Uncategorized

Dili, Komandu Polísia Nasional Timor-Leste (PNTL) kinta-feira (12/04) ne’e liu husi Komandante Jerál akompaña husi Segundu Komandante Jerál PNTL hasoru malu Presidente Repúblika (PR) hodi informa situasaun seguransa iha rai laran liu-liu iha tempu kampaña Eleisaun Antesipada (EA).

Komandante Jerál PNTL Komisariu Polísia Julio da Costa Hornay hafoin enkontru ba jornalista sira hateten situasaun seguransa iha periodu dahuluk kampaña eleitoral ninian lao ho diak no seidauk iha problema ida bo’ot maka mosu ne’ebe maka presija toma atensaun.

“Ita nia seguransa nafatin iha munisipiu, reforsa tan ita nia Unidade Espesial ba iha ne’eba atu bele asegura lalaok kampaña iha munisipiu tuir orariu ne’ebe maka iha”, tenik na’in ulun PNTL ne’e.

Komisariu Polísia Julio da Costa Hornay esplika liu tan katak iha Oecusse maka kazu ida iha mini kampaña ida ne’ebe mosu la tuir orariu nasional no sira aproxima koalia ba malu hodi hapara no karik iha maka Comissão Nacional Eleição (CNE) kuando hasai ona orariu ruma ou dezisaun ruma ita halo tuir ida ne’e.

Partidu Balun Uza Atributu Artemarsias iha Kampaña EA, Komandu PNTL Hato’o Ona Ba MP

Relasiona ho partidu balun ne’ebe maka uja atributu artemarsias iha kampaña Eleisaun Antesipada (EA) maka Komandu PNTL hato’o ona kazu refere ba Ministeriu Públiku (MP) hanesan na’in ba prosesu hotu no ita hein orientasaun husi MP.

“Medida maka ita halo, kazu saida deit maka mosu, sé maka na’in ba prosesu MP hanesan ezekutador iha terenu ne’e ita hato’o no rezistu hafoin MP hato’o nia dezisaun mai oinsa”, hateten Komandante Jerál PNTL ne’e.

Komisariu Polísia ne’e apela ba militante partidu politiku sira hotu atu respeitu Lei ne’ebe maka iha no ita nia polísia oan sira ne’ebe iha terenu hala’o dever ne’ebe maka sira iha, kumpri sira nia dever mantein Lei.

“Portantu laiha autorizasaun atu halo movimentu partidu politikus nian ho atributu artemarsias ninian tanba ne’e wainhira iha kampaña maka partidu politiku uza atributu artemarsias ninia maka PNTL sei halo ninia atuasaun, tanba Lei sei vigora”, hakotu Komisariu Polísia Julio da Costa Hornay.

Media PNTL.         

Dili, Komandu Polísia Nasional Timor-Leste (PNTL) tersa-feira ne’e (10/04) hala’o enkontru ho Korpu Diplomatiku no Adidu Seguransa inklui reprezentante embaixada sira iha Timor-Leste kona-ba situasaun seguransa iha rai laran relasiona ho periodu kampaña, eleisun no formasaun governu.

Segundu Komandante Jerál PNTL Komisariu Polísia Faustino da Costa ne’ebe lidera enkontru ne’e hateten objetivu husi briefing ne’e maka oinsa adidu hirak ne’e bele akompaña situasaun tanba além-de ne’e ita presija fó hatene ita nia preparasaun oinsa atu asegura para sira labele sente tauk tanba sira nia ema iha Timor.

“Aproveita iha biban ne’e atu husu sira nia kolaborasaun no kooperasaun atu oinsa sira nia movimentu balun ba iha munisipiu ou ba area balun ne’ebe risku atu sira bele informa mai Komandu ou ba Komandu munisipiu ou keta sira iha eventu balun atu halo tanba ne’e informa ba sira katak iha tempu kampaña aktividade bo’ot seluk labele halo”, tenik Segundu Komandante Jerál PNTL ne’e.

Komisariu Polísia Faustino da Costa subliña liu tan katak iha apresentasaun enkontru ne’e identifika munispiu lima maka potensia ba area konflitu tanba ne’e iha briefing ne’e ita hatene ona oinsa atu bele asegura.

“Marka presensa iha briefing ne’e embaixada hotu-hotu ne’ebe existe iha Timor, sira nia adidu defesa, adidu seguransa sira husi Estadu Únidu Amerika, Australia, China, Filipina, no nasaun sira ne’ebe estabelse sira nia embaixada iha Timor-Leste”, hatutan Komisariu Polísia ne’e.

