PNTL Halao Workshop Sistema IMS ba Nivel Ezekutivu

IMGL0439

Dili- Komandu Polisia Nasional Timor-Leste (PNTL) halao workshop Sistema Jestaun Insidente (IMS-sigla ingles) ba Komandante munisipiu, no Unidade konaba oinsa utilija sistema dijital hodi relata servisu lor-loron, kazu asidente no Insidente ba Komandu Jeral.

Komandante Komandu Operasaun Superintendente Xefe Pedro Belo hateten workshop ida ne’e inportante teb-tebes ba Komandante sira atu iha konyesementu oinsa bele kompriende sistema ne’e ho diak hodi orienta membru sira iha terrrenu bele halao servisu ho diak, Nia hato’o asuntu ne’e iha Sentru Formasaun Polisia Comoro Dili, segunda (26/09).

Nia hatutan atu hatene ita nia susesu iha terrenu maka ita mos presija relatoriu tanba relatoriu maka bele suporta ita nia servisu no hatudu ita nia susesu. Akompana didiak aprejentasaun ne’e no kontinua hatutan ba membru sira iha terrenu, atualiza nafatin servisu ne’ebe maka halao husi aldeia to’o mai Ofisial Polisia Suku (OPS) sira halo relatoriu ba Komandu munisipiu no Komandante munisipiu hato’o tutan ba Komandante Jeral nune’e kada asidente no insidente iha teritoriu laran tomak Komandante Jeral bele akompana ho diak no hato’o relatoriu ba governu tutela ne’ebe maka toma konta ba area seguransa.

“Husu nafatin ba Komandante sira ita iha sistema IMS tanba ne’e uza ho didiak tanba iha pontus no kriteria ne’ebe maka tau tia ona konaba insidente, asidente, patrullamentu, no servisu hotu-hotu ne’ebe maka PNTL halo nune’e Komandante Jeral no Komandante hotu-hotu bele asesu ,”dehan Belo.

IMGL0478

Iha workshop ida ne’e Xefe IMS no IT maka halo aprejentasaun tanba ne’e husu ba Komandante sira atu akompana didiak nune’e kuandu iha avaliasaun ba Komandu munisipiu sira ita bele hatene katak prestasaun servisu ne‘e bele hare iha neba.

Entertantu Komandante Jeral PNTL Komisariu Polisia Faustino da Costa hateten Sistema Jestaun Insidente uza durante tinan barak ona no oinsa Komandante sira monitorija no akompaña tanba prioridade governu nian ida maka governu elektroniku entaun signifika se ita iha ona sistema ne’ebe instaladu entaun tenke  uza ho diak, efikas no efisiente nune’e hamenus mos gastus, iha tempu pasadu lori relatoriu ne’e mahar bot maibe ohin loron kuandu hotu-hotu uza sistema ne’e ho diak la presiza relatoriu ne’ebe manual maibe bele haruka liu husi email deit.

Nia hatutan workshop ohin foku liu ba jestaun insidente ne’e buat ida ne’ebe maka durante ne’e Komandante sira akompaña durante ne’e tanba husi akontesementu sira maka Komandante sira dejena sira nia planu servisu operasaun.

“Hau mos orienta ona atu ba oin labele iha diferente dadus entre Ospital no PNTL tanba ita nia situasaun maka ne’e iha kapital Dili asidente ne’ebe involve parte rua motor ho motor normalmente Polisia ba atende sira dehan husik ba maun sira ami rezolve mesak hafoin sira ba konsulta iha ospital entaun saida maka sistema ne’e haruka desde kuandu iha akontesementu asidente Polisia tenke rejistu no prosesu; Se parte rua atu rezolve mesak ne’e problema ketak ida nune’e ita bele hare ba oin prosesu kontinuasaun ita tenke iha dadus ne’ebe hanesan,”Komisariu esplika.

Nia haktuirtan Ami hatene katak babain sira balu ne’ebe hakarak rezolve mesak ne’e tanba sira nia transporte la iha kondisaun no laiha dokumentu ruma entaun sira evita tia no dehan Maun Polisia sira lalika ami rezolve deit maibe Komandu nia orientasaun mak ne’e kualker atendementu  Polisia tenke rejistu no atualija

IMGL0408

Iha okajiaun ne’e Komandante TLPDP Superintendent Daren Booy hateten workshop ida ne’e iha materia inportante atu diskuti no inportante tebes ba Komandante munisipiu sira atu hatene konaba insidente hotu-hotu ne’ebe maka akontese iha komunidade no tenke relata no rejistu iha IMS atu nune’e Komandante Jeral no Nai ulun sira bele hatene no halo prioridade saida maka presija atu halo.

Nia akresenta sistema IMS ne’ebe maka ita uza daudaun desde uluk to’o agora iha situasaun difikuldade balu ne’ebe ita hasoru no ita sei diskuti konaba IMS ba futuru nian. Agora ba oin TLPDP sei halo esforsu servisu hamutuk ho PNTL atu dejenutan sistema baze de dadus ida ne’ebe kontemporariu, esforsu ne’ebe ita sei halo sei atinji buat ne’ebe ita espera iha tinan tolu nia laran nune’e bele realija ona.

Workshop durante loron tomak ne’e loke husi Komandante Jeral akompaña husi Komandante Komandu operasaun, Komandante CFP no Komandante TLPDP no partisipa husi Komandante munisipiu, Komandante Unidade, Xefe Departamentu Xefe Seksaun, Xefe Servisu no estajiariu husi UNTL no IOB. Media PNTL

Ekipa Fc MI Okupa Segundu Lugar iha Jogu Finál Tasa Fronteira

306833846_1527666917694304_4726081950331214960_n

BATUGADE, 25 setembru 2022 – Ekipa Futeból Ministériu Interior hakat ba finais kontra klubu husi Coverde F, Iha Kampu Sanirin.

