Uncategorized

Dili, Komandu Polísia Nasional Timor-Leste (PNTL) no Ministeriu Turizmu, Komersiu no Industria (MTKI) liu husi Inspecção Geral dos Jogos kinta-feira (21/01) ne’e asina Nota Entendimentu ka Memorandum of Understanding (MoU) hodi kontrola jogu illegal hirak ne’ebe maka akontese iha nasaun Timor-Leste.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha edifisiu MTKI Fomentu hateten liu husi MoU entendimentu ne’e maka PNTL pronto atu kontribui hodi redúz atividade liu-liu jogu illegal sira ne’ebe maka fó prejuizu ba Estadu liu husi atividade ilísitu sira.

“PNTL nu’udar forsa seguransa ida ne’ebe iha misaun atu defende Legalidade Demókratiku, garante seguransa ba ema hotu-hotu inklui riku-soin ema hotu nian iha nasaun Timor-Leste no importante mós iha atividade sira hanesan ne’e presiza iha fiskalizasaun direita no mós supervizaun inklui monitorizasaun husi autoridade relevante sira seluk”, tenik Komandante Jerál PNTL ne’e.

Autoridade masímu Instituisaun Seguransa ne’e akresenta tan atividade sira ne’e sai fali atividade komérsiu ne’ebe bele fó lukru ba ema ruma bainhira laiha kontrolu no mós monitorizasaun husi parte sira relevante.

“Iha oportunidade ida ne’e Komandu PNTL apresia no agradese ba Inspetór Jerál Jogu ho nia ekipa tomak ne’ebe hala’o formasaun ba PNTL hod bele realiza atividade asina MoU ida ne’e, agradese mós ba Ministru MTKI ne’ebe maka apoiu tebes-tebes atividade realizasaun ba asina Nota Entendimentu entre instituisaun rua hanesan PNTL no Inspecção Geral dos Jogos ninian”, hateten Komisariu Polísia ne’e.

Iha fatina hanesan Ministru MTKI José Lucas do Carmo da Silva hateten ho akordu ida ne’e la signifika katak atu bandu jogu sira, maibé governu halo akordu ne’e ho objetivu atu regularize jogu sira ne’ebe maka bele hatama reseita ba Estadu Timor-Leste.

“Ho akordu ne’e maka parte Inspecção Geral dos Jogos hamutuk ho PNTL sei halo asaun sira ne;eve konkreta hodi kombate jogu illegal sira ne’ebe maka oras ne’e dadaun buras ona iha nasaun ida ne’e, tanba iha tempu ne’ebe naruk tebes grupu balun hakarak akumula deit ba sira nia interese maibé haluha tiha saida maka Estadu Direitu”, informa governante ne’e.

Nota Entendimentu ne’e asina entre parte Primeiru nian maka Inspetór Jerál Jogu MTKI nian Domingos da Costa Guterres ho parte Segundu maka Komandante Jerál PNTL Komisariu Polísia Faustino da Costa. Hola parte iha serimonia ne’e Ministru MTKI, Komandante Jerál PNTL, Inspetór Jerál Jogu MTKI, reprezentante Vise Ministru Interior atúal Sekretariu Estadu Protesaun Sivil, Estrutura Komandu PNTL tomak inklui funsionariu MTKI nian.

 Media PNTL. 

Dili- Polisia Nasional Timor-Leste (PNTL) rejista kazu hamutuk 97 durante semana ida nia laran hahu loron 15 to’o 20 Janeiru kompostu husi insidente 57 no asidente 40 hodi halo prosesu.

Porta Voz PNTL Superintendente Xefe Arnaldo Araujo hateten  kazu ne’ebe maka PNTL rejista maka Violensia Domestika 12, asaltu 11, Baku malu 10, Amiasa 4, Ofensas Integridade Fizika Simples 15, tuda malu 2 no estraga fasilidade publiku 1, Nia hato’o asuntu ne’e liu husi komferensia emprensa ohin (Kinta, 21/01) iha Kuartel Jeral PNTL Kaikoli Dili.

