Uncategorized

Dili- Polisia Nasional Timor-Leste (PNTL) liu husi Centru Formasaun Polisia (CFP) halo exoneração ba Inspector Cesaltina Soares ID #12294 ne’ebe maka halao knaar iha instituisaun PNTL durante tinan 16 nia laran.

Komandante Centru Formasaun Polisia Superintendente Arquimino Ramos hateten Exoneração ne’e halo bazeia ba pedidu rejignasaun husi Inspector ne’e rasik iha loron 2 fulan Agostu 2018 no hetan aprovasaun husi Komandante Jeral liu husi despacho No 203/CG-PNTL/VIII/2018 hodi halo exoneração, Nia hato’o asuntu ne’e ba jornaslista sira iha CFP Comoro Dili, Sesta (31/08).

Superintendente ne’e haktuirtan katak Inspector Cesaltina Soares sai tanba ninia hakarak rasik ho rajaun katak nia bele halao servisu diak liu iha liur nudar responsavel igreja Jeova nian, nia hakarak kontinua misaun hanesan bibiatan ba ninia sarani sira, tanba ne’e hahu ohin ba oin nia laos ona membru PNTL.

Tuir Komandante CFP Inspetor Cesaltina Soares ema ne’ebe servisu diak no kalma maibe ida ne’e maka nia desijaun, iha nasaun demokratiku ita simu ema hotu atu hili servisu ne’ebe maka nia hakarak.

PNTL seidauk iha estatutu rasik tanba ne’e sei aplika hela Estatutu Funsaun Publika nian nune’e rejignasaun ne’ebe maka kada individu halo Komandante Jeral nia kompetensia atu desidi lalaok husi prosesu ne’e.

Iha okajiaun ne’e  Inspetor Cesaltina Soares hateten rajaun rejignaan tanba nudar forsa seguransa hau laiha tempu atu halao knaar spiritual nian ho maximu tanba ne’e rejignaan atu halao misaun spiritual hodi haklaken biblia hodi hanorin ema hotu atu sai Jejus nia disiplu no haruka sira atu ba hanorin ema seluk hanesan Jejus hanorin.

“ Hau nia lia menon ba membru PNTL hotu atu halao servisu ho diak no respeitu diretus humanus nudar kriatura Maromak nian,” Nia dehan .

Inspetor Cesaltina Soares hahu halao knaar iha instituisaun PNTL iha fulan Agostu tinan 2002 iha Unidade Polisia Maritima, Komandu munisipiu Dili, Lojistika Komandu Jeral no kolokasaun ikus iha CFP. Durante ne’e assume knaar hanesan Komandante Postu UPM Sional, Atauru no Atabae, Xefe Seksaun Lojistika no ikus liu hanesan ajuntu Seksaun Fizika no Instructor iha CFP.

Serimonia Exoneração halao iha CFP ho formatura ne’ebe diriji husi Komandante Centru Formasaun Polisia ho prejensa husi Inspetor, Sarjentu, Ajente no Funsionariu Sivil CFP nian no kompleta ho despedida no foto hamutuk. Media PNTL

Dili- Polisia Nasional Timor-Leste (PNTL) sei asegura seguransa ba eventu Tour de Timor ne’ebe maka sei realiza iha loron 4-8 fulan Setembru tinan 2018.

Komandante Operasaun Interinu Superintendente Xefe Mateus Fernandes hateten enkontru ohin atu halo preparasaun ba munisipiu hirak ne’ebe maka sai rute ba TDT tinan ne’e nune’e sira bele asegura seguransa ho diak, Nia hato’o asuntu ne’e ba media PNTL hafoin enkontru ho komisaun organizadora TDT iha Kuartel Jeral PNTL Kaikoli Dili, Tersa (28/08).

Nia haktuirtan katak  Polisia sei halo cek point, taka dalan no akompaña siklista (rider) sira bele liu ho diak liu-liu ba kompania sira ne’ebe halo projetu iha dalan husu para atu fo espasu bainhira eventu ne’e lao tanba ne’e husu hot-hotu nia kontribuisaun hodi fasilita no fo susesu ba eventu inteernasional ne’e.

