Aileu, 18 jullu 2022 (SRP) – Komandu Polísia Nasionál Timor-Leste (PNTL), Munisípiu Aileu, prende karreta kamioneta ida no asegura joven nain-2, ne’ebé hatama sasan ilegál liuhosi fronteira wainnhira halo ativitidade pasa revista ba karreta no motor sira ne’ebé halo movimentu iha dalan públiku Kuartel Komandu Munisípiu Aileu nia oin, Suku Malere, Postu Aileu Vila.
Komandante Komandu Munisípiu Aileu, Superintendente Polísia, Jorge Monteiro, deklara sidadaun timor-oan nain 2 ne’e PNTL kaptura tanba halo transaksaun ilegál iha fronteira terrestre Timor-Leste ho Indonézia.
“Horikalan ita simu informasaun hosi komunidade sira katak iha karreta kamioneta ida konsege tula sasán ne’ebé hatama ilegál hosi Indonézia mai Timor-Leste, ami mós halo hela “Auto Stop” ba viaturas sira ne’ebé halo movimentu iha tempu kalan, entaun aproveita situasaun ida-ne’e ita konsege halo aprensaun ba karreta refere ho númeru matríkula A. 53.60 no asegura mós joven mane nain rua ho inisiál JmF, tinan 45 husi Covalima, no AsA tinan 25, husi Bobonaro, durannte halo check point iha Komandu PNTL Aileu nia oin”, esplika Jorge Monteiro, via telefonika iha loron segunda ne’e.
Nia dehan, sasán sira ne’e suspeitu sira hatama ilegál hosi fronteira Mota Masin iha Salele-Suai, Munisípiu Covalima no kontinua atu lori ba Dili.
“Sasan ilegál hirak ne’ebé ita prende maka hanesan sigarru marka Gudang Garam Surya 12 hamutuk pakote 640 totál 6.600 kaixinas, tabaku lulun marka Pohon Sagu pakote hamutuk falun 60 3.200, tabaku lulun marka Matahari pakote 320 hamutuk falun 640 no-mós Supermie marka Indo Mie hamutuk kaixa 293”, relata.
Jorge Monteiro, hatutan suspeitu nain 2 ho evidénsia hirak ne’e asegura ona iha Komandu Munisípiu Aileu no kontinua halo investigasaun hodi buka tuir nain ba objetu hirak ne’e hafoin sei submete ba Ministériu públiku.