Nia haktuirtan PNTL  mos rejista kazu asidente trafiku hamutuk 40, kanek kmaan 24 no kanek todan 5. Kazu hirak ne’e nia prosesu lao ona hodi hato’o ba Ministeriu Publiku nune’e submete ba justisa.

Alende ne’e PNTL rejista mos sidadaun hirak ne’ebe maka tama illegal mai Timor-Leste liu husi fronteira terrestre hahu husi loron 01-20 Janeiru 2021 hamutuk sidadaun nain 76, sidadaun hirak ne’e kompostu husi timor oan hamutuk 73 no Estranjeiru hamutuk nain 3, ne’ebe  kompostu husi feto nain 18 no mane 58. Sidadaun hirak ne’e tama ona iha karantina durante loron 14 tuir regras Saude mundial.

Kestiona konaba akontesementu tiru mate karau iha Manufahi iha suku Dotik aldeia Weto, Komandu PNTL haruka ona ekipa husi Servisu Informasaun Polisial (SIP) tun ona ba terrenu hodi halo investigasaun, ekipa ne’e hetan evidensia balu hanesan involku iha fatin akontesmentu no sei halo investigasaun hodi justifika involku ne’ebe ema uza.

Andamentu ba prosesu ne’e lao hela no hein katak iha tempu badak sei hatene semaka involve iha kazu ne’e  nune’e Komandu bele foti desijaun ba kazu ne’e.

Iha biban ne’e porta voz mos apela ba povu atu labele estraga fasilidade hirak ne’ebe maka governu prepara no tau iha fatin publiku hanesan sinain tranzitu iha Estrada, fasilidade iha Jardim, tanba kodigu penal artigu 259 krime Danu Agravadu penalija hahalok ne’e ho ameasa kadeia tinan 2 to’o 8 ou multa. Tanba ne’e PNTL sei atua wainhira hetan keixa. Media PNTL

Maliana, Komandante Jerál Polísia Nasional Timor-Leste (PNTL) Komisariu Polísia Faustino da Costa iha segunda-feira (18/01) akompaña husi Komandante Komandu Operasaun Superintendente Xefe Pedro Belo hala’o vizita servisu ida ba munisipiu Bobonaro postu administrativu Maliana hodi hare’e besik liu tan seguransa iha area fronteira liga ho situasaun Pandemia COVID-19 ne’ebe ninia númeru sae maka’as iha rai ketan Indonesia-Atambua. Objetivu husi vizita ne’e maka atu fó orientasaun balun ne’ebe mai husi parte governu ba Komandu PNTL munisipiu Bobonaro oinsa maka atu asegura seguransa iha fronteira nian.

Komandante Jerál PNTL Komisariu Polísia Faustino da Costa iha ninia intervensaun ba enkontru ne’ebe hala’o iha Komandu PNTL munisipiu Bobonaro hateten ohin oportunidade diak ida hodi mai iha ne’e hodi fahe informasaun no oinsa ba oin ita nia servisu hamutuk hodi prevene Pandemia surtu COVID-19 ninian, oinsa ita hamutuk salva ita nia povu, ita nia komunidade no salva ita nia maluk sira hotu.

“Hanesan ita hotu hatene katak ita tama ona ba Estadu Emergensia (EE) ba dala-sia ninian ne’ebe hahu’u iha loron 3 fulan Janeiru sente katak todan oituan tanba suspende aktividade lubuk ida hanesan eskola la lao, misa iha igreja mós laiha, iha mós aktividade lubuk ida seluk ne’ebe labele lao”, tenik Komandante Jerál PNTL ne’e.

Komisariu Polísia akresenta tan katak hare’e ba situasaun iha rai laran liu-liu ba númeru moras COVID-19 komesa menus maka iha semana kotuk (sexta-feira) iha fila fali alterasaun ida, hafoin Konsellu Ministru altera ou hamamar oituan regras EE sira nian ba dala-sia maibé iha tempu ida hanesan ita nia Konsuladu Timor nian iha nasaun Indonesia liu-liu iha parte osidental aktualiza ba ita kona-ba situasaun ita nian iha parte tasi sorin ne’ebe fó risku tebes-tebes ba ita rasik iha Timor-Leste.

