Uncategorized

Dili- Departamentu Polisia Komunitaria halo konsultasaun ba Esbozu Norma Organizasaun no Prosedimentu (NOP) ba Komandante PNTL munisipiu 13 hodi bele halo diskusaun no hamosu ideias ruma hodi hadia diak liutan esbozu ne’e .

Xefe Departamentu Polisia Komunitaria Superintendente Asistente Antonio da Luz hateten Konsultasaun ne’e atu halibur ideias husi Komandante munisipiu 13 no partisipante sira atu dezenvolve NOP ne’e sai diak liutan, Nia hato’o asuntu iha Hotel Ramelau Aimutin Dili (23/11).

Komandante da Luz haktuirtan katak NOP ne’e sai hanesan mata dalan ba Ofisial Polisia Suku (OPS), Konselu Polisiamentu Komunitaria (KPK) no Konselu Siguransa Munisipiu (KSM) atu bele inplementa iha servisu loro-loro nian iha terrenu bazeia ba ho mata dalan ne’ebe maka iha atu halo servisu tuir orientasaun servisu ne’ebe maka iha.

NOP hakerek kona-ba inplementasaun servisu Polisia Komunitaria liu-liu OPS atu nune’e bele kompriende didiak saida maka sira atu halo iha terenu no foti desijaun ruma nomos servisu hamutuk ho KPK ne’ebe estabelese ona atu rezolve problema ne’ebe maka komunidade sira enfrenta.

“ Durante ne’e ita utiliza deit manual ne’ebe maka uluk parseru ho departamentu Polisia Komunitaria dezenvolve maibe ita hanoin katak manual ne’e ladun forte tanba ne’e ita transforma manual ne’e sai hanesan lei oan ida liu husi NOP atu bele regula servisu OPS, KPK no KSM hodi nune’e bele foti desijaun balu relebante ho problema hirak ne’ebe akontese iha Komunidade nia leet,” Komandante ne’e esplika..

Hafoin Konsultasaun iha fulan Dezembru 2016 ami sei halo revizaun hafoin bolu fila-fali Komandante munisipiu sira nomos partisipante sira ne’ebe partisipa iha konsultasaun ne’e hodi bele hare fila-fali opiniaun sira ne’ebe partisipante sira fo hodi bele dezenvolve diak liu NOP ida ne’e, no wainhira remata maka husu aprovasaun husi Komandante Jeral hodi halo impelementasaun iha terrenu.

Konsultasaun ba Esbozu NOP ne’e diriji husi Segudu Komandante Jeral PNTL Komisariu Polisia Faustino da Costa akompaña husi Komandante Komandu Administrasaun Superintendente Xefe Mateus Fernandes, Komandante Komandu Operasaun Superintendente Xefe Henrique da Costa, Reprezentante Embaixada Nova Zelandia no Xefe Fundasaun Azia no partisipa husi Eis Segundu Komandante Jeral Komisariu Afonso de Jesus, Komandante PNTL munisipiu 13, Adjuntu Diretor Fundasaun Mahein, reprezentante JICA, Polisia Nova Zelandia no konvidadus sira. Media PNTL

Dili- Polisia Nasional Timor-Leste (PNTL) propoin ba Ministru Interior atu halo revizaun ba regulamentu disiplinar PNTL nune’e bele fo kompetensia ba Konselu Superior atu foti desijaun ba membru ne’ebe halo infrasaun.

Segundu Komandante Jeral PNTL Komisariu Polisia Faustino da Costa hateten Komandu PNTL prekupa Regulamentu Disiplinar PNTL nian tanba ne’e ami prepara proposta esbosu foun atu aprezenta ba Ministru Interior atu bele hetan ideias no alterasaun balu antes lori kontinuasaun prosesu para iha apresiasaun no alterasaun, Nia hato’o asuntu ne’e ba jornalista sira iha Kuartel Jeral PNTL Kaikoli Dili (21/11).

