Uncategorized

Dili, Komunidade husi aldeia 03 suku Maskarinhas postu Administrativu Vera-Cruz iha quinta-feira (28/04) ne’e, hamutuk ho Ekipa Fasilitador, halo sorumutu Pra-Dialogu hodi koalia kona-ba problema ne’ebe akontese iha aldeia refere.

Problema ne’ebe maka akontese iha aldeia refere, akontese iha fulan kotuk entre joven nain ha’at (4) baku joven nain ida (1) iha tempo kalan wainhira sira ho kondisaun lanu. Iha momentu ne’ebe kedas, Polísia halo kapturasaun ba suspeitu no vitima lori kedas ba hospital hodi halo tratamentu. Hafoin kapturasaun, suspeitu nain ha’at ne’e ba presta sira nia deklarasaun iha Ministériu Públiku. No kazu refere, depois suspeitu rekoñese sira nia hahalok hanesan krime, Ministeriu Públiku detein suspeitu iha sela durante oras hitu-nulu-resin hitu (72) nia laran no kazu refere taka ka remata ona.

Maibé ho problema refere, xefe suku Postu Administrativu Vera-Cruz hanesan autoridade lokal, foti desijasaun hodi halo Suspensaun ba komunidade tomak iha aldeia 03 nian laran. Tanba tuir autoridade lokal ne’e, hafoin akontesimentu joven baku malu, iha tempo kalan sempre akontese ema deskoñesidu tuda uma hirak ne’ebe besik Estrada ninian aldeia 03 nian. No iha tempo ida, autoridade lokal ne’e, kaer toman ema ne’ebe maka sempre tuda uma, maibé hafoin kaer toman, xefe suku ne’e husu tuir ba ema hirak ne’ebe tuda maibé sira nega ka hateten la hare ou hetan ma ne’ebe maka halo asaun ne’e.

Nune’e, xefe suku ho estrutura tomak suku Maskarinhas buka meius ou dalan atu resolve problema ne’ebe sempre akontese iha aldeia ne’e, maibé laiha resposta husi komunidade sira. Tanba razaun ne’e, xefe suku hasai Suspensaun ba komunidade sira iha aldeia 03 nian, atu nune’e populasaun refere bele hanoin ou tetu didiak ba maneira ne’ebe autoridade lokal sira fó atu resolve problema ne’ebe akontese halo komunidade sira kalan labele toba ho hakmatek.

Tanba ne’e, ekipa fasiltador ne’ebe kompostu husi Polísia Komunitariu, representante Ministeriu Interior liu husi Diresaun Nasional Desenvolvimentu Nasional no mós representante husi NGO BELUN organiza sorumutu Pra-Dialogu entre komunidade aldeia 03 ho estrutura autoridade lokal suku Maskarinhas nian, hodi bele buka dalan ka meius ne’ebe diak nune’e labele tan akontese problema iha tempo oin mai.

Xefe Departamentu Polísiamentu Komunitariu husi Komando Operasaun, Superintendente-Assistente António da Luz iha ninia lia menon ba sorumutu ne’e hateten atu bele hetan seguransa iha ita nia rai, laos deit servisu ka dever Polísia Nasional Timor Leste no F-FDTL nian, maibé ne’e ita hotu-hotu ninia responsabilidade atu bele asegura seguransa.

“Hau akompaña prosesu ida ne’e kuando akontese ita forma ekipa, hau nia membru sira hamutuk ho ekipa sira, hahu’u ho prosesu ida ne’e, ne’ebe ohin preukupasaun barak hato’o kona-ba seguransa, ema barak interpreta sala liafuan seguransa, tanba ne’e ita presija hatene lolos konteudu husi seguransa ne’e saida?” hateten Superintendente-Assistente António da Luz ba komunidade sira.