“Hakarak agradese ba Prezidente Autoridade ho nia ekipa tomak ninia esforsu tomak durante ne’e katak ita presija servisu hamutuk nafatin, reforsa liu tan laos deit iha parte Bobonaro nian maibé tantu mós iha munisipiu Covalima no mós iha Oecusse”, afirma Komisariu Polísia ne’e.

Iha biban ne’e, lider komunitaria sira munisipiu Bobonaro nian pronto nafatin atu servisu hamutuk ho Komandu PNTL munisipiu Bobonaro nian iha âmbitu prevensaun ba Surtu COVID-19 nian no mós asegura seguransa iha area fronteira.

Hola parte iha enkontru ne’e Komandante Jerál PNTL Komisariu Polísia Fautino da Costa Komandante Komandu Operasaun Superintendente Xefe Pedro Belo, Prezidente Autoridade munisipiu Bobonaro, Autoridade Postu, Xefe Suku no estrutura tomak Komandu PNTL munisipiu Bobonaro nian. Media PNTL.               

Dili- Polisia Nasional Timor-Leste (PNTL) rejista ema nain tolu (3) mate durante semana ida nia laran hahu loron 8-14 Janeiru tinan 2021 tanba asidente trafiku no insidente.

Porta voz PNTL Superintendente Xefe Arnaldo Araujo informa hahu loron 8 to’o 14 fulan ne’e Polisia Nasional Timor-Leste rejista ema nain ida mate tanba asidente trafiku entre kareta Bus no motorizada Honda Revo Fit ne’ebe soke malu iha area Manduki-Atabae rejulta vitima Joaquina Guilhermina (57) husi suku Sanirin Atabae mate, Nia hato’o asuntu ne’e liu husi komferensia emprensa ohin (Kinta 14/01) iha Kuartel Jeral PNTL Kaikoli Dili.

Komandante ne’e informatan PNTL mos rejista kazu insidente rua seluk maka eletrisidade soke mate vitima Dinis de Jesus Amaral (40) nudar professor husi Eskola Tekniku Profesional Akar laran munisipiu Covalima, vitima mate tanba la kuidadu aan wainhira hadia ahi eletrisidade iha nia uma.

Alende ne’e iha mos kazu ikan lanu ema nain ida mate iha suku Parlamentu munisipiu Lautem vitima Leonel Fernandes (9) no ema nain sia (9) seluk konsege lori ba ospital hodi halo tratamentu, ema hirak ne’e konsumu ikan ne’ebe maka sira kaer iha tasi maibe ikan ne’e iha benenu.

Porta Voz ne’e haktuirtan durante semana ne’e nia laran PNTL rejista insidente hamutuk 44 kompostu husi Asaltu malu kazu 11, baku malu kazu 14, Tuda malu 3, Tuda uma 1, Violensia Domestika 13, ikan lanu ema 1 no eletrisidade soke ema kazu ida (1) no asidente ne’ebe maka akontese hamutuk 16 no rejulta vitima ida mate.

Atualija mos katak hahu loron 29 fulan Dezembru 2020 to’o agora iha ema barak maka tama mai husi fronteira, sidadaun balu iha pasaporte kompletu maibe tanba momentu neba odamatan portaun taka hela entaun sira liu husi dalan illegal maibe sira ba aprejenta aan iha postu Polisia UPF iha lina fronteira no UPF lori sira ba Servisu Migrasaun hafoin kumpri karantina iha Mota Ain, Prosesu ba sidadaun hirak ne’e lao hela no lao tuir regras ne’ebe maka iha. Media PNTL

Dili, Durante loron hitu nia laran hahu’u husi loron 30 fulan Desembru 2020 to’o loron 05 fulan Janeiru tinan 2021 Komandu Polísia Nasional Timor-Leste (PNTL) rezista kazu Insidente hamutuk 69 no Asidente hamutuk kazu 23. Maske nune’e situasaun seguransa iha teritoriu nasional lao diak no hakmatek.

