tuir hela hodi hatene motivu husi insidente ne’e. Insidente seluk mosu iha loron 25 Outubru ne’e, wainhira Ró husi Oecusse mai Dili iha pasageiru ida maka mate iha ró laran.

“Entretantu, iha loron 25 Outubru mosu Asidente ida ne’ebe akontese soke malu entre kareta HILUX ho Motorizada iha area Manleu Metinaru, rezulta feto ida mate iha fatin no mane ida mate iha Hospital Nacional Guido Valadares (HNGV), transporte rua ne’e mai husi diresaun ne’ebe la hanesan, kauza husi asidente ne’e maka fátor umanu”, afirma Xefe Gabinete Relasaun Públika PNTL ne’e.

Iha biban ne’e Superintendente Xefe Arnaldo esklarese mós kona-ba informasaun ne’ebe espalha iha Media Sosial katak PNTL sei sobu hotu aktividade Kemping ne’ebe hala’o iha fim-de-semana husi jovem balun iha area Area Branca nian. Intensaun Komandu nian maka atu hare’e aktividade refere maibé laos atu ba sobu, tanba tuir Komandu nia hare’e dala-barak iha Kemping ne’e bele iha feto ida mane rua ou mane rua feto ida. Ema hotu iha liberdade atu hala’o Kemping maibé ita mós iha Moral atu bele hato’o ba komunidade sira liu-liu jovem sira katak hala’o aktividade ne’e ho Pozitivu.

“Tanba ita hare’e oras ne’e dadaun kazu ema soe bebe, ema tara-ann parese fátor ida maka mai husi aktividade Kemping sira ne’e, tanba ne’e apela ba inan-aman sira atu tau manatn ba oan sira karik sira iha aktividade ruma ne’ebe hala’o iha fim-de-semana atu nune’e bele evita problema sira ne’ebe maka ikus-ikus ne’e mosu iha ita nia rai”, tenik Porta Voz Komandu PNTL ne’e.

Media PNTL.         

Komandu PNTL Aktualiza Situasaun Seguransa Aktual Ba PR

2F5A0737

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa no Segundu Komandante Jerál Komisariu Polísia Mateus Fernandes kinta-feira (22/10) ne’e hala’o enkontru semanal ho Prezidente Repúblika (PR) Dr.Francisco Guterres Lu-Olo hodi aktualiza situasaun seguransa aktual iha teritoriu Timor laran tomak.

Komisariu Polísia Faustino da Costa hafoin enkontru ba jornalista sira hateten além-de aktualiza situasaun seguransa aktual, iha sorumutu ho Xefe Estadu ne’e Komandu PNTL mós aktualiza kazu Insidente no Asidente balun ne’ebe maka akontese durante semana ida nia laran.

“Aprezenta mós Insidente balun, liu-liu iha semana ida nia laran kazu Suisidiu ka Hatalik-Ann nafatin akontese kuaze iha tinan ida ne’e fulan balun nia laran, tanba iha semena ida ne’e mosu kazu Tara-Ann ne’e ida iha Lospalos, Liquiça no Maubisse-Ainaro”, tenik Komandante Jerál PNTL ne’e.

Autoridade másimu seguransa ne’e afirma tan iha semana ida nia laran kazu asidente fatal ida ne’ebe mosu iha Suai vitima ida mate iha fatin wainhira lori mesak motor. Aprezenta mós iha enkontru ne’e ba PR kona-ba situasaun ne’ebe mosu iha fim-de-semana, aktividade ida Kemping ne’ebe organiza husi jovem sira iha area Tasi-Ibun nian, situasaun ida ami orienta ona ba Komandu sira atu buka tuir aktividade sira ne’e liu-liu iha parte balun area lokal Turistíku nian ita nia jovem sira sempre halo mobilizasaun ho númeru ne’ebe bo’ot, klaru ida ne’e direitu pesoal ema nian.

“Tanba iha aktividade Kemping balun ita nota katak, sé jovem sira ne’e lao hamutuk na’in rua ka tolu (Feto rua mane ida, mane rua feto ida) toba hamutuk iha lona ki’ik oan ida nia laran ne’e ba Komandu PNTL preukupasaun ida tenke hare’e”, afirma Komisariu Polísia ne’e.

