Dili-Polisia Nasional Timor-Leste(PNTL) kontinua apela ba povu Timor-Leste atu kontinua kumpri regras Estadu Emerjensia ba dala-11 hodi prevene transmisaun pandemia COVID-19.
Komandu Polisia Nasional Timor-Leste liu husi Porta voz Superintendente Xefe Arnaldo Araujo husu ba komunidade sira hotu atu mantein no kumpri regras prosedimentu saude mundial hodi prevene ann husi moras COVID-19 hanesan uza mascara, fase liman ho sabaun no mantein distansia fiziku, Nia hato’o asuntu neé liu husi Komferensia imprensa Kinta (04/03) iha Kuartel Jeral PNTL Kaikoli Dili.
Bazeia ba rezolusaun governu Nu 11/ 2021 de 02 de marcu katak mantein nafatin serka sanitaria iha munisipiu Covalima hodi taka fronteira no bandu komunidade desloka ba munispiu seluk no mai iha Munisipiu Covalima.
‘’Populasaun husi munisipiu Covalima labele halo movimentu mai kapital Dili no munisipiu 11 seluk sekarik kontra otomatikamente Polisia la autoriza,”dehan Porta Voz.
Governu mos suspende prosesu aprendijajen iha Eskola no administtrasaun lokal bazeia ba Despasu Ministerial Nu.11/2021 hateten konaba suspensaun provijoriu ba prosesu ensinu apredizajem prezensial iha eskola iha munisipiu Covalima nian husi loron 27 fulan fevereiru too loron 13 fulan marsu 2021.
Nuneé mos despaisu Nu. 12/M-MAE/II/2021 hodi hapara temporariu servisu administrasaun munisipiu Covalima la halo atendementu ba publiku durante loron 7 ho esepsaun ba servisu husi Ministeriu Saude, Ministeriu Interior, Sentru Integradu Gestao de Crize no Ministeriu Estatal.
Liu husi oportunidade ida ne’e Komandu PNTL hakarak klarifika ba komunidade sira konaba informasaun ne’ebe espala iha publiku liu husi media sosial katak sei hapara hotu sirkulasaun transporte publiku nee la los tanba transporte publiku sei lao nafatin iha munisipiu 11 inklui RAEOA maibe PNTL kontinua halo cek point iha munisipiu hotu hodi nunee bele Evita transmisaun lokal.
Atu fo hanoin hikas katak iha loron 15 fevereiru Konsellu Ministru (KM) desidi halo serka sanitaria iha munisipiu bobonaro no Covalima tanba risku ba pasajen illegal iha fronteira terestre.
Prezidente Republika Francisco Guterres “Lu-Olo” dekreta EE dala 11 vigora iha kinta (4/03) oras 00:00 no sei remata iha loron 02 abril oras 11:59 ho estensaun EE ne’e KM deside mantein serka sanitaria iha munisipiu Covalima. Media PNTL.
