Uncategorized

Ainaro– Membru Polisia Nasioal Timor-Leste (PNTL) munisipiu Ainaro nain 15 ho postu Ajente Prinsipal hetan promosaun diviza no promovidu ba postu Ajente Chefe, no postu Sarjentu promovidu ba postu Primeru Sarjentu.

Komandante Jeral PNTL Komisariu Polisia Faustino da Costa hateten promosaun karrera pessoal direitu membru ida-idak ninian husi ita boot sira rasik wainhira kumpri ona regra, prinsipiu jeral no prinsipiu espesial ne’ebe maka hatur nanis ona iha rejimi promosaun PNTL bazeia ba dekretu lei Nu 16/2009 de 18 de Marsu, Nia hato’o kestaun ne’e iha deskursu ba serimonia promosaun diviza iha munisipiu Ainaro Tersa (19/04).

Nia haktuirtan katak membru sira ne’ebe ohin hetan oportunu hodi halo promosaun Komandu avalia no observa katak presija duni iha rekonesementu husi Komandu konaba ita boot sira nia esforsu no kontribuisaun nomos kumprimentu ne’ebe ita boot sira hatudu liu husi regras ne’ebe koloka iha rejimi promosaun PNTL ninian.

Promosaun kareira PNTL nian ne’ebe ofisialmente halao iha loron 27 de Marsu 2016, aktividade hanesan halao ohin iha Ainaro ho promosaun ba kategoria rua Ajente Prinsipal ba Ajente Chefe nain 10 no Sarjentu ba Primeru Sarjentu nain 5.

Iha oportunidade ida ne’e hakarak hato’o ba membru PNTL munisipiu Ainaro katak promosaun hanesan ne‘e iha tempu tuir mai ita sei la uza data 27 de Marsu (loron aniversaiu PNTL) nudar loron determinante hodi halo promosaun maibe sei halao iha loron no fulan sira seluk wainhira priense rekejitu promosaun nian iha kada kategoria galão no diviza ne’ebe maka ita boot sira iha.

Iha okajiaun ne’e Segundu Komandante PNTL hodi Komando PNTL nomos PNTL Munisipiu Ainaro nia naran agradese ba eis Administrador munisipiu Ainaro Manuel Ramos Pinto ne’ebe iha pasadu hamutuk ho parseru dezenvolvimentu PNTL assume responsabilidade hanesan Vice Prezidente Konselu Diretiva Municipal hodi esforsu no koloka inklui instala Konselu Polisiamentu Komunitariu iha Munisipiu Ainaro ne’ebe ikus mai sai nudar progresu inportante ida ba PNTL ne’ebe oras ne’e sai nafatin nudar prioridade ida PNTL iha tinan hirak tuir mai.

Husi rezultadu hirak ne’e komando PNTL sente katak orgullu no onra boot ida tanba bele inplementa ona Polisiamentu prosimidade ka polisia hamutuk ho komunidade no komunidade sente katak kestaun seguransa laos responsabilidade ema ida nian mesak maibe responsabilidade ita hotu nian.

Serimonia promosaun diviza ne’e partisipa husi Administrador munisipiu Ainaro, Organizasaun Não Govermental, Konselu Polisiamentu Komunitaria, Ofisial Polisia Suku no konvidadus sira. Media PNTL

Dili–Polisia Nasional Timor-Leste (PNTL) liu husi aktividade cek point, kaptura ona suspeitu nain 30 ne’ebe maka hana no ta’a ema iha tempu kalan, no suspeitu hirak ne’e detein iha sela polisia munisipiu Dili durante oras 72 hodi submete ba prosesu investigasaun.

Segundu Komandante Jerál PNTL Komisariu Polisia Faustino da Costa wainhira hasoru malu ho jornalista sira iha nia knaar fatin PNTL Kaikoli Dili, Sexta (22/04) hateten “Kriminozu kuaze nain 30 maka detein iha sela PNTL munisipiu Dili durante oras 72 hafoin submete ba prosesu PNTL sei aprejenta ba Ministeriu Publiku hodi halo prosesu justisa tuir lei ne’ebe maka vigora”.