“ Polisia konsidera Tour de Timor inportante no garante eventu internasional ne’ebe maka realiza kada tinan ne’e sei lao ho susesu,” Komandante Mateus dehan.

Tour de Timor nudar eventu internasional ne’ebe maka inportante tebes ba Timor-Leste hodi sosializa progresu dezenvolvimentu, promove fatin turismu ne’ebe timor iha, kultura, ambiente   no rikusoin hirak ne’ebe maka iha nune’e atleta sira ne’ebe maka mai partisipa bele apresia no hatene progresu Timor-Leste nian.

Entertantu portavoz no komisaun organizadora TDT Johnny Gutteres hateten Komisaun organizadora infrenta limitasaun barak iha tinan ida ne’e relasiona ho situasaun politika no finansas maibe prontu atu suporta PNTL hodi atinji susesu ba eventu ida ne’e.

Nia hatutan komisaun organizadora sei fasilita komunikasaun, komvustivel no nesesidade seluk ne’ebe maka PNTL presiza  hodi akompaña no fo seguransa ba Tour de Timor.

Tuir dadus ne’ebe iha Tour de Timor tinan 2018 sei partisipa husi rider nasional nain 61, Australia nain 41, Republika Ceko nain 1, Alemaña nain 2 no Inglatera nain 3

Rute sei hahu iha loron 4  start husi Dili Palasio do Governu ba Aileu, Aileu ba Ainaro, Ainaro ba Ermera, Ermera ba Liquica no finish iha Dili. Media PNTL

Dili- Mini laboratoriu Forensik ba Servisu Investigasaun Criminal Nasional (SICN) sei fasilita ezaminasaun  balistiku, ezaminasaun finger printing, ezaminasaun toxicologia (racun), ezaminasaun dokumentus no ezaminasaun seluk ne’ebe presija apoiu laboratoriu hodi buka evidensia.

Komisariu Faustino da Costa hateten laboratoriu ne’e sei fasilita Forensiac sira atu halao sira nia knaar nudar meius inportante ba investigasaun kriminal atu halao sira nia servisu ho livre, seguru no iha fatin ne’ebe propriu tanba rejultadu ezaminasaun forensic maka sai referensia servisu Polisia nian liu-liu area investigasaun atu aprejenta kazu ho evidensia no eksikuensia, Nia hato’o asuntu ne’e iha serimonia inagurasaun mini laboratoriu Forensic iha Kuartel jeral PNTL Kaikoli Dili, Sexta (17/08).

Komisariu ne’e haktuirtan katak iha prosesu investigasaun se kompleta ona evidensia no eksikuensia maibe sei presijatan dadus dijital maka tenke liu husi laboratoriu.

Kestiona konaba rekursu humanus komisariu Faustino hateten SICN iha pessoal lubuk ida ne’ebe maka halao servisu iha area ida ne’e maske seidauk sufsiente, tanba ne’e maka komandu planea atu aumenta rekursu humanus no fo treinamentu ba sira atu halao servisu.

Iha Okajiaun ne’e Xefe Servisu Investigasaun Kriminal Nasional Superintendente Jorge Monteiro hateten mini laboratoriu ida ne’e estabelese hodi fasilita servisu Polisia nian atu halo ezaminasaun ne’ebe maka bele halao iha rai laran hanesan ezemplu ezaminasaun balistiku, ezaminasaun finger printing, ezaminasaun toxicologia (racun), ezaminasaun dokumentus no ezaminasaun seluk ne’ebe presija apoiu laboratoriu.

Superintendente Monteiro akresentatan katak ita sempre haruka sampel ba rai liur atu halo teste laboratoriu ne’ebe gasta osan barak no tempu ne’ebe naruk maibe seidauk iha serteja ba rejultadu tanba ne‘e maka ita halo esforsu no posibilidade hotu-hotu  atu halo ezaminasaun iha timor tuir ita nia ekipamentu no rekursu humanu ne’ebe maka iha.