Porta Voz Komandu PNTL Superintendente Xefe Arnaldo Araújo liu husi konferensia Imprensa tersa-feira (05/01) ne’e iha Kuartél Jerál informa kazu Insidente ne’ebe maka mosu durante loron hitu nia laran, kazu ass liu maka asaltu malu, violensia domestika, baku malu no tuda malu.

“Kazu asidente ne’ebe maka akontese durante loron hitu nia laran rezulta ema na’in rua mate fatin no na’in 12 hetan kanek kma’an, enkuantu total kazu insidente ne’ebe maka mosu hanesan kazu asaltu malu hamutuk 31, violensia domestika kazu 9, baku malu kazu 9 no kazu tuda malu hamutuk 7”, informa Porta Voz Komandu PNTL ne’e.

Superintendente Xefe Arnaldo akresenta tan katak iha loron 02 fulan Janeiro tinan 2021 ema asaltu malu iha Suai suku Beco aldeia Diluhilil postu admistrativu Suai Villa munisipiu Covalima rezulta ema na’in hat kanek, suspeitu hamutuk na’in lima, na’in hat detein ona iha sela PNTL munisipiu Covalima no suspeitu ida seluk ho inisial A.S PNTL sei buka tuir hela, motivu husi asaltu malu ne’e sei iha prosesu nia laran.

“Iha loron sabadu 02/01 oras 10:00 matebian ho naran António de Araújo tinan 28 monu mesak husi rai naruk no mate fatin, iha aldeia Maubok suku Fatisi munisipiu Aileu; motivu husi akontesimentu ne’e maka bainhira matebian sai husi uma atu ba vizita nia familia hodi hato’o Boas Festas wainhira to’o iha aldeia Maubok matebian monu ba rai naruk mate iha fatin, kazu refere oras ne’e iha hela prosesu investigasaun”, esplika Superintendente Xefe ne’e.

Aktual Xefe Gabinete Relasaun Públika PNTL ne’e afirma tan katak iha loron 04 Janeiro tinan 2021 mosu abuzu Seksual ida iha munisipiu Ermera iha ne’ebe joven feto ida ho idade 19 anos ho inisial AV hela iha Dili (Bebonuk) ho nia familia ba iha Gleno, wainhira to’o iha ne’eba vitima (joven feto-red) hetan violasaun abusu seksual husi mane joven na’in tolu, oras ne’e dadaun PNTL munisipiu Ermera hala’o hela ninia prosesu investigasaun.

Komandu PNTL Husu Ba Komunidade Atu Kumpri Regras EE

Relasiona ho situasaun Pandemia Covid-19 iha Timor-Leste, iha inisiu tinan 2021 Prezidente Repúblika dekreta tan extensaun Esradu Emergensia (EE) ba Da-sia liu husi Dekretu Prezidente Nu.73/2021 no Dekretu governu Nu.21/2021 iha ne’ebe Ministeriu Saúde (MS) aplika Protokolu hanesan medida sira hodi prevene moras Covid-19, maka Komandu PNTL husu ba komunidade sira atu kumpri regras hirak ne’ebe maka MS fó sai.

“Husu ba komunidade sira atu kumpri regra sira husi MS hanesan wainhira sai husi uma tenke uza mascara, fase liman ho sabaun, distansia sosial husi ema ida ho ema seluk, labele halibur malu liu ema na’in sanulu, laiha aktividade kultura hanesan festa ou serimonia sira ne’ebe halibur ema barak, molok tama ba supermerkadu sira tenke fase liman no matein distansia sosial iha loja laran”, apela Xefe Gabinete Relasaun Públika PNTL ne’e.

Media PNTL.      

Dili- Polisia Nasional Timor-Leste husu ba povu atu selebra loron boot tinan foun 31/12, 01/Janeiru 2021 ho paz no domin.

Komandante Jeral PNTL Komisariu Faustino da Costa husu atu povu tomak liu-liu joven sira atu ita hotu festeja tinan troka malu ida ne’e ho diak, ho domin, dame no paz wainhira hemu tenke sukat aan kuandu bosu demais deskansa labele halo viajen no inpedimentu ba ema seluk, tanba ita hotu hatene joventude maka futuru familia no nasaun nian, Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili Tersa (29/12).