Ba kestaun sira ne’e, Xefe Estadu nia preukupasaun liu maka kazu Suisidiu tanba kazu ne’e ninia númeru iha fulan hirak nia laran sa’e maka’as. Kona-ba preparasaun seguransa iha loron Finadu, Komandu PNTL hatun ona orientasaun ba Komandu munisipiu idka-idak atu asegura seguransa iha idak-idak nia munisipiu iha komemorasaun sira fulan Novembru nian.

Media PNTL.       

2F5A0739

Vise Ministru Interior Enkontru ho Komandante Jeral no Segundu

2F5A0571

Dili- Vice Ministru Interior enkontru ho Komandante Jeral no Segundu Komandante Jeral Polisia Nasional Timor-Leste (PNTL) hodi koalia konaba disiplina no oinsa respeita Hirarkia Komandu.

Vice Ministru Interior Antonio Armindo hateten disiplina ne’e refere liu ba loro-loron kuandu Ajente ida hetan nia Komandante Seksaun ka Komandante Peltaun tenke kumprimenta no kontinensia ida ne’e inportante nomos ba membru Corpu Seguransa Pessoal (CSP) sira ne’ebe maka eskolta membru governu no Alta entidade (VIP-sigla ingles) la signifika sira nia nivel hanesan VIP kuandu sira hetan sira nia Komandante, Komandante seksaun to’o komisariu sira tenke kontinensia, Nia hato’o asuntu ne’e iha Kuartel Jeral PNTL Kaikoli Dili (21/10).

Membru governu ne’e haktuirtan Hau mai koalia ho Komisariu nain rua atu nune’e fo hanoin ba komandante hotu-hotu atu hatutan mensajen ne’e ba membru Polisia hotu-hotu no loro-loron iha formatura Komandante sira tenke fo hanoin nafatin katak orentasaun husi Komisariu maka koalia konaba disiplina, etika servisu no hakruk ba hirarkia.

2F5A0522

Iha vizita ne’e Vice Ministru Interior akompana husi Komandante Jeral, Segundu Komandante Jeral no Komandante du Komandu Administrasaun hare direta konstrusaun edifisiu foun Kuartel Jeral ne’ebe maka agora daudaun lao hela no hahu ona piling tanba ne’e maka ita mai hare para hatene ninia lalaok ne’e to’o nebe.

Kestiona konaba okupante balu ne’ebe maka seidauk husik mamuk fatin ne’ebe maka governu notifika ona ba konstrusaun Kuartel Jeral membru governu ne’e hatan ida ne’e maka ohin Hau ho Komisariu nain rua (2) koalia konaba ida ne’e ita hein despezu admistrativa husi Ministeriu Justisa Terras Propriedade depois ita hare oinsa atu muda sira tanba iha planu tenke muda sira tanba dalan atu sai ne’e maka agora daudaun sira okupa hela.

2F5A0583

Iha vizita ne’e Vice ministru mos observa direta Ofisina PNTL hodi hare lalaok no prosesu manutensaun ba kareta PNTL nian manutensaun ne’e inportante tanba PNTL iha kareta operasional no  halo servisu operasaun durante oras 24 no ofisina ba PNTL ne’e inportante hodi hare saida maka ita hakarak hadia diakliutan no inportante ba governu atu konsidera hodi hadia ofisina ne’e diak liutan hodi haruka mekanik sira ba tuir treinamentu nune’e mai halo servisu ne’ebe maka diak liutan. Media PNTL

Durante Semana Ida, PNTL Rezista Kazu Insidente 59 No Asidente 20

IMG_0011

Dili, Durante semana ida hahu’u husi loron 13 to’o loron 19 fulan Outubru tinan ne’e Komandu Polísia Nasional Timor-Leste (PNTL) rezista kazu Insidente hamutuk 59 no Asidente hamutuk 20 ne’ebe maka akontese iha teritoriu nasional.

Porta Voz Komandu PNTL Superintendente Xefe Arnaldo Araújo tersa-feira (20/10) ne’e liu husi konferensia imprensa hateten situasaun seguransa jerál iha teritoriu Timor-Leste laran tomak lao diak no hakmatek, maske nafatin mosu insidente ne’ebe ho total kazu 59 domina liu husi kazu baku malu no asalta malu ne’ebe maka akontese hahu’u husi loron 13 to’o 19 fulan Outubru.

