Dili, 18 novembru 2020 (SRP) – Feminina husi Diresaun Jeral Servisu Migrasaun organiza atividade desportu iha ambitu komemorasaun loron feminina Migrasaun nian ba dala lima, ne’ebe hala’o iha resintu Ministeriu Interior Vila-Verde.
Vise-Ministru Interior António Armindo iha abertura seremonia ne’e, kongratula feminina migrasaun tomak ne’ebe organiza eventu ne’e.
“Primeira vez hau hau sente kontente orgullu bot rona Feminina Servisu Migrasaun halo pedidu ida mai hau atu realiza eventu ida, hodi halibur feto no mane husi instituisaun estadu no privadu sira. tanba ne’e hakarak kongratula sira no fo Parabens ba feminina Servisu Migrasaun sira ne’ebe servisu hamutuk hodi halibur feto maluk sira mai tuir kompetisaun ida ne’e”, hateten Vise António Armindo iha nia diskursu, kuarta ne’e.
Nia dehan, sei fo apoiu tomak ba kualker atividade ne’ebe liga ho aborda igualdade jenéru nian.
“Feminina Migrasaun nia programa ne’e mesmu kik maibe extraordinariu tebes tanba liga ho sensivel jeneru nian. Se ita koalia kona-ba “Gender”, konta ho hau nia apiou masimu ba ida ne’e. Nune’e hau mos fiar katak politika seluk maka mai mos sei kontinua nafatin”, nia hateten.
Antes remata VMI mos dezafia Prezidente feminina Migrasaun sira atu kontinua selebra kada tinan no servisu makas hodi halo seremonia ne’e bot liu tan hodi konvida instituisaun sira husi Bombeiros, Protesaun Sivil, F-FDTL, Parteira sira, Rede Feto inklui sosiedade sivil sira seluk tan.
Entertantu, Diretor Jeral Servisu Migrasaun, Superintendente Asistente Polisia, Luis Soares Barreto, hateten atividade ne’e envolve instituisaun relevante sira no insitutuisaun privada ida.
“Ohin ita hala’o jogu dada tali ba dahuluk hodi komemora aniversariu feminina migrasaun nian ba dala 5, ne’ebe envolve instituisaun relevante sira husi Komando Jeral, Komando Munisipiu Dili, DNSPP (Diresaun Nasional Seguransa patrimoniu Estadu), Migrasaun rasik no-mos ajensia operador telekomunikasaun husi Telcomcel, maibe ba oin ita sei tau osan halo diak liutan ida ne’e”, nia haktuir.
Luis hateten, atividade seluk ne’ebe sei kontinua maka hanesan, seminariu nasional, sertame (kadi kakutak), Zumba, hafoin remata ho misa agradesementu ba iha loron Aniversariu ne’ebe sei monu iha 21 novembru 2020.