Iha jogu refere klube rua anima tebes adeptus ne’ebé partisipa no asiste jogu iha kampu Sanirin, entertantu iha jogu ne’e klube rua ne’ebé hala’o jogu ho ritmu aas, iha 90 Minutu nia laran hodi rezulta golu ba malu ho eskór 1-0 Iha minute segunda parte nian. Golu ne’e marka husi klubu Coverde FC ho nia jogadór númeru kamizola 9. Hodi halo ekipa MI sofre golu 1 husi Coverdi.

Alende ne’e ekipa adversariu (MI) mós lalakon nia espiritu desportivu hodi hala’o nafatin jogu ba mai, maibé la rezulta golu, hodi halo empata iha 90 minutu nia laran. Ekipa rua ne’e hala’o jogu ho di’ak tebes hodi anima adeptus klubu rua ne’e nian to’o remata.

Tuir kapitaun Coverde fó nia komentariu katak “sente kontente ho rezultadu jogu, sira-nia klube manan no lalakon iha tasa refere durante hahú inísiu jogu to’o remata nia husu ba ekipa klubu hotu atu labele lakon espíritu vontade ba desportu liu-liu ba sira ne’ebé partisipa jogu maibé la to’o final, iha parte ida nia mós sente orgullu nia ekipa bele fó rezultadu pozitivu ba tasa Fronteira ne’e”.

307123911_1527666061027723_316481322782292973_n

Iha seremónia finál ba tasa Fronteira ne’e komandante UPF, Superintendente Polísia Euclides Belo, hateten, Ohin ultima jogu ba tasa fronteira nian ne’ebé sei anima ita iha kampu sanirin, iha fatin hanesan nia hatutan tán, ekipa husi Ministériu Interiór hasoru Coverde, tanba ne’e maka hanesan komandante Unidade Fronteira hanesan mós konselleru ba aktividade ida ne’e. Seremónia enseramentu tasa fronteira, susesu ba ekipa rua ne’ebé joga iha lokraik ne’e husu hotu-hotu atu anima komunidade ne’e tanba Domingo ohin nian ko’alia kona-ba haksolok,

Ohin imi nain 21 iha kampu laran ne’e sei fó kontente no ksolok ba bainaka sira.

Ikusliu komisaun organizadóra fahe mós tasa ba manan nain husi primeiru 1-3 lugar, no Ministériu Interior hetan segundu lugar husi tansa Fronteira ne’e.   Serviços Relações Públicas

 

Operasaun Lao Ain Komandu PNTL Munisipiu Dili Asegura Membru PSHT Nain 26

308590363_1525903811203948_866127699590969857_n

Dili, 24 setembru 2022 – Komandu PNTL Munisipiu Dili halo operasaun patrulla ho kareta inklui lao ain tuir kada bairu iha tempu kalan hodi prevene krime sira ne’ebe perturba ordem publika inklui garante seguru ba komunidade sira iha kapital Dili.

Komandante PNTL Munisipiu Dili, Superintendente Xefi Polisia Henrique da Costa, hateten operasaun ne’e konsege asegura joven nain 26 ne’ebe viola kumprimisiu lider arte marsiais sira nian.

“Operasaun ne’e nia objetivu maka hodi antesipa krime ne’ebe akontese iha Dili laran no ohin kalan ita orienta Esquadra PNTL hotu mak hanesan, Dom-Aleixo, Cristo-Rei, Nain-Feto, Vera-Cruz no Metinaro, halo operasaun rutina lao ain tama sai bairu iha area risku sira ne’ebe sempre akontese problema hodi garante situasaun hakmatek iha komunidade nia let, no iha operasaun ne’e ita konsege asegura joven nain 26 hosi Grupu Arte Marsiais (GAM) PSHT, iha area Aimutihun, Suku Becora, Postu-Administrativu Cristo-rei, tanba viola kumprimisiu hosi lider arte marsiais sira ne’ebe antes ne’e fo sai ona ba publiku”, esplika Henrique, iha nia knar fatin Caicoli, sesta kalan ne’e.

Nia dehan, ekipa patrulla identifika joven 26 ne’e halibur malu hodi halo treina iha fatin nakukun ne’ebe bele mosu provokasaun hodi kauza ba perturbasaun ordem publik.

“Bazeia ba Rezolusaun Guvernu ho numeru 01/MI-MD/IX/2022, ita intensifika volume atividade patrullamentu lao ain iha tempu kalan ne’e hare mos ba movimentu joven sira ne’ebe halo agrupamentu hemu lanu iha dalan publiku ita foti medida prevensaun hodi evita hahalok sira ne’e bele fo perturba ordem publika”, afirma.

Iha fatin hanesan, Xefi Aldeia Bekusi Kraik, Alicia Moniz Amaral, hateten nia parte laiha kuñesementu no atividade ne’e bele provoka situasaun ladiak iha bairu laran.

“Atu dehan katak antes ne’e ami enkontru ona ho Prezidente KRAM (Komisaun Reguladora Artes Marsiais) fo sai ona regras dehan karik Grupu Arte Marsiais ruma atu halo atividade treinu sira ne’e tenke iha uluk koordenasaun ba Autoridade Lokal. Sira mos husu atu kontróla Grupu Arte Marsiais sira, tanba wainhira atu identifika sentru formasaun hodi treina iha Suku no Aldeia, presija halo pedidu ba Xefí Suku sira maka autóriza kona ba fatin halo treinu nian, nune’e mós atu identifika treinadór arte marsiais ne’ebé atu fó treinu tenki kábe ba polísia nia servisu. Agora sira treina ida ne’e kategoria hanesan ilegal tanba halibur malu iha uma let laiha kuñesementu hosi Xefi Suku no OPS (Ofisial Polisia Suku). Depois treina iha dalan ninin no ahi taka nakukun hotu kedas ne’e bele provoka fali situasaun ladiak tanba daudaun festa ida besik hela iha ne’e, entaun ho movimentu ba mai ne’e provokador ruma iha bele sadik malu no problema bele mosu”, haktuir Xefi Aldeia ne’e.