“Kazu asidente tráfiku hamutuk 20 ne’ebe maka akontese kauza husi fátor umanu 90%, fátor veíkulo 5% no fátor Estrada 5%, dala barak asidente hirak ne’e mosu tanba ema ne’ebe maka konduz karreta no motor ho kondisaun matan-dukur nune’e laiha konsentrasaun ne’ebe diak durante hala’o viagem”, esplika Porta Voz Komandu PNTL ne’e.

Superintendente Xefe afirma mós kona-ba kazu omisidiu aman oho oan ne’ebe maka akontese iha Aldeia Labubu-Aidahu, Postu Administrativu Laclo, Munisipiu Manatuto fulan kotuk, oras ne’e dadaun suspeitu enkamiña ona ba iha Ministeriu Públiku (MP) hodi hein prosesu lao ba oin. Nune’e mós insidente ne’ebe mosu iha munisipiu Manufahi fulan kotuk, ninia prosesu enkamiña ona ba MP no suspeitu detein ona iha Prizaun Preventiva, vitima ninia kondisaun rekopera ona.

Media PNTL.     

Trimestre Daruak PNTL Dili rejista kazu 445

2F5A7412

Dili- Durante trimestre daruak fulan Jullu-Setembru tinan 2020 Polisia Nasional Timor-leste (PNTL) munisipiu Dili rejista kazu krime hamutuk 445 ne’ebe maka komete husi sidadaun sira

Komandante PNTL munisipiu Dili Superintendente Xefe Henrique da Costa hateten  iha fulan tolu (3) nia laran Komandu PNTL munisipiu Dili rejista kazu krime hamutuk 445 husi kazu hirak ne’ebe maka iha maioria ofensas integridade fizika hamutuk 155, violensia domestika 47 no kazu seluktan, Nia hato’o asuntu ne’e iha enkontru Konsellu Seguransa Munisipal (KSM) foin lalais ne’e iha CFP Comoro Dili.

Alende ne’e Komandu PNTL munisipiu Dili mos rejista kazu infrasaun hamutuk 1.587 maioria motorista sae motor la uza kapasete no seluktan. Infrator sira selu multa ka koima durante fulan tolu (3) hahu Jullu-Setembru hamutuk $54.459.

Husi kazu krime no infrasaun ne’ebe maka iha loke PNTL Dili nia matan atu buka manera hodi prevene no kombate krime, buka manera oinsa atu bele eduka ita nia sosiedade hodi halo prevensaun ba krime liu husi medida ida maka Vizivilidade, Involvimentu no Profesionalismu (VIP), medida vizivilidade maka hanesan agora ita koloka ita nia Polisia barak iha Estrada, prezensa iha komunidade nia leet liu husi patrula no seluktan.

2F5A6220

Involvimentu maka hanesan prezensa KPK sira nian, lider komunitariu sira, joventude no stake holder sira hotu atu servisu hamutuk ho Polisia, involvimentu ita hotu nian hodi apoiu seguransa sai hanesan pontu pojitivu ida hodi  prevene no kombate krime.

Iha sorin seluk ita mos nafatin eduka ita nia povu liu husi programa Polisia vizita ba Kampus, atividade ida ne’e remata iha fulan kotuk ne’ebe maka identifika universidade hamutuk 11 ne’ebe Departamentu Polisia Komunitaria, Investigasaun no Tranzitu sira maka halo sosializasaun konaba Servisu Polisiamentu Komunitaria, Regras Tranzitu no Prevensaun Krime. Programa Segundu ne’ebe maka sei realiza iha fulan Novembru maka programa Polisia Vizita ba Eskola hodi halo sensibilizasaun ba estudante sira.  Media PNTL

Komandante PNTL Munisipiu Simu Orientasaun Seguransa Finadu Husi Komandante Jerál

2F5A0434

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa hamutuk ho Segundu Komandante Jerál Komisariu Polísia Mateus Fernandes tersa-feira (20/10/2020) ne’e realiza enkontru ida ho Komandante PNTL munisipiu, Unidades, CFP, Xefe Servisu no Departamentu sira iha Kuartél Jerál hodi simu orientasaun Komandu nian relasiona ho seguransa ba loron Finadu no selebrasaun seluk iha fulan Novembru nian hanesan loron 12 no 28 Novembru tinan ne’e.

Komisariu Polísia Faustino da Costa hafoin sorumutu ba jornalista sira hateten enkontru ohin ita realiza atu hare’e servisu ne’ebe durante ne’e halo liu-liu iha implementasaun Estadu Emergensia (EE) no mós sá difikuldades no problema ne’ebe Komandu munisipiu sira hasoru.

