Dili, Komandu Polísia Nasional Timor-Leste (PNTL) segunda-feira (02/09) ne’e halo serimonia formatura jerál ba deskolasaun membru hamutuk na’in 34 hodi apoiu servisu seguransa iha Komandu Unidade Patrullamentu Fronteira(UPF) iha liña fronteira.
Komandante Jerál PNTL Komisariu Jerál Polísia Henrique da Costa hafoin serimonia formatura ba jornalista sira hateten ohin hala’o serimonia isar bandeira ba primeira semana fulan Outubru ninian, atu nune’e Komandante Jerál ou Segundu Komandante Jerál ne’ebe dirije formatura ne’e hodi bele fó orientasaun ba membru sira.
“Ohin mós hanesan momentu ida ne’ebe maka ita prepara ita nia membru sira husi munisipiu no Unidade Espesial Polísia (UEP) hodi ba reforsa tan ita nia kolega sira iha fronteira ninian, ita hatene katak relatoriu husi fronteira ninian iha fulan hirak ba kotuk ne’e sasan tama no sai husi fronteira hanesan kontra bandu ne’e barak, entaun ita presija reforsa ba iha ne’eba”, tenik Komandante Jerál PNTL ne’e.
Komisariu Jerál Polísia ne’e afirma tan katak Komandu UPF iha ninia difikuldades maka rekursu ne’ebe mak limitadu hanesan rekursu umanu no mós transporte ninian, entaun saida maka ita responde agora dadaun maka ita haruka uluk ita nia membru sira ba, maibé ba oin ita bele hare’e fila fali oinsa ita bele apoiu tan transporte ruma ba sira, tantu kareta no mós motorizada ba iha postu sira atu nune’e bele halo movimentu hodi kontrola iha fronteira ninian.
“Sé karik iha fulan ikus tinan 2023 maka ita la konsege responde nesesidade kona-ba transporte ninian, ita sei tau atensaun ba iha Orsamentu 2024 ninian bele sosa transprte ruma hodi bele apoiu membru sira servisu iha fronteira ninian liu-liu postu ne’ebe iha”, haktuir Komisariu Jerál Polísia ne’e.
Hatan kona-ba utilizasaun armas hanesan rekursu ikus ne’ebe membru sira tenke uja, Komisariu Jerál Polísia ne’e hateten ida ne’e ita fó atensaun ba membru sira ne’ebe maka ita koloka ba fronteira tanba servisu iha ne’eba ne’e laos hasoru ita nia ema rai laran deit, maibé ita mós hasoru sidadaun sira husi rai seluk ninian. Entaun, ita husu atu nune’e utilizasaun armas ne’e nafatin tenke hare’e ba ita nia regras, legalidade oinsa utiliza armas ninian.
“Iha ne’eba ne’e presija barak liu maka ida koalia ninian, maibé armas ne’e sai hanesan últimu rekursu karik hanesan sira nia vida hetan ameasa ka ema seluk nia vida hetan ameasa, ida ne’e ita laiha razaun atu nune’e halo tan negosiasaun komunikasaun, tanba komunikasaun nian la hetan ona solusaun entau últimu rekursu uja armas no ita hatene katak, ita lakoi atu nune’e halo kilat tarutu iha fronteira ne’eba hodi kria fali pániku ba ita nia komunidade sira iha ne’eba, orsida ema bele hateten dehan husi parte seluk ruma maka halo kilat tarutu iha ne’eba, tanba ne’e ita fó hanoin kedas ba membru sira atu hatene”, hatutan Komandante Jerál PNTL ne’e.
Autoridade másimu instituisaun Seguransa ne’e akresenta tan katak membru sira ne’e wainhira to’o iha Komandu UPF Nu’u Badak Motain ninian, Komandante Unidade sei prepara formasaun básiku ba sira atu nune’e membru sira hatene no kompriende servisu iha fronteira ninian oinsa molok koloka sira ba iha postu ne’ebe maka atu koloka sira ba.
“Sira hamutuk iha ema na’in 34 maka ita koloka ba, sira hala’o servisu ne’e durante fulan rua, hafoin ida ne’e sei halo rotasaun hodi membru seluk sei koloka iha ne’eba, tantu ida ne’e ita fó ona despasu ba Komandante munisipiu sira atu nune’e prepara hela membru na’in rua atu nune’e hodi troka fila fali sira ne’ebe maka haruka ona ba iha momentu ida ne’e”, tenik Autoridade másimu instituisaun Seguransa ne’e.
Membru hirak ne’e sei koloka ba iha postu sira ne’ebe iha hanesan fronteira Postu Bobonaro, fronteira Postu Covalima no fronteira postu Oecusse. No ida ne’e Komandante Unidade maka sei avalia, ida ne’ebe maka presija atu koloka, kona-ba kolokasaun husi Komandu Jerál sei la Interven tanba ida ne’e Komandante Unidade maka hatene liu. Media PNTL.