308628918_1525929537868042_1448239607922452202_n

Nia haktuir, oras ne’e komunidade sei trauma hela ho akontesementu semana kotuk tanba ne’e nia husu atu halo atividade treina sira ne’e bele husu autorizasaun hosi polisia no indika fatin publiku labele iha fali uma let ne’ebe bele kria situasaun la hakmatek.

“Ita hotu akompaña katak situasaun iha loron 5 setembru halo ema hotu preokupa ho ataka malu entre joven ne’ebe kuaze atu kauza ba instabilidade tanba ne’e hau lori komunidade nia naran hato’o agradese ba autoridade seguransa sira ne’ebe mai fo hanoin joven sira ne’e atu labele repete tan no husu nafatin ba joven sira hotu atu asegura paz no estabilidade hodi kontribui ba prosesu dezenvolvimentu iha Timor-Leste, nune’e sosiedade sira bele tau fali konfiansa ba arte marsiaís sira, tanba durante ne’e komunidade sira nia observasaun ba Arte Marsiaís sira gosta halo de’it maka problema iha komunidade nia le’et.”, sujere.

Xefi Aldeia Alicia, mos husu ba KRAM no Sub-Komisaun sira ne’ebe estabelese ona inklui lider Arte Marsiais atu kontinua halo sosializasaun ba membru sira hodi halo tuir kumprimisiu ne’ebe maka fo sai ona ba publik iha semana kotuk ba.

“Antes ne’e Sekretariu Jeral PSHT, Pedro Aparacio, hateten estrutura PSHT hatun ona diretiva ba nia membru tomak hodi bandu no labele uza atributu arte marsiais iha bairu laran, entaun presija tebes ema hotu nia kontribuisaun tantu mai husi grupu ka individu, para oinsa bele kumpri regulamentu espesífiku ne’ebe lider arte marsiais sira fo sai ona nune’e bele garante orden públiku no respeitu sidadaun sira seluk nia direitu iha bairu laran no hetan fali konfiansa hosi komunidade no Guvernu rasik”, salienta.

 

Nia dehan, hare ba tinan kotuk iha Atabae, Grupu Arte Marsiais no Arte Ritual halo ona juramentu ba bandeira lulik RDTL no Maromak atu hametin fraternidade, lolo liman ba malu hodi simu no dame malu hanesan maun alin inklui hadok an hosi konflitu, maibe realidade hatudu oin seluk.

 

Entretantu operasaun lao ain ne’e lidera hosi Komandante Operasaun PNTL Munisipiu Dili, Inspetor Xefi Polisia, Delfim da Silva, no hetan apoiu rekursu hosi Forsa Rezerva inklui ekipa servisu sekreta Makikit hosi Munisipiu Dili, Servisu Informasaun Polisia Nasional (SIPN) ne’ebe halo movimentu hodi informa ba ekipa patrulla sira atu responde ho lalais.   Media Serviços Relações Públicas

 

SIKN-PNTL Halo Aprensaun Ba Kamioneta Tolu Tula Sasan Merkadoria

305662219_1512781835812464_1176223797224864323_n

Dili, Komandu Polísia Nasional Timor-Leste (PNTL)  iha loron 22 fulan Setembro tinan 2022 oras 10:00 akompaña movimentu ida husi Motain mai Kapital Dili, deskonfia Kamioneta tolu ho xapa Mátrikula DH:85.14, DH:84.36, no DH:81.32 tula sasan Merkadoria maibé deskonfia hase’es-ann selu Impostu ba Autoridade iha liña fronteira.

Porta Voz Komandu PNTL Superintendente Xefe Armando Monteiro liu husi konferensia imprensa sexta-feira (23/09) ne’e hateten ho aktu ida maka ita nia autoridade seguransa akompaña hafoin to’o iha Kapital Dili ita halo Aprensaun.

“Hafoin halo aprensaun, orseik (22/09/2022) kedas Servisu Investigasaun Kriminal Nasional (SIKN) halo enkontru urjente ida ho ita nia Autoridade servisu iha Postu Integradu Liña fronteira ninian no ohin (23/09/2022) dadersan até agora dadaun ita nia SIKN kontinua ho kareta no sasan nain, sasan hirak ne’ebe halo aprensaun, ita halo kontajen no husi kontajen ida ne’e maka pursentu rua-nulu (20%) tuir faktura ne’ebe maka selu impostu ba iha ita nia autoridade iha fronteira no purentu walu-nulu (80%) se’es an selu impostu ba Estadu”, esplika Porta Voz Komandu PNTL ne’e.

306569777_1512781255812522_7747125653572117888_n

Superintendente Xefe ne’e salienta tan katak tanba ne’e ohin mós ita nia SIKN kontinua halo prosesu ba kazu ida ne’e no tuir ajenda aban sei aprezenta ba Ministeriu Públiku (MP) nu’udar nain ba Prosesual ninian. Sasan hirak ne’ebe maka ohin ita nia SIKN halo aprensaun, maioria sasan nesesidade básika.

“Sasan hirak ne’ebe tuir dalan legal (20%) ohin kedas ita entrega ona ba sasan nain no sasan hirak ne’ebe la tuir dalan legal (80%) ita aprezenta ba MP nu’udar nain titular ba Prosesual, ba ema hirak ne’ebe maka importa sasan la tuir dalan legal ita konsidera hanesan deskamiñu ida, tenta hase’es an husi autoridade hodi la selu impostu”, hatutan Superintendente Xefe ne’e.

Husi aktu ida ne’e maka, koordenasaun no komunikasaun entre instituisaun iha liña fronteira ne’e kontinua lao nafatin tantu iha nivel postu integradu, tantu mós iha nivel tátika area fronteira Mota-masin, tantu mós iha Batugade; no mós iha area Oecusse ninian. Liu husi koordenasaun no komunikasaun ida ne’e ita bele hamutuk atu oinsa bele kontrolu movimentu ema no sasan ne’ebe maka tama no sai liu husi ita nia liña fronteira mai ita nia nasaun Timor-Leste.