2F5A0428

“Orientasaun ne’ebe Komandu fó ba oin katak buat ne’ebe sira halo durante ne’e hare’e ba saida maka tenke hadia ba oin liu-liu iha fulan Novembru no Dezembru nia laran, ita hatene katak iha fulan Novembru nia laran iha eventu lubuk ida maka loron Finadu, loron Santu sira nian, loron Juventude Assu-Wa’in no mós loron 28 Novembru entaun oinsa maka PNTL, Komandu idak-idak asegura loron importante hirak ne’e”, esplika Komandante Jerál PNTL ne’e.

Autoridade másimu Seguransa ne’e salienta tan situasaun hirak ne’ebe maka Komandu munisipiu aprezenta maioria maka kestaun transporte no kombustivél. Komandu mós aktualiza katak Orsamentu Prezidente Repúblika (PR) promulga ona, oinsa atu hare’e iha Komandu munisipiu no unidades idak-idak durante ne’e iha dividas karik atu hare’e no oinsa maka bele hasa’e proposta/dokumentu mai ona Komandu atu nune’e wainhira iha autorizasaun ba utilizasaun Orsamentu nian bele uza no mós sá nesesidades maka Komandu/Unidades presiza liu-liu iha fulan Novembru, Dezembru no Janeiru nia laran.

 2F5A0442

“Orientasaun Komandu nian klaru katak tenke asegura loron Finadu, tanba ne’e maka ohin bolu Komandante hotu-hotu mai, tanba ita hatene bain-bain balun iha Misa laran komesa halo problema no iha rate/semiteriu halo problema; nune’e maka ohin realiza enkontru ne’e hodi fó orientasaun oinsa maka bele asegura iha loron Finadu ne’e,” subliña Komisariu Polísia ne’e.

Komandante Jerál PNTL ne’e akresenta tan katak kontrolu ba movimentu transporte iha loron Finadu sai mós asuntu ida ne’ebe Komandu orienta ba Komandu munisipiu idak-idak téknikamente atu oinsa Komandante sira asegura nune’e evita mosu asidente iha loron importante ne’e, hare’e ba kada tinan númeru asidente sempre sa’e maka’as iha selebrasaun loron Finadu. Iha situasaun seluk klaru ita hare’e mós tanba iha EE ne’e, ita orienta Komandante hotu-hotu katak wainhira halo barragem/Chek Point presiza tenke verifika labele ema sira ne’ebe karta kondusaun mate iha fulan Janeiru ka Dezembru tinan kotuk dehan ita uza Lei ne’e atu labele akuza, hanoin ida ne’e lalos. Só ida ne’ebe ninia dokumentu ne’e kuandu expire/mate iha tempu EE. Asuntu ida ne’e ohin orienta ba Komandante hotu-hotu atu hare’e situasaun ida ne’e.

Media PNTL.                      

Korpu Dosente UNPAZ Kompleta Kursu Pedagozia

 2F5A0377

Dili- Korpu dosente Universidade daPaz (UNPAZ) nain 62 kompleta kursu pedagozia faze formasaun Eskolar durante semana rua iha Sentru Formasaun Polisia (CFP-sigla portuges) no sei kontinua pratika durante fulan tolu (3) iha sira nia kampus.

Komandante CFP Superintendente Xefe Arquimino Ramos hateten kursu ne’e realiza bazeia ba rekomendasaun painel internasional ne’ebe maka Ajensia Nasional ba Avaliasaun no Akreditasaun Akademika (ANAAA-sigla portuges) konvida iha tempu hirak liuba sira halo vizita ba universidade hotu no hare katak Sentru Formasaun Polisia ho padraun nivel internasional nune’e professor Hasma rasik rekomenda ba magnifiku retor sira hotu atu halo estudu komparativu iha CFP tanba iha metodu hanorin ho ninia metodu aprendizajen ne’ebe diak ona iha Timor-Leste, Nia hato’o asuntu ne’e iha enseramentu kursu iha CFP Comoro, Sexta (16/10).

Komandante ne’e haktuirtan hafoin formasaun klase durante semana rua sei kontinua pratika durante fulan tolu (3) no Instrutor sira sei akompana dosente sira oinsa prepara manual, planu lisaun, planu sesaun, metodu hanorin no oinsa avalia paper, wainhira metodu hirak ne’ebe maka instrutor hanorin sira kompleta no hadia diak hotu ona ita avalia no halo ezame iha sira nia universidade.