Laiha Orsamentu Hadia Eskuadra Polísia Komoro

Relasiona ho kondisaun edifisiu eskuadra Polísia Komoro ne’ebe grave tebes, Segundu Komandante Jerál PNTL relata katak sé kuandu situasaun politika normal orsamentu jerál estadu iha maka PNTL sei halo buat ruma atu bele hadia.

“Situasaun politika sei hanesan ne’e orsamentu jerál estadu laiha, ita uza duadésimu oinsa maka ita bele hadia ida ne’eba (eskuadra Polísia Komoro-red) sai diak, sé governu foun mai sei metin no orsamentu jerál estadu iha maka PNTL sei hadia ida ne’e”, hateten Komisariu Polísia Faustino da Costa.

Segundu Komandante Jerál PNTL akresenta liu tan katak problema eskuadra polísia Komoro nian ne’e, Komandu iha ona planu, deseñu no fatin atu oinsa bele hadia atu nune’e wainhira tempu udan fatin ne’e labele nakonu ho be’e bebeik hanesan agora dadaun.

Media PNTL.   

Dili, Komandu Polísia Nasional Timor-Leste (PNTL) no FALINTIL Forsa Defeza Timor-Leste (F-FDTL) sei garante seguransa durante periodu kampaña, eleisaun to’o formasaun governu foun. Lia hirak ne’e hato’o husi Komandu rua ne’e liu husi konferensia imprensa ida ne’ebe hala’o iha Segunda-feira (09/04) ne’e iha Kuartél Jerál F-FDTL Fatuhada.

Komandante Jerál PNTL Komisariu Polísia Julio da Costa Hornay iha konferensia ne’e hateten eleisaun antesipada hanesan solusaun ida ne’ebe maka Presidente Repúblika foti hodi resolve problema impase politika ne’ebe maka akontese iha ita nia rai, tanba ne’e nu’udar Timor oan ita hotu iha dever atu asegura desizaun ida ne’e nune’e dala ida tan povu sei hili ninia reprezentante iha Parlamentu Nasional no ninia matenek nain sira atu tu’ur iha governu hodi desenvolve ita nia rai liu husi votus ne’ebe povu idak-idak sei fó ho ninia konsiensia rasik.

“Atu Eleisaun Antesipada (EA) ne’e lao ho diak no susesu presija povu tomak nia kontribuisaun hamutuk ho Forsa Seguransa no Defesa hodi hametin estabilidade no paz nune’e prosesu tomak EA nian hahu’u husi kampaña to’o formasaun oitavu governu konstituisaun bele lao ho diak no susesu”, tenik Komandante Jerál PNTL ne’e.

Komisariu Polísia Julio da Costa Hornay akresenta liu tan katak nu’udar responsavel másimu ba seguransa husu nafatin povu tomak nia kontribuisaun ba estabilidade no paz iha ambiente EA ida ne’e, tane ass maturidade politika ne’ebe hatudu ona iha eleisaun parlamentar liu ba ne’ebe hetan apresiasaun bo’ot tebes husi mundu internasional.

“Forsa Seguransa PNTL ho Forsa Defesa F-FDTL en-koordenasaun prontu ona servisu hamutuk hodi asegura EA ida ne’e, maibé ami mesak sei labele presija povu tomak nia apoiu, PNTL sei hatu’un nia efetivus tomak Komandu sei fó apoiu efetivu hodi reforsa Komandu Munisipiu sira hodi asegura eleisaun ne’e”, hatutan Komisariu Polísia ne’e.

Iha fatin hanesan Xefe Estadu Maior Jeneral F-FDTL Major Jeneral Lere Anan Timur iha oportunidade ne’e koalia katak instituisaun rua ne’e (PNTL no F-FDTL) iha ninia estatutu organiku ne’ebe define momos ba ninia elementu sira.

“Instituisaun rua ne’e apésar ida toma konta seguransa interna, ida defesa externa maibé bandu la halo faz parte, la pratika politika ou la tama partidu ne’e ohin ami reuniaun tu’ur hamutuk ho Komandante hotu-hotu fó hanoin fila fali atu bele alerta nafatin”, hateten Xefe Estadu Maior Jeneral F-FDTL ne’e.

Major Jeneral Lere Anan Timur haktuir liu tan katak ida seluk ba Forsa Defesa Timor-Leste úniku tantu PNTL únika instituisaun iha Timor, Forsas Armadas da Repúblika Demokratika Timor-Leste laiha seluk.