Media PNTL.          

Parseiru UNDP Apoiu Ekipamentus Elektróniku Ba VPU

Dili, Parseiru United Nations Development Programme (UNDP) liu husi programa KOICA apoiu ekipamentus elektróniku ba Komandu Polísia Nasional Timor-Leste (PNTL) liu-liu ba Servisu Investigasaun Kriminal Nasional (SIKN), Unidade Ema Vulneravel (Vulnerable Persons Units -VPU- sigla Iglês) hodi apoiu servisu VPU sira iha munisipiu.

Apoiu ida ne’e rezultadu husi enkontru meja redonda ne’ebe organiza husi VPU hodi konvida VPU munisipiu no parseiru hanesan ALFELA no UNDP rasik, hodi identifika difikuldade ne’ebe investigador VPU sira infrenta iha servisu fatin, funsaun husi ekipamentus hirak ne’e maka uza ba nesesidade investigador, wainhira Intervenentes sira labele marka presensa iha edifisiu VPU hodi fó deklarasaun ka depoimentu.

305805678_1511101839313797_1752023163120155595_n

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha salaun enkontru Kuartél Jerál hateten serimonia ida ne’e maske ita hala’o simples maibé iha ninia signifikadu ne’ebe bo’ot tebes ba instituisaun PNTL oinsa atu eleva no haforsa ninia abilidade no kapasidade ba atendimentu públiku ne’ebe mai ho moto ida katak “Justisa ba Ema Hotu, Ema Hotu Presiza Protesaun”.

“Atu bele haforsa atendimentu no implementasaun ba programa sira ne’ebe ita iha, sai hanesan mós prioridade ida ba PNTL maka implementa aktividade Inisiativa Spotlight ninian no mós kontinua programa ne’ebe sai prioriodade ida iha PNTL iha tinan hirak ne’e no ba oin maka Sensibiliza no fahe informasaun ba iha ita nia komunidade iha asuntu Violensia Basea ba Jéneru no mós ba protesaun Feto no Labarik”, esplika Komandante Jerál PNTL ne’e.

Komisariu Polísia ne’e afirma liu tan katak programa ida ne’e sai hanesan programa prioridade ida husi programa prioridade hitu iha PNTL ninian iha tinan lima ba oin, no ohin ita hotu hamutuk iha fatin ida ne’e atu hare’e no hetan suporta/apoiu husi parseiru internasional no parseiru sira hotu maka atu bele atinzi kapasidade ba atendimentu maka hetan apoiu/meius ekipamentus husi parseiru sira.

Iha fatin hanesan Reprezentante Rezidensia UNDP iha Timor-Leste Munkhtuya Altangerel hateten nia parte sente kontente tanba UNDP no PNTL iha ona parseiria servisu ne’ebe independensia, UNDP konsidera katak importante tebes atu servisu hamutuk ho Polísia tanba dala-barak PNTL hanesan pontu kontaktu dahuluk ba ema barak ne’ebe presiza PNTL nia apoiu , inklui Feto, labarik feto no sovrevivente husi Violensia Basea ba Jéneru sira.

306324568_1511102512647063_2990819653851058084_n

“Importante tebes katak ami apresia Polísia nia nia servisu maka’as no asiste sira atu fornese apoiu diak liu ba ema vulneravel sira, UNDP Inisiativa Spotlight foin lalais ne’e hala’o avaliasaun preliminariu ida ba Unidade Ema Vulneravel, rezultadu ida hatudu katak iha limitasaun bo’ot iha sistema jestaun kazu iha nivel postu administrativu no ninia koordenasaun ho nivel munisipiu”, tenik Reprezentante Rezidensia UNDP iha Timor-Leste ne’e.

Munkhtuya Altangerel salienta tan katak agora dadaun transmite informasaun hala’o liu husi dokumentu físiku, kazu sira husi sub distritu ba munisipiu sira ne’ebe sai ona dezafia bo’ot ida no dala-barak rezultadu lakon ka tarde atu aktualiza informasaun. Além-de husi rezultadu ne’e, liu husi pedidu ofisial ida husi Komandante Jerál PNTL liu husi VPU dirize ba UNDP hodi hatudu katak presiza ekipamentu elektroniku ba Komandante no Ofisial VPU sira.

Ekipamentus hirak ne’e maka hanesan Laptop hamutuk 14, Printer hamutuk 13, Hardisk External hamutuk 17.  No iha fulan ida liu ba, parseiru TLPDP mós distribui ona Kamera hodi uza hasai fotografia Intervenentes sira nian, ho ida ne’e maka sufisiente ona hodi fó atendimentu ba vitima Violensia Base aba Jéneru.

Hola parte iha serimonia ne’e Inspetúr Jerál, Komandante Komandu Operasaun, Administrasaun, Xefe SIKN, Xefe Relasaun Internasional, Xefe Servisu, Xefe Departamentu inklui ekipa parseiru UNDP no TLPDP.

Media PNTL.  

CFP fo Formasaun Baziku ba Guarda Seguransa HNGV

IMGL9879

Dili- Sentru Formasaun Polisia (CFP-sigla portuges) fo formasaun baziku ba Guarda Seguransa Hospital Nasional Guido Valadares (HNGV) nain 40 atu bele aumenta sira nia konyesementu no abilidade hodi halao sira nia knar diak liutan no professional.

Komandante CFP Interinu Inspetur Xefe Polisia Julio Barbosa hateten prosesu formasaun hotu-hotu nia objetivu maka oinsa atu muda mentalidade no karakter ema nian relevante ho situasaun ne’ebe maka Timor-Leste iha no aplika universal, Nia hato’o asuntu ne’e iha CFP Komoro Dili (19/09)

Nia hatutan formasaun ne’e sei foka liu ba oinsa iha konyesmentu konaba komunikasaun, manera oinsa uza radio komunikasaun, oinsa halo patrullamentu, edukasaun fizika, ordem unida, oinsa uza forsa bazeia ba Diretus Humanus, utilija algema, defeza pessoal no seluktan.