2F5A0393

UNPAZ halo koperasaun ho CFP no sira fo bolsu estudu ba membru PNTL  lisensiadu nain rua no Mestradu nain rua kada tinan no ami sente buat ida koperasaun ne’e ami simu no ami mos tenke fo buat ne’ebe PNTL bele maka kursu pedagozia ne’ebe dezenvolve kleur ona desde tinan 2004 to’o agora.

Iha okajiaun ne’e Retor UNPAZ Adolmandu Amaral  hateten kursu ne’e ajuda tebes UNPAZ atu dosente sira afirma lolos sira nia pojisaun hanesan dosente tanba sai dosente ne’e tenke iha vokasaun, matenek ita iha ona mais badaen no abilidade ne’e presija aumenta liu husi formasaun atu nune’e estudante sira bele aproveta ho sistimatiku.

Nia haktuirtan antes ne’e ami halo ona estudu ne’ebe formasaun semana rua iha teoria no fulan tolu iha pratika ne’e depende ba dosente sira ne’ebe maka prontu ona ekipa formador sira, ANAAA no INDIMO sei akompana pratika iha universidade.

Entretantu Diretor ANAAA Edmundo Viegas hateten inisiativa ida ne’e diak tebes halao bazeia ba koperasaun entre instituisaun Ensinu Superior no CFP husi parte ANAAA apresia persijamente tanba ninia formadu sira ne’e Dosente tanba ne’e ANAAA presta atensaun espesial ida nomos fo apresiasaun ba instituisaun rua ne’e tanba hola inisiativa halao kursu formasaun Pedagozia ba Professor Ensinu Superior nian para hakbiit sira hodi komplementa sira nia kompetensia ne’ebe maka durante ne’e sira iha ona.

2F5A0385

Nia haktuirtan Dosente sira barak mak matenek iha sira ida-idak nia area maibe fator esensial ida ne’ebe maka ita hotu-hotu hakarak enkoraja ba instituisaun Superior sira katak mestre sira mos tenke iha kapasidade no kbiit atu transfere sira nia matenek ba estudante sira.

Mensajen ne’ebe Hau hato’o ba Komandante CFP no Magnifiku Retor UNPAZ karik inisiativa kursu ida ne’e bele atrai mos interese no atensaun husi instituisaun Ensinu Superior sira seluk iha tempu badak.

Serimonia enseramentu ne’e partisipa husi Segurndu komandante CFP Superintendente Boavida Ribeiro, Korpu dosente UNPAZ, Instruotr no konvidadu sira. Media PNTL

2F5A0331

Komandu PNTL Realiza Enkontru KSM

IMG_0014

Dili- Komandu Polisia Nasional Timor-Leste (PNTL) munisipiu Dili realiza enkontru Konsellu Seguransa Munisipal (KSM) hodi haforsa lina kordenasaun no fo solusaun ba problema ne’ebe sempre akontese iha munisipiu Dili.

Prezidente KSM atual Komandante PNTL munisipiu Dili Superintendente Xefe Henrique da Costa hateten kestaun ne’ebe maka ita tau atensaun maximu maka problema ne’ebe sempre akontese iha Dili laran hanesan tuda malu, ataka malu entre grupu no Violensia Domestika tanba ne’e ita husu atu servisu hamutuk ho lider komunitaria sira nune’e bele identifika hun husi problema hirak ne’e hodi buka solusaun, Nia hato’o asuntu ne’e iha CFP Komoro Dili, Kinta (15/10).

Nia haktuirtan PNTL mos introdus programa ba Administrador Postu no lider komunitaria sira katak Komandu munisipiu Dili iha programa Polisia Vizita Kampus ne’ebe remata ona no iha fulan Novembru ba oin sei realizatan programa Polisia Vizita ba Eskola atu halo sosializasaun no koalia ho estudante sira atu hatene regras tranzitu, Polisiamentu Komunitaria no prevensaun krime.

“Ita halo avaliasaun ba Konsellu Polisiamentu Komunitaria (KPK) no KSM apoiu tebes Polisia nia servisu ne’e pozitivu teb-tebes tanba iha problema balu sira nia kapasidade bele resolve iha suku,” dehan Komandante ne’e.