Partisipa iha Konferensia ne’e Komandante PNTL Munisipiu 13 inklui Komandante F-FDTL sira hotu.

Media PNTL.  

Maliana_ Komandu Polísia Nasional Timor-Leste (PNTL) munisipiu Bobonaro hamutuk ho Comissão Nacional Eleição (CNE) no Konsellu Seguransa munisipou Bobonaro iha loron 6 fulan Abril tinan ne’e hala’o reuniaun konsolidasaun no asina Paktu Unidade Nasional ho reprezentante Partidu Politiku sira ne’ebe maka sei kompete iha Eleisaun Antesipada (EA) atu bele garante seguransa durante realizasaun kampaña no EA tinan ne’e.

Komandante Komandu Operasaun ne’ebe reprezenta Komandu Jerál PNTL Superintendente Xefe Henrique da Costa hafoin serimonia ba jornalista sira hateten Komandu Jerál liu husi Komandu Operasaun hasai ona ordem operasaun ba Komandante Munisipiu sira, Xefe Servisu, Komandante Unidade, Xefe Departamentu atu nune’e bele prepara planu operasaun idak-idak nian ba iha kampaña no eleisaun ninian.

“Orientasaun no ordem operasaun distribui ona liu husi xefe operasaun munisipiu 13, xefe operasaun Unidade sira, xefe operasaun servisu sira hotu-hotu simu ona lori ba iha sira nia fatin atu sira bele prepara fali sira nia planu operasaun atu bele ezekuta iha kada idak-idak nia munisipiu”, tenik Komandante Komandu Operasaun ne’e.

Superintendente Xefe Henrique da Costa esplika liu tan katak iha parte fronteira ninian ita orienta ona ba Komandante Munisipiu sira ne’ebe maka iha fronteira atu nune’e bele alerta no sira servisu hamutuk ho Unidade Patrullamentu Fronteira atu nune’e bele asegura seguransa iha liña fronteira.

Iha biban hanesan serimonia ne’e nian entrega mós armas brankas ne’ebe mak Grupu Arte Marsias sira uza durante ba Komandu PNTL Munisipiu Bobonaro no halo juramentu hodi la komete tan aktu krime iha munisipiu refere. Komandante PNTL Munisipiu Bobonaro Superintendente Xefe Armando Monteiro hateten basea ba Lei nu.5/2017 nian kona-ba Armas Brankas nian maka Komandu PNTL Munisipiu Bobonaro liu husi Ofisial Polísia Suku (OPS) halo dezeminasaun Lei refere ba komunidade sira iha baze.

“Liu husi dezeminasaun Lei ida ne’e maka komunidade nia kontribuisaun no sira nian partisipasaun másimu hodi bele entrega volontariamente armas brankas ne’ebe maka ita nia governu bandu ona atu bele uja no ita nia komunidade mós hakarak kontribui hodi garante paz no estabilidade iha sira suku”, hateten Komandante PNTL Munisipiu Bobonaro ne’e.

Superintendente Xefe Armando Monteiro akresenta liu tan katak liu husi programa ida ne’e maka Komandu PNTL Munisipiu Bobonaro laos halo operasaun maibé liu husi diálogu, dezeminasaun no aproximasaun ba ita nia komunidade no komunidade sira maka entrega armas brankas hirak ne’e mai autoridade seguransa munisipiu ninian.

Iha fatin hanesan Presidente Autoridade Munisipiu Bobonaro iha nia diskursu agradese ba repezentante partidu poliitku sira hotu ne’ebe maka asina ona Paktu Unidade Nasional, asaun hirak ne’e tanba esforsu husi Komandu PNTL Munisipiu Bobonaro ho estrutura tomak hodi bele organiza aktividade refere.

Programa ne’e realiza hetan suporta husi parseiru desenvolvimentu United Nation Development Programme (UNDP) no servisu hamutuk ho CNE Munisipiu Bobonaro, Komandu PNTL Munisipiu Bobonaro. Partisipa iha enkontru ne’e Autoridade Lokal, Xefe Suku, estudante no komuniadade sira. Tema ba programa ne’e maka “Trankualidade, Dame, Hakmatek no Seguru iha Prespektiva Seguransa Nasional Ba Kampaña Politika no Eleisaun Antesipada 2018 Iha Timor-Leste Espesialmente Iha Munisipiu Bobonaro”.

Media PNTL.   

