DILI, 09 marsu 2021 (SRP) – Guvernu liuhusi Vise-Ministru Interior, iha loron tersa feira-ne’e, entrega nesesidade báziku ba Polísia Nasionál Timor-Leste (PNTL) Munisípiu Dili, hodi reforsa servisu postu vizilánsia PNTL ne’ebé estabelese iha Dili laran tomak inklui check point sira iha pontu entrada sira.
Antonio Armindo, entrega direta nesesidade bázika hirak ne’e ba Segundu Komandante PNTL Munisípiu Dili, Superintendente Polísia, Euclides Belo, ho sasan sira mak hanesan Supermie, be, kafé no fós.
Euclides Belo iha nia liafuan badak hateten, hodi Komandante PNTL Munisípiu Dili nia naran fó agradesimentu ba Governu liuhusi Vise-Ministru Interior, tanba bele responde nesesidade polísia nian balu.
“Ha’u lori Komandu PNTL Munisípiu Dili nia naran agradese ba apoiu ida-ne’e, no ami mós sente kontente tanba Vise-Ministru lori nia tempu espesiál hodi lori prezente furak ne’e no ami hato’o agradese ba ajuda ida-ne’e”, dehan Euclides Belo ba SRP, hafoin simu apoiu ne’e, iha Komandu PNTL Caicoli, ohin.
Iha fatin hanesan, Vise-Ministru Interior, Antonio Armindo, informa katak apoiu ne’e hanesan opsaun ida atu kontribui fasilita servisu PNTL.
“Ohin ha’u mai iha ne’e, hodi fó apoiu nesesidade báziku uituan ba PNTL Dili, mak hanesan Mie Sedap kaixa 40 no bé kaixa 40, Nescafé ho fós aban mak sei lori mai. Apoiu hirak ne’e atu reforsa postu vizilánsia PNTL ne’ebé hala’o servisu operasionál check point sira iha pontu entrada sira mak hanesan, Hera, Metinaro, Balibar, Mota-Ulun, Tasi-Tolu, Tibar, no sira ne’ebé patrulla lao ain liga ba serka sanitariu iha Munisípiu Dili ne’ebé Guvernu dekreta ona”, dehan Vise-Ministru Antonio Armindo.
Iha oportunidade ne’e, Vise-Ministru Antonio Armindo kontinua apela ba povu Timor-Leste atu kontinua kumpri regras Estadu Emerjénsia ba dala-11 hodi prevene transmisaun pandemia COVID-19
“Husu ba komunidade sira hotu atu mantein no kumpri regras prosedimentu saúde mundiál hodi prevene ann husi moras COVID-19 hanesan uza mascára, fase liman ho sabaun no mantein distánsia fíziku, no labele halo movimentu illegál iha fronteira tanba bele fó impaktu ba saúde publika”. Nia sujere.
Iha okajiuan-ne’e, hetan mós akompañamentu husi Porta voz Komandu Polísia Nasionál Timor-Leste, Superintendente Xefe Polísia Arnaldo Araujo.
Media MI;#AX
