Dili- Polisia Nasional Timor-Leste (PNTL) liu husi Sentru Formasaun Polisia asina Memorandum de Intendementu ho Institutu Politekniku Betanu (IPB) hodi fornese kursu Pedagojia ba dosente sira.
Segundu Komandante Jeral PNTL Komisariu Polisia Mateus Fernandes hateten Sentru Formasaun Polisia (CFP-sigla portuges) hanoin katak inportante teb-tebes persija halo interligadu ho universidade sira seluk para tau hamutuk hanoin para estuda hamutuk iha Training of Trainer (TOT) atu prepara instructor sira no treinador sira ne’ebe maka forte hodi nune’e prepara fo aprendijajen ba partisipante sira ne’ebe mai partisipa kursu, Nia hato’o asuntu ne’e iha serimonia asina MOU iha CFP Komoro Dili, tersa (26/04).
Komisariu ne’e haktuir liu husi MOU ne’e IPB servisu hamutuk ho CFP atu troka impresões, fahe esperensia ba malu oinsa prepara esprensia ba treinador ida hodi prepara ba formasaun iha futuru PNTL nian.
MOU ne’e bale ba tinan 5 hafoin sei hare no reve fila-fali, hafoin asina MOU ne’e iha futuru ita sei hare area espesifiku rua (2) ne’ebe maka IPB iha no ba future sira sei aumentatan area para depois kursu hirak ne’ebe maka relevante ho Polisia bele foti barak liutan tanba IPB mos iha kedas Same Betanu entaun PNTL iha Same mak bele tuir maibe iha ne’e mai dalaruma ami shearing deit manual sira ne’e depois troka hanoin no estuda hamutuk. Alende ne’e IPB mos sei fo bolsu estudu ba PNTL tuir area ne’ebe maka nesesariu ho sira nia servisu.
Iha okajiaun ne’e Magnifiku Prezidente IPB Dr.Acasio Cardoso Amaral hateten tuir akordu ne’ebe maka asina ohin iha area formasaun Pedagojia sertifikadu nivel IV tanba ne’e maka agora sei halo formasaun pedagojia ba sertifikadu nivel IV depois ba oin sei upgrade ba sertifikadu nivel V tuir rejime kareira universitariu ne’ebe ejiji tenke iha formasaun pedagojia sertifikadu nivel V.
Nia haktuirtan Dosente nain 30 resin maka sei partisipa iha kursu pedagojia ne’ebe maka CFP fornese.
IPB fornese kursu rua maka produsaun Animal no Konstrusaun Sivil no tinan-tinan sempre iha rejime espesial ba membru PNTL no F-FDTL sira bele aproveta ida ne’e hodi ba hasai kursu iha IPB no UNTL tanba universidade publiku permite simu membru PNTL no F-FDTL tuir area kursu ne’ebe maka iha.
Serimonia asina MOU ne’e partisipa husi Magnifiku Prezidente IPB ho nia estrutura, Segundu Komandante Jeral PNTL ho nia estrutura nomos Ofisiais, Sarjentu no Ajente sira. Media PNTL
