Dili- Governu entrega ro’o patrulha unidade rua ba Polisia Nasional Timor-Leste (PNTL)-Unidade Polisia Maritima (UPM) hodi kontrola area kosteira no prevene atividade Peska Ilegal.
Ministru Interior Francisco Guterres hateten Ro’o rua ne’e ho objetivu atu fasilita UPM halao servisu patrulhamentu iha tasi liu-liu iha parte agua territorial nian hodi bele reforsa ro’o ne’ebe maka iha antes ne’e hodi koloka fali ba postu Com nomos reforsatan postu Atabae hodi halo kontrolu ba atividade illegal iha area neba, nia hato’o asuntu ne’e iha serimonia entrega ro’o ba UPM iha Kuartel UPM Lecidere Dili, Segunda (15/04).
Nia hatutan Governu iha planu atu investe ba UPM kada tinan no sei halo rekrutamentu ba membru PNTL hodi reforsa UPM hodi kontrola Agua territorial husi atividade peska illegal no krime.
“Governu iha planu ida ne’ebe maka agora hahu hare hela oinsa atu iha futuru bele halo investimentu ida boot ba UPM hodi halao serbisu tanba investimentu ne’e inklui prepara infraestrutura ne’ebe maka diak ba sira inklui prepara ro’o ho kapasidade ne’ebe maka bot liutan para halo kontrola mais efetivu ho nune’e sira lori tempu naruk iha tasi laran hodi kontrola tanba agora daudaun sira lori ro’o hanesan ne’e masimu lato’o loron ida sira sai no fila,”dehan MI Guterres.
Nia akresenta Governu sei haritan Autoridade Maritima ne’ebe maka governu sei halo investimentu ida boot ba autoridade ida ne’e ho nia area operasaun iha parte kosta sul maibe iha kosta norte ne’e agua territorial nia kompetensia iha Polisia nia laran tanba ne’e maka ita investe ba Polisia hodi kontrola agua territorial iha parte norte inklui Oecusse, tanba ne’e maka agora ami fahe hela Autoridade maritima hari parte defeza mos hare ba investimentu hodi kria kondisaun atu ba kosta sul enkuantu parte interior sei hare insvestimentu iha kosta norte maibe ita lao hamutuk nafatin.
Iha okajiaun ne’e Komandante UPM Superintendente Polisia Eugenio Perreira hateten ro’o unidade rua (2) ne’e foin to’o, ita sei hare konsentra iha nivel baze Kordeli nian nune’e ida ita sei haruka ba Illa Atauro hodi kontrola iha area neba ne’ebe maka nia zona maritima iha potensialidade ba krime organizadu hanesan peskas illegal no ida sei koloka iha Com, iha parte fronteira norte nian area Beacou koloka ona Speed Boat ida iha neba hodi apoiu postu vizilansia iha area norte ninian. Kada Speed ida koloka membru nain 6 ne’ebe maka iha atividade 24 oras on call kualker chamada ruma sira responde durante 24 oras.
Nia hatutan UPM seidaduk iha rekursu humanus no rekursu transporte ne’ebe maka sufsiente tanba ita iha situasaun ilha ne’ebe maka haleu ho tasi tanba ne’e ilha oecusse ita labele koloka rekursu transporte iha neba maske ita iha postu vizilansia.
Iha jestaun operasional UPM orienta liu ba prevensaun no Supersaun ba atividade krime organizadu no ita bele hare ninia potensialidade ba krime organizadu ne’ebe maka akontese no ita konsentra ba area fronteira maritima iha parte norte ho kodas parte Indonezia ninia tantu mos iha parte sul ho Mota Masin parte Indonezia nian ne’ebe makai ha potensialidade ba krime organizadu liga ho kontra bandu, peskas illegal, nomos iha Atauro iha potensialidade ba krime organizadu hanesan peskas illegal nune’e mos iha parte leste ne’ebe makai ha identifikasaun ba zona maritima ne’ebe makai ha potensialidade ba krime organizadu sira.
Ro unidade rua ne’e sosa iha Surabaya Indonesia ho montantante orsamentu menus husi $ milaun ida.
Entretantu Diretor ezekutivu kompania CROWN Unipesoal Lda Doni Banardi hateten ro’o ne’e ho kondisaun diak no nia konstrusaun uza aluminium ho serbisu halao ho makina ho nia kapasidade speed 600 PK no bele tula ema hamutuk 15 kada ro’o ida.
Serimonia ne’e partisipa husi Segundu Komandante Jeral PNTL,Komisariu Polisia Pedro Belo, Komandante UEP, Komandante UPF, Komandante Munisipiu no konvidadu sira.
hafoin entrega Ministru Interior akompanha husi Komandante Jeral no Segundu Komandante Jeral no membru UPM Koko Ro foun rua ne’e husi Kuartel UPM to’o area Kristu Rei. Media PNTL