Xefe Departamentu Polísiamentu Komunitariu ne’e mós realsa tan katak parte Polísia somente halo tuir Lei no Ordem ne’ebe maka existe iha ita nia rai. Polísia laos atu halo kapturasaun ba kualkér ema ida ne’ebe la halo asaun krime. Tanba ne’e, parte Polísia Komunitariu apela ba komunidade hotu atu bele hatene idak-idak ninia responsabilidade atu hado’ok ann husi problema, ho nune’e deit maka ema hotu bele moris iha situasaun ida hakmatek no paz.

Rohan husi sorumutu ne’e, parte rua husi aldeia refere hanensa autoridade lokal no komunidade rasik asina deklarasaun ida atu ble realiza sorumutu nahe biti bo’ot no sasin ba deklarasaun ne’e maka Polísiamentu Komunitariu husi Komando Operasaun no Ekipa fasilitador sira.

Media PNTL.  

Same– Situasaun Seguransa no ordem publika iha area juridiku Komando PNTL munisipiu Manu-Fahi aktualmente seguru no kontroladu, nune’e populasaun sira moris hakmatek hodi halao sira nia aktividade loro-loron.

Komandante PNTL munisipiu Manu-Fahi Superintendente Agustinho Gomes hateten situasaun seguransa no ordem publika iha area juridiku Komando PNTL munisipiu Manu-Fahi aktualmente seguru no kontroladu tanba membru PNTL munisipiu Manu-Fahi halao servisu ho diak no responsabilidade, Nia hato’o kestaun ne’e liu husi enkontru hamutuk ho Segundu Komandante Jeral PNTL iha nia vizita servisu ba munisipiu foin lalais iha Same.

Nia informatan katak servisu funsaun polisial ne’ebe maka iha hanesan Seguransa, Investigasaun, Polisiamentu Komunitaria,Intelijensia no Tranzitu lao hela maske sidauk perfeitu no atinji objetivu ne’ebe maka planea ona maibe realidade sira hotu-hotu feto no mane halo esforsu makaas hela.

“ Hau fiar katak ho esforsu no dedikasaun ne’ebe maka sira halo sei kontribui foti imajen no kredibilidade PNTL iha munisipiu Manu-Fahi,” Nia hato’o esperansa ba membru sira.

Eskuadra Same sempre transorta suspeitu, vitima no testamuña lori ba Tribunal Distrital Suai hodi tuir julgamentu; husi parte seguransa apoia mos aktividade relijioja no mos asegura seguransa iha eventu selebrasaun loron nasional hanesan Restaurasaun Independensia 20 de Maio, Restaurasaun Independensia 28 Novembru no seluktan. Media PNTL.

Batugade, atu apoio servisu Unidade Patrullamentu Fronteira, Komando Jerál Polísia Nasional Timor Leste (PNTL) entrega karreta hamutuk tolu (3) ho tipu karreta Kanter.

Komandante Jerál PNTL Komisariu Polísia Julio da Costa Hornay iha serimonia ne’e hateten karreta hirak ne’e atu bele atende ba problema no seguransa iha parte fronteira nian.

“ Ita hotu-hotu iha atu asegura, atu servisu hodi fó seguransa máximu ba fronteira, liu-liu ba entradas sasan ilegais no ema, para atu halo prenvensaun ba rai doben Timor Leste ida ne’e, husi kriminozu sira ne’ebe maka hakarak atu aproveita fronteira terrestre hodi infitra tama mai iha ita nia rai ida ne’e”, hateten Komisariu Polísia Julio da Costa Hornay.

Komandante Jerál PNTL mós apela ba membru husi Unidade Patrullamentu Fronteira atu bele servsiu hamutuk ho F-FDTL hodi asegura seguransa iha Timor Leste, maske instituisun la hanesan maibé misaun ida deit maka atu asegura liña fronteira Timor Leste nian.

Tuir Komisariu Polísia ne’e katak, antes ne’e halo ona enkontru entre Komando Jerál, Komando Posto UPM, Komando Unidade no Xefe Estadu Major Jeneral hodi koalia kona-ba entidimentu servisu husi parte F-FDTL no PNTL, liu-liu iha area fronteira ninian. No apela ba membru husi forsa rua ne’e, atu bele koopera no koordena ba malu hodi hare’e ba misaun ida deit katak atu asegura seguransa externa no interna rai ida ne’e nian.

