Dili, Australia Federal Police (AFP) liu husi Timor-Leste Police Development Program (TLPDP) kontinua apoiu Komandu Polísia Nasional Timor-Leste (PNTL) iha area Terorizmu no area Kooperasaun Polisial. Akordu rua ne’e asina direita husi Komandante Jeral PNTL Komisariu Jerál Polísia Henrique da Costa ho Deputy AFP Lisa Gale iha tersa-feira (26/03) ne’e no asiste direitamente husi Ministru Interior, Sekretariu Estadu Protesaun Sivil, Segundu Komandante Jerál no Komandante Komandu Supervizaun sira PNTL nian.
Ministru Interior Francisco Guterres ba jornalista sira hafoin asiste asina akordu ne’ebe hala’o iha Salaun Ministeriu Interior hateten ohin ami asiste asinatura akordu tékniku rua entre Polísia Australia ho Polísia Timor-Leste.
“Akordu rua ne’e importante tebes tanba Kooperasaun ida entre Polísia Australia ho Polísia Timor-Leste liu husi TLPDP katak ne’e programa ba Polísia ninian, akordu ne’e Australia fó apoiu barak ona, hau hakarak agradese ba Australia liu-liu AFP tanba sira mós apoiu rehabilitasaun Centro Formasaun Polísia (CFP)”, informa Ministru Interior ne’e.
Membru Governu ne’e salienta tan katak sira mós fó treinamentu ba membru PNTL sira ba iha nasaun Indonesia (Malang), Nova Zelandia, Australia rasik, agora dadaun ita fokus kooperasaun ne’e ba area formasaun lideransa ninian, area Investigasaun Kriminal no area tékniku sira ne’ebe maka balun presiza sira nia tulun atu bele eleva polísia nia kapasidade atu bele hala’o servisu ho professional liu.
“Akordu ida ne’e atu mai formaliza deit no hametin liu tan kooperasaun ne’ebe maka lao tiha ona durante tinan ruanulu resin, iha tinan barak nia laran sira nafatin tulun ita, tanba ne’e ita simu atu bele avansa oituan, ajuda nafatin ita nia polísia lao ba oin”, hatutan Membru Governu ne’e.
Nia haktuir tan katak kooperasaun atu fó formasaun iha area Terorizmu ba membru PNTL atu bele halo preparasaun hodi antisipa mosu terorizmu iha ita nia rai, formasaun ne’e diak hodi halo prevensaun. No atu eleva kapasidade ita nia membru PNTL sira atu bele atinzi hodi kombate krime organizadu sira mai iha ita nia rai. Akordu ne’e rasik ho durasaun tinan tolu hafoin ida ne’e ita revê fila fali hodi bele lao nafatin ba oin.
Iha fatin hanesan Deputy AFP Lisa Gale hateten hau nia prezensa iha Timor-Leste ba semana ida ne’e ho objetivu primeiru maka atu re-inforsa relasaun amizade entre Timor-Leste ho Australia no entre AFP ho PNTL liu husi akordu rua ne’ebe maka ohin ita selebra iha Ministeriu Interior hanesan provas ida hodi hatudu katak Kooperasaun entre rai rua forte tebes.
“Ida ohin hamutuk ho Komisariu Jerál Polísia Henrique da Costa, ita fortelese no formaliza akordu kooperasaun entre Polisia Federal Australia ho Timor-Leste iha area Terorizmu, segundu akordu selebra entre Polisia Federal Australia ho PNTL liu-liu iha area kooperasaun polisial ne’ebe maka foka ba treinamentu, foka mós ba area sira seluk ne’ebe maka nia objetivu atu fortalese no hasa’e kapasidade PNTL ninian”, afirma Deputy AFP ne’e.
Lisa Gale subliña tan katak iha nivel diplomasia entre Polísia ho Polísia bele hare’e katak relasaun ne’ebe maka forte no diak tebes entre Polísia Federal ho Timor-Leste liu ona tinan ruanulu, entaun ida ne’e dala ida tan hodi hatudu katak fortalesimentu kooperasaun ne’e, hatudu katak instituisaun rua ho países (nasaun) rua kontinua haburas no hametin kooperasaun bilateral. Razaun hau nia prezensa iha ne’e maka atu fortalese kooperasaun entre Polísia rua no entre nasaun rua.
“Importante tebes liu-liu iha akordu kooperasaun iha kombate terorizmu tanba ida ne’e importante tebes atu oinsa ita fortalese no hametin ita nia fronteira husi ameasa trans-nasional crime sira”, hakotu Deputy AFP ne’e.
Media PNTL.