Nia haktuir tan katak suspeitu sira ne’e kaptura tanba sa’e motor sikat samurai iha kotuk laran no halai malorek , motor kenalpot resin, espellu laiha, dokumentus laiha no karta kondusaun laiha.

Atu prevene autor sira repete fali krime ne’ebe maka hanesan, iha prosesu identifikasaun Polisia tau ona iha lista naran no fotografia autor sira ne’ebe maka kaptura ona nune’e wainhira suspeitu hirak ne’e fila ba uma no halo nafatin krime hanesan maka sei aplika ba sira sansaun agravantes ne’ebe maka sei hatodan sira.

Aktividade cek point iha tempu kalan nu’udar aktividade prevensaun ida ne’ebe maka halo atu detekta autor sira ne’ebe maka sempre hana malu iha Dili laran durante tempu kalan. No husi aktividade ne’e detekta duni katak, maioria ema sira ne’ebe hana malu uza rama ambon, laos tur hein deit iha fatin maibé lao uza motor ho karreta. Resultadu husi pasa revista ou cek point ne’e, PNTL detekta duni violasaun ne’ebe bo’ot hanesan lori motor ou kareta laiha dokumentus no lori sasan kroat hanesan samurai.

Resultadu husi aktividade cek point ne’ebe maka halo iha semana ne’e nia laran, nota katak ladun iha ona asaltus. PNTL aliened hala’o aktividade cek point, halo mós Dialog no vizita komunidade liu-liu ho autoridade sira, PNTL iha Ofisial Polisia suku(OPS) ne’ebe maka kolokadu hotu iha suku-suku no sira nia kna’ar maka koalia ho lider komunitaria sira.

Media PNTL

Dili, molok apresenta Planu Asaun Annual 2016 ba tinan 2017 ba governu lao ho diak, segunda-feira ne’e (25/04/2016) Segundu Komandante Jerál Polísia Nasional Timor Leste (PNTL) Komisariu Polísia Faustino da Costa ofisialmente halo abertura ba sorumutu kona-ba Revisaun Planu Asaun Annual (PAA) ne’ebe organiza husi Departamentu Administrasaun no Planeamentu PNTL nian.

Direktur Departamentu Planeamentu PNTL Superintendente Assistente José da Costa iha ninia lia menon molok diskusaun hahu’u hateten PNTL iha ninia Planu Estratéjiku ba tinan lima nian hahu’u husi tinan 2014-2018 ne’ebe buat balun halo ona no buat balun seidauk halo.

“Tanba ida ne’e maka ohin loron ita atu halibur fila fali iha ne’e hodi hanoin buat ne’ebe ita halo, ita husik bele liu ba, buat balun ne’ebe ita seidauk halo hotu, ita halo revisaun hodi bele hetan resultadu iha planu ne’ebe sei hala’o iha tinan 2017 nia laran”, hateten Superintendente Assistente José da Costa.

Tuir Direktur Departamentu Planeamentu PNTL ne’e ba Komandante distritu sira ne’ebe admira ho enkontru ne’ebe hala’o ho urgente, tanba tuir programa governu nian, katak iha lorn 27 fulan ne’e, Instituisaun hotu-hotu tenke hatama ona ninia planu ba iha gabinete Primeiru Ministru nian.

Entertantu, Segundu Komandante Jerál Komisariu Polísia Faustino da Costa iha ninia diskursu perante Komandante sira katak ho surumutu ne’e hanesan marka tan istoria ida oinsa atu hare’e Polísia Nasional Timor Leste nia ba oin hodi servi, hodi protégé ita nia komunidade.

“Ohin ita hotu iha ne’e atu halo diskusaun ida no mós ita nia preparasaun aktividades annual ba 2017 ninian dehan hanesan ne’e ida, iha mudansa ba matrix ne’ebe iha orsida teknikamente parte administrasaun no planeamentu sei hatudu ba ita bo’ot sira para oinsa ba oin ita atu priense”, tenik Komisariu Polísia Faustino da Costa.