Komisariu ne’e haktuirtan akontesmentu hirak ne’ebe maka durante ne’e mosu mai husi joventude no grupu eis arte marsiais tanba ne’e nudar timor oan hakarak husu ba timor oan hotu atu hamutuk, hadomi malu no hametin paz hahu husi ita nia uma laran antes ita halo ba maluk sira seluk.

Iha biban ne’e Komandante Jeral mos hato’o ba publiku katak iha loron 31/12 bele sunu fugetes iha fatin ne’ebe maka determinadu hanesan Sao Paulo no Kristu Rei laos iha jardim igreja, kapela no iha dalan publiku ne’ebe bele hamosu risku ba ema seluk ne’ebe halao nia atividade liu-liu misa kalan no loron tinan foun.

Relasiona ho situasaun pandemia surtu COVID-19 iha Timor-Leste maka lideransa maximu instituisaun Seguransa apela ba komunidade tomak atu nafatin kopera, kolabora no kontribui ba regras ne’ebe Ministeriu Saude no Organizasaun Saude Mundial (OMS) fo sai maka fase liman ho sabaun, uza maskra, liu-liu ba asesu fatin publiku nomos oinsa atu bele mantein distansia sosial iha nebe deit no bainhira deit tanba Ita nia governu atualija konaba pandemia COVID-19 ne’ebe ohin loron numeru afetadu hahu aumenta iha Timor-Leste no nasaun seluk.

Iha oportunidade ne’e Komandu PNTL mos relata ba publiku katak iha tinan 2020 PNTL halo esforsu tomak hodi halao nia knaar hodi asegura seguransa ba povu tomak iha rai ida ne’e inklui nia riku soin, maske nune’e PNTL rejista akontesementu ka insidente iha nivel teritoriu nasional no munisipiu 12 inklui RAEOA Hahu Janeiru to’o 27/12 2020 hamutuk kazu 4.197 no ema lubuk ida maka lakon sira nia vida tanba suisidiu (hatalik aan) alende ne’e rejista mos asidente rodaviariu 1.415 no rejulta vitima nain 74 maka lakon sira nia vida (mate).

Alende PNTL mos loke prosesu balu ba atuasaun no inpedimentu husi nia membru sira hamutuk kazu 181 entre kazu hirak ne’e iha kazu 26 maka hetan ona desijaun ba suspensaun no kazu 3 maka hetan demisaun; maioria kazu abandona servisu no arte marsiais.

PNTL kontinua prosesu nia membru sira ne’ebe la kumpri regras no lei ne’ebe iha tuir regulamentu disiplinar PNTL nian, ho nune’e husu nafatin ba membru no Komandante sira hotu atu sai ezemplar nudar inplementador lei.

Antes atu remata hodi estrutura Komandu PNTL nia naran hato’o Boas Festa do Santo Natal no Boas entradas 01 de Janeiru 2021 ba Komandante no membru PNTL hotu, parseru servisu, ekipa konjuntu nomos povu tomak fiar katak prejensa loron foun tinan 2021 nian sei lori roman foun mai ita nune’e ita bele kontinua moris iha dame, paz, no feliz ho prejensa Jejus Kristu iha ita nia leet. Media PNTL

Maliana, Komandu Polísia Nasional Timor-Leste (PNTL) sexta-feira semana kotuk (18/12) realiza Parada Prontidaun hodi asegura seguransa festa Natal 2020 no Tinan Foun 2020 no garante ezekusaun implementasaun Estadu Emergensia (EE).

Komandante Jerál PNTL Komisariu Polísia Faustino da Costa iha ninia intervensaun ba iha serimonia ne’ebe hala’o iha Komandu PNTL Munisipiu Bobonaro hateten hanesan ita hotu hatene katak oras ne’e dadaun PNTL nu’udar instituisaun Estadu nian ne’ebe designa hodi bele defende Legalidade Demokrátiku no garante seguransa ba ema hotu inklui asegura riku-soin sasan ema hotu nian no mós protégé bebeik Direitus Umanus, Direitu Sidadaun sira liu-liu iha termu ne’ebe konstitui iha Lei no Regulamentu sira.

