Dili, Komandu Polísia Nasional Timor-Leste (PNTL) liu husi Diresaun Justisa no Disiplina Nasional (DJD) Segunda-feira (12/08) ne’e realiza formasaun kona-ba Justisa no Disiplina ba Xefe Seksaun Justisa husi Komandu Munisipiu, Unidade tolu (UPM, UEP, UPF) no Centro Formação Polícia (CFP).
Iha ninia intrevensaun ba serimonia abertura formasaun refere ne’ebe hala’o iha Centro Formação Polícia (CFP) Comoro, Diretúr Justisa no Disiplina (DJD) Superintendente Xefe Polísia Justinho Menezes hateten informasaun balun katak hafoin simu kargu hanesan Diretúr Justisa no Disiplina (DJD) iha loron 17 fulan Agostu tinan 2023 liu ba, hafoin hare’e tiha kazu hirak ne’ebe iha hahu’u husi tinan 2015 to’o tinan 2023 kuaze 167 kazu pendente ona kuaze tinan lima liu ona.
“Hafoin hau halo jestaun hamutuk ho hau nia Komandante Sub Seksaun sira iha DJD, esforsu no konsege iha tinan 2023 hela deit 24 kazu maka ninia prosesu taka no arkivu, represaun eskrita no tuir mós kazu pendente iha Tribunal, iha mós Rekursu husi Ministru Interior hamutuk 21 kazu, iha tinan lima no ne’en liu ba sei pendente iha Ministeriu Interior”, haktuir Diretúr Justisa no Disiplina (DJD) ne’e.
Superintendente Xefe Polísia ne’e afirma tan katak iha tinan 2024 ita iha kazu hamutuk 90 hahu’u husi fulan Janeiru to’o fulan Jullu maka iha kazu prosesu disiplinar husi DJD la konta ho husi munisipiu no unidade sira. Maibé ita konsege halo hotu tiha 28 kazu iha pasadu nian inklui mós iha tinan ida ne’e kazu 90 ne’e ita halo hotu ona 65 kazu, ida maka Rekursu iha Ministeriu Interior, ida maka Desizaun Tribunal, hela deit ona 24 kazu. Iha fulan ida ne’e, ita finaliza mós kazu kuaze lima no ne’en ona, entaun signifika katak jestaun ne’ebe maka hau foti, iha Inovativu/Mudansa.
“Tanba dezafiu sira ne’e, maka hau detekta iha tinan kotuk ita halo ona enkontru/formasaun loron ida deit maibé iha tinan ida ne’e hau iha programa loron lima ba Komandante Seksaun no Investigasaun sira, loron lima ne’e loron rua imi sei hetan teoria liu-liu kona-ba Lei sira no iha loron tolu ne’e sei prátika, atu bele hare’e prosesu hahu’u inisiu to’o remata ne’e oinsa”, hatutan Superintendente Xefe Polísia ne’e.
Iha fatin hanesan Segundu Komandante Jerál PNTL Komisariu Polísia Pedro Belo iha ninia intervensaun ba abertura formasaun ne’e hateten formasaun ba iha Diresaun Justisa no Disiplina ita hare’e katak tinan ne’e ita hare’e númeru ladun aumenta, lolos ne’e iha parte Justisa no Disiplina ne’e kada tinan tenke iha formasaun bebeik, tanba Kapasitasaun ne’e importante tebes.
“Hanesan ohin Diretúr DJD konfirma kona-ba númeru kazu sira ne’ebe maka ita iha durante ne’e, ita hare’e ba númeru kuantidade kazu ne’ebe maka iha ita bele hare’e katak nia númeru ne’e sa’e ho razaun sira ne’ebe maka ohin Diretúr DJD hateten katak kazu iha munisipiu maka la hala’o prosesu depois haruka mai hotu iha DJD Nasional, ita hare’e tanba saida maka kazu sira ne’e la halo prosesu presiza hatene didiak ninia kauza ne’e saida los”, tenik Segundu Komandante Jerál PNTL ne’e.
Komisariu Polísia ne’e salienta tan katak ita mós tenke identifika didiak kualidade membru sira ne’ebe maka koloka iha seksaun Justisa ne’e atu nune’e labele prejudika wainhira atende kazu disiplinar ruma. Tanba ne’e ita tenke indentifika didiak kualidade membru sira nian, hafoin maka ita bele hare’e ba ninia kuantidade atu nune’e ita bele hala’o servisu ho profesionalizmu iha âmbitu atende kazu ruma.
“Wainhira ita identifika ona problema maka ita bele tau iha planu atu oinsa maka bele iha formasaun no kapasitasaun ba membru sira iha seksaun Justisa kada Komandu munisipiu no unidade nune’e iha tinan oin mai membru sira ne’e bele hetan ona formasaun hodi hasa’e sira nia koñesimentu iha area Justisa nian, tanba ne’e hau husu ba Xefe Seksaun Jutisa sira atu aproveita didiak loron lima formasaun ida ne’e nune’e wainhira fila ba ita nia munisipiu no unidade ita iha ona koñesimentu naton hodi atende kazu sira”, apela Komisariu Polísia ne’e.
Tuir planu formasaun ne’e sei lao durante loron lima hahu’u husi loron 12 to’o loron 16 fulan Agostu tinan 2024 no formasaun ne’e sei oferese husi Gabinete Jurídiku PNTL no ekipa DJD Nasional.