Komisariu Faustino haktuirtan katak regulamentu disiplinar PNTL iha frakeja balu maske lei organika hateten PNTL nia formasaun no disiplina identiku militar maibe prosesu infrasaun ba membru sira ne’ebe halo infrasaun krime no disiplinar ne’e kompletamente halo prosesu sivil.

“PNTL nia regulamentu disiplinar hateten katak wainhira membru ruma komete infrasaun krime no sivil maka sei halo prosesu sivil katak se ita hatene momos katak ema ne’e sala maibe konsidera nafatin Presumsaun Inosente (praduga tak bersalah) tanba ne’e maske ema ne’e sala tenke liu husi prosesu ida liu-liu ba kazu krime maske membru ne’e sala maibe Konselu Superior so bele rekomenda ba prosesu ba Demisaun bainhira julgamentu iha ona Sentensa Tribunal kondena tinan 3 ou liu tama prizaun”. Segundu Komandante Jeral esplika.

Wainhira Tribunal kondena minimu tinan tolu prizaun maka Konselu Superior PNTL propoin ba demisaun, se ministeriu tutela aseta maibe pesoal ne’e rasik sente la satisfas nia bele halo rekursu ba Tribunal Distrital no Tribunal desidi katak mantein desijaun ne’ebe Komandu no governu foti no ema ne’e rasik la satisfas ho desijaun ne’e maka nia rasik halo Rekursu Kontesiozus ba Tribunal Rekursu.

Durante prosesu ne’e lao maka sansaun no despaisu sira ne’ebe aplika antes anula hotu no labele lao signifika membru ne’e hatais farda no halao servisu bai-bain hodi hein desizaun ba rekursu ne’ebe maka nia halo.

Relasiona ho kazu balu ne’ebe maka tuir lolos halo suspensaun ou demisaun ba membru ne’e maibe kontinua halao servisu nafatin tanba ne’e dalabarak publiku kestiona no hau responde katak lei maka fo dalan tanba ne’e maka kazu balu iha 2008 to’o 2016 membru sira servisu nafatin tanba lei maka autorija. Media PNTL

Dili- Komandu PNTL munisipiu Dili kaptura negosiante nain hat (4) ne’ebe maka faan fugetes (paixon) tamba governu bandu atu negosiante sira faan paixon antes loron natal.

Segundu Komandante Jeral PNTL Komisariu Polisia Faustino da Costa hateten iha semana liu ba Komandu Munisipiu Dili konsege halo kapturasaun ba ema nain 4 ne’ebe faan fugetes sira nain 4 ne’ebe kaptura prosesu iha munisipiu Dili lao hela no foti ona fugetes balu iha Komandu municipal Dili, Nia hato’o asuntu ne’e ba jornalista sira iha Kuartel jeral PNTL Kaikoli Dili (21/11).

Komisariu Faustino haktuirtan katak fugetes iha loza sira ita foti hotu ona no prosesu lao maibe sira ne’ebe agora daudaun faan ba labarik sira iha dalan uza sistema mobile ho motorizada katak sira ho motor ba iha bairu balun no hare labarik e depois sira para iha neba no faan fugetes tanba ne’e maka PNTL tenta buka nafatin autor sira ne’e.

“ Negosiante sira ne’e uza modus operandi agora la hanesan saida maka sira halo iha pasadu, sira nain hat ne’ebe kaptura sira nia deklarasaun maka ne’e ema sira faan fugetes agora ne’e la faan permanente iha loza ou fatin balun”.

Operasaun ba fugetes ka paixon bazeia ba diretiva ida ne’ebe maka hasai ona iha tinan 2015 ne’ebe maka orenta operasaun ba fugetes tanba fulan Novembru fugetes komesa tarutu iha bairu balun iha Dili laran tanba ne’e Komandu fo ona orentasaun ba Komandu munisipiu inklui Unidade Patrulamentu Fronteira (UPF) sira atu asegura. Media PNTL

Lautem, atu fasilita servisu membrus Polísia Nasional Timor Leste (PNTL) iha munisipiu, Komandante Jerál PNTL inagura tan edifisiu foun Kuartél Jerál iha munisipiu Lautem ne’ebe ninia obra konstrusaun halo durante tinan ha’at.