Atu opera ekipamentus hirak ne’e iha tinan 2001 instituisaun PNTL haruka ona pessoal nain 13 ba estuda iha Filipina durante tinan 5-6 hodi halo servisu iha laboratoriu, hare ba rekursu humanus, ekipamentu no fatin naton atu halo ezaminasaun laboratoriu.

Mini laboratoriu ne’e konstrui ho apoiu finanseru no tekniku husi parseru Timor-Leste Police Development Program (TLPDP). Laboratiru ne’e iha ekipamentu ne’ebe maka PNTL simu husi doador sira hanesan governu Australia,  Korea, Cina no governu Estadus unidus America.

Serimonia inagurasaun ne’e kompleta ho despedida ho Komandante TLPDP nudar parseru ne’ebe maka durante ne’e servisu no apoiu dezenvolvimentu instituisaun PNTL. Media PNTL

Dili- Polisia Nasional Timor-Leste (PNTL) lansa Estratejia Jeneru ba periodu tinan 2018-2022 hodi dezenvolve partisipasaun Polisia feto iha instituisaun PNTL.

Reprezentante Komandante Jeral PNTL Superintendente Xefe Carlos Jeronimo hateten estratejia ida ne’e sai matadalan hodi fo prioridade konaba hakbiit servisu  feto PNTL tuir planu estratejiku PNTL nian, Nia hato’o asuntu ne’e ba Jornalista sira iha komferensia emprensa hafoin lansamentu livru Estratejia Jeneru PNTL iha Kuartel Jeral PNTL Kaikoli Dili, Kinta (16/08).

Nia hatutan estrajeia ida ne’e lori aspirasaun tomak Polisia feto sira hotu nian tan ne’e hein katak ida ne’e sai duni matadalan ba feto sira hodi bele lao korela ho planu estratejiku PNTL nian tanba laiha estratejia ida lao mesak tenke lao tuir nia dalan tuir planu ne’ebe bele orienta ba.

“Hau alertatan dala ida estratejia ne’e sei inplementa faze por faze tuir prioridade no kapasidade orsamentu,” dehan Komandante Jeronimo.

Entretantu Diretora jeral Servisu Korporativu ministeriu Interior Guilhermina Ribeiro hateten estratejia maka sai mestre atu atinji tarjetu ne’ebe maka iha tuir programa VIII governu nian, estratejia Ministeriu Interior no estratejia oinsa atu promove igualdade jeneru iha PNTL no atu hadia situasaun seguransa feto hodi responde ba situasaun ne’ebe maka relasiona ho Planu Estratejiku ba rejolusaun konflitu konselu seguransa 1325.

Iha okajiaun ne’e Prezidente Grupu Mulher Parlamentar Timor-Leste (GMPTL) Deputada Lídia Norberta Martins sujere atu nune’e ekipa ne’ebe halo validasaun ba planu estratejiku ne’e hare estratejia ida atu aumenta promosaun feto liu-liu iha nivel desijaun nian tanba ami sente inportante atu aumenta promosaun feto diak liutan no hasae sira nia lideransa iha instituisaun PNTL.

Nia haktuir sujestaun tuir mai maka oinsa hasae investimentu ba kapasitasaun no formasaun hodi prepara feto maluk sira no reforsa liutan sira nia potensia ne’ebe iha no evalua rejultadu kapasitasaun hirak ne’ebe fo tia ona.

Xefe UN Women Sunita Caminha hateten Ami kontinua servisu hamutuk ho gabinete grupu traballu jeneru no gabinete jeneru PNTL hodi suporta sira atinji metas no tarjetu husi estrajia jeneru PNTL.

Nia hatutan ba futuru UN Women Iha prosesu orsamentu UN Women servisu hamutuk ho Ministeriu Interior, PNTL  Sekretariu Estadu Igualdade no  Inkluzaun hodi ajuda unidade planeamentu sira hodi bele enkaixa orsmanetu ne’ebe presija hodi halo alokasaun adekuadu hodi atinji estratejia ida ne’e.