IMG_0007

Komandu mos husu apoiu husi KPK no lider komunitaria sira ba inplementasaun programa Polisia Vizita ba Uma husi OPS nomos Patroli sira hodi koalia ho komunidade sira no identifika lolos sese maka hela iha familia uma kain ida no sese maka hela iha bairu ne’e tanba problema barak ne’ebe maka mosu husi bairu ida ba hamutuk fali ho joven sira iha bairu neba hodi ataka malu tanba ne’e maka ita nia programa Polisia vizita ba uma ne’e ita sei halao liu-liu OPS ho KPK nomos lider komunitaria sira ita husu atu servisu hamutuk hodi susesu ba programa ne’e.

Iha okajiaun ne’e Xefe Departamentu Polisiamentu Komunitaria Nasional Superintendente Assistente Helena Das Dores hateten estabelesimentu KPK kompleta ona iha munisipiu Dili oinsa maka atendementu ba komunidade to’o iha aldeia tanba ne’e husu ba Xefe suku no Ofisial Polisia Suku (OPS) atu jere nia membru KPK atu halo prevensaun ba konflitu no identifika autor ba problema hodi tur hamutuk para rezolve no halao servisu tuir Normas Organizasaun no Prosedimentu (NOP) ba KPK hodi asegura servisu ho diak tuir regras ne’ebe maka iha hodi servisu hamutuk ho joventude no komunidade sira.

Iha parte seluk Administrador postu Administrativu Dom-Aleixo Tomas Barros hateten KPK nia prezensa inportante tebes maske iha situasaun pandemia COVID-19 sira ladun halao atividade normal maibe prezensa KPK ne’e faz parte hanesan ain liman Polisia nian hodi tulun Polisia komunitaria atu hare problema ne’ebe sempre akontese iha suku ida-idak iha postu Administrativu Dom Aleixo ne’ebe sai risku ba konflitu liu-liu iha area Rotunda Comoro tanba joven sira seidauk iha hanoin diak no halo provokasaun iha tempu kalan no tuda malu.

Nia haktuirtan ho enkontru ida ne’e ba futuru ita identifika area hirak ne’ebe maka risku ba komflitu no buka mekanismu hodi foti autor hirak ne’ebe involve no halo koperasaun servisu hamutuk ho autoridade lokal no fo formasaun ba sira hodi minimija problema iha fatin neba.

Enkontru loron tomak ne’e partisipa husi Administrador Postu Administrativu, Xefe Suku, Reprezentante NGO, Joventude membru KPK, OPS no Komandante Eskuadra hotu iha munisipiu Dili. Media PNTL

IMG_0031

Komandu PNTL Informa Situasaun Seguransa Ba PR

2F5A4239

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa no Segundu Komandante Jerál Komisariu Polísia Mateus Fernandes iha loron kinta-feira (15/10) hala’o enkontru semanal ida ho Prezidente Repúblika (PR) Dr.Francisco Guterres Lú-Olo hodi informa situasaun seguransa iha rai laran.

Komisariu Polísia Faustino da Costa hafoin enkontru ba jornalista sira hateten sorumutu ne’e hanesan enkontru semanal ne’ebe Komandu PNTL halo hodi aprezenta ba Xefe Estadu informsaun sira kona-ba situasaun seguransa rai laran lao diak iha nivel territorial no asidente hirak ne’ebe maka koantese durante semana ida nia laran iha âmbitu implementasaun Estadu Emergensia (EE).

“Iha implementasaun EE, parte PNTL nafatin asegura hela liu-liu ba iha area fronteira atu dehan deit katak iha semana ida nia laran ita halo kapturasaun illegal iha fronteira ne’e total ema na’in 14, husi númeru ne’e ida maka indikasaun lori atributu Arte Marsias no 13 sira seluk ita nia estudante hirak ne’ebe hela no kontinua sira nia estudu iha Indonesia”, esplika Komandante Jerál PNTL ne’e.

Autoridade másimu seguransa ne’e hatutan katak iha enkontru ne’e informa mós ba Xefe Estadu kona-ba situasaun rodoviaria katak iha semana ida nia laran ita rezista asidente hamutuk 36, rezulta ema na’in 6 maka mate. Husi asidente sira ne’e kauza maka fátor ema, konduz la ho kuidadu katak negligênsia umana hanesan akontese iha loron dominggu foin lalais ne’e iha Dili, hanesan mós iha Lospalos no Buacau tula sasan barak hasoru motor derepente la konsege kontrolu depois rezulta ema balun tenke husik mundu ne’e no barak hetan kanek.

Media PNTL.    