Viqueque, Comissão Nacional Eleição (CNE) hamutuk ho Komandu Polísia Nasional Timor-Leste (PNTL)  munisipiu Viqueque, iha loron 3 fulan Abril tinan ne’e hala’o aktividade Edukasaun Sivika ba komunidade sira iha munisipiu Viqueque.

Presidente CNE Alcino Barris iha sorumutu ne’e hateten ohin hanesan oportunidade diak bele mai hamutuk ho komunidade sira liu-liu atu fahe informasaun ruma relasiona ho prosesu eleisaun ne’ebe atu hala’o dadaun no oinsa ho informasaun ne’ebe fahe atu hametin no hakbi’it liu tan ita nia partisipasaun iha eleisaun antesipada ida ne’e.

“Ohin ami iha jestu ida ne’ebe hasoru malu ho ita bo’ot sira ho maneira edukasaun sivika ne’ebe lolos pertenente liu maka ami fahe informasaun, situasaun hanesan ne’e iha dekretu Lei fahe ona ba 12 iha fatin ne’ebe la hanesan no iha Timor laran tomak no munisipiu hotu inklui mós iha rai liur (Australia, Korea do Sul, Irlandia, Inglatera no Portugal-red) ne’ebe mak ami fahe informasuan liu-liu kona-ba aktu eleitorais ne’ebe maka ita sei hala’o iha loron 12 fulan Maiu tinan ne’e” hateten Presidente CNE ne’e.

Alcino Barris akresenta liu tan katak iha informasaun sira ne’ebe ami fahe maka atu hametin liu tan ita nia kondisaun ba eleisaun ida ne’e tanba ita hotu hatene no akompaña katak eleisaun ida ne’e hanesan solusaun ida ne’ebe ikus no diak liu ita opta bainhira meius sira seluk ita la konsege.

Iha fatin hanesan, Komandante Jerál PNTL Komisariu Polísia Julio da Costa Hornay iha ninia intervensaun hateten seguransa ba eleisaun hau hahu’u husi situasaun país em jerál iha ne’ebe ita ukun ann tiha nasaun barak hare’e hela riku-soin ne’ebe ita iha hodi tama Timor liu, situasuan seluk tan mak kona-ba Terorismu no narkotika sira ne’e hanesan meius ida ne’ebe diak atu ema utiliza hodi destrui ita nia nasaun.

“Ho buat sira ne’e hotu maka ita nia seguransa, defesa tenta nafatin atu prevensaun ida ne’e maibé primeiru iha rai laran tenke iha estabilidade no paz, se ita mak nafatin halo konflitu iha ita nia rai la hatene tinan 10 ou 20 mai ne’e saida maka sei akontese ba ita nia rai”, tenik Komandante Jerál PNTL ne’e.

Komisariu Polísia Julio da Costa Hornay subliña liu tan katak iha peskiza ne’ebe maka iha tinan kotuk relata katak parte Viqueque maka sai fatin risku liu ba konflitu hanesan Komandante Jerál hau dehan risku ne’e mai husi ne’ebe, Viqueque oan laos beik-ten maibé Viqueque oan matenek tanba Viqueque oan iha ona maturidade politika ne’ebe diak.

“Ba PNTL iha Viqueque, koloka imi iha ne’e tanba povu no imi tenke servi ho dignu no professional, proibidu tama iha politiku, se hakarak tama resigna ann, Lei la fó dalan atu membru PNTL involve iha GAM (Grupu Arte Marsias-red) se imi involve fila ba uma no sai, tanba ida ne’e hatudu katak imi laiha sentidu atu servi povu, imi tenke implementa Lei no Ordem, hala’o dever ho diak no dignu no husu imi atu bele asegura seguransa ho diak iha Viqueque ba eleisaun antesipada tinan ne’e”, hatutan Komisariu Polísia ne’e.

Partisipa iha sorumutu ne’e Xefe Estadu Maior Jeneral F-FDTL Major Jeneral Lere Anan Timur, Komandante Jerál PNTL, Presidente CNE Alcino Barris, Komandante PNTL Munisipiu Viqueque, Administrador Munisipiu Viqueque, Inspetór Jerál CNE, Autoridade Lokal, reprezentante partidu politiku, delegadu CNE no estrutura inklui komunidade sira iha munisipiu Viqueque.

Media PNTL.    

Dili, Komandu Polísia Nasional Timor-Leste (PNTL) liu husi departamentu Polisiamentu Komunitaria (POLKOM) tersa-feira ne’e (03/04) realiza enkontru ida hamutuk ho Komandante Munisipiu inklui Komandante eskuadra sira hodi diskuti preprasaun seguransa iha Eleisaun Antesipada (EA) ne’ebe sei hala’o iha fulan Maiu tinan ne’e.