Formasaun ne’e hanesan formasaun ba dala uluk alende formasaun ne’ebe maka halao ona ba funsionariu Saneamentu Dili, Guarda Prijaun nomos seguransa PAX sira.

Iha okajiaun ne’e Reprejentante Diretur HNGV Raul Humberto Gama hateten Ita hotu hatene katak sirkulasaun no movimentu pasiente no familia pasiente durante oras 24 nia laran no membru Siguransa hirak ne’e maka asegura oinsa seguransa iha HNGV, loron ba loron sira sempre infrenta problema entermus ekipamentu oinsa atu atende vizitante sira iha ospital tanba ne’e Formasaun ida ne’e oinsa atu forma sira oinsa atu utilija ekipamentu seguransa ne’ebe maka sira iha para atendementu iha ospital ho professional.

IMGL9943

“Husu Guarda sira tenke hakruk ba regras durante iha formasaun no konsentra hodi simu materia no pratika ne’ebe maka Instrutor sira fo no husu ba Instrutor sira atu fo teoria ne’ebe maka relevante ho sira nia servisu, etika komunikasaun no etika atendementu ne’ebe maka inportante tebes ba sira,” dehan Gama.

Iha biban ne’e agradese ba CFP tanba iha disponibilidade hodi atende ami nia proposta oinsa atu halao formasaun ba membru Guarda HNGV tanba sira nia atendementu dalaruma la reprezenta siguransa durante ne’e Ami hare lakunas balu ne’ebe maka membru seguransa infrenta.

Entretantu Reprejentante Komandante Jeral Superintendente Xefe Polisia Pedro Belo hateten formasaun ida ne’e inportante tebes tanba Guarda Seguransa sira persija iha konyesmentu tekniku no taktika se laiha konyesementu maka hanesan mos ema bai-bain ne’ebe maka hamrik iha odamatan.

“Kuandu maluk sira termina ona imi nia aan ba Guarda Seguransa maka Imi labele lori Imi nia organijasaun ba iha fatin servisu, labele lori partidu, no labele lori kor oi-oin ba iha fatin neba, nudar ajente seguransa ne’ebe kuidadu ema ne’ebe maka ba iha neba, funsionariu sira ne’ebe maka servisu iha ospital no pasiente hirak ne’ebe maka halo tratamentu iha ospital no ekipamentus hirak ne’ebe maka iha tanba ne’e se Imi tau Imi nia aan didiak maka ema hotu sei respeitu imi,” Komandante Belo husu.

Formasaun ne’e fahe ba faze rua kompostu husi Faze I Guarda Seguransa nain 20 hahu loron 19-30 setembru no Faze II nain 20 hahu loron 10-21 outubru 2022.

Abertura formasaun ne’e kompleta ho le akta husi Diretor Rekursu Humanus HNGV hafoin kontinua asina husi Reprejentante Diretur HNGV no Komandante CFP Interinu.

Formasaun ne’e loke husi Reprejentante Komandante Jeral PNTL Superintendente Xefe Polisia Pedro Belo ho prejensa husi Reprejentante Diretor FDCH, Xefe Gabinete no Xefe Departamanetu sira iha HNGV, Instrutor CFP no partisipante sira. Media PNTL

 

IMGL9853

CAC Hala’o Sosializasaun Formatu Arendimentu Bens Interese No Agradadu Familiar Ba Komandu PNTL

305083176_1502484516842196_1232617585247086066_n

Dili, Comissão Anti Corrupção (CAC-sigla Português) halo’a Sosializasaun Formatu Arendimentu Bens Interese No Agradadu Familiar Ba Komandu Polísia Nasional Timor-Leste (PNTL).

Reprezentante Segundu Komandante Jerál PNTL Inspetúr Jerál Superintendente Xefe Carlos Jerónimo iha ninia intervensaun ba aktividade ne’ebe hala’o sexta-feira (09/09) ne’e iha Kuartél Jerál hateten ohin tempu oportunu ida diak ba Komandu PNTL relasiona ho konvite ne’ebe mai husi CAC determina kedas katak iha loron 29 fulan Setembru sei halo deklarasaun kona-ba riku-soin sira.

“Ho ida ne’e lori Komandu PNTL nia naran hato’o ami nia agradesimentu ba ekipa CAC ne’ebe mai fó informasaun sira ne’ebe relasiona ho formatu deklarasaun kona-ba riku-soin sira, husu ba ita hotu atu deklara didiak tanba ita hanesan ajente Estadu nian hodi bele kontribui ba medidas kombate Korupsaun nian”, esplika Inspetúr Jerál PNTL ne’e.

Superintendente Xefe ne’e afirma bazeia ba konvite ne’ebe maka husi CAC, maka Komandante Jerál orienta hodi komunika kedas ba Komandante Komandu PNTL munsipiu hotu no Xefe Servisu sira ne’ebe maka tutela kargu ne’ebe importante atu bele mai hodi rona esplikasaun ka sosializasaun husi CAC.

Iha fatin hanesan, Adjuntu Komisariu CAC Luis de Oliveira Sampaio ba Asuntu Prevensaun no Sensibilizasaun hateten ekipa CAC agradese ba konvite ne’ebe mai husi Komandu PNTL atu bele partilla ka fahe informasaun politika Estadu nian ne’ebe transforma liu husi Lei Nu.7/2020 kona Medidas Prevensaun no Kombate Korupasaun.

“Eventu ida ne’e manifesta sentidu pretense no interese bo’ot husi Komandu PNTL atu hamutuk ho CAC iha politika Estadu nian ba kombate krime Korupsaun iha Timor-Leste, liu husi Lei Nu.7/2020 kona Medidas Prevensaun no Kombate Korupasaun; Lei ne’e iha jerál enkuadra elementu importante hat maka hanesan ida koalia kona-ba Medida sira Prevensaun no Kombate Korupasaun, segundu kona-ba Estadu adopta mekanizmu sira, boa prátika sira ne’ebe iha rai liur hodi intruduz iha ita nia sistema ne’ebe ita sei aprende hamutuk oinsa atu prense iha sistema plataforma online”, tenik Adjuntu Komisariu CAC ne’e.