Sorumutu validasaun planu Estratejia Jeneru PNTL no lansamentu Livru Estratejia Jeneru period 2018-2022 ne’e partisipa husi Komandante TLPDP, Parseru JICA, pontu fokal PNTL husi munisipiu, Fundasaun Azia, Sekretariu Estadu Igualdade no Inkluzaun grupu trabalu jeneru no komvidadu sira. Media PNTL

Dili- Ministru Interior Interinu Filomeno Paixão halo enkontru dahuluk ho Komandu Jeral PNTL hodi deskuti  konaba seguransa nasional integradu, atuasaun integradu, komplementaridade, subsidiaridade no rasionalizasaun de bens.

Ministru Interior Interinu Filomeno Paixão hateten halao enkontru ba Komandu Jeral PNTL hodi hasoru malu ho Komandante Jeral no Segundu Komandante Jeral hamutuk ho Ofisiais Superior sira ne’e nudar vizita dahuluk hafoin simu posse nudar ministru Defeza no ministru Interior Interinu, Nia hato’o asuntu ne’e iha enkontru ho Komandante Jeral PNTL,Segundu Komandante Jeral no Oficiais Superior sira iha Kuartel Jeral PNTL Kaikoli Dili Tersa (14/08).

Nia hatutan Forsa rua F-FDTL no PNTL nudar forsa irmaun tanba ne’e tenke hare malu diak hodi kompleta malu iha aspetu seguransa interna no externa. Husu ba Ofisiais PNTL atu hare lei seguransa nasional hodi sai referensia ba planu servisu Polisia Nasional Timor-Leste tanba iha lei ne’e  koalia konaba seguransa nasional integradu, atuasaun integradu, komplementaridade, subsidiaridade no rasionalizasaun de bens.

“Atu dezenvolve forsa rua ne’e tenke iha kapasitasaun maibe labele paralela no duplika tenke halo rasionalizasaun ita labele mehi atu sosa meius ne’ebe la tuir ita nia kapasidade husu atu komandante sira iha konsiensia no kaer ba konseitu ida ne’e hodi dezenvolve PNTL,” Nia dehan..

Relasiona kazu tiru kilat iha Maliana ministru husu atu Komandante sira tenke iha asaun ba nia membru sira   hodi evita problema tanba akontesementu iha Maliana halo komunidade no ema internasional sira tauk no prekupa konaba seguransa.

Ministru Defeza no Ministru Interior Interinu ne’e afirma planu ne’ebe aprezenta husi Komandante Jeral PNTL ne’e diak I nia mai laos atu muda planu ne’ebe maka iha ona maibe atu ajuda hodi aserta forsa rua ne’e. Media PNTL

Dili- Situasaun seguransa no ordem publika iha Timor-Leste kontroladu no seguru nune’e povu kontrinua halao nia knaar ho seguru.

Komandante Jeral PNTL Komisariu Julio da Costa Hornay hateten enjeral situasaun seguransa rai laran lao hakmatek no kontroladu, laiha problema boot ne’ebe maka presija toma atensaun imediata ka halo atuasaun, Nia hato’o asuntu ne’e ba jornalista sira iha knaar fatin Kaikoli Dili, Segunda (13/08).

Komisariu ne’e haktuirtan katak maske iha kazu balun ne’ebe maka akontese hanesan kazu violensia domestika, joven sira hemu tua lanu depois tuda malu no baku malu, maibe Polisia marka prezensa hodi atende problema hirak ne’e.

Kazu balu Polisia konsege lori ba prosesu, kazu balu wainhira Polisia to’o fatin akontesementu suspetu sira halai lakon, no kazu balu informasaun iha terrenu la temi suspetu sira nia naran entaun polisia sei buka informasaun hodi kaptura suspetu sira maibe presiza mandadu kapturasaun husi Pinisteriu Publiku nune’e Polisia ezekuta. Media PNTL

Dili- Komandu Polisia Nasional Timor-Leste fo promosaun diviza por antiguidade ba membru nain sanulu resin ne’ebe maka hatudu prestasaun servisu diak durante ne’e.