Komandante Jerál PNTL Komisariu Julio da Costa Hornay ne’ebe ofisialmente inagura edifisiu ne’e apela ba Komandu munisipiu hamutuk ho membrus sira atu iha responsabilidade no obrigasaun hodi kuida edifisiu ne’e hanesan uma rasik.

“Ohin ita asiste serimonia ida ne’ebe importante ba munisipiu Lautem, edifisiu foun depois tinan sanulu-resin-neen (16) ita uja edifisu tuan Polísia Indonesia husik hela mai, ohin ita komesa uja edifisiu foun ne’ebe nia kustu husi orsamentu povu Timor nian rasik hodi hari’i”, tenik Komandante Jerál PNTL iha ninia diskursu.

Komisariu Julio da Costa Hornay akresenta tan katak Importante ba Komandu maka buat ida ne’ebe iha, ita bele utiliza ho diak, ho sentimentu ida hanesan ita nia rasik, tanba dala ruma ita bele halo konstrusaun kuartél ida ne’ebe furak maibé kuandu laiha sentimentu kuida hanesan sasan rasik, tinan ida to’o rua bele att fila fali.

Entertantu, Komandante PNTL munisipiu Lautem Superintendente Marcos Sequeira hateten Komandu Munisipiu la hein apoio husi Kompañia maibé tanba konstrusaun ne’e hanesan ezizensia ida atu bele fasilita membrus sira nia servisu loron-loron no edifisiu tuan ne’e bele utiliza ba interese seluk.

Serimonia inagurasaun ne’ebe ho tema “Hamutuk Lautem Forsa No Forsa Hamutuk Lautem Bele”, taka ho hala’o mini expozisaun ida ne’ebe maka Komandu PNTL Munisipiu Lautem prepara hanesan fotogradia no video aktividade hotu husi Komandu PNTL munisipiu Lautem nian.

Preparasaun Seguransa ba Komemorasaun 28 Novembro

Relasiona ho aktividade komemorasaun loron Proklamasaun Independensia 28 Novembro ba tinan ne’e ne’ebe sei hala’o iha munisipiu Lautem, Komandante Jerál PNTL sei garante seguransa ba aktividade expozisaun no serimonia insar bandeira iha loron 28 Novembro.

“Ne’e dever ida ba PNTL atu asegura seguransa serimionia 28 Novembro nian sai diak tanba ne’e membrus PNTL Komandu munisipiu Lautem tenke sente orgullu no dignu katak governu deside hodi selebra serimonia loron historiku nian iha munisipiu Lautem”, tenik Komisariu Julio da Costa Hornay ba jornalista sira hafoin serimonia.

Ne’e duni, Komandu PNTL apela ba membrus hotu iha munisipiu Lautem hanesan uma na’in ne’e tenke prepara ann hodi kontrola estabilidade no paz atu serimonia ne’e bele lao ho diak hodi komunidade sira mós bele partisipa ho kontenti.

Partisipa iha serimonia inagurasaun ne’e Komandante Komponente Apoio Servisu (KAS-F-FDTL) Tanente Coronel Punu Fanu, Komandante PNTL munisipiu sira, administrador munisipiu Lautem no komunidade sira.

Media PNTL.

Dili- Ekipa Polisia Nasional Timor-Leste (PNTL) munisipiu Dili sai vensedor ba kompetisaun nasional poco -poco ba dala III ne’ebe maka organiza husi Ministeriu Saude.

Ekipa PNTL munisipiu Dili sai vensedor Primeiru Lugar (juara I) hodi halakon ekipa 14 ne’ebe maka partisipa iha kompetisaun poco-poco ne’ebe maka halao iha loron 18 to’o 20 Novembru 2016 no organiza husi Ministeriu Saude.

Entertantu Ekipa Ministeriu Interior okupa Segundu Lugar (Juara II) no ekipa PNTL Kuartel Jeral okupa Terseru Lugar (Juara III); no Ekipa Feto Atauro okupa kuatru Lugar (harapan I) Taxa ba Vensedor sira maka hanesan osan no taxa (Piala).