Komandante Administrasaun PNTL Superintendente Xefe Mateus Fernandes ne’ebe reprezenta Komandu hodi halo abertura ba enkontru ne’e hateten polisia komunitaria mosu atu hare’e oinsa ajuda  konsolida fiar komunidade nian ba iha polisia.

“Konsolida fiar ida ne’e depende ba ita (polisia-red) oinsa maka komunidade iha fiar ba ita, hahalok ita ema nian, internal no external ema idak-idak nian, hahalok rua ne’e maka sei kontribui konfiansa no simpatia ne’e mai ou la mai, por exemplu hau nu’udar polisia komuntaria ida hau deve dor, hau lanu loron lanu kalan ne’e oinsa maka konsolida fiar katak ita faan ita nia servisu diak, hahalok diak para depois bele manan konfiansa husi sosiedade”, tenik Komandante Administrasaun PNTL ne’e.

Superintendente Xefe Mateus Fernandes akresenta liu tan katak agora dadaun ita hotu hatene kritika, lamentasaun hasoru ita polisia barak, iha parte seluk ita ho polisia komunitaria hare’e oinsa maka bele kria simpatia husi komunidade ho ita ba prevensaun seguransa ninian.

“Agora dadaun parseiru UNDP (United Nation Development Program) ajuda mós ita para depois halo Paktu Unidade Nasional sei halo iha munisipiu Baucau, Maliana no Ermera atu bele hare’e oinsa maka ita bolu besik ita nia komunidade sira hamutuk halo seguransa iha prosesu eleitoral ne’ebe maka la kleur tan ita sei halo”, hatutan Superintendente Xefe ne’e.

Iha fatin hanesan Xefe TLPDP (Timor-Leste Police Development Program) apresia ho prensensa Komandante PNTL munisipiu sira iha âmbitu preprasaun seguransa ba Eleisaun Antesipada ne’ebe maka sei halao iha loron 12 fulan Maiu tinan ne’e.

Partisipa iha sorumutu ne’e Komandante PNTL Munisipiu Ermera, Manufahi no Aileu, inklui Komandante eskuadra husi munisipiu balun. Enkontru ne’e realiza iha salaun EDTA Fatuhada.

Media PNTL.    

Dili, Polísia Nasional Timor-Leste (PNTL) iha ninia loron aniversariu ba dala XVII (18) kondekora Polísia Repúblika Indonesia (POLRI) Bagian Nusa Tengara Timur (NTT), Kepala Badan Nasional Narkotika Indonesia (BNN-NTT) ho Méritu Seguransa Públika primeira Klase.

Komandante Jerál PNTL Komisariu Polísia Julio da Costa Hornay hafoin serimonia ba jornalista sira hateten ohin PNTL halo kondekorasaun ba membrus PNTL iha aniversariu ida ne’e hanesan louvor ida ne’ebe Komandu Jerál PNTL fó ba membru PNTL tuir servisu sira ne’ebe sira halo durante tinan 18.

“Ida ne’e ninia regras iha, regulamentu kona-ba kondekorasaun ba membrus tomak hahu’u husi Komandante Jerál to’o iha Ajente iha direitu atu simu kondekorasaun iha artigu por artigu hakerek ona iha ne’eba, kondekorasaun medella, sertifikadu louvores, kompetensia ministru nian, kompetensia Komandu Jerál nian hakerek hotu iha ne’eba ne’e mak ohin ita halo tuir no ida ne’e halo basea ba artigu ruma tanba ida ne’e Komandu sempre iha hanoin atu kondekora ninia ema maibé la se’es husi regras isra ne’ebe maka iha”, hateten Komandante Jerál PNTL ne’e.

Komisariu Polísia Julio da Costa Hornay mós koalia kona-ba PNTL kondekora Polri NTT no BNN ne’e basea ba servisu hamutuk ne’ebe ita halo liu husi MoU ne’ebe maka PNTL ho Polri asina desde tinan 2009, ninia implementasaun ida ne’e maka ita koopera ba malu hodi kaptura kriminozu sira balun ne’ebe maka ultrapasa liu husi ita nia fronteira ba Indonesia no husi Indonesia mai iha Timor-Leste.

“Tanba ne’e maka Komandu konsidera servisu ida ne’e susesu tebes no iha Lei mos fó autorizasaun atu kondekora ema estranjeiru, tanba ne’e ita uja artigu ne’e hodi kondekora sira hanesan apresiasaun servisu ne’ebe durante ita halo hamutuk iha prosesu prevensaun kriminal ninian”, hatutan Komisariu Polísia ne’e.

