Dili, Komandu Polísia Nasional Timor-Leste (PNTL) hanesan instituisaun Seguransa ida ne’ebe hala’o nafatin nia misaun hodi garante seguransa ba ema hotu liu-liu iha momentu ne’ebe maka Timor-Leste hasoru ba oras ne’e dadaun aplika hela Serka Sanitaria (SS) hodi prevene transmisaun moras surtu COVID-19.
Komandante Jerál PNTL Komisariu Polísia Faustino da Costa hateten maske Timor-Leste hasoru hela SS maibé PNTL kontinua hala’o nia misaun ho responsabilidade hamutuk ho parte relevante hanesan Forsa Defesa hodi garante seguransa ba ema hotu.
“Situasaun seguransa iha nivel teritoriu nasional Timor-Leste laran tomak oras ne’e dadaun lao ho diak, kalma no hakmatek liga ba iha akontesimentu ka konfrontu balun ne’ebe mosu iha kapital Dili maibé la implika ida ne’e to’o iha munisipiu sira, la daet to’o iha munisipiu; ba asuntu parte fronteira ninian maka los duni desde Estadu Emergensia (EE) hahu’u liu-liu to’o iha momentu aplika SS ba munisipiu rua hanesan Bobonaro no Covalima, parte seguransa nafatin hala’o nia kna’ar ho responsabilidade no hamutuk ho parte relevante hanesan Forsa Defesa, lider komunitaria no mós entidade, autoridade munisipal sira”, tenik Komandante Jerál PNTL ne’e.
Autoridade másimu seguransa ne’e afirma tan katak iha semana ne’e nia laran sei nafatin halo kapturasaun ba sidadaun Timor oan ne’ebe tenta nafatin halo atividade élezitus ka ilegal sira iha fronteira hanesan haku’ur fronteira ilegalmente hodi kompras sasan nesesidades básika, prosesu ba ema sira ne’e hotu, hanesan ita hotu hatene iha EE asaun primeiru ba ema sira e’e maka ita enkamiña ba ekipa COVID-19 ninian, lori ba kuarantena ba sidadaun Timor oan hafoin loron 14 bainhira rezultadu hatudu katak sira laiha efeitus ka laiha positivu moras COVID-19 maka sira ne’e imediatu kontinua fila fali prosesu investigasaun iha Komandu munisipal sira.
“To’o oras ne’e dadaun hafoin governo deside ona hodi hapara SS ne’ebe halo iha Covalima tantu mós iha Fatumea temporariamente seidauk rezistu kazu ruma hanesan kapturasun ilegal iha area fronteira iha Covalima ninian”, afirma autoridade másimu seguransa ne’e.
Komisariu Polísia akresenta tan katak SS ba iha kapital Dili katak ne’e nu’udar kontinuasaun husi SS dahuluk ne’ebe hahu’u iha loron 9 to’o 15 fulan Marsu, tuir Rezolusaun Governu ne’ebe fó sai tantu mós Rezolusaun governu nian Nu.16 no 17 hakarak atu hare’e katak ne’e iha situasaun rua hafoin kontinuasaun mantein SS iha Dili maka Rezolusaun Nu.16 maibé mós iha Rezolusaun ida koalia própriu kona-ba Konfinamentu Domesiliáriu, agora iha Rezolusaun rua ne’e nafatin mós atribui responsabilidade ida ba autoridade seguransa atu halo fiskalizasaun ba aktividade hotu-hotu liu-liu ba SS no Konfinamentu Domesiliáriu ida ne’e.
“Los duni katak ita hotu hatene no akompaña desde loron 9 fulan Marsu mai to’o loron 25 fulan Marsu maka Komandu PNTL liu-liu Komandu munisipal Dili halo nia kna’ar ida ne’e laos mesak maibé ho entidade relevantes inklui mós Konsellu Polisiamentu Komunitária (KPK) ne’ebe instala ona iha munisipiu Dili no mós munisipiu sira seluk, husi servisu hamutuk ida ne’e maka Komandu PNTL munisipiu Dili ho Unidades Espesial Polisia (UEP) hamutuk ho Unidades sira PNTL nian ne’ebe destaka iha Komandu PNTL munisipiu Dili hodi asegura SS ida ne’e maka ita halo kapturasaun ba sidadaun hamutuk ema na’in 310”, esplika Komandante Jerál PNTL ne’e.
Media PNTL.