Segundu Komandante Jerál ne’e mós afirma tan katak, Komando Polísia Nasional Timor Leste tau iha tinan 2014-2018 tau prioridade ba iha Polisiamentu Komunitariu, Tránzitu Seguransa Rodoviariu, Asuntu Fronteira no Aktividade Operasional. Komisariu Polísia ne’e mós apela ba Komandante Unidades sira hotu katak, Planu Aktividade iha maka ita bele ezizi orsamentu nune’e bele aloka ba aktividades ne’ebe maka iha ona planu, no relata didiak ba aktividades ne’ebe tau iha prioridades.

Media PNTL.

Suai, Segundu Komandante Jerál Polísia Nasional Timor Leste (PNTL) Komisariu Polísia Faustino da Costa iha ninia visita munisipiu sira, foin lalais ne’e (18/04/2016) hala’o enkontru ho Komandante Eskuadra sira iha munisipiu Covalima hodi rona desafiu no problema ne’ebe maka munisipiu ne’e hasoru.

Enkontru ne’ebe partisipa husi Komandante Eskuadra hotu iha munisipiu Covalima ne’e, hala’o iha edifisiu PNTL munisipiu Covalima no koalia liu kona-ba kazu no krima sira ne’ebe maka rezista durante ne’e iha munisipiu Covalima rasik. Komandante Munisipiu Covalima, Superintendente Polísia Eugenio Perrera ne’ebe ofisialmente loke sessaun enkontru hateten enkontru ne’e atu informa ba Segundu Komandante Jerál kona-ba situasaun seguransa em jerál iha munisipiu Covalima iha inisiu tinan (2016) ida ne’e nian.

“Liga ho situasaun ne’ebe ami atu apresenta iha enkontru ne’e, iha munisipiu Covalima hanesan munisipiu ne’ebe iha liña fronteira terrestre, fronteira maritime no mós fronteira auréo, klaru iha liña fronteira sira ne’e iha potensia ne’ebe bele mós lori situasaun ameasas ka risku ba iha estabilidade no seguransa iha munisipiu ida ne’e,” hateten Superintendente Polísia Eugenio Perreira wainhira loke sessaun enkontru ho Segundu Komandante Jerál PNTL.

Komandante munisipiu Covalima ne’e mós hatutan tan katak karakterístika ba iha intervensaun seguransa ninia iha nivel munisipiu Covalima mai ho nia aspektu rua, maka hanesan hare’e ba iha liña fronteira, ne’ebe iha mós nia karakterístika krime ne’ebe mai ho nia natureza iha liña fronteira ninian, no aspektu segundu maka liga ba munisipiu Covalima rasik ne’ebe hatudu hahalok husi populasaun rasik ne’ebe bele kategoria ba aktu krime.

Superintendente Polísia ne’e mós esplika tipu krime ne’ebe maka rejista iha munisipiu Covalima, ba ida ne’e nia hateten, “Konforme ami nia dadus estatístika ne’ebe maka Komando munisipiu Covalima konsege akumula informasaun, liu-liu kona-ba informasaun formal liu husi rejistrasaun ba kazu ne’ebe maka ami asegura durante fulan dahuluk tinan 2016 nian maka hanesan kazu agresaun fíziku ne’eb ho númeru ass liu, kazu violensia doméstika, no kazu violasaun seksual”.

Iha fatin hanesan, Segundu Komandante Jerál Komisariu Polísia Faustino da Costa iha ninia intervensaun, louva Komandante eskuadra ho ninia Komandante munisipiu ne’ebe konsege konvense ema ne’ebe laos Suai oan mai partisipa iha aktividade motorcros iha munisipiu ne’e rasik.

“Imi halo aktividade motorcros ne’e tanba imi iha inisiativa atu komemora loron aniversariu Polísia Nasional Timor Leste (PNTL) nian ne’ebe moris halo tinan 16 no ida ne’e hola parte ona aktividade ida ne’ebe ita tau iha moto PNTL nian hanesan Vizibilidade, Involvimentu no Professionalizmu (V.I.P), tanba hare’e husi númeru ema ne’ebe mak partisipa iha aktividade motorcros ne’e que barak, ida sai ona hanesan Involvimentu ne’ebe sir abele tau iha konfiansa ba iha servisu Polísia Nasional Timor Leste nian”, tenik Komisariu Polísia Faustino da Costa ne’ebe eleva no agradese ba inisiativa hodi kria eventu motorcros ne’e.