Iha fatin hanesan, Kapolda Polri NTT R. Erizman ne’ebe simu Medalha Méritu Seguransa Pública primeira Classe hateten presensa nia no ekipa mai iha Timor-Leste hodi hatan ba konvite ne’ebe maka PNTL haruka ba Polri NTT iha biban aniversariu PNTL nian ba dala 18 no hau hato’o Parabens ba tinan ida tan ne’e no hau hare’e katak progresu desenvolvimentu iha tinan 18 nia laran ne’e iha mudansa ne’ebe signifikadu.

“Tebes, desenvolvimentu instituisaun ida laos derepente sai diak maibe iha ninia etapa ba etapa hau hanoin hanesan ne’e, maibé tuir relatoriu no hau nia observasaun durante iha ne’e iha mudansa barak iha instituisaunn PNTL nia laran, ami mós koalia kona-ba relasaun servisu ne’ebe diak durante ne’e hanesan relasaun familia entre PNTL ho Polri bele hasa’e tan liu-liu iha atendimentu fronteira ne’ebe maka dala barak presija atensaun husi instituisaun seguransa rai rua ne’e nian”, tenik Kapolda Polri NTT.

R. Erizman agradese no sente orgullu ba kondekorasaun ne’ebe nia simu husi PNTL no hato’o ninia agradesimentu ne’ebe klean ba governu Timor-Leste liu-liu Prezidente Repúblika no Primeiru Ministru RDTL ne’ebe marka presensa iha loron ne’e no hare’e katak amizade ne’ebe maka governu iha ho instituisaun PNTL liu husi apoiu ne’ebe maka governu fó ba PNTL.

Entretantu, Xefe Estado-Maior General F-FDTL Major-General LereAnan Timur ne’ebe iha biban aniversariu PNTL nian simu mós Medalha Méritu Seguransa Pública primeira Classe hateten kondekorsaun ne’ebe nia simu laos hodi naran pesoal nian deit maibé lori instituisaun tomak tanba desde hari’I PNTL ami servisu hamutuk ne’eb diak tebes-tebes.

“Liu husi servisu hamutuk ne’ebe maka diak tebes-tebes iha liu husi komunikasaun tanba ne’e sira rekoñese esforsu ida ne’e no kooperasaun ida ne’e maka sira kondekora hau nu’udar Komandante Forsa Armadas nian”, koalia Xefe Estado-Maior General F-FDTL ne’e.

Além de kondekora Kapolda Polri NTT no Xefe Estado-Maior General F-FDTL, iha loron aniversariu ne’e PNTL mós fo kondekorasaun ba membrus sira husi Ofisias to’o ba ajente tuir kategoria ne’ebe maka iha. No fó mos sertifikadu louvor no promosaun ba mmebru PNTL por antiguidade.

Media PNTL.

Dili, loron 27 fulan Marsu tinan 2018 Polísia Nasional Timor-Leste (PNTL) selebra ninia existensia ba dala XVIII (18) ho serimonia Forsa Parada iha kampu Centro Formação Polícia (CFP) no impozisaun Kondekorasaun no mós promosaun ba membru PNTL sira.

Prezidente Repúblika (PR) Dr. Francisco Guterres  Lú-Olo iha ninia diskursu saúda membru PNTL hotu, mane no feto maluk sira ne’ebe maka loron-loron fó –an tomak ba kauza públika, defende Estadu-de-direitu demokrátiku no liberdade ba ita idak-idak no ba ita hotu no fó ita bo’ot sira nia kapasidade tomak, atu serve rai ida ne’e no serve maluk timoroan hotu-hotu.

“Ho Orgullu bo’ot mak hau mai iha ne’e, nu’udar Prezidente Repúblika, hodi hahi’I loron bo’ot ida ne’e, hamutuk ho ita bo’ot sira, ami hotu hatene katak ita bo’ot sira fó ann tomak , ho haraik ann no domin mak ita bo’ot sira hala’o servisu atu kumpri misaun fó seguransa ba hotu-hotu, dala-barak ita bo’ot sira sakrifika-an hodi fó hakmatek ba ita nia rain Timor-Leste no ami mós bele moris ho laran metin no hakmatek iha ami nia hela fatin ka fatin ne’ebe deit”, tenik Prezidente Repúblika RDTL ne’e.

