Dili- Polisia Nasional Timor-Leste (PNTL) komandu munisipiu Liquica kaptura ona Suspetu nain tolu (3) ba kazu Furto (naok) osan no sasan iha loza Cines nian iha Liquica, Suspetu hirak ne’e ho inisial ET, AM no Suspetu MMH, maibe suspetu nain ida (1) konsege halai liu,
Portavoz Komandu PNTL Superintendente Polisia Antonio Da Lúz relata katak iha loron 28 marsu tinan 2024 oras tuku 03:00 madrugada iha sidadaun timor oan nain hat (4) ne’ebe maka tama iha loza Cines nian iha Liquica, sira tama no naok sasan iha loja laran, antes atu foti sasan hirak ne’e sira kesi tia loza nain ho naran Wan Yen Cao hafoin sira foti sasan hirak ne’e, hafoin loza nain fo informasaun ba Polisia iha munisipiu Liquica, iha momentu neba membru PNTL sira halo kedas atuasaun hodi halo kapturasaun ba suspetu nain Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili, Segunda (01/04).
Nia hatutan iha akontesementu ida ne’e Suspetu sira konsege foti osan ho montante $7000.000. Suspetu sira lori sasan kroat hanesan katana ida no sabit rua no tali hodi kesi no amiasa loza nain.
Iha momentu neba Polisia sira prende sasan evidensia hanesan kareta modelu Land Kruzer prado kor silver ho Xapa Matrikula 23035 no Kareta Mazda CX7 kor mutin xapa matrikula A 12470 TL ( kareta Rental nian ), savi dokumentu nomos kareta agora asegura hela iha Komandu munisipiu Liquica.
Prosesu ba kazu ne’e lao hela, Suspetu nain tolu ne’e orsida sei lori ba Tribunal hodi submete ba Primeiru Interogatoriu; komandante PNTL munisipiu Liquica no Xefe Investigasaun Kriminal mos iha ne’e hodi akompanha prosesu ne’e.
Suspetu ida seluk ne’ebe maka halai PNTL kontinua buka tuir nia paraderu no Hein Mandadu Kapturasaun husi Tribunal hodi kaptura nia, parte Polisia husi serbisu sekreta no Komandu munisipiu Liquica buka tuir ona suspetu ne’ebe maka halai.
Nia reforsa Suspetu ho inisial ET (halo ona kazu krime ba dala lima no tama sai komarka), no suspetu seluk ho inisial AM (komete ona kazu ba dala rua).
Ligadu ho volume kazu furto agravadu ne’ebe maka aas Portavoz ne’e esplika PNTL liu husi Komandu munisipiu sira halo esforsu hodi koloka OPS iha suku hodi serbisu no hela besik komunidade, PNTL halo esforsu makaas hodi halo prevensaun maibe buat hirak ne’e hotu presija koperasaun husi parte hotu tanba ema hotu hakarak moris hakmatek no livre hodi buka moris, se ita ho asaun hirak hanesan ne’e signifika ita rasik la kria estabilidade iha ita nia rai laran tanba ne’e maka presiza ema hotu nia kontribuisaun ba paz no hakmatek.
“Husu ba sidadaun hotu atu kopera ho Autoridade Seguransa hodi halo prevensaun ba aktus ka hahalok hirak hanesan ne’e, se ita hadomi nasun ida ne’e maka mai ita hotu kontribui,” dehan Komandante.
Dala ruma ita halo serbisu maibe husi parte balu, ema sira ne’e mos matenek no iha skill kuandu sira hare Polisia halo serbisu no ses utuan sira aproveta kedas situasaun tanba ne’e maka husu ba parte sira hotu atu kopera, se ita fiar deit ba parte seguransa makai ta labele resolve problema ida ne’e maibe hau fiar katak ho koperasaun parte hotu-hotu makai ta sei asegura no prevene hahalok sira ne’e.
Serbisu laos ho manera hanesan ne’e Maromak fo mai ita liman ain no kakutak atu halo serbisu laos aproveta fali situasaun hodi ba naok ema seluk nia sasan, nia hakotu.
Media PNTL