Luis de Oliveira hatutan tan pontu seluk husi elementu importante hat maka reforsa medidas represivu existensia sira katak iha Lei Nu.7/2020 aktualiza no define tan tipe krime korupsaun sira ne’ebe introduz iha ita nia Estadu maibé ohin ita atu foka liu kona-ba regime deklara bens e interese. Estadu hamosu Lei Nu.7/2020 ne’e atu hatudu sentidu bo’ot Estadu nian kona-ba oinsa protégé ninia sidadaun sira ne’ebe hakna’ar-an iha instituisaun Estadu atu la monu ba tentasaun sira krime korupsaun nia no Lei ida ne’e partikularmente iha rejime deklarasaun rikusoin nian fó énfaze ba medida prevensaun, enkuantu medida represivu nu’udar opsaun últimu.

Hola parte iha sensibilizasaun ne’e Inspetúr Jerál, Komandante Komandu Administrasaun, Komandante PNTL munisipiu 13, RAEOA, Xefe Servisu no Xefe Departamentu sira iha Kuartél Jerál PNTL nian.

Media PNTL.            

 

Komandu F-FDTL no PNTL Asina Diretiva Konjunta Nu.2/2022

IMGL8497

Dili-Komandu Falintil Forsa Defeza Timor-Leste(F-FDTL) no Polisia Nasional Timor-Leste (PNTL) asina diretiva Konjunta Nu.2/2022 konaba regra Empenamentu Konjuntu  ba Trankulidade no seguransa hodi responde ba situasaun neébe maka akontese iha rai laran.

Xefe Estadu Major Jeneral F-FDTL Tanente Jeneral Falur Rate Laek hateten Asina diretiva konjuntu husi Komandu rua nudar dokumentu ida konaba regra Empenamentu de Arma, diretiva ida neé bazeia ba Diretiva Konsellu Ministru neebe maka Primeiru Ministru nudar mos Ministru Interior no Vise Ministru haruka mai no ami prepara no ejekuta hafoin fo ba Primeiru Ministru hodi fo konkordansia ikus liu  nuneé Ami halo diretiva ida neé atu responde situasaun neébe maka akontese iha rai laran.

Ita la jeneralija tanba laos iha teritoriu rai laran tomak maibe situasaun hirak neé mosu no media sosial neébe maka fo informasaun halo ajitasaun boot ida maibe ita hare liu-liu joventude sira neébe tau liman ba forsa Defeza no Seguransa; Ita hatene iha mundu tomak iha neébe deit kuandu problema social ruma mosu Polisia ho Militar sira halo neé sira mak sala hela deit neé hanesan kultura mundu nian mais ita labele abuza toó neba ita hatene katak forsa rua neé treinadu no Governu Estadu investe no halo ona istoria naruk nuneé hau hatoó katak neé afirmasaun soberania nian, se ita mak la respetu semak atu respetu fali.

Ema neébe maka kuandu la respeta instituisaun rua neé signifika insulta, tebe, desrespeita herois no martires sira nia luta, tenke kaermetin ita nia kultura nudar povu no nasaun.

Apelu ba instituisaun rua Ita boot sira tenke brani, preparadu no treinadu atu responde buat neébe diak no aat mais ita boot sira mos hanorin atu halo buat neébe diak. Militar ruma neébe halo labele halo desijaun mesak maibe tenke rona ordem Komandu ema ida la halo desijaun iha nia aan rasik por enkuantu iha ultimu instansia maka uza regra emprenamentu de armas ida neé maka hakerek iha diretiva konjunta neé.

Apelu ba komunidade sira espesialmente ba joventude neébe maka tuir relatoriu neébe tama katak neé signifika mal edukadu husi inan aman, organijasaun neébe nia partense ba no ajente edukasaun neébe maka hanorin nuneé ohin loron mosu mentalidade hanesan neé.

“Husu ba sira nia karera sei naruk, oan no bei oan sira nia karera sei naruk Ami sira neébe iha neé Imi nia maun no imi nia aman sira neébe tur iha instituisaun rua neé loron ida ami sei troka no joventude sira maka sei mai troka tanba neé prepara aan foti buat neébe diak para halo tuir”.

Ami instituisaun rua neé hamutuk hahu ohin ba oin ami servisu hamutuk lao hodi hare saida maka akontese “Custa o que custar dura o que durar ”Ami sei la husi sakrifisiu hirak neébe tinan naruk atu monu ba rai ami sei tutur, hasan, leba, haklilino dada maske todan kuandu ami hamutuk maka nasaun forte, Ami iha apoiu komunidade, povu, igreja Katolika, joventude nasionalista no patriota sira, komunidade internasional neébe solidariu ho ami neébe husu para ita hotu halo buat neébe diak no los ami husu kontribusaun povu timor neébe barani, aswain, povu unidu no fiar nain nuneé ita hotu hamutuk hodi nasaun ida neé ita fiar malu no rona malu tanba o mak timor, hau mak timor, nia mak timor no ita hotu mak timor iha rai Timor Loro Sae.

“Hau fiar katak maioria joventude laos mak sira neébe tuda membru F-FDTL, sira neébe soe bomba Molotov ba Polisia”.

Kuandu Ami tur hamutuk iha neé signifika ami nia komprimisiu iha neé ba oin ami servisu hamutuk Lei difini ida-idak tuir nia servisu no ami halo kordenasaun nafatin apoiu nafatin no kordena malu hanesan liman karuk no los neébe kompleta malu ho apoiu povu tomak nian no inan aman sira kontribui informasaun nuneé oan sira neébe hahalok aat labele husik liu.