Kona-ba transporte ne’ebe fahe ba Unidade ne’e, Komandante Jerál husu ba membru UPF atu bele utiliza transporte hirak ne’e ho responsabilidade no sentidu katak sai nain ba sasan hirak ne’e, hodi nune’e karreta sira ne’e bele dura ba iha tempo naruk.

Media PNTL.

Oecusse, iha semana kotuk (21/04) Komandante Jerál PNTL Komisariu Polísia Julio da Costa Hornay akompaña husi Prezidente Autoridade Espesial Oecusse Dr.Mari Alkatiri hala’o inagurasaun ba caserna membru PNTL.

Prezidente ZEEMS Dr. Mari Alkatiri ne’ebe partisipa mós iha serimonia ne’e hateten caserna hirak ne’e halo kleur ona, maibe tamba hetan seguransa husi parte Polísia nune’e, caserna hirak ne’e bele dura to’o tempo hetan inagurasaun.

“Lei hari’i Rejiaun Administrativa Espesial Oecusse Ambeno define kedas katak Komando Polísia no Komando Forsas Armadas ida deit, Komando Jerál iha Dili no Komando iha rejiaun no iha munisipiu, responde entermos operasionais ba Komando Jerál”, tenik Prezidente ZEEM hafoin inagura caserna PNTL iha rejiaun Oecusse.

Dr. Mari Alkatiri hateten tan katak, Lei mós define dever de kooperasaun koordenasaun entre autoridade rejiaun ho naturalmente no Komando Jerál tu’un mai iha Komando iha rejiaun, tamba ne’e normal wainhira Polísia presija apoio ruma husi autoridade no autoridade iha kondisaun atu fó apoio.

“Akontese iha tinan kotuk, oportunidade ida ne’ebe diak para bele hahu’u hadia oituan kompleksu (bairo) ida ne’e no ho kondisaun minímu no básika para bele Polísia sira hetan fatin atu hela, atu deskansa para bainhira presija sira atu halo operasaun, sira pronto atu halo operasaun”, hateten Prezidente ZEEMS.

Media PNTL.  

Oecusse, iha semana kotuk Ofisial Polísia Suku (OPS) PNTL ofisialmente simu motorizada ne’ebe entrega husi Komandante Jerál PNTL Komisariu Julio da Costa Hornay.

Komisariu Polísia Julio da Costa Hornay iha serimonia entrega motorizada ne’e hateten planu sosa motorizada ba OPS ne’e, basea ba nessesidade servisu membru OPS nian wainhira tu’un ba iha area rural.

“Ohin ita entrega xave motorizada OPS, politika ida ne’ebe maka Komando tetu no deside wainhira halo analisa oan ida hahu’u husi gastu mina nian ba tinan ida nian,manuntensaun no reparasaun iha tinan ida nian, governu aloka orsamentu ba kada motorizada estadu nian sira ne’e hotu, ita multiplika ba tinan lima nian hamutuk hira”, tenik Komandante Jerál PNTL.

Komisariu Polísia ne’e hatutan tan katak, planu sosa motorizada ba OPS sira ne’e, base aba estimasaun ba gastu ne’ebe hasai kada tinan lima ba manuntesaun motorizada sira ne’e, maka Komando apresenta ba Ministru Interior no Primeiru Ministru hodi hetan aprovasaun hodi sosa no kompleta motorizda ba OPS.

Tipu motorizada ne’ebe maka entrega ba OPS ne’e megapro hodi responde ba servisu membru OPSD nian wainhira hala’o servisu to’o iha fatin no distansia ne’ebe do’ok.

Media PNTL.