Segundu Komandante Jeral PNTL Komisariu Polisia Faustino da Costa iha nia intervensaun hateten liu husi kompetisaun ida ne’e partisipante sira tenta atu esplora no hatudu servisu ekipa no espiritu de korpu ne’e inportante.

Komisariu ne’e haktuirtan katak kompetisaun ne’e inportante ba saude korasaun ne’ebe diak maka ita tenta manan material balu hanesan osan no taxa ne’ebe maka komisaun organizadora prepara hafoin ida ne’e ita buka atu manantan konfiansa katak ami nia ekipa maka mais mellor no ema selukmos rekuinese ida ne’e.

“Kompetisaun ne’ebe halao iha Kuartel Jeral ne’e hola parte hanesan atividade Polisiamentu Komunitariunune’e Komunidade mos bele vizita Kuartel Jeral PNTL atu sira bele hatene katak fatin ne’e laos ba Polisia deit maibe ne’e oportunidade ida ba sira hodi hatene katak Polisia nia edifisiu ne’e hanesan ne’e no bele halo atividade hamutuk ho komunidade”.

Kompetisaun Nasional Poco-Poco ne’e halao durante loron tolu 18-20 Novembru 2016, loron primeiru partisipa husi ekipa hamutuk 6 no loron da ruak partisipa husi ekipa 8, hodi hatudu katak servisu ekipa no espiritu de korpu ne’e inportante liu.

Kompetisaun poco-poco ba dala 3 ne’e partisipa husi ekipa 14 husi Ministeriu Interior, PNTL (ekipa rua), Ministeriu Saude, Ministeriu Agrikultura no Peskas (MAP), Cruz vermelha Timor-Leste (CVTL), Ministeriu Obras Publika (ekipa rua),Hospital Nasional Guido Valadares(HNGV) no Feto Atauro. Media PNTL

Dili, Komando Polísia Nasional Timor Leste (PNTL) liu husi departamentu Polisiamentu Komunitaria realiza enkontru annual ho parseiru desenvolvimentu sira hanesan The Asia Foundation (TAF), BELUN, UNDP no Fundasaun Mahein (FM) ne’ebe maka durante ne’e fó apoio ba iha Community Policing Program Management Committee (PMC) atu hare’e progresu servisu durante tinan 2016.

Komandante Jerál PNTL Komisairu Julio da Costa Hornay ne’ebe halo abertura iha Enkontru PMC ne’e hateten Komandu apresia ho apoio parseiru sira nia mai iha PNTL ne’ebe iha avansu bo’ot liu-liu ba iha departamentu Polisiamentu Komunitaria tanba hetan konfiansa másimu husi komunidade.

“Husi apoio hirak ne’ebe maka parseiru sira fó, progresu sira ne’e maka hanesan kolokasaun Ofisial Polísia Suku (OPS), Konsellu Polisiamentu Komunitariu (KPK), Konsellu Seguransa Munisipiu (KSM) nia apoio servisu iha prevensaun konflitu iha nivel aldeia, suku to’o mai iha nivel nasional”, tenik Komandante Jerál PNTL.

Komisairu Julio da Costa Hornay subliña liu tan katak antuziasmo PNTL nian ba programa parseiru sira nian maka Komandu Jerál kolaka ona OPS hamutuk 442 iha Suku, apoio motorizada atu fó suporta sira nia servisu, laptop 442 prepara atu fahe no tuir planu sei kompleta tan maka radiu komunikasaun no fatin ba membru sira atu servisu.

“Husi resultadu hirak ne’e laos mai mesak husi PNTL maibé hamutuk ho parseiru sira ita desenvolve aktividade polísia komunitaria nian no ita mós espera katak iha tinan rua oin mai nesesidades importante balun ne’ebe maka tau iha Planu Estratéjiku Desenvolvimentu Nasional (PEDN) departamentu Polisia Komunitaria sei hare’e atu bele hetan apoio ruma husi parseiru sira”, hateten Komisairu Julio da Costa Hornay.