Iha okajiaun neé Segundu Komandante Jeral PNTL Komisariu Polisia Mateus Fernandes hateten akontesmentu neébe maka komplika situasaun seguransa rai laran iha komfrontu entre Artes Marsiais iha munisipiu Dili neébe komplika ba estabilidade nasional ida neé sai hanesan prekupasaun governu nian nuneé hasai Rejolusaun Nu.26 iha loron 06 setembru 2022 atu komandu rua bele halo Komandu konjunta ba emprenamentu asuntu neébe agora daudaun ita hotu infrenta.

Enkontru hamutuk Forsa Armada ho PNTL, membru Governu Vise ministru Interior no Sekretariu Estadu Joventude no Desportu, Artes Marsiais no KRAM oinsa para hamutuk retoma fila-fali ordem publika iha nia fatin tanba iha situasaun neébe akontese halo ema barak sente prekupa no paniku.

Liu husi lider Arte Marsiais no estrutura sei kolabora ho autoridade seguransa ba membru hirak neébe maka involve iha krime sei prosesu tuir lei, lider arte Marsiais ho nia estrutura kompromete atu kolabora iha paz no estabilidade ba sira neébe maka kria violensia no Lider arte marsiais sira konkorda kuandu problema ruma mosu lalika dun malu maibe buka rezolve, eduka no kontrola membru tur lei Nu.5/2017 Rejime juridiku konaba pratika artes marsiais, Rituis Armas Brancas Rama Ambon no alterasaun ba kodigu penal nomos Rejolusaun governu Nu.4/2020 konaba reativasaun arte marsiais, primeru diretiva KRAM konaba kriteriu rejistu no organizasaun artes marsiais no diretiva konaba mata dalan ba treinamentu.

Lider arte marsiais no estrutura konkorda atu atributu arte marsiais sei uza deit iha fatin treinamentu duke uza ba fatin publiku hodi halo fila-fali auto stop ba Liberdade publiku nomos ba organizasaun ruma, halo terror, amiasa, anarkismu no estraga ema seluk nia sasan satan familia balu tauk no refujia ba fatin seluk.

Empenamentu ida ne’e katak operasaun ida neé forsa instituisaun rua afirma konkordansia hirak neébe maka ohin hau temi iha leten katak durante neé KRAM fo ona regulamentu no regras atu regula arte marsiais maibe la inplementa tanba neé forsa rua hamrik para afirma situasaun neébe lhalo komunidade kontinua hakfodak, paniku no sidade Dili Bandidu maka nakonu tanba neé ita tenke asegura.

Instituisaun rua sei defende legalidade demkratiku no disiplina no lei neébe maka vigor rigrojamente tuir regras empenyamentu konjunta hodi garante trakulidade seguransa interna ho filosofia neutru no imparsial.

Serimonia asina Diretiva konjuntu neé hola parte mos husi Estrutura F-FDTL ho Estrutura PNTL. Media PNTL

 

 

 

Komandu PNTL halao Reuniaun ho Komandu F-FDTL no Lider Arte Marsiais no Rituais

IMGL8207

Dili-Komandu Polisia Nasional Timor-Leste (PNTL) halao Reuniaun ho Komandu F-FDTL no Lider Arte Marsiais no Arte Rituais sira atu fo solusaun ba problema ne’ebe maka akontese no reestabiiliza seguransa rai laran hodi asegura paz no hakmatek ba povu no nasaun

Komandante Komandu Operasaun Superintendente Xefe Polisia Pedro Belo hateten Reuniaun ne’ebe maka ohin realiza iha Kuartel Jeral bazeia ba Despasu Konjuntu No.01/MI-MD/IX/2022 orentasaun husi Primeiru Ministru Taur Matan Ruak nudar mos Ministru Interior liu husi Vice Ministru Antonio Armindo ne’ebe maka ohin organiza hodi reuniaun hamutuk ho Sekretariu Estadu Joventude no Desportu, Prezidente Komisaun Reguladora Arte Marsiais (KRAM), Xefe Estadu Major Jeneral F-FDTL, hamutuk ho Lider Arte Marsiais no Arte Rituais, Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili, kuarta (07/09).

Nia esplika Reuniaun ida ohin ho nia objetivu oinsa lider Arte Marsiais sira hamutuk no kontribui ba estabilidade nasional hodi nune’e servisu hamutuk ho Polisia no F-FDTL atu nune’e ita hotu fo garantia fila-fali ba komunidade katak hahu agora ba oin sei lamosutan problema.

Iha reuniaun ida ne’e hamosu solusaun ne’ebe maka mai husi Lider Arte Marsiais no Arte Rituais PSHT, Kera-Sakti, KORK no Arte Rituais 77 sira ne’ebe maka kompremitidu katak vitima sira ne’ebe maka hetan estragus ba sasan sira maka sei ajuda no kontaktu malu oinsa atu rekopera fila-fali sira nia sasan ne’ebe maka hetan estragus ne’e hanesan solusaun diak ba hotu-hotu atu nune’e buat hotu bele sai diak liutan.

Iha reuniaun ida ne’e mos husi Lider arte Marsiais sira iha komitmentu ida katak sei servisu makaas atu fo disiplina ba membru hotu-hotu arte marsiais atu bele kopera no kria estabilidade diak ba rai doben Timor-Leste.

Iha biban ne’e lider Arte marsiais sira kompremitidu atu servisu makaas hodi eduka sira nia membru sira atu kontribui ba paz no seguransa iha rai laran

“Apela ba membru husi Arte Marsiais No Arte Rituais hotu atu labele hatais farda no atributu hotu ne’ebe iha ligasaun ho organizasaun nian hodi halo movimentu iha fatin publiku hodi hamosu provokasaun, hamosu konflitu no instabilidade iha komunidade nia leet,” sira promete.