Dili, iha Sentru Formasaun Akademia tersa-feira ne’e (26/04) Komandante husi Munisipiu 13 partisipa iha enkontru Sosializasaun ba Dekretu Lei no° 3/2016 kona-ba Estatutu Administrasaun Munisipal, Autoridade Munisipal no Klibur Tekniku Interministerial ba Desentralizasaun Administrativa sira.

Segundu Komandante Jerál Polísia Nasional Timor Leste Komisariu Polísia Faustino da Costa ne’ebe ofisialmente loke sorumutu ne’e apela ba Komandante husi Munisipiu sira atu bele aproveita didiak iha sosializasaun Lei kona-ba desentralizasaun.

“Ohin ita halibur iha fatin ida ne’e, atu bele rona hodi akompaña aktividade saida maka Polísia Nasional Timor Leste presija agora no ba oin bele koloka iha planu asaun annual nian ba tinan 2017,” tenik Komisariu Polísia Faustino da Costa.

Segundu Komandante PNTL ne’e mós subliña tan katak governu Timor Leste desde tinan 2011 trasa ona planu ida ne’ebe koñesidu ho Planu Estratéjiku Desenvolvimentu Nasional to’o ba tinan 2030, katak iha planu ne’e konstitui mós sá estrutura governasaun maka atu define to’o iha base, no oinsa Polísia Nasional Timor Leste mós bele prepara aktividades saida deit, nune’e bele exekuta mós Planu Estratéjiku Desenvolvimentu Nasional ne’ebe governu prepara.

Iha fatin hanesan, Direktur Geral Desentralizasaun Administrasaun husi Ministeriu Administrasaun Estatal Sr. Abilio José Caetano hateten, parte ministeriu apresia tebes ba koloborasaun no partisipasaun husi Komando Jerál liu-liu Komandante husi Munisipiu 13. Direktur Geral ne’e mós adradese tebes ba Komando PNTL no Komando husi Munisipiu sira, hodi bele organiza sosializasaun ne’e nune’e Komando Munuisipiu sira bele hatene klean kona-ba esbosu husi dekretu Lei ne’e rasik.

Objektivu husi Sosializasaun ba mebru PNTL ne’e, maka oinsa iha futuru parte PNTL bele impõe ordem ba populasaun wainhira la kumpri Ordem husi Administrador Munisipiu sira, relasiona ho exekusaun husi Lei kona-ba Desentralizasaun Administrativa sira.

Media PNTL.

Ainaro– Membru Polisia Nasioal Timor-Leste (PNTL) munisipiu Ainaro nain 15 ho postu Ajente Prinsipal hetan promosaun diviza no promovidu ba postu Ajente Chefe, no postu Sarjentu promovidu ba postu Primeru Sarjentu.

Komandante Jeral PNTL Komisariu Polisia Faustino da Costa hateten promosaun karrera pessoal direitu membru ida-idak ninian husi ita boot sira rasik wainhira kumpri ona regra, prinsipiu jeral no prinsipiu espesial ne’ebe maka hatur nanis ona iha rejimi promosaun PNTL bazeia ba dekretu lei Nu 16/2009 de 18 de Marsu, Nia hato’o kestaun ne’e iha deskursu ba serimonia promosaun diviza iha munisipiu Ainaro Tersa (19/04).

Nia haktuirtan katak membru sira ne’ebe ohin hetan oportunu hodi halo promosaun Komandu avalia no observa katak presija duni iha rekonesementu husi Komandu konaba ita boot sira nia esforsu no kontribuisaun nomos kumprimentu ne’ebe ita boot sira hatudu liu husi regras ne’ebe koloka iha rejimi promosaun PNTL ninian.

Promosaun kareira PNTL nian ne’ebe ofisialmente halao iha loron 27 de Marsu 2016, aktividade hanesan halao ohin iha Ainaro ho promosaun ba kategoria rua Ajente Prinsipal ba Ajente Chefe nain 10 no Sarjentu ba Primeru Sarjentu nain 5.