Dr. Francisco Guterres  Lú-Olo akresenta liu tan katak Timoroan hotu-hotu hein no hakarak Polísia Nasional Timor-Leste ida ne’ebe kaer metin Timor-Leste nu’udar país ne’ebe seguru, ne’ebe hatene taka dalan ba krime, tanen metin valor demokratiku sira, tau matan ba direitu ema nian no instituisaun demokratika sira.

“Hau aproveita oportunidade ida ne’e hodi husu ba membru polísia sira hotu atu halo diferensa momos entre prosesu krime no prosesu ne’ebe mak laos krime, ita nia Lei sira estabelese prosedimentu la hanesan kona-ba prosesu kirme no prosesu ne’ebe laos krime”, apela na’in Ulun RDTL ne’e.

Iha fatin hanesan, Komandante Jerál PNTL Komisariu Julio da Costa Hornay iha ninia intervensaun ba serimonia aniversariu ne’e agradese ba presensa na’in ulun sira nasaun ne’e nian iha serimónia komemorasaun Aniversariu Policia Nacional-Timor Leste ba dala 18 nu’udar honra ba ami no motivasaun ba Komandu no nia efetivu sira atu servi ho diak liu tan iha futuru.

“Dala ida tan ami agradese ba excelencia sira nia presensa iha serimonia ida ne’e manifesta rekoñesimentu estadu no governu ba buat ne’ebe instituisaun halo husi loron ba loron, no hau afirma no konta nafatin ho esforsu no dedikasaun elementu sira nian ne’ebe ho firmeza dedikasaun no determinasaun ba estabilidade no paz iha rai ida ne’e”, tenik Komandante Jerál PNTL ne’e.

Komisariu Julio da Costa Hornay subliña liu tan katak Policia Nacional Timor-Leste ohin festeja nia tinan ba dala 18 durante periodu ida ne’e instituisaun PNTL lao hamutuk ho transformasaun  iha sosiedade, buka atu servi ba públiku tuir prinsipiu ne’ebe hatu’ur iha Konstituisaun Repúblika katak atu defende Legalidade demokratika no garante seguransa sidadaun sira nian, la apartidaria no la inklina ba ida ne’e ou ida ne’eba.

“Durante tinan 18 moris, prosesu desenvolvimentu iha instituisaun ida ne’e lao diak mezmu lao neneik maibé tinan ba tinan sempre iha mudansa ki’ik oan balun tantu rekursu materiais, ekipamentus transporte, desenvolvimentu kapasidade rekursu umanu no bem estar membru sira nian, progresu hirak ne’e akontese tanba iha apoiu maka’as husi governu liu husi Ministru Interior aktual Ministru Defesa no Seguransa ne’ebe tutela ba pasta seguransa”, hatutan na’in ulun PNTL ne’e.

Marka presensa iha serimonia aniversariu PNTL nian ba dala 18 Prezidente Repúblika Dr. Francisco Guterres  Lú-Olo ho esposa Cidalia Lopes Nobre, Prezidente Parlamentu Nacional, Sr. Aniceto Longuinhos Guterres Lopes, Prezidente Tribunal Recurso, Dr. Deolindo dos Santos, Primeiro-ministro, Dr. Marí Bim Amude Alkatiri, Ministru Defesa no seguransa, Sr. José Agostinho Sequeira “Somotxo” no esposa, Chefe Estado-Maior General F-FDTL, Major-General LereAnan Timur, Kapolda Nusa Tengara Timur (NTT) , Kepala Badan Nasional Narkotika-Indonesia (BNN-NTT), Korpus Diplomatikus,  Parseirus servisu hanesan GNR, TLPDP, TLCPP, JICA no Asia Foundation, Ofisias Supeior, Subalternu, Ajente no funsionariu sivil PNTL tomak.

Media PNTL.    

Dili, Komandu Polísia Nasional Timor-Leste (PNTL) apela ba Komandu munisipiu 13 inklui Regiaun Espesial Oecusse atu bele asegura seguransa durante periode kampaña no realizasaun Eleisaun Antesipada (EA).

Lia hirak ne’e hato’o husi Komandante Jerál PNTL Komisariu Polísia Julio da Costa Hornay iha enseramentu enkotru planu operasaun ba seguransa eleisaun antesipada ninian ba Komandante PNTL munisipiu no Komandante Unidade.