Iha fatin hanesan, Xefe Departamentu Polisiamentu Komuntariu Superintendente Asistente António da Luz hateten objetivu husi annual metting ne’e, halo atu hare’e progresu servisu polísia komunitariu nian durante ne’e.

“Objetivu husi enkontru ne’e mak Komandu PNTL liu husi departamentu polísia komunitariu hamutuk ho parseiru sira organiza atu bele hare’e kona-ba progresu servisu polísia komunitariu nian hamutuk ho parseiru sira trasa ona iha planu annual ninian ne’ebe maka hetan aprovasaun husi Komandante Jerál atu implementa iha tinan 2016”, subliña Xefe Departamentu Polisiamentu Komuntariu.

Superintendente Asistente António da Luz akresenta liu tan katak resultadu husi aktividade hirak ne’ebe maka hala’o ona iha tinan 2016 apresenta iha enkontru ne’e atu bele hetan apresiasaun, sujestaun balun husi komandu no parseiru sira atu bele hare’e kontinuasaun ba iha programa polísia komunitaria nia iha tinan 2017.

Media PNTL.

Dili- Komandu PNTL husu ba komunidade suku Kaikoli uma kain 11 ne’ebe maka afetadu ba futuru konstrusaun edifisiu Kuartel Jeral atu kopera ho governu nune’e bele aselera prosesu hari edifisiu foun.

Komandante Komandu Administrasaun Superintendente Xefe Mateus Fernandes hateten komunidade tenke kopera atu nune’e dezenvolvimentu konstrusaun ne’e bele lao tanba governu preve ona orsamentu atu halo konstrusaun ne’e iha tinan 2017, Nia hato’o asuntu ne’e liu husi komferensia emprensa hamutuk ho Diresaun Terras Propriedade iha Kuartel Jeral PNTL Kikoli Dili Sexta (11/11).

Nia haktuirtan katak husu ba uma kain 11 ne’ebe maka seidauk kopera governu la taka dalan ba imi atu rezista se lalais liu entaun diak liu tanba ami fo ona prazu loron tanba kuandu hein kleur liu maka orsamentu bele fila fali ba kaixa estadu.

Iha okajiaun ne’e Diretor Interinu Diresaun Nasional Terras Propriedade Servisu Cadastral (DNTPSC) Gabriel C de Araujo hateten Komunidade afetadu uma kain 21 ne’e uma kain 7 maka kopera hodi asina kontratu indimizasaun ba uma no ai horis ami finalize ona no lori dokumentu mai entrega iha komandu Jeral PNTL, no uma kain 11 seidauk koopera.

Nia haktuirtan katak DNTPSC halo ona faze prosesu orsamentu ba finansas hafoin sira nia orsamentu tama iha sira nia konta bankaria maka ekipa sei fo notifikasaun no husu sira hamamuk fatin bazeia ba kontratu ne’ebe maka iha, no sira ne’ebe ba kopera sei halo despezu administrativu.

Total orsamentu ne’ebe maka aprova ba komunidade afetadu hamutuk $362.147,21, orsamentu ba kada familia depende ba avalisaun ne’ebe maka ekipa Ministeriu Obras Publika halo no ba komunidade sira ne’ebe halo reklamasaun bele hato’o ba Tribunal no parte governu hare atu rezolve.

Indimizasaun sei refere ba uma no ai horis kona ba rai sei tuir mai tanba lei rai sei iha prosesu diskusaun iha Parlamentu Nasional wainhira lei ne’e aprovadu no promulga maka sei regulariza tuir lei ne’e.