Segundu Komandante Jeral PNTL Komisariu Faustino da Costa hateten promosaun por antiguidade ne’e halao tanba membru ne’e halao knaar ho diviza ne’e to’o tinan lima (5) ou liu ho kategoria diviza Ajente ba Ajente principal, Ajente principal ba ajente Xefe, Sarjentu ba primeiro Sarjentu, no Inspetor Assistente ba Inspetor, Nia hato’o asuntu ne’e ba jornalista sira hafoin serimonia promosaun diviza iha Kuartel Jeral PNTL Kaikoli Dili, Kinta (09/08).

Komisariu ne’e haktuir ba promosaun por antiguidade la depende ba vaga iha kalae maibe tuir kriteriu hanesan membru ne’e lima (5) ou neen (6) iha diviza ida ne’e, la halo problema, laiha kazu, no kondisaun fizika no mental diak.

Promosaun diviza por antiguidade ne’ebe maka realiza ohin iha Kuartel Jeral simbolikamente fo ba membru nain tolu (3) maka hanesan Ajente Prinsipal Margarida F.M da Cruz promove ba postu Ajente Xefe, Sarjentu Jose N.B Soares promove ba postu Primeiru Sarjentu no Inspector Assistente Gaspar N. Abi promove ba postu Inspector no ba sira seluk Komandante Unidade no munisipiu maka organiza tanba despaisu husi Komandu Jeral fo sai ona.

Membru hirak ne’ebe hetan promosaun diviza maka hanesan Ajente principal promove ba Ajente Xefe, Sarjentu nain ida (1) promove ba Primeiru Sarjentu no Inspector Assistente nain hitu (7) promove ba Inspetor; Maioria Ofisial sira feto husi Saude PNTL, Servisu imigrasaun nain ida no Pilotu PNTL.

Promosaun Diviza por antiguidade ne’ebe maka realiza ohin iha Kuartel Jeral diriji husi Komandante Jeral, akompaña husi Segundu Komandante Jeral no partisipa husi ofisiais sira. Media PNTL

Dili- Komandu Polisia Nasional Timor-Leste (PNTL) no Falintil Forsa Defeza Timor-Leste (F-FDTL) halo briefing jeral konaba seguransa nasaun nia ligasaun ho situasaun politika rai laran.

Komandante Jeral PNTL Komisariu Julio da Costa Hornay hateten hanesan forsa seguransa no defeza ita hamrik metin no hamutuk nafatin hodi koopera ba malu iha servisu iha terrenu ne’e maka intensaun ita hamutuk iha ne’e atu hato’o briefing jeral ida ne’e ba Komandu rua, Nia hato’o asuntu ne’e iha intervensaun Briefing Jeral Seguransa iha Centru Formasaun Polisia Dili, Tersa (24/07).

Komisariu Julio haktuirtan Nudar Forsa seguransa no defeza firmeja hodi mantein nafatin estabilidade no paz liu husi servisu makaas, pasensia no sakrifisiu ne’ebe ita halo; Hau, Jeneral Lere hamutuk ho Ministru Defeza no Ministru Interior interinu buka nafatin dalan atu koalia nafatin ho nai ulun sira hanesan Prezidente Republika, Primeiru Ministru no Parlamentu Nasional koalia oinsa buka solusaun ba situasaun PNTL no F-FDTL.

Liga ba situasaun politika rai laran ita hotu rona no akompaña impasse politika ne’ebe lao iha ita nia rai husi entidade sira ho situasaun politika ida ne’e konvida ita forsa seguransa atu alerta hodi mantein seguransa paz no hakmatek.

buat ne’ebe ita halo ona iha fulan hirak liu ba forsa rua hamutuk ida deit ho objetivu boot tebes hodi manan komfiansa husi komunidade, autoridade lokal no lideransa sira no komunidade internasional, ita mantein nafatin ida ne’e tanba Inportante forsa rua hamutuk atu mantein estabilidade no paz ba povu no nasaun.