“Iha tempu Natal nu’udar oportunidade ida ikus kona-ba Festa Familia ninian iha tinan-tinan ne’ebe koñesidu selebrasaun ida ita hanaran Festa Natal 25 Desembro, nune’e partikularmente iha Timor-Leste ita hotu hatene no mós rekoñese katak festa ida ne’e laos selebra deit própriu iha Timor-Leste maibé Kristaun iha mundu tomak festeja hanesan mós Timor-Leste sei hala’o”, tenik Komandante Jerál PNTL ne’e.

Autoridade másimu seguransa ne’e afirma tan katak iha tinan 2020 ida ne’e mós sai hanesan supreza bo’ot ida no liu-liu laos deit Timor-Leste maka hasoru maibé mundu tomak hasoru dezafiu no mós Pandemia iha ne’ebe hanaran SARS CO2 ka koñesidu COVID-19 nune’e situasaun ida ne’e obriga ita liu-liu membru sira PNTL ninian atu foti medida ida ne’ebe sepsional laos deit ba populasaun maibé mós refere liu kona-ba aktividade sira PNTL ninian.

“Durante iha tinan 2020 ita hotu asiste no akompaña kona-ba implementasaun EE ne’ebe hahu’u kedas iha loron 27 fulan Marsu no oras ne’e dadaun Timor-Leste tama iha implementasaun EE ba dala-walu nian nu’udar ita hotu hatene, importante tebes mós iha parte ida ne’e atu bele kontrola Pandemia ida ne’e iha nasaun nia laran husi Pandemia ne’ebe afeta tebes laos deit iha Timor-Leste maibé iha mundu tomak ne’ebe aktividades sosias, ekonomikas no mós halo hodi rezulta ema balun iha rai liur lakon sira nia servisu, lakon sira nia familia no mós balun sira nia familia tenke hela iha sala Isolamentu no hela iha sala Isolamentu akontese mós ba iha Timor-Leste”, haktuir na’in ulun PNTL ne’e.

Komisariu Polísia ne’e akresenta tan iha tempu susar ida ne’e partikularmente ho situasaun epidemologika iha mundu tomak maka kontrolo sira iha area fronteira sai mós hanesan alvu ida ne’ebe instituisaun seguransa en-kooperasaun ho instituisaun defesa tenke asegura katak ita nia sosiedade, komunidade tenke seguru no evita propagasaun kona-ba Virus Pandemia COVID ida ne’e.

“Hare’e ba situasaun hirak ne’e ba iha implementasaun EE ida ne’e maka Komandu PNTL orienta oinsa atu asegura no reforsa liu tan seguransa iha fronteira, maka Komandu koloka mós UEP, UPF ne’ebe destaka nanis hamutuk ho UPM hanesan mós Komandu munisipiu sira liu-liu iha fronteira atu garante katak sidadaun sira bele halo sira nia movimentu ida ne’ebe laiha infesaun ba iha Virus SARS CO2 ida ne’e; além-de ne’e mós iha implementasaun EE ida ne’e instituisaun PNTL hari’I no kria Postu temporariu/ Postu Vizilansia iha area sira ne’ebe nesesita katak presiza tau duni ita nia seguransa hodi garante laos deit ba aktividade ida ne’ebe ita preukupa maibé mós ba aktividades sira hotu ne’ebe tuir Lei la permite ou ita hanaran Kontra-Bandu”, hakotu Komandante Jerál PNTL ne’e.

Media PNTL. 

Dili, Komandu Polísia Nasional Timor-Leste (PNTL) liu husi Departamentu Administrasaun no Planeamentu Nasional (DAP) no Departamentu Polisiamentu Komunitaria Nasional (DPKN) hamutuk ho parseiru desenvolvimentu The Asia Foundation (TAF) sexta-feira (11/12) ne’e realiza Kolokiu Nasional ida kona-ba Planu Asaun Munisipiu (PAM) ne’ebe akipa traballu husi TAF, Planeamentu Nasional no DPKN prepara ona ba Komandante PNTL munisipiu 13, Komandante Eskuadra no Polisiamentu Komunitariu munisipiu sira.