Komisariu Polísia Faustino da Costa hateten tan katak, nia hili munisipiu Covalima hanesan munisipiu ne’ebe primeira vés nia visita, hafoin simu mandatu hanesan Segundu Komandante Jerál no mós sai hanesan munisipiu ba dala uluk iha ninia aktividade visita munisipiu.

“Komandante Jerál no hau nia mandatu implementa Planu Estratéjiku Polísia Nasional Timor Leste nian ho prioridades ha’at maka hanesan Polisiamentu Komunitariu, Seguransa Rodoviariu, Seguransa iha Fronteira no Servisu Operasionais ne’ebe labele hamrik mesak”, hateten Segundu Komandante Jerál.

Razaun tau prioridade ba iha Polisiamentu Komunitariu iha Planu Estratejiku, Komisariu Polísia Faustino da Costa hateten, ne’e implementa tanba sempre iha bebeik keixa ka lamentasaun husi populasaun nia seguransa iha suku idak-idak nian.

Media PNTL.

Suai– Segundu Komandante Jerál Polisia Nasional Timor-Leste (PNTL) Komisariu Polísia Faustino da Costa vizita servisu iha munisipiu Cova-Lima, Ainaro no Manu-Fahi hodi hare’e no rona difikuldade ne’ebe maka membru PNTL iha munisipiu ida-idak enfrenta.

Segundu Komandante Jerál PNTL Komisariu Polisia Faustino da Costa hateten iha vizita servisu iha munisipiu Cova-Lima foin lalais ne’e katak, “Vizita servisu ne’e ho objektivu atu halo enkontru ho estrutura tomak PNTL iha munisipiu hodi fahe informasaun ba sira kona-ba saida maka sira tenke halo hodi antisipa ba futuru”.

Nia informa tan katak iha enkontru ho komandante munisipiu sira maioria la menta kona-ba menus ekipamentus eskritoriu no moviliarius, tanba komputador nee’be sira uza balu antigu desde tempu UNTAET, maibe Komando sempre hato’o ba sira katak sasan hirak ne’e PNTL la preve no sosa kada tinan tanba orsamentu Jeral Estadu maka sei determina.

Alende ne’e Komandante postu administrativu balu kestiona kona-ba motor no fasilidade ne’ebe Ofisial Polisia Suku (OPS) sira simu tanba sira mós dala ruma sente dúvida hela tanba s’a maka OPS sira simu motor no sei simu tan leptop maibe Komandante postu administrative sira la hetan material sira ne’e.

“Hau informa ba sira prioridade komando PNTL nian tinan ida ne’e, ba oin hanesan kontinua tau prioridade primeru ba Polisiamentu Komunitaria tanba ne’e mak fasilita sira, prioridade segundu maka Tranzitu tanba tinan-tinan ema mate iha dalan barak liu kazu sira seluk entaun ita tau oinsa para iha munisipiu sira hatene sira atu halo cek point, sensibilizasaun informasaun kona-ba Kodigu Estrada no kolia ho autoridades tomak kona-ba risku ba transporte nomos prioridade terseru maka asuntu frontera ne’ebe sai problema nasional,” Nia esplika.

Koalia kona-ba fronteira ema hotu nia hanoin ba Batu-gade, Mota-Masin no parte Sakato, maibe fronteira bele mos iha parte seluk tanba infiltrasaun no transferensia husi sasan balu inklui ema bele mós fronteira ne’e iha Dili tanba ita iha Portu no Aeroportu tanba ne’e komando munisipiu sira mos presiza hatene no antisipa tanba tren merkadu ohin loron sai prekupasaun ba seguransa.

Durante vizita servisu ne’e alienede halo enkontru ho komandante munisipiu no Komandante postu administrativu sira halao mos aktividade motor cros iha Cova-Lima no promosaun diviza ba membru PNTL nain 319 ho postu Ajente prinsipal promovidu ba ajente Chefe iha munisipiu Ainaro. Media PNTL

Covalima, iha loron Domingo (17/04/2016) Segundu Komandante Jerál Polísia Nasional Timor Leste (PNTL) Komisáriu Polísia Faustino da Costa, halo abertura ba aktividade motorcros ne’ebe hala’o iha kampu Munisipiu Covalima, postu Administrativo Suai Villa, suku Camanasa.