Iha oportunidade ida ne’e hakarak hato’o ba membru PNTL munisipiu Ainaro katak promosaun hanesan ne‘e iha tempu tuir mai ita sei la uza data 27 de Marsu (loron aniversaiu PNTL) nudar loron determinante hodi halo promosaun maibe sei halao iha loron no fulan sira seluk wainhira priense rekejitu promosaun nian iha kada kategoria galão no diviza ne’ebe maka ita boot sira iha.

Iha okajiaun ne’e Segundu Komandante PNTL hodi Komando PNTL nomos PNTL Munisipiu Ainaro nia naran agradese ba eis Administrador munisipiu Ainaro Manuel Ramos Pinto ne’ebe iha pasadu hamutuk ho parseru dezenvolvimentu PNTL assume responsabilidade hanesan Vice Prezidente Konselu Diretiva Municipal hodi esforsu no koloka inklui instala Konselu Polisiamentu Komunitariu iha Munisipiu Ainaro ne’ebe ikus mai sai nudar progresu inportante ida ba PNTL ne’ebe oras ne’e sai nafatin nudar prioridade ida PNTL iha tinan hirak tuir mai.

Husi rezultadu hirak ne’e komando PNTL sente katak orgullu no onra boot ida tanba bele inplementa ona Polisiamentu prosimidade ka polisia hamutuk ho komunidade no komunidade sente katak kestaun seguransa laos responsabilidade ema ida nian mesak maibe responsabilidade ita hotu nian.

Serimonia promosaun diviza ne’e partisipa husi Administrador munisipiu Ainaro, Organizasaun Não Govermental, Konselu Polisiamentu Komunitaria, Ofisial Polisia Suku no konvidadus sira. Media PNTL

Dili–Polisia Nasional Timor-Leste (PNTL) liu husi aktividade cek point, kaptura ona suspeitu nain 30 ne’ebe maka hana no ta’a ema iha tempu kalan, no suspeitu hirak ne’e detein iha sela polisia munisipiu Dili durante oras 72 hodi submete ba prosesu investigasaun.

Segundu Komandante Jerál PNTL Komisariu Polisia Faustino da Costa wainhira hasoru malu ho jornalista sira iha nia knaar fatin PNTL Kaikoli Dili, Sexta (22/04) hateten “Kriminozu kuaze nain 30 maka detein iha sela PNTL munisipiu Dili durante oras 72 hafoin submete ba prosesu PNTL sei aprejenta ba Ministeriu Publiku hodi halo prosesu justisa tuir lei ne’ebe maka vigora”.

Nia haktuir tan katak suspeitu sira ne’e kaptura tanba sa’e motor sikat samurai iha kotuk laran no halai malorek , motor kenalpot resin, espellu laiha, dokumentus laiha no karta kondusaun laiha.

Atu prevene autor sira repete fali krime ne’ebe maka hanesan, iha prosesu identifikasaun Polisia tau ona iha lista naran no fotografia autor sira ne’ebe maka kaptura ona nune’e wainhira suspeitu hirak ne’e fila ba uma no halo nafatin krime hanesan maka sei aplika ba sira sansaun agravantes ne’ebe maka sei hatodan sira.

Aktividade cek point iha tempu kalan nu’udar aktividade prevensaun ida ne’ebe maka halo atu detekta autor sira ne’ebe maka sempre hana malu iha Dili laran durante tempu kalan. No husi aktividade ne’e detekta duni katak, maioria ema sira ne’ebe hana malu uza rama ambon, laos tur hein deit iha fatin maibé lao uza motor ho karreta. Resultadu husi pasa revista ou cek point ne’e, PNTL detekta duni violasaun ne’ebe bo’ot hanesan lori motor ou kareta laiha dokumentus no lori sasan kroat hanesan samurai.

Resultadu husi aktividade cek point ne’ebe maka halo iha semana ne’e nia laran, nota katak ladun iha ona asaltus. PNTL aliened hala’o aktividade cek point, halo mós Dialog no vizita komunidade liu-liu ho autoridade sira, PNTL iha Ofisial Polisia suku(OPS) ne’ebe maka kolokadu hotu iha suku-suku no sira nia kna’ar maka koalia ho lider komunitaria sira.