Planu Asaun Munisipiu (PAM) mak mata-dalan ida ba servisu Polisiamentu Komunitáriu hodi implementa estratejía Komandu Jerál nian ba atinji vizaun no misaun enjeral. PAM ne’e mós sai nu’udar dokumentu advokasia ida hodi halo kontaktu ho parte interesada sira atu hetan atensaun hodi aloka rekursu finanseiru no seluk tan ba apoia servisu polisiamentu komunitáriu no estratejía PNTL enjeral.

Xefe DAP Superintendente Calistro Gonzaga iha entrevista hateten sorumutu ohin ne’e atu ita hare’e Planu Asaun Munisipal ida ne’ebe maka atu halo Uniforme, atu hetan apoiu husi ajénsia internasional sira.

“Tanba iha avaliasaun lubuk ida ne’ebe maka ita halo, iha munisipiu balun maka iha avansu/mudansa maibé iha munisipiu balun presiza hetan mós informasaun hodi hetan ballansu, nune’e maka ita realiza sorumutu ida ne’e atu bele kompratilla/fahe informasaun kona-ba Normas Organizasaun Planeamentu Asaun Munisipal nian”, esplika Xefe DAP ne’e.

Superintendente Calistro afirma tan iha sorumutu ne’e iha diskusaun kona-ba segmentu saida maka sei ajusta ba iha Normas Organizasaun ida ne’e, hodi ikus mai hetan rezultadu segmentu saida ba Normas ida ne’e no aprezenta ba Komandante Jerál PNTL hodi aprova, nune’e ita utiliza hanesan Planu Asaun Munisipal (PAM) atu bele hetan apoiu husi parseiru desenvolvimentu sira.

“Planu ne’e ona maibé ita hakarak atu ajusta fila fali, tanba iha munisipiu balun ne’ebe maka implementa husi TAF halo ona maibé iha munisipiu balun seidauk hetan informasaun konkretu tanba ne’e maka ita halo Normas ida ne’e atu bele munisipiu hotu-hotu tenke hetan informasaun, atu nune’e iha tinan 2021 hotu-hotu tenke lao ho Planu ida ne’e”, akresenta Superintendente ne’e.

Planu Asaun Munisipal (PAM) ida ne’e sei lao ho ninia Normas programa sira hanesan atu hetan apoiu kona-ba sorumutu, deseminasaun Lei ruma, atu halo sensibilizasaun ba informasaun husi polísia ba iha komunidade, ida ne’e maka ita halo Normas ida atu munisipiu sira hotu tenke hato’o informasaun ba komunidade tenke uniforme.

Kolokiu ho tema “Aprezentasaun Normas Prosedimentu No Organizasaun (NOP) Ba Planu Asaun Munisipal (PAM), Programa Polisiamentu Komunitariu” hala’o iha salaun Konferensia Tower-Fatuhada ne’ebe abertura husi Komandante Jerál PNTL Komisariu Polísia Faustino da Costa akompaña husi Komandante TLPDP, Xefe DAP, Xefe DPCN no partisipante sira iha Kolokiu ne’e maka Komandante PNTL munisipiu 13, Komandante Eskuadra no Polisiamentu Komunitariu munisipiu sira.

Media PNTL.        

Dili- iha insiu fulan Dezembru Polisia nasional Timor-leste (PNTL) rejista kazu insidente hasmutuk hitu (7) no asidente trafiku tolu(3)

Porta Voz PNTL Superintendente Xefe Arnaldo de Araujo hateten durante inisiu fulan Dezembru PNTL rejista kazu insidente hamutuk 7 ne’ebe rejulta ema nain ida (1) mate tanba monu husi ai, Nia hato’o asuntu ne’e liu husi komferensia emprensa iha Sentru Formasaun Polisia Komoro Dili, Kinta (11/12).