“Ba Komandante sira, servisu seguransa ba eleisaun antesipada ida ne’e servisu ida ne’ebe importante tebes ba rai no nasaun ida ne’e, tanba ne’e ba Komandante sira apésar ita iha difikuldade maibé ita nia entidementu no sakrifisiu ba ida ne’e atu determina nasaun nia futuru atu ba iha ne’ebe, ba oin ne’e atu oinsa, nasaun ida tenke iha governu legal ida no orsamentu iha mak ita bele desenvolve ita nia rai tanba ne’e tau iha konsiderasaun seguransa ba eleisaun ida ne’e importante tebes atu ita nia povu bele hala’o sira nia direitu ba votu ida ne’e, direitu kampaña ida ne’e ho ambietnte ne’ebe diak”, hateten Komandante Jerál PNTL ne’e.

Komisariu Polísia Julio da Costa Hornay apela ba Komandante munisipiu sira atu bele konsola joven sira, veteranu sira no povu iha baze, enkontru sira ne’ebe maka Komandante munisipiu sira halo ida ne’e maka sai hanesan fátor determinante atu Komandante sira informa ba idak-idak nia komunidade katak eleisaun ida ne’e mosu tanba demokrasia ne’ebe ita hakarak ona atu utiliza no mos ita nia Konstituisaun da Repúblika hateten iha ne’eba.

“Tanba ne’e ita labele hala’o ida ne’e ho odio vigansa atu iha tempu ikus mai resultadu diak ou ladiak mós ita mak sente ida ne’e, tanba ne’e mantein Komandante sira nia ekipa liu-liu OPS (Ofisial Polísia Suku) sira iha munisipiu atu bele hala’o nafatin aktividade sira ne’ebe Komandante sira halo durante ne’e hodi hetan susesu ne’ebe diak, fó koñesimentu ne’ebe klean ba ita nia povu atu sira entende hodi hakribi ba aktu krime sira ne’ebe mosu iha tempu kampaña no eleisaun”, hatutan Komisariu Polísia ne’e.

Enkontru ne’ebe realiza durante loron tolu (21/03-23/03) iha Hotel Golgota ne’e organiza husi Komandu Operasaun servisu hamutuk ho Comissão Nacional das Eleições (CNE) no hetan partisipasaun másimu husi Komandante PNTL munisipiu 13 inklui Regiaun Espesial Oecusse no Komandante Unidade sira PNTL nian.  Media PNTL.

Dili, Komandu Polísia Nasional Timor-Leste (PNTL) preparadu atu fó asistensia seguransa iha loron eleisaun antesipada ne’ebe sei hala’o iha loron 12 fulan Maiu tinan ne’e.

Komandante Jerál PNTL Komisariu Polísia Julio da Costa Hornay iha Kuarta-feira ne’e (21/03) konvoka enkontru ida hamutuk ho Komandu PNTL munisipiu sira inklui Komandu Unidade Espesial Polísia (UEP), Unidade Polísia Marítima (UPM) no Unidade Patrullamentu Fronteira (UPF) hodi diskuti oinsa planu operasaun ba seguransa eleisaun antesipada ninian.

“Ohin iha ne’e ami hamutuk atu fó informasaun ba malu kona-ba situasaun iha terenu atu bele prepara planu operasaun tuir nesesidade ne’ebe maka iha terenu nesesita ba eleisaun antesipada nian, tanba ne’e maka ohin konvida komandante sira mai atu mai rona aprezentasaun husi parte Comissão Nacional das Eleições (CNE) atu Komandante sira bele entende malu atu planu operasaun nian bele lao tuir nesesidade operasaun nian”, tenik Komandante Jerál PNTL ne’e hafoin halo abertura ba enkontru refere iha Salaun Golgota Terra Santa.

Komisariu Polísia Julio da Costa Hornay akresenta liu tan katak parte lojistika PNTL preparadu fó apoiu saida maka iha, oituan ka barak ida ne’e maka ita fó, saida maka governu fó mai Komandu atu fó ba seguransa ida ne’e maka Komandu sei uza.

“Orsamentu oituan, apoiu lojistika iha atu bele fó apoiu iha seguransa eleisaun antesipada nian no problema kombustivel Komandu tenta nafatin atu resolve problema ida ne’e ho governu tanba ne’e kompetensia Komandu ninian no hamutuk ho governu resolve kestaun sira ne’e atu iha eleisaun antesipada ne’e ita bele asegura no mós transporte ho maneira hotu ita tenta atu bele prepara”, hatutan Komisariu Polísia ne’e.

Enkontru ne’ebe sei hala’o durante loron tolu ne’e partisipa husi Komandante PNTL munisipiu 13, Komandante Unidade sira inklui parte CNE.

Media PNTL.