Media PNTL

Dili, molok apresenta Planu Asaun Annual 2016 ba tinan 2017 ba governu lao ho diak, segunda-feira ne’e (25/04/2016) Segundu Komandante Jerál Polísia Nasional Timor Leste (PNTL) Komisariu Polísia Faustino da Costa ofisialmente halo abertura ba sorumutu kona-ba Revisaun Planu Asaun Annual (PAA) ne’ebe organiza husi Departamentu Administrasaun no Planeamentu PNTL nian.

Direktur Departamentu Planeamentu PNTL Superintendente Assistente José da Costa iha ninia lia menon molok diskusaun hahu’u hateten PNTL iha ninia Planu Estratéjiku ba tinan lima nian hahu’u husi tinan 2014-2018 ne’ebe buat balun halo ona no buat balun seidauk halo.

“Tanba ida ne’e maka ohin loron ita atu halibur fila fali iha ne’e hodi hanoin buat ne’ebe ita halo, ita husik bele liu ba, buat balun ne’ebe ita seidauk halo hotu, ita halo revisaun hodi bele hetan resultadu iha planu ne’ebe sei hala’o iha tinan 2017 nia laran”, hateten Superintendente Assistente José da Costa.

Tuir Direktur Departamentu Planeamentu PNTL ne’e ba Komandante distritu sira ne’ebe admira ho enkontru ne’ebe hala’o ho urgente, tanba tuir programa governu nian, katak iha lorn 27 fulan ne’e, Instituisaun hotu-hotu tenke hatama ona ninia planu ba iha gabinete Primeiru Ministru nian.

Entertantu, Segundu Komandante Jerál Komisariu Polísia Faustino da Costa iha ninia diskursu perante Komandante sira katak ho surumutu ne’e hanesan marka tan istoria ida oinsa atu hare’e Polísia Nasional Timor Leste nia ba oin hodi servi, hodi protégé ita nia komunidade.

“Ohin ita hotu iha ne’e atu halo diskusaun ida no mós ita nia preparasaun aktividades annual ba 2017 ninian dehan hanesan ne’e ida, iha mudansa ba matrix ne’ebe iha orsida teknikamente parte administrasaun no planeamentu sei hatudu ba ita bo’ot sira para oinsa ba oin ita atu priense”, tenik Komisariu Polísia Faustino da Costa.

Segundu Komandante Jerál ne’e mós afirma tan katak, Komando Polísia Nasional Timor Leste tau iha tinan 2014-2018 tau prioridade ba iha Polisiamentu Komunitariu, Tránzitu Seguransa Rodoviariu, Asuntu Fronteira no Aktividade Operasional. Komisariu Polísia ne’e mós apela ba Komandante Unidades sira hotu katak, Planu Aktividade iha maka ita bele ezizi orsamentu nune’e bele aloka ba aktividades ne’ebe maka iha ona planu, no relata didiak ba aktividades ne’ebe tau iha prioridades.

Media PNTL.

Suai, Segundu Komandante Jerál Polísia Nasional Timor Leste (PNTL) Komisariu Polísia Faustino da Costa iha ninia visita munisipiu sira, foin lalais ne’e (18/04/2016) hala’o enkontru ho Komandante Eskuadra sira iha munisipiu Covalima hodi rona desafiu no problema ne’ebe maka munisipiu ne’e hasoru.

Enkontru ne’ebe partisipa husi Komandante Eskuadra hotu iha munisipiu Covalima ne’e, hala’o iha edifisiu PNTL munisipiu Covalima no koalia liu kona-ba kazu no krima sira ne’ebe maka rezista durante ne’e iha munisipiu Covalima rasik. Komandante Munisipiu Covalima, Superintendente Polísia Eugenio Perrera ne’ebe ofisialmente loke sessaun enkontru hateten enkontru ne’e atu informa ba Segundu Komandante Jerál kona-ba situasaun seguransa em jerál iha munisipiu Covalima iha inisiu tinan (2016) ida ne’e nian.