Nia haktuirtan alende ne’e rejistamos kazu asaltu cineza iha Baucau, Ahi han uma, tentativa sexual hasoru minoridade iha munisipiu Cova Lima no kazu seluktan, Alende ne’e PNTL mos rejista Asidente trafiku hamutuk tolu (3), nain ida mate no rua kanek kmaan, asidente ne’e akontese tanba fator humanu kondus motor ho kondisaun lanu no la kontrola velosidade.

     Liu husi Komferensia emprensa ne’e Porta Voz PNTL husu ba sidadaun hotu-hotu  liliu ba joven sira labele hemu tua iha dalan publiku hodi halo perturbasaun no Nafatin bandu sunu foguete/ só bele sunu iha 31 kalan hodi simu tinan foun.

Fo hanoin mos winhira iha tempu udan kuidadu uza Telefone tanba bele iha koneksaun ho dejatre railakan nune’e mos wainhira lori kareta ho motorizada labele preokupa ho telephone tanba bele hetan asidente. Nune’e mos inan-aman sira atu kontrola oan sira iha tempu udan bo’ot tun labele ba halimar be’e iha Estrada publiku tamba bele fó ameasa ba ita/Desastre. Media PNTL

Dili- Polisia Nasional Timor-Leste (PNTL) halao workshop loron ida ba Xefe operasaun munisipiu no xefe Sentru Operasaun Distrital hodi halo uniformijasaun relatoriu servisu Komandante sira nian.

Komandante Jeral PNTL Komisariu Faustino da Costa hateten liu husi worksop ida ne’e atu fo hanoin hikas ba Komandante sira atu nune’e kualker atividade ne’ebe maka sira halao tenke relata informasaun kompletu mai Komandu Jeral, Nia hato’o asuntu hirak ne’e iha Sentru Formasaun Polisia Komoro Dili, Kinta (10/12).

Komisariu ne’e haktuirtan Komandante sira mos tenke identifika problema saida maka akontese hodi halo planu operasaun no planu atendementu hodi fo seguransa maximu ba povu no nasaun.

Durante ne’e dalaruma komandante sira hato’o relatoriu atraza, relatoriu la kompletu no presija verifika fali tanba ne’e maka liu husi avaliasaun ne’ebe maka ita halao ho Komandante Sentru Operasaun Nasional foun nesesita katak ita presija halo fila-fali workshop ida hanesan ne’e para halo uniformijasaun tanba iha rotasaun komandante husi nivel nasional to’o munisipiu, Unidade, Xefe Seksaun no Xefe Operasaun munisipiu sira tanba ne’e maka presija halo uniformijasaun katak ita nia formatu relatoriu maka ida ne’e no presija hotu-hotu kompleta.

Relasiona ho selebrasaun loron Santu  Natal no tinan foun Komandu PNTL hasai ona orientasaun operasaun ba Komandante munispiu sira atu asegura seguransa  maibe emprinsipiu fugetes ne’e ita bandu no autorija deit ba ida ne’ebe iha lisensa ka autorijasaun tanba iha tempu babain la autorija atu tiru fugetes so autorija deit iha loron 24, 25 nomos 31 kalan laos loron kalan tarutu iha kintu-kantu.

Kestiona konaba prekupasaun publiku konaba atuasaun Polisia nian ne’ebe dalaruma uza forsa liderasaun ne’e hateten la iha lei Polisia nian ka normas ida autorija aktu uza forsa tanba ne’e Komandu halo ona prosesu hodi investiga oknum membru PNTL ne’ebe maka halo atuasaun uza forsa iha kazu sunu sasan sexta baziku iha munisipiu Viqueque.

Workshop loron ida ne’e organija husi Sentru Operasaun Nasional ho apoiu husi parseru TLPDP no partisipa husi Komandante do Komandu Operasaun Nasional, Xefe relasaun Publika no porta Voz PNTL, Komandante Sentru Formasaun Polisia, Xefe Operasaun munisipiu, Xefe Sentru Operasaun Distrital. Media PNTL