Komisariu Polísia Faustino da Costa Hala’o Vizita Servisu Ba Komandu PNTL Munisipiu Tolu

Viqueque, Manufahi, Aileu, Komandante Jerál Polísia Nasional Timor-Leste (PNTL) Komisariu Polísia Faustino da Costa durante loron rua (12-13/10) hala’o vizita servisu ida ba iha Komandu PNTL munisipiu tolu hanesan Viqueque, Manufahi no Aileu hodi hare’e besik liu tan kondisaun no problema ne’ebe maka Komandu hasoru durante ne’e.

2F5A9054

Iha loron 12 fulan Outubru tinan 2020, Komisariu Polísia Faustino da Costa akompaña husi Xefe Gabinete Relasaun Públika no ekipa hala’o vizita dahuluk iha Komandu PNTL munisipiu Viqueque ne’ebe hahu’u kedas hala’o enkontru ho Komandante munisipiu no Komandante eskuadra sira hodi rona preukupasaun no difikuldade ne’ebe maka Komandu ne’e hasoru durante hala’o kna’ar iha terenu.

Iha biban enkontru ne’e, Komandante PNTL munisipiu Viqueque Superintendente Sebastião Alves Quintão aprezenta relatoriu badak kona-ba Koimas ou Infrasaun ne’ebe Komandu PNTL munisipiu Viqueque hatama ba kofre Estadu hahu’u husi fulan Janeiru to’o Outubru tinan 2020 hamutuk $2.181,00. Rezista mós Servisu Investigasaun Kriminal (SIK) durante fulan Janeiru-Outubru ho total kazu 141 ne’ebe maka rezistu ba Ministeriu Públiku (MP) hamutuk 124, kazu 8 maka taka no kazu 9 maka sei iha prosesu nia laran.

Komisariu Polísia Faustino da Costa iha enkontru ne’e hateten vizita ne’e halo hodi mai hare’e no rona difikuldade ne’ebe maka Komandu hasoru. Mai fó mós Komandu PNTL nia hanoin atu ajusta tuir saida maka ita nia governu nia hakarak ba oin, instituisaun Estadu ida ne’e lao husi ne’ebe. Tanba ne’e iha 27 Marsu wainhira simu posse, iha buat haat ne’ebe tau iha importansia bo’ot tebes maka hanesan Mudansa, Konfiansa, Koizaun no Esperansa.

2F5A9541

Hafoin hala’o enkontru iha Komandu PNTL munisipiu Viqueuque, Komandante Jerál ho komitiva hala’o fali vizita ba iha eskuadra Fatuberliu munisipiu Manufahi hodi hare’e difikuldade ne’ebe maka membru sira hasoru durante hala’o kna’ar hanesan autoridade seguransa.

Loron 13 fulan Outubru, Komisariu Polísia Faustino da Costa hala’o fila fali enkontru ho Komandante PNTL munisipiu Manufahi hamutuk ho Komandante eskuadra haat hanesan Same, Turiskai, Alas no Faturbeliu inklui Xefe Seksaun no Servisu sira Komandu munisipiu nian. Iha oportunidade enkontru ne’e Komandante PNTL munisipiu Manufahi Superintendente Joni Viana das Regras aprezenta situasaun seguransa iha munisipiu ne’e, servisu no problema ne’ebe maka infrenta durante ne’e.

Iha munisipiu Manufahi, Komisariu Polísia ne’e hala’o vizita mós ba iha Caserna Komandu nian hodi hare’e besik liu tan kondisaun edifisiu no membru hirak ne’ebe maka hela iha fatin ne’e.

Iha loron ikus vizita nian, Komandante Jerál PNTL ho ekipa to’o iha Komandu PNTL munisipiu Aileu hodi hala’o enkontru ho Segundu Komandante PNTL munisipiu Aileu Superintendente Assistente António Lourenço da Costa Soares hamutuk ho Komandante eskuadra sira hanesan Aileu Villa, Lekidoe, Laulara no Remixio.

Objetivu prinsipal husi vizita servisu autoridade másimu seguransa ne’e maka atu hare’e besik liu tan kondisaun no difikuldade hirak ne’ebe maka Komandu munisipiu sira infrenta. No objetivu segundu maka halo preparasaun planu servisu Komandu PNTL nian ba oin iha eventu sira ne’ebe maka Timor-Leste sempre selebra ba.

Media PNTL.   

2F5A9873