Bobonaro, 18 jullu 2022 (SRP) – Hafoin simu informasaun hosi Servisu Informasaun Polísia Nasional (SIPN) ne’ebé destaka iha Munisípiu Bobonaro, Komandu PNTL Munisípiu Bobonaro hatun kedas diretiva ba Eskuadra PNTL Bobonaro, halo pasa revista no asegura sidadaun timor-oan mane na’in-2 tanba halo transaksaun ilegál ba kuda 4, iha Suku Oeleu Postu-Administrativu Bobonaro, Munisípiu Bobonaro.
Komandante Munisípiu Bobonaro, Superintendente Polísia Antonino Mauluta, deklara sidadaun ida-ne’e asegura tanba tenta halo transaksaun ilegál iha fronteira terrestre Timor-Leste ho Indonézia.
“Iha oras 14.00 otl, iha Postu-Administrativu Bobonaro nian membru PNTL Eskuadra Bobonaro halo pasa revista rutina konsege asegura suspeitu nain-2 no prende kamioneta ida ho númeru matríkula 57.236, ne’ebé mak tula evidénsia kuda-4 liuhusi liña fronteira ba nasaun Indonézia”, hateten Komandante Mauluta, via telefone, iha loron segunda ne’e.
Nia dehan, suspeitu nain rua ne’e ho inisiál JS, tinan 52, no suspeitu ida seluk naran MS nudar mós eis Xefi Suku Oeleu, tinan 54, no sira nain rua hela iha Aldeia Tas, Suku Oeleu, Munisípiu Bobonaro.
“Ita halo identifikasaun no sira hola kuda ne’e ho montante osan US$ 1.240.00, no kuda 4 ne’e hola iha Munisípiu Ainaro ho nia objetivu lori ba faán iha Atambua-Indonézia”, deklara.
Mauluta hatutuan, horisehik to’o ohin loron Komandu Munisípiu servisu koletivu kaptura ona timor-oan hamutuk ema nain 8 no sei falta tán seluk ne’ebé UPF kaptura no ita-nia komunidade sira ne’e maioria halo transaksaun ilegál iha liña fronteira.