Iha okajiaun ne’e Xefe Estadu Mayor General F-FDTL  Jeneral Lere Anan Timur hateten briefing jeral ne’e alende atu apar ho situasaun politika rai laran hakarak mos halibur hamutuk ofisiais husi instituisaun rua ne’e maske instituisaun F-FDTL no PNTL misaun ketak-ketak maibe iha situasaun konkreta ruma mosu  ita hamutuk organija malu komandu fo komfiansa institusional

Politika defeza no seguransa maka atu nasaun ne’e estavel, nudar Komandante Jeral, Xefe Estadu Mayor no Segundu Komandante Jeral  ami nia prekupasaun maka halo nusa para instituisaun rua ne’e garante seguransa no estabilidade atu estadu no  governu metin atu povu moris iha estabilidade no paz nia laran.

Briefing jeral seguransa ne’e partisipa husi Segundu Komandante Jeral PNTL, Vice Xefe Estadu Maiyor F-FDTL, Ofisiais Superior PNTL no Ofisias Kapitaun F-FDTL. Media PNTL

Dili- Media maka espiritu ba demokrasia tanba media hanesan pilar inportante husi demokrasia iha estadu direitu demokratiku hodi hatutan povu nia lian, nudar instrumentu ida atu fasilita sosiedade hodi komunika ba malu no halo kontrolu sosial.

Xefe Gabinete Asesor Juridiku PNTL Inspetor Virgilio D. Correia hateten  Polisia Nasional Timor-Leste (PNTL) hó Media tenke no sempre fo konfiansa ba malu hodi garante estabilidade politika no trasmite mensangen ba públiku hó imparsiál no neutral, tanba instituisaun rua ne’e sempre presiza malu tuir ida-idak nia misaun ne’ebe konsagra iha Konstituisaun RDTL, Nia hato’o asuntu ne’e iha iha aprejentasaun Forum Dialogu Dili iha salaun Ministeriu Finansas Aitarak laran Dili foin lalais.

Nia haktuir ita kompara PNTL ho média hanesan kilat ne’ebe labele utuliza tuir ema ida-idak  vontade ka sira nia hakarak, maibe uza tuir stándar no kode etika ne’ebe instituisaun rua ne’e iha.

Atu garante servisu lao ho diak PNTL no média labele politizadu husi politikus sira; waihira politizadu maka kualidade informasaun no prevensaun kriminalidade sei la kredibel, la proporsionál no la iha transparansia hodi haklaken mensanjen demokrasia ba públiku.

“ Papel Média iha Operasaun Polísial nian durante eleisaun maka hamutuk hó PNTL promove kondisaun seguransa, asegura manutensaun ordem publika, no prevene kriminalidade no hahalok seluk ne’ebé kontra valor demokrasiaa nian, ne’ebe hanaran krime eleitoral,”Inspetor Virgilio dehan.

Media no PNTL hatudu ona kualidade professional hodi fo kontribusaun ba susesu eleisaunXefe suku, eleisaun Prezidensia, eleisaun Parlamentar no eleisaun Antisipada 2018 nune’e povu ezerse sira nia poder politika hodi hili sira nia lideransa ho livre, direita no sekreta.

Iha okajiaun ne’e Prezidente Asosiasaun Radio Komunidade Timor-Leste  Prezado Ximenes husu ba PNTL atu servisu hamutuk ho radio komunidade iha munisipiu atu transmite informasaun seguransa no lalaok servisu Ofisial Polisia Suku (OPS) iha suku hotu iha teritoriu laran tomak nune’e komunidade iha area rural bele hatene, kompriende no kontribui ba seguransa.

Iha fim da semana ne’e loron 19-20 de Jullu, Konselu Imprensa (KI) Timor-Leste realija Forum Dialogu Dili ho tema “ Building a Network to strengthen Media Self Regulatory Mechanism”  in South Asia and the pacific ka auto regulasaun media iha sudeste Aziatiku hodi halibur hamutuk konselu Imprrensa husi Indonezia, Filipina, Tailandia, Papua Nova Guinea no seluktan hamutuk ho media nain, jornalista no estudante Komunikasaun sosial husi UNTL no UNITAL hodi fahe ideia ba malu.  Media PNTL.