Dialogu no enkontru aproximasaun ho komunidade afetadu halao husi ekipa interministerial ne’ebe maka kompostu husi Ministeriu Justisa (DNTPSC), Ministeriu Obras Publika, Ministeriu Agrikultura no PNTL hanesan nain ba projetu hahu halo prosesu ne’e desde tinan 2014 to’o agora no ekipa konsege rekola uma kain 20 hamutuk hamutuk komunidade 18 maka hela iha neba no ita halo prosesu to’o ohin loron iha komunidade nain 7 maka kopera ho governu liu husi akta-akta enkontru no rejolusaun ne’ebe maka hasai husi governu iha loron 5 outubru tinan 2016. Media PNTL

Dili, hahu’u husi inisiu tinan 2016 to’o iha fulan Outubru, Polísia Nasional Timor Leste (PNTL) rejista ona asidente tráfiku hamutuk 1.540, kanek kma’an hamutuk 1.274, kanek todan hamutuk 312 no ema hamutuk na’in 56 maka mate.

Komandante Jerál PNTL Komisariu Julio da Costa Hornay iha segunda ne’e (14/11) hateten kauza husi asidente hirak ne’e maioria tanba fatór umanu no fatór estrada.

“Kauza husi asidente hirak ne’e maka fatór umanu, fatór estrada no mós la kumpri regras tránzitu ne’ebe maka ita nia lei kódigu estrada kria tiha ona ba ita nia rai ida ne’e”, tenik Komandante Jerál PNTL ba jornalista sira iha nia kna’ar fatin.

Komisariu Julio da Costa Hornay apela ba kondutor sira ne’ebe maka lori karreta no motor atu bele kumpre regras tránzitu ne’ebe maka iha, no lori karreta labele ho kondisaun lanu tanba vida pasajeiru sira nia iha kondutor nia liman.

“Ne’e duni husu ba maluk Timoroan sira hotu atu toma atensaun hodi ita bele reduz númeru asidente no reduz vida Timoroan sira nia ne’ebe lakon iha estrada”, salienta Komisariu Julio da Costa Hornay.

Seguransa Eleisaun Suku, Primeiru no Segundu Ronde Kontroladu

Relasiona ho aktividade Eleisaun Suku ne’ebe hala’o iha teritoriu Timor laran tomak, hahu’u husi primeiru no segundu ronda, PNTL konsege asegura ho diak no kontroladu.

Komandante Jerál PNTL ne’e ba jornalista sira hateten durante eleisaun suku hala’o, insidente hamutuk 10 maka akontese maibé PNTL konsege asegura seguransa ho diak.

“Durante prosesu eleisaun ne’e lao iha munisipiu 13, em jerál lao ho diak, kontroladu maske akontese insidente balun husi joven sira ne’ebe maka provoka situasaun iha sentru votasaun maibé PNTL konsege hakalma, joven balun maka konsege lori mai iha sela detensaun nune’e mós seguransa eleisaun suku ba segunda ronde nian lao ho diak to’o mai agora iha ne’ebe balun sei iha prosesu apuramentu nia laran”, esplika Komandante Jerál PNTL.

Komisariu Julio da Costa Hornay akresenta tan katak maske membrus PNTL sira ne’ebe maka fó seguransa iha kada sentru votasaun mínimu, maibé ida ne’e la sai obstakulu ba instituisaun PNTL atu asegura eleisaun suku nia ho diak.

Iha biban ne’e mós Komandante Jerál PNTL hato’o votu parabens ba xefe suku eleitu no ba komunidade tomak iha Timor laran ne’ebe kontribui duni sira nia ann ba iha eleisaun ida ne’e ho diak, hodi garante estabilidade no paz.

PNTL Sei Kontrola Fogetes Iha Loja Sira

Hare’e ba besik ona tama fulan Dezembru, PNTL sei kontrola Supermerkadu no loja sira ne’ebe maka komesa ona faan fogetes maske laiha autorizasaun husi parte kompotente.

“Aproveita oportunidade ida ne’e hau husu ba komunidade tomak, liu-liu emprezariu internasional no mós nasional sira atu labele faan fogetes iha loja antes tempu Natal, maibé ita komesa rona ona fogetes nia lian, tanba ne’e komandu fó ona ordem ba PNTL munisipiu Dili hodi kontrola no prende sasan hirak ne’e”, apela Komisariu Julio da Costa Hornay.

Media PNTL.

