IMG_6000
Palásiu Presidensiál Nicolau Lobato, Díli, 21 abril 2022. Prezidente Repúblika, Francisco Guterres Lú Olo, apresia Polísia Nasionál Timor-Leste (PNTL) ba nia serbisu hodi garante seguransa durante periódu kampaña eleisaun ba Prezidente Repúblika ne’ebé la’o ho di’ak tebes.
Iha audiénsia ho Komandante Jerál PNTL, Komisáriu Faustino da Costa, Prezidente Republika hato’o ninia apresiasaun ba Polisia Nasional Timor Leste tomak ne’ebé garante situasaun hakmatek iha tempu periódu kampaña ninia hahú husi primeira volta to’o mai iha segunda volta.
Prezidente Repúblika husu PNTL mantein nafatin kadeia komandu instituisaun ne’ebé metin no kontinua fó seguransa ho di’ak liután ba ninia sidadaun hotu-hotu.
Durante kampaña, PNTL rejista kazu krime eleitorál hamutuk lima. seidauk inklui krime sira akontese hafoin 19 abril 2022 no halo koordenasaun parte Comissão Nacional de Eleições (CNE). Krime sira ne’e akontese iha munisípiu Viqueque, RAEOA no Ainaro. MÍDIA PR.