Iha okajiaun ne’e Lider Arte Marsiais PSHT Pedro Aparicio lori membru tomak nia naran husu diskulpa ba Komandu F-FDTL ho Komandante Komponente Naval sira tanba iha membru balu ne’ebe baku membru F-FDTL no membru sira ne’ebe komete krime tenke kopera ho autoridade seguransa atu entrega aan ba PNTL ou ba sede PSHT iha Timor Lodge nune’e husi estrutura maka sei lori ba aprezenta ba Polisia no lalika prekupa tanba hotu-hotu servisu tuir lei.

“Husu diskulpa mos ba Komunidade, Governu no Estadu tanba Ami nia membru sira dalaruma involve iha krime, maibe hahalok krime ne’e responsabilidade pessoal ida halo krime maka ba hatan maibe aktus ne’ebe maka sira hamosu prezuizu ba komunidade organizasaun PSHT prontu atu fo kompensasaun tanba ne’e husu ba komunidade sira ne’ebe maka afetadu husi komflitus ne’ebe maka akontese iha loron 05/09 favor ida hato’o keixa, reklama ou hato’o karta ba ami hafoin ami servisu hamutuk ho PNTL Servisu Investigasaun Kriminal atu halo investigasaun ba Danus hirak ne’e hodi fo kompensasaun ida ne’ebe justu,”dehan Aparicio.

Liu husi komferensia emprensa ne’e Lider Arte Marsiais no Arte Rituais sira hamosu lian ida deit oinsa atu kontrola membru sira no bolu atensaun ba sira nia membru sira atu hamutuk hametin unidade nudar timor oan hodi kontribui ba paz no estabilidade rai laran. Media PNTL

Kazu Suisidiu Iha Sela Detensaun, Komandu PNTL Foti Medida Kautelares Ba Membru Na’in Walu

IMGL5760

Dili, Relasiona ho kazu suisidiu ida ne’ebe maka akontese iha loron 01 fulan Setembru tinan 2022, iha sela detensaun Komandu PNTL munisipiu Dili maka Komandu Jerál foti medida Kautelares hodi fó suspensaun preventiva durante loron 60 ba membru PNTL munisipiu Dili na’in walu.

Porta Voz Komandu PNTL Superintendente Xefe Armando Monteiro liu husi konferensia imprensa segunda-feira (05/09) ne’e aktualiza kazu loron 01 fulan Setembru nian iha sela detensaun Komandu PNTL munisipiu Dili katak husi akontesimentu kazu ne’e iha oras 19h25 Komandante Komandu PNTL munisipiu Dili ho nia estrutura halo reuniaun ho Xefe Servisu Investigasaun Kriminal PNTL Superintendente Jorge Monteiro ho nia ekipa, Prokurador Distrital Dili Dr.Jacinto Babo, Defensor Públiku Dr.José Telo S. Cristovão, PDHJ, Sosiedade Sivil no reprezentante husi organizasaun PSHT Dr.Pedro Aparicio.

Rezultadu husi reuniaun ida ne’e, iha konkordansia presiza kria Ekipa Investigasaun Konjuntu External no Internal PNTL nian, ne’ebe maka hahu’u hala’o ona servisu iha data akontesimentu ne’e. Iha loron 02 fulan Setembru tinan 2022 iha oras 08h30 Servisu Investigasaun Kriminal PNTL halo pedidu Outopsia ba Ministeriu Públiku hodi hetan despasu Outopsia.

Basea ba reuniaun konkordansia iha Komandu PNTL munisipiu Dili atu garante Professional, Transparansia no Akuntabilidade maka iha oras 14h00 PSIC no médiku Patologia husi HNGV Dili maka halo Re-Konstrusaun Lokal do Krime. Iha loron 03 fulan Setembru 2022, oras 16h00 PSIC no médiku maka halo Outopsia ba vitima iha sala Mortuario HNGV Dili.

Iha loron 02 fulan Setembro 2022 Komandante Jerál PNTL hasai Despasu Urjenti ho Nu.365/CG-PNTL/IX/2022, nomeia Ofisial PNTL na’in hat (4) hodi halo Investigasaun Internal Urjenti ba kazu ne’e. Relatoriu Nu.Ref.322/GAB/Xefe/SIK/PNTL/IX/2022 ho asuntu relatoriu kazu deskonfia Suisidiu iha Sela Komandu PNTL munisipiu Dili. Despasu Nu.365/CG-PNTL/IX/2022 asuntu Nomeasaun ekipa Investigasaun Konjuntu ba Komandu PNTL munisipiu Dili ba Kazu Nuc.0186/22/DIDIL. Despasu Nu.119/2ºKJ-PNTL/IX/2022 asuntu Suspensaun Preventiva no Submete ba Prosesu Disiplinar no Kriminal.

“Ohin loron 05 fulan Setembro 2022, Komandu Jerál PNTL foti Medida Kautelares hodi fó Suspensaun Preventiva durante loron 60 ba membru Komandu PNTL munisipiu Dili na’in walu (8) kompostu husi ofisial na’in tolu (3), Sargentu na’in ida (1) no Ajente na’in hat (4) ne’ebe maka hala’o sira nia kna’ar durante kazu ne’e mosu hodi rezulta ita nia sidadaun ida ho identidade JB tinan 20 mate iha Sela Detensaun, hodi submete ba prosesu Investigasaun Disiplinar no Kriminal ninian”, esplika Porta Voz Komandu PNTL ne’e.

Tanba ne’e liu husi oportunidade ida ne’e lori Komandu Jerál PNTL nia naran husu nafatin ba sidadaun Timor oan hotu, labele monu ba Manobra individu  ou grupu balun ne’ebe maka lansa Propaganda oin-oin iha Media Sosial, hamutuk ita kria Paz, Unidade, Amizade, Promove ita nia identidade, Kultura hodi kontribui Estabilidade, Seguransa no Desenvolvimentu Nasional.

Atu informa katak agora dadaun ita nia ekipa PNTL ne’ebe maka lidera husi Xefe Departamentu Polisiamentu Komunitaria Nasional ho mós lori Komandu nia naran hato’o Sentidu Kondelênsia, hasoru familia matebian iha ninia residensia Audian.

Media PNTL.