Dili, 26 marsu 2021 (SRP)-Hafoin simu orientasaun servisu husi Komandu Jeral PNTL, polisia tranzitu nasional hamutuk ho tranzitu Munisipiu Dili, kinta kalan ne’e halo operasaun pasa revista ba viaturas ne’ebe halo movimentu iha tempu kalan hodi asegura regra Serka Sanitaria iha kapital Dili, ne’ebe Guvernu dekreta ona relasiona ho moras surtu Covid-19 ne’ebe oras ne’e daet ona ba komunidade lokal.
Tuir Komandante Polísia Tranzitu Nasionál Superintendente Polísia João Belo, katak atividade ne’e halo hodi desinfekta veikulu sira inklui asegura regra Serka Sanitaria iha kapital Dili.
“Ida ne’e operasaun konjunta entre tranzitu nasional ho tranzitu Munisipiu Dili ho atividade rua maka hanesan, ami halo operasaun hijiene hodi desinfekta ba veikulu sira ne’ebe halo movimentu iha estrada publiku no atividade seluk maka ami ezekuta regra Serka Sanitaria hodi identifika transporte sira ne’ebe maka ba mai laiha dokumentu pesoal no dokumentu transporte nian”, dehan João Belo ba SRP iha Caicoli, kinta kalan ne’e.
Komandante ne’e afirma, motorista sira wainhira lori kareta no motor sai ba estrada publiku tenke iha atensaun lori dokumentu transporte no karta kondusaun hodi labele impede sira nia movimentu.
“Hau hakarak informa mos ba publiku atu bele hatene katak, iha dadus asidente trafegu husi fulan fevereiru nian mai ne’e hamutuk ona 130 no iha pursentu 60 maka laiha karta kondusaun. Nune’e ita atu hateten katak, asidente ne’ebe akontese maioria kauza husi ema sira ne’ebe maka karta kondusaun laiha. Tanba ne’e maka komandu desidi operasaun pasa revista ne’e kontinua lao hodi identifika motorista sira ne’ebe maka uza transporte tenke iha karta kondusaun”, nia esplika.
Joaõ Belo fo hanoin fali katak operasaun ne’e sei kontinua nafatin hodi asegura regra serka sanitaria nian no nia husu atu limita movimentu ne’ebe laiha nesesariu iha kapital Dili laran.
“Husi pasa revista ida ohin ne’e, ita halo aprensaun ba motorizada privadu hamutuk 21 no kareta privadu iha tolu. Maioria infrator sira ne’e laiha dokumentu pesoal no dokumentu viaturas nian. Nune’e ita halo ona prosesu hodi aplika multa no sira ne’ebe simu ona nota infrasaun sei ba selu koima iha banku BNCTL hafoin lori billete ne’e mai tranzitu nasional hanesan evidensia hodi bele mai foti fali sira nia motor no kareta hirak ne’e”, katak nia.
Iha biban ne’e, polisia tranzitu hetan apoiu husi Comando Oficial Ligação Forca Tarefas (COLFT) husi Sentru Integradu Jestaun Krize ne’ebe lidera husi Inspetor Xefi Polisia, Luis Amaral ho ekipa ne’ebe halo hela patrulla, hodi tula infrator sira ba ida-idak nia uma.