Dili- Polisia Nasional Timor-leste (PNTL) nain 2.448 sei fo seguransa ba Eleisaun Suku Segunda Ronde ne’ebe maka sei halao iha loron 13 fulan Novembru iha Sentru votasaun 1.530

Komandante Komandu operasaun Superintendente Henrique da Costa hateten Komandu PNTL sei koloka nia membru iha Sentru Votasaun hodi garante seguransa ba Eleisaun Segunda Ronde atu nune’e povu bele ba vota ho seguru.

Komandante ne’e haktuirtan katak kolokasaun pessoal iha sentru votasaun lahanesan bazeia ba fatin ne’ebe maka iha risku komandu munisipiu ida-idak sei koloka membru tuir nesesidade ne’ebe maka iha.

Komandu Jeral apoiu membru hamutuk nain 298 ba Komandu munisipiu 12 hodi fornese seguransa iha sentru votasaun nomos seguransa taktika hodi responde ba situasaun ruma.

Membru sira ne’ebe maka sei fo seguransa husi Unidade Epesial Polisia (UEP), Unidade Polisia Maritima (UPM), Unidade Polisia Fronteira (UPF), Centru Formasaun Polisia no Komandu Jeral.

Serimonia Deslokasaun membru PNTL ba munisipiu sei halao iha loron 12 fulan Novembru tuku 8:30 iha Kurtel Jeral PNTL Kaikoli Dili no prezidi husi Komandante Jeral PNTL Komisariu Polisia Julio da Costa Hornay. MEDIA PNTL.

Dili- Polisia Nasional Timor-Leste (PNTL) rejista insidente hamutuk 12 iha Sentru Votasaun iha munisipiu Dili, Ainaro, Baucau, Viqueque, Lautem no Cova-Lima.

Komandante Komandu Operasaun Supertintendente Xefe Henrique da Costa hateten durante fo seguransa ba Eleisaun Suku iha loron 29 fulan Outubru mosu problema ou insidente hamutuk 12 hanesan joven balu hemu tua lanu no tenta tama iha sentru votasaun ho intensaun atu impede Eleisaun Suku no tenta atu foti Bulletin de Votos husi brigada sira, hahalok hirak ne’e konsidera hanesan krime, Nia hato’o asuntu ne’e ba media PNTL iha nia knar fatin Kaikoli Dili (07/11).

Nia haktuirtan katak PNTL konsege kaptura suspeitu hirak ne’e entrega ba Komandu PNTL munisipiu ida-idak hodi kontinua halo prosesu investigasaun no lori ba Tribunal; Maske mosu problema balu iha Sentru Votasaun maibe PNTL kontinua mantein seguransa no Eleisaun Suku lao ho diak no tuir rezultadu husi STAE katak Kandidatu Sefe Suku barak maka pasa ba Segunda Volta tanba ne’e iha loron 13 fulan Novembru sei halao eleisaun segunda volta maka oras ne’e dadaun komandu PNTL prepara hela planu operasaun no membru hodi fo apoiu seguransa.

Relasiona ho Eleisaun Suku segunda volta ne’ebe maka sei halao iha loron 13/11 Komandante Komandu Operasaun ne’e husu ba Komunidade sira nia apoiu no koperasaun hamutuk ho membru PNTL ne’ebe maka koloka iha sentru votasaun hodi asegura seguransa atu nune’e eleisaun segunda volta bele lao ho susesu.

Eleisaun Suku ne’ebe maka realiza iha loron 29 fulan Outubru tinan 2016 hetan apoiu husi membru PNTL Nain 2.893 hodi fo seguransa ba Sentru Votasaun 2.225 iha teritoriu Timor-Leste laran tomak tanba Seguransa ba Eleisaun Suku hanesan faze ida atu esprimenta kapasidade forsa PNTL atu asegura festa demokrasia ida ne’e

Membru PNTL assume sira nia knaar ho diak maske hasoru difikuldade menus rekursu humanus tanba ne’e koloka kada sentru votasaun membru nain ida deit maibe tanba apoiu maximu husi Autoridade Lokal, joventude, no Komunidade sira maka Eleisaun Suku lao ho diak. Media PNTL