Aktividade motorcros ne’ebe hala’o hodi komemora loron Aniversáriu PNTL nian ba dala 16 ne’e, organiza husi PNTL Munisipiu Covalima rasik, servisu hamutuk ho administrador Covalima no hetan apoio husi Sekretariu Estadu Juventude no Desportu (SEJD).

Entertantu ekipa ka pessoal sira ne’ebe partisipa iha aktividade ne’e, maka representante joventude ne’ebe iha talent ba motorcros husi munisipiu 13 inklui membru PNTL nain ida mós partisipa iha aktividade motorcros ne’e. Komunidade husi munisipiu Covalima, sente kontente tanba bele hare’e no partisipa aktividade halai motorcros nune’e bele anima sira iha loron feriadu.

Iha fatin hanesan, Sekretariu Estadu Juventude no Desportu Leovejildo Hornai ne’ebe partisipa mós iha aktividade ne’e, fó mós Parabens ba Polísia Nasional Timor Leste (PNTL) ba ninia aniversáriu foin lalais ne’e. Enkuantu manan nain husi aktividade ne’e maka ekipa husi munisipiu Dili maka Jovi Mendes sai primeiru Lugar, segundu lugar manan husi Obot Fame no terseiru lugar manan husi Dadu Monteiro.

Atu hetan seguransa durante aktividade ne’e hala’o, ekipa mediku Saude no Bombeiros preparadu iha fatin hodi bele fó asistensia lalais wainhira akontese asidente ruma.

Media PNTL.

Dili- United Nation Development Program (UNDP) oferese ekipamentus servisu ba Repartisaun Relasaun Publika no media Polisia Naional Timor-Leste (PNTL) atu nune’e bele fasilita servisu loron-loron hodi halo dokumentasaun ba servisu PNTL ho diak liutan.

Manajer projetu UNDP iha PNTL Kerrytilo Pinto hateten UNDP laos deit kapasita membrus sira iha Relasaun Publika maibe mos presiza fasilita ho ekipamentus ne’ebe maka apropriadu atu nune’e bele fasilita servisu Relasaun Publiku nian ho diak, Nia hato’o kestaun ne’e iha serimonia entrega ekipamentus ba Komandante administrasaun no Komandante Repartisaun Relasaun Publika iha Kuartel Jeral PNTL Kaikoli, Dili Kinta (21/04).

Nia espera katak sasan elekroniku hirak ne’e bele fasilita Relasaun Publiku lao ba oin, no husu ba komandante sira bele supervisiona membrus sira para utilija sasan hirak ne’e ho kuidadu nune’e’e bele garantia kualidade servisu membrus iha Relasaun Publika no Media PNTL.

Iha okajiaun ne’e komandante Administrasaun Superintendente Chefe Mateus Fernandes hateten PNTL iha parseru barak ne’ebe sempre hakarak fo tulun hanesan UNDP ne’ebe halo esforsu makaas laos deit fo formasaun maibe fornese ekipamentu atu nune’e membrus Relasaun Publiku bele halao servisu ho diak liutan ba povu no nasaun Timor-Leste.

Nia haktuirtan katak ekipamentus ne’ebe maka UNDP oferese ne’e ajuda teb-tebes PNTL nia servisu tanba iha tempu badak sei iha eventu inportante hanesan elisaun parlamentar no elisaun suku no akividade PNTL ne’ebe maka barak tebes.

Komandante Administrasaun ne’e hato’o agradesementu ba UNDP tanba liu husi esforsu no ajudu husi UNDP ita bele hetan ekipamentus servisu ne’ebe modernu tanba UNDP hadomi tebes PNTL.

“ Husu ba membrus sira ne’ebe servisu iha Relasaun Publika no Media PNTL atu uza didiak ekipamentus hirak ne’e no kontrola atu nune’e sasan hirak ne’e diak nafatin hodi uza iha servisu loro-loron nian,”dehan nia.

Ekipamentus hirak ne’ebe maka UNDP oferese maka hanesan Projektor, Reflektor, Canon EOS 7D, Rotolight RL48, Tripod no ekipamentus seluktan nebe maka uilija ba servisu media nian. Media PNTL