“Liga ho situasaun ne’ebe ami atu apresenta iha enkontru ne’e, iha munisipiu Covalima hanesan munisipiu ne’ebe iha liña fronteira terrestre, fronteira maritime no mós fronteira auréo, klaru iha liña fronteira sira ne’e iha potensia ne’ebe bele mós lori situasaun ameasas ka risku ba iha estabilidade no seguransa iha munisipiu ida ne’e,” hateten Superintendente Polísia Eugenio Perreira wainhira loke sessaun enkontru ho Segundu Komandante Jerál PNTL.

Komandante munisipiu Covalima ne’e mós hatutan tan katak karakterístika ba iha intervensaun seguransa ninia iha nivel munisipiu Covalima mai ho nia aspektu rua, maka hanesan hare’e ba iha liña fronteira, ne’ebe iha mós nia karakterístika krime ne’ebe mai ho nia natureza iha liña fronteira ninian, no aspektu segundu maka liga ba munisipiu Covalima rasik ne’ebe hatudu hahalok husi populasaun rasik ne’ebe bele kategoria ba aktu krime.

Superintendente Polísia ne’e mós esplika tipu krime ne’ebe maka rejista iha munisipiu Covalima, ba ida ne’e nia hateten, “Konforme ami nia dadus estatístika ne’ebe maka Komando munisipiu Covalima konsege akumula informasaun, liu-liu kona-ba informasaun formal liu husi rejistrasaun ba kazu ne’ebe maka ami asegura durante fulan dahuluk tinan 2016 nian maka hanesan kazu agresaun fíziku ne’eb ho númeru ass liu, kazu violensia doméstika, no kazu violasaun seksual”.

Iha fatin hanesan, Segundu Komandante Jerál Komisariu Polísia Faustino da Costa iha ninia intervensaun, louva Komandante eskuadra ho ninia Komandante munisipiu ne’ebe konsege konvense ema ne’ebe laos Suai oan mai partisipa iha aktividade motorcros iha munisipiu ne’e rasik.

“Imi halo aktividade motorcros ne’e tanba imi iha inisiativa atu komemora loron aniversariu Polísia Nasional Timor Leste (PNTL) nian ne’ebe moris halo tinan 16 no ida ne’e hola parte ona aktividade ida ne’ebe ita tau iha moto PNTL nian hanesan Vizibilidade, Involvimentu no Professionalizmu (V.I.P), tanba hare’e husi númeru ema ne’ebe mak partisipa iha aktividade motorcros ne’e que barak, ida sai ona hanesan Involvimentu ne’ebe sir abele tau iha konfiansa ba iha servisu Polísia Nasional Timor Leste nian”, tenik Komisariu Polísia Faustino da Costa ne’ebe eleva no agradese ba inisiativa hodi kria eventu motorcros ne’e.

Komisariu Polísia Faustino da Costa hateten tan katak, nia hili munisipiu Covalima hanesan munisipiu ne’ebe primeira vés nia visita, hafoin simu mandatu hanesan Segundu Komandante Jerál no mós sai hanesan munisipiu ba dala uluk iha ninia aktividade visita munisipiu.

“Komandante Jerál no hau nia mandatu implementa Planu Estratéjiku Polísia Nasional Timor Leste nian ho prioridades ha’at maka hanesan Polisiamentu Komunitariu, Seguransa Rodoviariu, Seguransa iha Fronteira no Servisu Operasionais ne’ebe labele hamrik mesak”, hateten Segundu Komandante Jerál.

Razaun tau prioridade ba iha Polisiamentu Komunitariu iha Planu Estratejiku, Komisariu Polísia Faustino da Costa hateten, ne’e implementa tanba sempre iha bebeik keixa ka lamentasaun husi populasaun nia seguransa iha suku idak-idak nian.

Media PNTL.